1Suga nyim tuya Yefun Allah tarubot yenabi wa men bi amui. An yo bi suktaru ne dik nde, wo An bi suktaru ne mwa. Yenabi mwa ne gwat sukamno subot Yefun Allah bi suktaru ket kwayo-kwayo.
2Wo su kam gato karowa bur kru ré sa, Yefun Allah syo An bi Gan ma, An tarubot An bi Gan wa men re. Su ketke Yefun Allah syo suktinggi nai An bi Gan anato su ketke An bi Gan ut suk mwa mo bur ré si gu nim ne sino. Yefun Allah bes An bi Gan subere suk mwa ne sok mo An bi Gan bi suk-i ne sino.
3Yefun Allah dakai ben sato An rer-rik wai o re tepsu kam, ete An bi Gan ne ben sato An rer-rik wai o re dom tepsu kam yor gato gat men. Yefun Yesus gwat Yefun Allah bi rer ne ma wa men jam. Sane An bi Gan ré anato tepsu Yefun Allah dakai ne it, tara kadit Yefun Allah wokgan yo dom nde. An bi Gan ki bi sukdu-i gato nggi wai subere An bi Gan mewa suk mwa mo bur ré si gu nim ne sino subere suk mwa ne kas sisu ndo sor. An bi Gan kak os wa men yetu subere Yefun Allah yo nutbot sukibit gato men ben ne o nde, ete Yefun Allah nai men gum sok mo An bi rus-i. Orete An bi Gan ne kem tak An de syim ge mo gu, mone An bi Gan si Yefun Allah gato sye wai o re, jom suk mwa ne sino.
4Sane Yefun Allah bes An bi Gan gum-i kok wai kadit malaikat mwa ne gum-i sino re. Yefun Allah bes An bi Gan gum-i, sane anato An bi Gan gum-i kok sye wai kadit malaikat gum-i o re,
5we, Yefun Allah ki sukdu ré nai malaikat dik yo dom nde, wo An ki nai An bi Gan sor re, sare do, "Nan anato Ji bi Gan. Su kam ré it, Ji anato tepsu Nan bi Ai it." Sane dom, Yefun Allah ki sukdu ré subot malaikat dik yo mo nde, wo An ki subot An bi Gan sor re, sare do, "Ji anato Pa ne bi Ai, Pa ne anato tepsu Ji bi Pa-i," Yefun Allah yo ki sukdu kwa we ne subot malaikat yo mo nde.
6Sarewo Yefun Allah syogat An bi Gan gato gum kok wai o re ma mo bur ré sa, Yefun Allah ki do, "Ji bi malaikat mwa ne sino som Pa ne et!"
7Yefun Allah ki sukdu subot malaikat mwa ne sare do, "Ji ben Ji bi malaikat ne ben bi suk-i nggi tepsu nofuf gato kas nggi. Ji ben Ji bi malaikat gato tepsu Ji bi pakwerut-i ne ben bi suk-i nggi tepsu bot ru gat suk."
8Sarewo Yefun Allah ki sukdu subot An bi Gan sare do, "Pa, Nan anato tepsu Ji, Yefun Allah, Nan kem mo yekwesu bi kursi, we Nan gum Yekwesu to kapyo mato kapyo. Nan jom Nan bi rus-i sa, Nan ben Nan bi suk-i mu nai Nan bi rus-i mone ri-roi pe sor.
9Nan mit iwa yé ben sukndo tepsu Ji mit sor, Nan bariwa yé ben sukibit re, Sane anato Ji gato jom Nan ne, Ji anato bes Nan gum kok wa Nan ben Ji bi suk-i, Ji ben Nan mit at wa Nan ben Ji bi suk-i, Nan mit at wai kadit Nan bi yesyim gato si Nan mone sino o re."
10Yefun Allah ki sukdu subot An bi Gan o do, "Pa o, Nan anato tepsu Yekwesu, su ketke Nan anato ut bur ré kadit i-ke ne sor, Nan dakai anato ut gu nim ne dom re.
11Suk mwa mo bur ré si gu nim ne sino bere ibit or re, wo Nan dakai sor ete kem pe. Suk mwa mo bur ré si gu nim ne sino bere ibit tepsu san bere ibit or re.
12Suk mwa ne bere yo ndo o nde, bere Nan nai tepsu ye nai san gato ibit ete bare wé re. Bere suk mwa ne, Nan win su dogato be o re, tepsu ye win san ibit su san be. Sarewo Nan dakai sor anato kem pe, Nan ben Nan bi suk-i tara mo nde. Nan sor anato kem gesyos to kapyo mato kapyo, pe gato or mó, yo mo nde."
13Yefun Allah yo ki sukdu tepsu sukdu ré nai malaikat ge dik yo dom nde, wo Yefun ki sukdu ré nai An bi Gan sor re, sare do, "Nan kem tak Ji de syim ge, Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et."
14Yefun yo ki sukdu bok ne subot malaikat nde, sane malaikat ne te suma gei ne? Malaikat ne anato suk gato da kridek yo mo nde, wo malaikat da gesyos sor ete mó. Yefun Allah yo bes malaikat tepsu An bi Gan gato Yekwesu si Yefun sino nde, wo Yefun syogat malaikat mu ós nje gato bere kem ndo to kapyo mato kapyo mo Yefun Allah bi nat-i ne sor re.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel