Alkitab Mobile SABDA
[VER] : [ABUN]     [PL]  [PB] 
 <<  1 Korintus 15 >> 

1Ji bi nji, ji bi nyanggon, ré yo, ji iwa nin napawa sukdu subot os ndo gato Yesus Kristus kak wa men yetu ne. Tomgatu ji duno nin subot os ne mó re. Sukdu gato ji duno nin su ne nin jam mó, nin onyar kem mó re.

2Nin jom sukdu subot os ndo gato Kristus kak ne anato Yefun Allah nai nin gum sok mo An bi rus-i it, wo nin yo jom sukdu gato ji ki nai nin ne pe nde yo, bere nin yo onyar kem mo Yefun ri nde, sane bere nin yo kem ndo to kapyo mato kapyo nde.

3Sukdu gato ji ki nai nin ne anato sukdu gato ye yi duno ji su mó re, orete ji waii duno nin su o. Sukdu kwa gato sye ne, ye krom mo Yefun Allah bi sukdu sare do, Kristus kwop wa tot suktot mo sukibit gato men ben ne wé re.

4Orge ye bi An mukri mo makwe. Or o tepsu suk gato ye krom mo Yefun Allah bi sukdu ne o do, kam we rek ete Yefun Allah sun An kadit sukkwop re.

5Or o Kristus ré kadum An nggwa nai Petrus me. Or o An kadum An nggwa nai yerasul musyu dik sop we ne o.

6Or o wam dik yo o, An kadum An nggwa nai yetu ka wotin mumek wai gato simo An ne. Yetu gare i-sye kem tó, wo deyo kwop re.

7Orge An kadum An nggwa nai Yakobus. Or o An kadum An nggwa nai yerasul mwa ne sino.

8An kadum An nggwa nai yé mwa ne, orete An kadum An nggwa nai ji dakai wari. Ji ré tara kadit yerasul yi neya, ji tepsu pabom gato bi im kem su, su mit ne tara kadit pa yi neya. Ji da tara kadit yerasul yi neya, sarewo An kadum An nggwa nai ji dom re.

9Ji ré yerasul gato gum wok teker mu bur. Ji ré yo tep wa ku gum yerasul nde, we suga nyim, ji ben sukye nai ye gato onyar kem mo Yefun.

10Sarewo Yefun Allah bi sukjimnut sye kas subot ji dakai yi anato An bes ji gum yerasul. Yefun Allah ben An bi suk-i ndo su ji yi anato su ré ji samok wa ben suk mwa ne ndo sino wai kadit yerasul yi neya. Ji samok wa ben suk tepsu yerasul kadit ji dakai bi suktinggi-i nde, wo kadit Yefun Allah dakai ben sukndo su ji yi, anato ji samok wa ben Yefun Allah bi suk-i.

11Sane ji duno nin e, yerasul yi anato duno nin e ne, suk yo nde. Suk gato ndo wai anato men yerasul duno nin si sukdu subot os ndo gato Kristus kak ne, ete nin onyar kem mó.

12Men duno nin do, Yefun Allah sun Kristus kadit sukkwop mó re. Sane nin ge bok yo ki do, ye gato kwop yo sun kadit sukkwop nde wa suma ne?

13Sukdu gato ye ki do, yekwop yo sun kadit sukkwop nde, do sangge it yo, Kristus dom yo sun kadit sukkwop nde.

14Sato Kristus yo sun kadit sukkwop nde yo, suk gato men duno nin su ne bere yo ós nin nde. Sane dom, sato Kristus yo sun kadit sukkwop nde yo, nin onyar kem mo Yesus Kristus yo ós nin nde.

15Sane o, sato yekwop yo sun kadit sukkwop nde yo, men kidar suk subot Yefun Allah anare, we men ki do, Yefun Allah sun Kristus kadit sukkwop it. Wo sukdu gato ye ki do, yekwop yo sun kadit sukkwop nde, do sangge it yo, Yefun Allah yo sun Kristus kadit sukkwop dom nde.

16Sato yekwop yo sun kadit sukkwop mo nde yo, Kristus dom yo sun kadit sukkwop nde.

17Sato Kristus yo sun kadit sukkwop nde yo, sukduno gato men onyar kem mone, yo ós men nde, wo sukibit ut pe mo men tó.

18Sane dom, sato Kristus yo sun kadit sukkwop nde yo, ye gato onyar kem mo Kristus, dogato kwop nyim ne, bere yo ku os wa kem ndo to kapyo mato kapyo o nde.

19Sane o men yé gato kwabom kam mo Kristus do, bere An ós men kem ndo to kapyo, sarewo sato Kristus sun kadit sukkwop nde yo, Kristus os men suga men kem mo bur ré sor re, wo An yo ós men kem ndo to kapyo mato kapyo nde. Sane bere kadit yetu mwa ne sino mo bur ré iwedewe, yé mwa ne kibot men do, "Kamapa, yé bok ne sibot os gato yo mu kom mo pe yo nde, os koirut yo mo nde."

20Sarewo sukdu gato sangge anato, Yefun Allah sun Kristus kadit sukkwop it. Sane mone men jam do, bere Yefun Allah waii sun ye gato kwop kadit sukkwop ne dom re.

21Yetu ge dik yo anato kak os wa sukkwop ma mo bur ré wa men yetu. Sane dom yetu ge dik yo o anato kak os wa men yetu sun kadit sukkwop.

22Men yetu mwa ré tepsu dik su Adam anato men kwop ne. Sane dom, men sino gato tepsu dik su Kristus bere Yefun Allah sun men kadit sukkwop re.

23Bere Yefun Allah sun ye gato kwop ne tepsu pe gato An dakai fro ne. Yefun Allah sun Kristus nyim, orete tepsu bi kam-i, bere Kristus satu ma mo bur ré, ete Kristus bi yetuge-i ak mó.

24Kristus satu ma mo bur ré, An sun An bi yetuge-i, orete bur kru it anane. Sugane yepasye mwa gato jom men yetu e, biris bi yekwesu gato ben men ket kwayo-kwayo e, yerom e, aboksye e ne bi suktinggi gato jom men e ne, bere Yefun Yesus nai suk mwa gane bi suktinggi wé kadit, subere suk mwa ne jammo Kristus sor. Orge Kristus syo suk mwa ne ma mo men bi Ai, Yefun Allah ne syim.

25Sane Kristus jom suk mwa ne sor suk mwa gato bariket Yefun Yesus ne jammo Kristus et.

26Suk mwa gato bariket Yefun Yesus ne dik yo anato suktinggi gato ben men yetu kwop ne. Suktinggi ne, Kristus bere ben ibit wari.

27Ye krom mo Yefun Allah bi sukdu do, "Yefun Allah anato ben suk mwa ne jammo Kristus." Wo Yefun Allah dakai yo sok mo "suk mwa" ne nde, Yefun Allah ti dor mo nden re, wo Yefun Allah ben suk mwa ne jammo Kristus sor re.

28Sane Yefun Allah ben suk mwa ne jammo Kristus. Or o Kristus, gato Yefun Allah bi Gan ne, waii jammo Yefun Allah, orete Yefun Allah dakai jom suk mwa ne or sino re.

29Sane sato ye ki do, yekwop yo sun kadit sukkwop nde yo, suma ben nin yé gato mbau ku syur win ye gato kwop ne? Ye gato ku syur win ye gato kwop ne bi sukjimnut sa u ne? Sato ye kwop yo sun o nde yo, ye ku syur win yekwop wa suma ne?

30Sane dom, kamdik-kamdik men dakai bi men nggwa wa men ku sukye mo Kristus bi suk-i wa suma ne? Ji bi ji nggwa, we ji jam do, bere Kristus sun ji kadit sukkwop mone tó.

31Ji bi nji, ji bi nyanggon, sangge, kamdik-kamdik, bergan ye gu ji kwop rok mo gato ji ben Kristus bi suk-i, wo ji bi ji nggwa mo sukye sane sor, we ji me mo nin do, ji duno nin anato nin onyar kem mo men bi Yekwesu Yesus Kristus ne it, sane ji mit at wa.

32Sato yekwop yo sun o nde yo, ji ben sukndi su yetu gato ye ki do, án tepsu suge sye gato krok mo Efesus ne, bere ós ji kem ndo mo bur ré sa u ne? Yo mo nde, wo ji jam do, bere Kristus sun ji kadit sukkwop mone tó. Sarewo sato yekwop yo sun o nde yo, men simo sukdu sare do, "Men git sugit e, men da nau e, men kamo sye sor, we bere men kwop, ete bere or mone it."

33Nin jammo sukdu sukkidar daret nde. Nin karowa ye gato ben sukibit bu yo, bere sukibit gato ye ne ben ne tik nin mit, ete ri ma nin yo ben nin bi suk-i ndo ne o nde.

34Su ré nin nai sukjimnut gato ndo et. Nin ben sukibit o nde. Nin deyo mone yo jam Yefun Allah nde tó, nin damen mone ete ndo.

35Bere ye deyo ndobot do, "Bere Yefun Allah sun yekwop mbau satu sa u ne? Bere yekwop ne sun satu su kaim sa suma ne?"

36Ye gato ki sane jam suk nde. Sukjan gro gato men jan ne i-sar ne dat, orete i-gro gan nggwar pu ete kom re.

37Sukjan gro gato men jan ne sato gandum e, sukjan gro yi neya, i-gro ana men jan ne, wo sukjan nggwar gato kom ne kaim bere tara re.

38Yefun Allah dakai ben sukjan ne kaim tepsu pe gato An imo. Sukjan gro mwa neya, Yefun Allah ben kaim tara kadit yu re.

39Suk mwa gato kem mo bur ré, i-kaim yo tepsu yu nde: yetu kaim tara-i re, suge kaim tara-i re, ndam kaim tara-i re, boge kaim tara-i re.

40Sane dom suk gato mo gu nim ne si suk gato mo bur ré kaim tara kadit yu re. Suk gato mo gu nim ne tara-i re, suk gato mo bur ré tara-i re.

41Kam mo gu nim ne tara-i re, aina tara-i re, bí tara-i re. Bí mwa ne tara kadit yu re.

42Sane dom, bere yetu gato Yefun Allah sun kadit sukkwop kaim tara-i re tepsu sukjan gro gato men jan ne tara kadit i-nggwar gato kom ne. Ye kaim gato budat ne mbras re, wo an kaim gato Yefun Allah sun ne bere gesyos re.

43Men yetu kaim mo bur ré ibit, men kaim yo nggi nde, wo men kaim gato Yefun sun ne, bere men kaim nggi, bere men kaim ndo wai o re.

44Men kaim mo bur ré, men kaim budat anare, wo men kaim gato Yefun Allah sun ne, bere gesyos. Men kaim budat mó yo, bere men kaim gesyos mó dom.

45Sane ye krom mo Yefun Allah bi sukdu do, "Ye ketke gato gum do Adam, Yefun Allah ben an tepsu ye gato mbau mo bur ré," wo ye gato men kendo do Adam doga wari ne, An tepsu ye gato ben men mbau sor to kapyo mato kapyo.

46Men kaim gesyos anato bor nyim mo bur ré nde, wo men kaim budat anato bor nyim. Orete men kaim gesyos ne bor wari.

47Adam doketke ne Yefun Allah ut kadit bur, wo Adam kedowe ma kadit gu.

48Yé mwa gato kem mo bur ré kaim budat tepsu Adam doketke kaim-i gato Yefun Allah ut kadit bur ré, wo men yé gato sok mo Kristus bi rus-i ne kaim bere tepsu Adam kedowe kaim-i ne, bere men kaim gesyos re.

49Su ré men kaim ré tepsu Adam gato Yefun Allah ut kadit bur ré. Sane dom, bere men kaim tepsu Adam gato ma kadit gu mone tó.

50Ji bi nji, ji bi nyanggon, ji bi sukdu-i sare: Men kaim budat ré, bere yo sok mo Yefun Allah bi de-i nde. Sane dom, men kaim budat bere mbras re, bere yo sok mo pe gato men kaim gesyos sok mone nde.

51Sukdu kwa yo gato ye yi jam nde, ji ki rer wa nin jam sare do, men sino yo kwop nde, wo bere Yefun Allah win men kaim or re.

52Tepsu gato trompet ba wari kai, bere men gensu Yefun Allah win men kaim kekro tepsu men gro minyap sare ge or re, we trompet ba it yo, Yefun Allah sun yé gato kwop nyim neya mbau satu su kaim gato gesyos re. Sugane dom men sino kaim tara or re, bere men kaim gesyos dom re.

53Men kaim budat gato mbras ré, bere Yefun Allah win su men kaim gesyos gato bere yo mbras o nde. Men kaim gato bere kwop, bere Yefun Allah win su men kaim gato gesyos sor.

54Men kaim budat gato kwop ré, Yefun Allah win su men kaim gesyos gato yo kwop o nde it yo, sugane Yefun Allah bi sukdu kwa dik yo bere bor sare do, "Suktinggi gato ben men yetu kwop ne yo nggi o nde it. Men nggi wai kadit suktinggi ne o re." Sane bere men ki do,

55"Sukkwop a, nan bi suktinggi mo u ne? Sukkwop a, nan bi ri wa nan gu men kwop su ne mo u ne?"

56Men ben siri kadit Musa bi sukduno anato sukkwop ku os wa gu men kwop ne. Siri gato men ben ne anato tepsu ri wa sukkwop gu men kwop su.

57Sarewo men ki ndo mo Yefun Allah, we men bi Yekwesu Yesus Kristus ma kak os wa ben men nggi wai kadit sukkwop o re.

58Sane, ji bi nji, ji bi nyanggon gato ji jimnotku, nin misyar Yefun nde, wo nin jom Yefun Yesus bi sukdu ne krat sor. Nin samok wa ben men bi Yekwesu Yesus Kristus bi suk-i sor, we nin jam do, suk mwa ne sino gato nin ben wa An ne yo ges yak yi nde.



 <<  1 Korintus 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran