Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 15 >> 

1Ye Yahudi ge bok yo gato onyar kem mo Yefun Yesus ma kadit bur Yudea, án ma mo kota Antiokhia. Yé bok ne duno ye gato onyar kem mo Yefun Yesus mone, án ki do, "Ye bisunat nin tepsu Musa ki ne yo, bere Yefun Allah nai nin gum sok mo An bi rus-i wé kadit bot gesyos, wo ye yo bisunat nin nde yo, bere nin yo kem gesyos nde re."

2Sarewo Paulus si Barnabas ki do, "Nin kidar ko ré go!" An we duwer yé bok ne mo sukduno ne, an we ki yé bok ne mone ndo nde. Sane ye bes Paulus si Barnabas sisu ye gato onyar kem mo Yefun Yesus ge bok yo o, án sino mu mo Yerusalem wa ku yerasul si yekwesu mo nu ari mone subere án si yepasye mwa ne sino kibot sukduno subot ye bisunat nje gane do, sangge bado, siri, e?

3Sane yé bok gato ye bes ne mu. Án muket bur Fenisia, si bur Samaria saresa, án nuk subot yewis yi nai ye gato kem mone, án nukbot suk gato ben to yewis yi jam sukdu subot Yesus Kristus, orete yewis yi mwa neya nai sukjimnut wa án brek kadit os ibit ete jammo Yefun Yesus tepsu án bi Yekwesu. Ye gato onyar kem mo Yefun Yesus mo bur ne jam sukdu ne sa, án mit iwa wai o re.

4Yé bok gato ye bes wa kibot ye bisunat nje ne mu kom mo Yerusalem sa, ye gato onyar kem mo Yefun Yesus mone e, yerasul e, si yekwesu mo nu ari mone kak án mit wa yé bok gato ma ne. Paulus si Barnabas nuk subot suk mwa gato Yefun Allah ben mo pe gato an we mu mone.

5Sarewo mone ye Farisi ge bok yo gato onyar kem mo Yefun Yesus, án ti, án ki do, "Yewis yi gato onyar kem mo Yefun Yesus ne, men syogat ye bisunat án sor. Men kiwa án benbot Musa bi sukduno-i mwa ne sino sor."

6Yerasul si yekwesu mo nu ari sum sino wa kibot yewis yi gato onyar kem mo Yefun Yesus do, ye bisunat án tepsu Musa bi sukduno ne bado, nde e?

7Ye kibot, ye kibot sor, Petrus ti, an ki nai nje mone do, "Ji bi nji, nin jam do Yefun Allah bes ji wa ji mu ki subot An bi sukdu subot os ndo gato Yesus Kristus kak ne nai yewis yi jam. Sane yewis yi jam sukdu ne, orete yé mwa nai sukjimnut dik do, án simo os be gato Yesus Kristus kak ne, án onyar kem mo Yefun Yesus it.

8Yefun Allah, gato jam men yetu mit si men onyar kom mo mit, An syo An Gen bok nggwa mo yewis yi tepsu An syo An Gen bok nggwa mo men re. Sane, men jam kadit ne do, Yefun Allah mit iwa yewis yi sok mo An bi rus-i tepsu men ye Yahudi sok mo An bi rus-i.

9Yefun Allah nut do, yewis yi si men ye Yahudi ne tep sino, An ben suk su men yewis mwa ne tep sino. Men ye Yahudi onyar kem mo Yefun Yesus anato Yefun Allah tot men bi suksiri wé kadit men, sukibit yo ut mo men o nde. Sane dom, Yefun Allah tot yewis yi bi suksiri ne wé ete nai yewis yi ne sok mo An bi rus-i, we yewis yi ne onyar kem mo An it.

10Yefun Allah kadum do, An iwa yewis yi ne it, An yo syogat yewis yi ben suk yo o nde, wo Yefun nai yewis yi sok mo An bi rus-i it. Sane men duwer Yefun Allah mone, bere siri re. Men syogat yewis yi ben suk yo o tepsu Musa bi sukduno wa suma ne? Ben sa u anato men iwa ben sukye nai yewis yi sane ne? Men ye Yahudi si men bi amui yo nggiwa benbot Musa bi sukduno-i nde. Sane men wergat yewis yi benbot Musa bi sukduno-i wa suma ne?

11Men wergat yewis yi benbot Musa bi sukduno-i ne o nde. Kadit men ye Yahudi benbot Musa bi sukduno-i ne anato men gum sok mo Yefun Allah bi rus-i wé kadit bot gesyos nde, wo men jam do, men bi Yekwesu Yefun Yesus dakai bi sukjimnut sye kas subot men anato An kak os ndo wa men, subere men ku os wa men gum sok mo Yefun Allah bi rus-i, subere men kem ndo to kapyo mato kapyo. Men ye Yahudi si yewis yi ne sino ku os mo suk gato Yesus Kristus ben ne, Musa bi sukduno-i yo ós men mone nde."

12Petrus ki sukdu ne, sane anato yé mwa gato sum mone not. Án sino jam Paulus si Barnabas nuk sukdu subot suk gato an we ben mo yewis yi bi bur-i gato kadum Yefun Allah bi suktinggi ne bor, subere yewis yi ne sino yeket ete nutbot ndo nde.

13An we nuk bi sukdu ne, orete Yakobus waii ki bi sukdu-i, sare do, "Ji bi nji, nin jammo suk gato ji ki ré et.

14Simon Petrus nukbot sukdu ne rer wa men jam do, su wam futmo gare, Yefun Allah kadum do, An bi sukjimnut sye kasbot yewis yi, we An nai yetu mwa kadit yewis yi neya sok mo An bi rus-i it.

15Suk gato bor ne, tepsu sukdu gato yenabi bok yo krom, sare do,

16Yefun Allah ki do, 'Suk ne or sa, Ji satu ma o, bere Ji bes Daud bi pa-i or re. Daud bi pa-i bok yo ben sukibit, wo bere Ji ben pa dik yo ben sukndo wai o re.

17Ji ben sane, subere yewis yi neya meret Ji tepsu án bi Yekwesu gato án jammo. Sane yewis yi gato Ji kendo ne, bere sok mo Ji bi rus-i.' Yefun Allah bi sukdu-i anane.

18Yefun Allah ki bi sukdu-i ne kadit nyim tuya re."

19Yakobus ki o do, "Saneyo, ji ki sare, yewis yi gato brek kadit os ibit, ete án jammo Yefun Allah ne, men werwa án benbot men ye Yahudi bi sukduno-i nde, men ben sukye wa án sane nde.

20Men syogat yewis yi sibot ye Yahudi bi sukduno-i sino nde, wo kwa bok yo sor re. Men krombot kwa bok ne mo surat dik yo wa án sare do, án git sugit gato ye som sukdaret bok neya su ne nde, án git suge ku gato i-dé mó tó ne nde, án git suge dé nde; yebris si nggon ben siri su yu daret nde.

21Nam it, yé ki subot sukdu kwa bok gato Musa krom ne, sane yewis yi jam it. Sane dom, su kam Sabat, kam sye ne sino, yé baca sukdu ne mo men bi nu ari petok sor."

22Yakobus ki bi sukdu-i, orete yerasul si yekwesu mo nu ari si yé mwa gato onyar kem mo Yefun Yesus ne sino syogat yetu ge bok yo simo Paulus si Barnabas mu mo kota Antiokhia subere án ki sukdu ne nai ye Kristen mone jam. Sane, ye bes Silas si Yudas (gato ye kendo do Barsabas). Ye we ne yekwesu mo yé gato onyar kem mo Yefun Yesus.

23Yerasul si yekwesu ne syo surat wa an ka at gwat syo nai ye gato onyar kem mo Yesus Kristus mo Antiokhia. Mo surat ne ye krom sare do, "Surat ré wa yewis yi, ye gato onyar kem mo Yefun Yesus mo kota Antiokhia, mo bur Siria si bur Kilikia. Nin yé gato onyar kem mo Yefun Yesus, gato tepsu men bi nji mo Yefun Allah bi rus-i, men yerasul si yekwesu mo nu ari gato kem mo Yerusalem, men ki ndo mo nin.

24Men jam do yetu ge bok yo mu kadit men mo Yerusalem re. Yé bok ne mu duno nin su sukduno gato ben nin nalar mó re. Men yo syogat yé bok ne mu duno nin sane nde. Án dakai mu ki sukdu tepsu án dakai bi sukjimnut-i.

25Sane men sum men kibot, orete men bes yetu ge we, men syogat an we mu ku nin. Ye we ne simo Paulus si Barnabas gato men jimnotku, an ka at mu sino.

26Paulus si Barnabas ne, an we mu ki sukdu subot men bi Yekwesu Yesus Kristus nai yé mwa jam. Bergan yé gu an we kwop mo sukdu gato an we ki ne.

27Sane yo, men syogat ye we gato gum do Yudas si Silas si an we mu ku nin. Suk gato men krom mo surat ré, ye we ne waii kibot dom, subere nin jam rer re.

28Men sum men kibot nin yewis yi or re. Yefun Allah Gen si men sino nai sukjimnut do, men werwa nin benbot sukduno yi neya nde, wo nin benbot sukduno gato men krom more sor re, sare do:

29Sugit gato ye som sukdaret bok neya su ne, nin git nde; nin git suge dé nde; nin git suge ku gato i-dé mó tó ne nde; nin sino, yebris si nggon ben siri su yu daret nde. Nin mewa nin nggwa kadit suk gato men krombot more yo, bere nin kem not. Men bi sukdu-i tut more. Ndo mo nin sor."

30Sane yé syogat ye ka at ne gwat surat ne mu. Ye ka at mu kom mo kota Antiokhia sa, ye ka at sum ye gato onyar kem mo Yefun Yesus mone, orge ye ka at syo surat ne nai yé ne.

31Nje mone baca surat ne, orge án mit iwa sukdu mone. Án mit iwa sukdu ne, we sukdu ne ós án kem not, án bi sukjimnut waiyu o nde.

32Yudas si Silas, an we yenabi dom, sane an we ki suk mwa kadit Yefun Allah wa ós yé ne onyar kem mo Yefun Yesus nggi wai o re.

33An we kem mone ari bok yo, orge ye gato onyar kem mo Yefun Yesus mone, án syogat ye we ne satu mu mo ye gato syogat an we ma ne. An we mu saresa, yé ki nai Yudas si Silas do, "Yefun Allah ete uttok nin ka we sor."

34[Sarewo ri ma Silas yo mu nde, an nai sukjimnut do, an kem pe mo Antiokhia sor.]

35Sugane Paulus si Barnabas kem mo Antiokhia tó, an we yo mu nde. An we si yé bok yo o duno nje su Yefun Allah bi sukduno-i mone, an we ki sukdu subot men bi Yekwesu Yefun Yesus nai nje mone jam.

36Kapyo tak, Paulus ki nai Barnabas do, "Ye gato onyar kem mo Yefun Yesus mo kota bok yo gato men ka we ki sukdu subot men bi Yekwesu Yefun Yesus nai án jam ne, men ka we mu ku án or et. Men ka we mu ku yé mwa ne subere men ka we watbot do, án onyar kem pe mo Yefun Yesus tó, bado, nde, e?"

37Barnabas mit iwa Yohanes (gato ye kendo do Markus) si an we mu sino ware,

38Paulus bariwa re, we tomgato an ka gri mu ki sukdu subot Yefun Yesus mo bur Pamfilia, Yohanes misyar an we, or Yohanes yo si an we o nde, an dakai mu kadit an we re.

39An we duwer yu nggi sor, anato kom mo rut an we wat yu. Barnabas kendo Yohanes si an it mo kwem, ete an we mu mo ef Siprus,

40wo Paulus kendo Silas si an mu kadit Antiokhia. An we yo mu nde tó, ye gato onyar kem mo Yefun Yesus mo Antiokhia ki suk su Yefun wa an we subere Yefun Allah mewa an we petok sor, orge

41an we mu mo bur Siria si bur Kilikia. Mone an we os ye gato onyar kem mo Yefun Yesus, subere an onyar kem mo Yefun nggi wai kadit nyim ne o re.



 <<  Kisah Para Rasul 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran