1Melkisedek ré, an yeraja mo kota Salem. An yekwesu gato ben suk tepsu yegweswai wa ye Salem si Yefun Allah gato gum kok sye wai o re. Melkisedek ré, an gum bi sukjimnut sare do, "Yeraja gato ben bi suk-i ri-roi." Sane dom, Melkisedek gato yeraja mo kota Salem ne, an gum bi sukjimnut dik yo o sare do, "Yeraja gato ós an bi rus kem not, we 'Salem' bi sukjimnut do, 'Men kem not.' " Melkisedek ré, ye yo krom sukdu subot an bi ai mo nde, an bi im mo nde. An bi amui dom ye yo krombot mo nde. Ye yo krombot kam gato an bi im pe an mo nde. Ye yo krombot kam gato an kwop mo nde. Bergan Melkisedek tepsu Yefun Allah bi Gan rok, we Melkisedek anato tepsu yegweswai gato kem to kapyo mato kapyo. Wam dik yo Melkisedek ku Abraham mo os mit. Abraham si bi yeko-i ben sukndi su yeraja ge at si bi yeko-i ne sa, Abraham si bi yeko-i anato nggi wai kadit yeraja ge at si bi yeko-i ne, orete Abraham do satu ma mo bi nat-i ne saresa, Melkisedek ku Abraham mo os mit. Mone Melkisedek ki suk su Yefun Allah subere Yefun Allah ben sukndo su Abraham. Sane suk gato Abraham nai kadit yeraja ge at si bi yeko-i gato an gu ne, Abraham syo napyo nai Melkisedek . Suk mwa gato Abraham nai kadit yeraja ge at ne, Abraham nai suk musyu dik yo, an syo suk ne dik nai Melkisedek sane sor.
2(7:1)
3(7:1)
4Sane men nutbot sisu ndo et, Melkisedek tepsu yepasye anato men bi amui Abraham syo suk gato an nai kadit yeraja ge at ne napyo nai Melkisedek. Suk mwa ne Abraham ku musyu dik yo, an syo suk dik yo nai Melkisedek. Abraham ben sane anato men jam do Melkisedek gum-i kok wai kadit Abraham gum-i o re.
5Sane dom, Yefun syogat ye Israel syo suk napyo nai Lewi bi yewis-i gato Yefun bes gum tepsu yesu wa ben suk mo Yefun Allah bi nu. Yesu ne mu nai suk kadit ye Israel. Ye Israel ku suk musyu dik yo, Lewi bi yewis-i gane nai suk dik yo kadit án. Ye Lewi nai suk kadit án dakai bi nji anane, we ye Lewi si ye Israel mwa ne sino bi amui mo Abraham. Sane Abraham bi pa-i, gato ye Israel ne, syo suk napyo nai yesu gato ben suk mo Yefun Allah bi nu, gato Lewi bi yewis-i.
6Abraham dom, syo suk napyo nai Melkisedek, sarewo Melkisedek sok mo yewis Lewi nde. Melkisedek yo tepsu yesu gato ben suk mo Yefun Allah bi nu mo Lewi bi yewis-i nde, sarewo an ku suk napyo kadit Abraham. Orete an ki suk su Yefun Allah subere Yefun ben sukndo su Abraham gato Yefun Allah tom suk bok yo su mó re.
7Men jam do, ye gato gum-i kok sor anato ye gato ki suk su Yefun Allah subere Yefun ben sukndo su ye gato gum-i wok mo bur kadit an. Sane men jam mone do, Melkisedek gum-i kok wai kadit Abraham gum-i re.
8Yesu gato ben suk mo Yefun Allah bi nu mo Lewi bi yewis-i ne, ye syo suk napyo nai án, sarewo yo nam nde ge, án kwop re, wo Melkisedek sa, Abraham syo suk napyo nai Melkisedek gato kem gesyos, tepsu ye krom mo Yefun Allah bi sukdu ne.
9Ben sato Lewi, gato si bi yewis-i nai suk napyo kadit ye Israel, Lewi ne syo suk napyo nai Melkisedek subot Abraham mone dom,
10we sugane, kapre ye pe Lewi nde tó, tomgato Abraham syo suk nai Melkisedek, ben sato Lewi dom syo suk nai Melkisedek mone, we kam sari ne ma Abraham bi yewis-i pe Lewi, Abraham bi dat ne. Sane Melkisedek ré sa, an gum kok wai o re.
11Yefun Allah bes ye Lewi tepsu yesu gato ben suk mo Yefun Allah bi nu, ye Lewi ben bi suk-i tepsu yegweswai wa ye Israel si Yefun Allah. Ye Lewi kibot Musa bi sukduno-i nai ye Israel jam, sarewo sukduno ne yo tep wa kak os wa nje sok mo Yefun Allah bi rus-i nde. Sane anato men mitmo yegweswai dik yo o, tepsu yegweswai gato sok mo Melkisedek bi de-i ne et. Men mitmo yegweswai gato ma kadit Lewi bi dat, Harun si bi yewis-i ne nde, wo men mitmo yegweswai dik yo o gato tepsu Melkisedek et.
12Ye do win yegweswai ye Lewi su yegweswai gato tepsu Melkisedek it yo, bere ye win sukduno gato rok ne su sukduno gato be o re.
13Yegweswai be gato win yegweswai mwa gato mo Lewi bi wis-i ne anato men bi Yekwesu Yesus Kristus dakai. Yesus Kristus ma kadit yewis yi. Yefun Allah yo bes nje mo Kristus bi yewis-i ne gum tepsu yegweswai ge dik yo mo nde. Yesus Kristus bi yewis-i ne ge dik yo ben suk mo Yefun Allah bi nu-i yo mo nde.
14Yé mwa ne jam do, men bi Yekwesu ne ma kadit Yehuda bi yewis-i. Musa ki subot yekwesu mo Yefun Allah bi nu sa, an yo ki kom mo wis ne dom nde. Sane Yesus Kristus tepsu Yekwesu be gato tara kadit ye Israel bi yekwesu mwa mo Yefun Allah bi nu suga nyim ne o re.
15Men ki sukdu subot Yekwesu be gato ma ne rer o wa nin jam et. Yesus Kristus ma tepsu Yekwesu be tepsu yewis daret nde, wo Yesus Kristus tepsu Melkisedek anato Yefun Allah bes Yesus Kristus tepsu Yekwesu be ne.
16Yesus Kristus kem gesyos tepsu Melkisedek, sane Yefun Allah bes Yesus Kristus tepsu Yekwesu mo Yefun Allah bi nu, kadit An sok mo Lewi bi yewis-i tepsu Musa bi sukduno-i nde, wo Yefun Allah bes An tepsu Yekwesu, we Yesus Kristus nggiwa kem to kapyo mato kapyo, yo or nde.
17Yefun Allah bes Yesus Kristus tepsu Yekwesu, tepsu ye krom mo Yefun Allah bi sukdu sare do, "Nan anato ku gum yekwesu mo Yefun Allah bi nu to kapyo mato kapyo, Nan tepsu yegweswai gato sok mo Melkisedek bi de-i."
18Yefun Allah bes yegweswai be, sane anato Musa bi sukduno-i gato rok ne men misyar wé, we sukduno ne yo nggi o nde. Sukduno ne yo kak os ndo wa men si Yefun Allah kem ndo nde.
19Sukduno ne yo ós ben suk yo ndo mo nde. Sane su ré Yefun Allah fro os gato ndo wai wa men o re. Men kwabom kam mo Yefun Allah do, sukduno be gato An fro ne anato kak os wa men subere men karowa Yefun Allah it.
20Sane dom, Yefun fro os be ne sa, An tom su men, An syo syim su do, An bes Yesus Kristus tepsu yegweswai wa men mone petok sor. Wo yegweswai yi neya gato An bes, An tom suk yo su men mo nde.
21Wo Yefun Allah bes Yefun Yesus tepsu yegweswai ne sa, An tom su, An syo syim ete Yefun Allah dakai ki Yefun Allah dakai gum su do, "Ji tom su Nan mó re. Suk gato Ji tom ne, Ji yo brek kadit nde, Ji ki do, 'Nan anato ku gum yekwesu mo Yefun Allah bi nu to kapyo mato kapyo sor.' "
22Sane men jam do, sangge, os be gato Yefun Yesus tepsu yegweswai wa ne anato ndo wai kadit os rok mo Musa bi sukduno-i ne o re.
23Yegweswai ye Lewi gato yesu mo Yefun Allah bi nu, yegweswai gato benbot os rok ne mwa yé re, we án yo kem gesyos nde, wo án kwop kadit re.
24Sarewo Yefun Yesus kem gesyos. Sane Yefun Yesus ben suk tepsu yegweswai sane petok sor, yo or nde, Yefun Allah yo win An nde.
25Sane anato Yefun Yesus nggiwa ben suk tepsu yegweswai wa ós men yé gato iwa ma mo Yefun Allah bi nat-i sor to kapyo mato kapyo. Yefun Yesus kem gesyos, An ós wa ki suk su Yefun Allah tepsu yegweswai wa men petok sor.
26Sane, Yefun Yesus sa, An dakai anato Yekwesu gato gum kok wai o re. Yefun Yesus sa, tep wa ós men mo suk mwa gato men yé mone. An bi An nggwa wa ben Yefun Allah bi suk-i sor. An yo ben sukibit mo nde, kwa dik yo dom nde. An ben suk mwa ne ndo sino. An ben An bi suk-i tara kadit men yetu gato ben sukibit. Yefun Allah bes An gum kok wai kadit suk mwa neya mo gu o re.
27An yo ben bi suk-i tepsu yekwesu gato gum kok wai mo Yefun Allah bi nu dogato nyim neya nde, An bi An nggwa wam dik wa tot sukibit gato men yetu ben ne sor re. Sarewo suga nyim tuya, kamdik-kamdik yekwesu mo Yefun Allah bi nu ne gu suge, suge ne dé sye wa tot sukibit gato án dakai ben ne mu nai Yefun Allah ne or wé, ete án waii gu suge yo o wa tot sukibit gato ye Israel yi neya ben ne o. Yekwesu ne ben suk sane gat sor. Sarewo Yefun Yesus dakai bi An nggwa, An kwop, An dé sye tepsu suktot wa tot sukibit gato men yetu mwa ne sino ben ne mu nai Yefun Allah wam dik sor re, tep wa kapyo mato kapyo.
28Suga nyim tuya, yé sibot Musa bi sukduno-i, sane yekwesu gato gum kok wai mo Yefun Allah bi nu, gato ye bes ne, án yo nggiwa ben bi suk-i ri-roi mo nde. Sarewo tepsu suk gato Yefun Allah tom ete syo syim su, gato bor wari kadit Musa bi sukduno-i ne, Yefun Allah bes An bi Gan gum Yekwesu gato gum kok wai mo Yefun Allah bi nu o re. An bi Gan sa, Yekwesu gato ben bi suk-i ne ri-roi sane sor to kapyo mato kapyo.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel