1Paulus si Silas mune mu, an we wai kadit kota Amfipolis si kota Apolinia, orge an we mu kom mo kota Tesalonika. Mone ye Yahudi bi nu ari dik yo mó.
2Sane, kam Sabat, ye Yahudi bi kam sye, Paulus sok mo ye Yahudi bi nu ari ne sagana ne. Paulus kibot sukdu gato ye krom mo Yefun Allah bi sukdu ne subere kak nje mone bi sukjimnut. Paulus ben sane su kam Sabat, wam gri.
3Paulus nai Yefun Allah bi sukdu kwa wokgan, orge an ki rer subot sukdu ne, an ki do, "Yefun Allah bi sukdu ré kadum nai men do, Ye gato Yefun Allah syogat ma mo bur ré wa nai men yetu kadit sukye ete jowa men ne, An ku sukye ndo nde nyim, orete Yefun Allah sun An kadit sukkwop. Sane ji bi sukdu-i wa nin anare: Ye gato Yefun Allah syogat ma ne gum do Yesus. Ye gato gum do Yesus anato Yekwesu gato Yefun Allah tom mo An bi sukdu ne do, bere An syogat Yekwesu dik yo ma mo bur ré wa nai men yetu kadit sukye ete jowa men. Yekwesu ne anato Kristus."
4Ye Yahudi ge bok yo nai sukjimnut do, sangge, sukdu gato Paulus si Silas ki ne sangge, sane yé bok ne simo an we. Sane dom, ye Yunani mwa gato nyuwa Yefun Allah jammo sukdu ne. Ye Yunani ne sor nde, wo nggon pasye ge bok yo dom onyar brek ete kem mo sukdu ne ete simo an we.
5Sarewo ye Yahudi ge bok yo o maskwa ket Paulus si Silas, we yé mwa iwa jammo ye we ne bi sukduno-i kadit án bi sukduno-i. Sane án sum yebambrai gato ben suk nde. Án sum ye gane, ete syogat ye ne saiye daret, ben yé mwa mone dakai maskwa yu daret. Án sino kas kekro mu mo Yason bi nu, án futmu meret Paulus si Silas mo Yason bi nu, subere án gwat Paulus si Silas mu mo yé mwa gwem wa án ndobot an we mone.
6Án meret Paulus si Silas ware, án yo ku nde, wo án gwat Yason si yé bok yo gato onyar kem mo Yefun Yesus mu mo yepasye mo kota ne, orete án saiye do, "Ye we gato ben yé mwa maskwa yu daret mo bur ré iwedewe, ye we ne anato ma mo kota ré it.
7Yason ré anato kendo ye we ma kem mo an bi nu-i. Ye we si yé bok gare bi sukdu-i do, Yefun Yesus anato Yekwesu yeraja be win Kaisar or re. Sukdu gato ye ki ne siri kadit men bi yekwesu yeraja Kaisar bi sukdu-i ne, we Kaisar sor ete yekwesu more sor."
8Yepasye si yé mwa gato mone jam suk gato yé ki ne sa, án sino suwar waiyu, yé mwa ne saiye dakai daret, yé maskwa yu daret mo sukdu ne or re.
9Sane yepasye ne ki nai Yason si yé bok ne do, "Nin bi sugum nai men wa men jom yei, subere men sombok nin wé. Kapyo tak, ete men kibot sukdu ne, orete men syo nin bi sugum satu o." Yason si ye ne syo sugum gato yepasye kiwa ne, orete yé sombok án ge bok ne wé re.
10Ber noru, ye gato onyar kem mo Yefun Yesus gato mone syogat Paulus si Silas mu kadit Tesalonika, mu mo kota Berea. Ye we mu kom motu sa, ye we mu mo ye Yahudi bi nu ari mone.
11Ye gato kem mo Berea, án kak án mit wa sukdu subot Yefun Yesus ne wai kadit ye Tesalonika. Ye Berea mit iwa wai o re. Kamdik-kamdik án si Paulus watbot Yefun Allah bi sukdu, subere án jam do, suk gato Paulus ki subot Yefun Yesus ne sangge, bado, siri, e?
12Sane, ye Yahudi mwa mone nai sukjimnut do, sukdu gato Paulus ki ne sangge, sane án simo os gato Yesus Kristus kak ne sor, án onyar kem mo Yefun Yesus it. Ye Yunani ge bok yo nai sukjimnut ne dom, nggon yepasye ge bok yo si yenggras sino.
13Ye Yahudi mo kota Tesalonika jam Paulus mu ki Yefun Allah bi sukdu subot Yefun Yesus mo kota Berea sa, án mu mone dom. Án mu krokgat yé mwa mone, subere yé mwa ne maskwa ket Paulus.
14Sane ye gato onyar kem mo Yefun Yesus mo kota Berea syogat Paulus mu kekro mo sem de, wo Silas si Timotius kem not mo kota Berea.
15Yé bok ne top Paulus mu mo kota Atena, orge án satu mo Berea. Paulus tarubot án do, Silas si Timotius werwa an we boribot Paulus kekro.
16Paulus eswa Silas si Timotius ma mo kota Atena saresa, an kwabom dek mo suk mwa gato nje som daret mone.
17Sane, Paulus sok mo ye Yahudi bi nu ari, an si ye Yahudi si ye Yunani gato jammo Yefun Allah mone ki sukdu subot Yesus Kristus wa kak yé ne bi sukjimnut. Sane dom, kamdik-kamdik, an si nje mo pasar kibot sukdu ne dom.
18Yeguru bok bu we gato gum do, Epikuros si Stoa duwer Paulus mo sukdu gato an ki ne. Paulus ki sukdu subot os ndo gato Yesus Kristus kak wa men yetu. Paulus ki do Yefun Yesus sun kadit sukkwop, sane yeguru bok bu we ne duwer Paulus mone. Yeguru deyo ki do, "Ye gare ki suk daret ko ré go!" Ye deyo o ki do, "Ye gare ki sukdu subot nje mo bur yi bi yefun-i."
19Sane yeguru bok ne kendo Paulus si án mu sum mo bobuk gato gum do Areopagus. Mone án ki nai Paulus do, "Men iwa men jam rer subot sukdu be gato nan duno nje su ne, nan ki napyo nai men jam et.
20Nan ki nan bi sukdu-i ne yak yi ten. Men jam sukdu ne rer nde tó, sane nan ki rer wa men jam et."
21(Ye mone iwa jam sukdu ne, we sugane ye Atena si yemabe gato ma kem mone iwa kibot sukdu gato be petok sor.)
22Sane Paulus ti mo bobuk Areopagus, an ki nai ye gato sum mone do, "Yenggras, ye gato kem mo Atena, ji jam do, nin iwa som yefun mwa neya petok sor,
23we, ji mubot nin bi kota sa, ji me suk mwa gato nin som ne. Ji watbot suk mwa gato nin bes gum kok ne. Ji ku dik yo gato bi meja wa ye grem suksom mone, ete ye krom mó do, 'Yefun Allah gato men jam nde anare.' Saneyo, Yefun Allah gato nin grem suksom wa ne, nin ki do, nin jam nde, su ré ji ki rer bot Yefun Allah ne subere nin jam.
24Yefun Allah gato ut bur ré si suk mwa mone, An sa, An jowa bur ré si gu nim ne sino. Yefun Allah ne yo kem mo nu gato men yetu nggo ne nde.
25An yo mitwa men yetu grem suksom wa An nde. An yo yewa suk yo mo nde, we An fuf An mas mo men yetu ben men mbau, An syo suk mwa nai men yetu sino.
26Ketke An ut yetu ge dik yo. Kadit ne, An anato ut yewis mwa ne, ete An syogat kem mo bur ré iwedewe. Su ketke An fro bur det wa yewis yo-yewis yo kem mó. An fro yewis mwa ne kem mo án bi bur det-i kom mo kam gato Yefun Allah ki ne, orete yé mu or wé kadit bur ne tepsu bi aina gato Yefun fro ne dom. Suk mwa ne Yefun Allah fro or re.
27Yefun Allah fro suk mwa sane, subere men yetu meret An. Yefun Allah iwa men meret An, ete men ku An. Yefun Allah da karowa men.
28Kadit An bi suktinggi anato men mbau e, men nggiwa ben suk, ete kem mo bur ré re. Yefun Allah ne, An tepsu men bi Ai, sagato nin bi nje-i gato krom sukbadek bi sukdu-i. An krom sare do, 'Men anato An bi pa-i.'
29Men anato An bi pa, saneyo men nut mo An do, An ka tepsu suk gato yetu ben su emas ne, bere siri re. Sane dom men nut mo An do, An ka tepsu suk gato yetu ben su perak e jok e ne, bere siri re. Suk sane, yetu anato fro tepsu yetu bi suktinggi-i ne.
30Suga nyim tuya Yefun Allah misyar men yetu ben suk ket men jam nde sane, wo ré yo, An syogat men yetu mo bur ré iwedewe kwet kadit sukibit gato men ben ne, ete men jammo An.
31Yefun Allah syogat men yetu kwet, we An fro kam gato bere An ndobot men yetu sino mo suk gato men ben ne. Yefun Allah bes yetu ge dik yo wa ndobot men yé mwa ne sino. Ye ne bere ndobot nje sisu ri-roi sor. Men jam do, sangge, bere Yefun Allah bes Ye ne, we Yefun Allah sun Ye gato An bes ne kadit sukkwop it."
32Ye jam Paulus ki subot Yefun Allah sun yetu kadit sukkwop sa, yetu ge bok yo sa Paulus, wo yetu ge bok yo o ki do, "Kapyo tak, men iwa nan ki subot sukdu ne o et."
33Orge Paulus mu kadit yé mwa gato sum mone.
34Yetu ge bok yo mone, án simo Paulus sor. Yé bok ne nai sukjimnut do, án simo os be gato Yesus Kristus kak ne, án onyar kem mo Yefun Yesus it anane. Kadit yé bok ne, yepasye ge dik yo gum do, Dionisius. An ye gato si yepasye sum mo bobuk Areopagus. Nggon dik yo gato gum do Damaris si yetu ge bok yo o dom nai sukjimnut wa án simo os be gato Yesus Kristus kak ne, án onyar kem mo Yefun Yesus, ete simo Paulus bi sukdu-i ne.
<< Kisah Para Rasul 17 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel