Alkitab Mobile SABDA
[VER] : [ABUN]     [PL]  [PB] 
 <<  Lukas 11 >> 

1Kam dik yo, Yefun Yesus ki suk su Yefun Allah mo nat dik yo. Yefun Yesus do ki suk or sa, Yefun Yesus bi pakon dik yo ki nai An do, "Yenggras, Nan duno men subere men jam men ki suk su Yefun Allah sisu ndo et, subere men waii jam men ki suk su Yefun sato Yohanes duno an bi pakon su ne."

2Sane, Yefun Yesus ki nai An bi pakon do, "Nin ki suk su Yefun Allah yo, nin ki sare do, 'Men bi Ai, Yé bes Nan gum kok sye wai ete ndo. Nan ma tepsu Yekwesu wa jowa men yetu ete ndo.

3Nan syo sugit tep wa men git su kam ré et.

4Nan maskwa men mo sukibit gato men ben mu nai Nan o nde, Nan nutbot o nde, tepsu men yo maskwa ye yi mo sukibit gato ye ne ben ma nai men ne nde, ete men nutbot o nde. Nan mewa men subere suk yo tik men mit ete ben men ges mo os ibit mone nde.' "

5Orge Yefun Yesus gwat sukamno subot nadi, An ki nai An bi pakon ne do, "Yetu ge dik yo kadit nin mu mo an bi yesyim bi nu su noru miten, orete ye ne ki nai bi yesyim do, 'Yesyim a, nan ós ji et! Nan syo roti koi gri ma, bere ji win. Nan ós ji su roti ne,

6we ré ete ji bi yesyim ge dik yo ma mo ji bi nu kadit os syu. Ji bi sugit mo nu ne or. Sugit wa ji syo nai an yo mo nde.'

7Sato nan bi yesyim gato nan mu me mone, an ki kadit nu mit ne do, 'Nan syimfar ji nde. Nusyo krat it. Ji si bi pa sem re. Ji bariwa ji sun, ete ji syo sugit ne nai nan re.' "

8"Sane, bere sa u ne? Ji ki sare do, kapre ye ne tepsu nan bi yesyim, an bariwa an sun, ete syo suk mwa gato nan kiwa ne. Sarewo nan damen wa nan ndek suk mo an nde, nan kigat nan bi yesyim ne anato bere nan bi yesyim ne sun, ete ós nan ne. Bere an syo suk mwa ne sino gato nan yewa ne.

9Sane Ji ki sare do: Nin ndek gat Yefun Allah sane sor, bere Yefun Allah syo suk nai nin; nin meret gat sane sor, bere nin ku; nin nggo nusyo gat sane sor, bere Yefun Allah kak nusyo wa nin.

10We sare, ye to ndek gat Yefun Allah, bere Yefun Allah syo suk nai an; ye to meret gat, bere an ku suk gato an mitmo ne; ye to nggo nusyo gat, bere ye kak nusyo wa an.

11Yenggras, nin bi pa ndekwa boge it yo, bere nin syo kwis wa an git, bado? Nde re.

12Pa ndekwa ndam bem it yo, bere nin syo wi nai pa ne bado? Nde re.

13Kapre nin anato ye gato ben nin bi suk-i ibit ne, nin jam nin syo suk gato ndo nai nin bi pa. Sane bere, nin ndek suk mo nin bi Ai mo gu yo, bere nin bi Ai syo suk gato ndo wai kadit ne o re. Ye to ndek Yefun Allah wa Yefun Allah syo An Gen, bere An syo re."

14Kam dik yo Yefun Yesus syun semda wé kadit yetu ge dik yo gato mbut, an yo du ndo nde. Semda do mu kadit ye ne sa, ye ne ki suk su ndo satu o re. Sane yé mwa gato mone yeket suk gato án me ne.

15Sarewo ye deyo ki do, "Beelzebul gen pet mo Ye ré anato An nggiwa syun semda wé kadit nje. Beelzebul gato biris bi yekwesu ne anato syo suktinggi nai An."

16Ye yi yo o meret os wa Yefun Yesus, sane án ndo mo Yefun Yesus do, "Nan ben suk yo gato ben Yefun Allah bi suktinggi ne bor wa men me et."

17Yefun Yesus jam yé ne bi sukjimnut re, sane Yefun Yesus ki nai án do, "Sato, yé gato kem mo bur dik yo, maskwa ket yu ete gu yu yo, bere án yo kem ndo su yu o nde, bere yé ne ibit or re. Sane dom, yé mo rus dik yo e ne maskwa ket yu, ete duwer yu yo, bere án yo kem ndo su yu o nde.

18Sane dom, mo biris bi yekwesu bi rus-i, semda e, aboksye e, yerom e ne maskwa ket yu, ete duwer yu yo, bere biris bi yekwesu si an bi rus-i yo kem ndo su yu o nde, wo bere án sino ibit mo koirut or re. Sane nin ki do, Beelzebul gen pet mo Ji anato Ji nggiwa syun semda wé kadit nje wa suma ne? Nin ki do, Beelzebul gato biris bi yekwesu ne anato syo suktinggi nai Ji wa suma ne? Biris bi yekwesu ne yo syo suktinggi nai Ji wa ben an bi rus-i ibit yo mo nde.

19Nin ki do, Ji syun semda su Beelzebul bi suktinggi, sarewo ye gato simo nin syun semda su suktinggi kadit u ne? Men me suk gato ye gato simo nin ben ne, sane men jam do, sukdu gato nin ki ne siri re.

20Ji syun semda su Beelzebul bi suktinggi nde, wo Yefun Allah anato ben Ji nggiwa Ji syun semda, sane anato nin jam do, Yefun Allah bi suktinggi tepsu Yekwesu gato nggi wai bor it anare. Yefun Allah ma jowa yetu mo bur ré it.

21ye gato kaim nggi, gato bi sukmise mwa. Sane ye gato kaim nggi do mewa bi nu-i yo, an bi suk mwa mo nu mit kem sisu ndo, yegitsi yo ku os wa nai an bi suk nde.

22Sarewo ye gato nggi wai kadit an do ma ben sukndi su an, ete gu an yo, an bi sukmise, gato an kwabom kam mone, ye gato nggi wai ne nai wé kadit an. Orete ye gato nggi wai ne nai an bi suk mwa mo nu mit ne, orge ye ne si bi yesyim syo yu su.

23Ye gato mit dik su Ji nde anato tepsu ye gato bariket Ji re. Ye gato yo si Ji ben Yefun Allah bi suk-i nde anato tepsu ye gato ben suk gato Ji ben ne ibit or re."

24"Yé do syun semda wé kadit yetu ge dik yo it yo, semda ne mu meret nat wa an kem mó. Semda ne mubot pe gato syur yo mo nde, semda meret nat ndo wa an sem mó. An yo ku nat yo tep nde. Saneyo, semda nut mo an syidem do, 'Ji satu mu mo ye gato tomga u ye syun ji kadit ne et.'

25Semda do mu kom mone sa, an me ye ne tepsu nu gato ye fre kwo, ete ye fro suk mwa mone sisu ndo it.

26Orge semda ne kendo semda ge mufit yo o gato mise wai kadit an sisu an mu kem mone dom. Sane semda bok ne ma, án sino bok nggwa mo yetu ne. Sane kom mo rut sa, yetu ne ibit wai kadit nyim ne o re."

27Yefun Yesus ki sukdu ne saresa, nggon ge dik yo gato si yé mwa mone ké nai An do, "Nggon gato kem su Nan, ete bi sus nai Nan da ne, nggon ne mit at wa wai o re."

28Sarewo Yefun Yesus ki do, "Sane nde re. Sare, ye gato jam Yefun Allah bi sukdu, ete benbot, bere ye ne mit at wa wai kadit Ji bi im ne o re."

29Yé mwa sum wa nden wa Yefun Yesus saresa, Yefun Yesus ki do, "Nin yé gato kem mo bur ré, nin ben nin bi suk-i ibit. Nin werwa Ji ben suk yo wa kadum Yefun Allah bi suktinggi bor. Ji yo ben suk sane mo nin gwem nde. Sarewo tepsu Yefun Allah ben An bi suktinggi bor wa yenabi Yunus, bere An waii ben sane o wa nin me et.

30Yenabi Yunus anato gwat Yefun Allah bi suktaru ma mo ye gato kem mo kota Niniwe. Yefun Allah bi suktinggi bor mone Sane dom Yetu bi Pa to Ji ré waii gwat Yefun Allah bi suktaru ma mo nin yé gato kem mo bur su ré. Nin me suk gato bere bor mo Ji,

31Su kam gato bere Yefun Allah ma ndobot yetu mwa ne sino, nggon pasye kadit bur nden si nin sun sino. Bere nggon ne ki nin gum ibit sare do, 'Ji ma kadit os syu mu ku yeraja Salomo subere ji jam Salomo bi sukdu-i gato kru. Sarewo Ye gato jam suk mwa wai kadit Salomo si nin kem sino, ete nin misyar An re.'

32Su kam gato bere Yefun Allah ndobot yetu mwa ne sino, bere ye Niniwe si nin sun sino ete ki nin gum ibit, we án jam Yunus bi sukdu-i sa, án brek kadit os ibit ete án jammo Yefun re. Ji gum-i kok sye wai kadit Yunus gum-i ne, sarewo nin yo jammo Ji bi sukdu-i nde."

33"Men ndum kak it yo, men yo grem suk yo wa nde. Men gurik mo bokor desnak dom nde. Wo men grem sukru ne mo pe gato kok, subere sukru rer ku ye gato sok mo nu mit ne.

34Sane nin gro tepsu sukru wa nin kaim. Nin gro ndo tepsu nin bi sukjimnut kak yo, bere rer ku nin kaim sino, wo nin gro ibit tepsu nin bi sukjimnut yo kak ri nde tó yo, nin kaim kem mo ndendu.

35Sane nin mewa nin dakai, subere nin bi sukru ne te nde, wo nin bi sukjimnut kak pe sor.

36Sane dom, nin do iwa nin bi sukjimnut kak subere nin jam suk gato sangge kom mo mit it yo, bere Yefun Allah kadum suk mwa ne nai nin jam. Bere nin kaim yo kem mo ndendu nde, wo tepsu sukru gato nin ndum, ete nin grem kok mo pe gato dor, bere nin jam suk mwa tepsu sukru rer ku suk mwa ne sino."

37Yefun Yesus ki suk ne or sa, ye Farisi dik yo kendo Yefun Yesus ma git sugit mo an bi nu. Sane Yefun Yesus mu, Yefun Yesus git sugit mo ye Farisi bi nu ne.

38Sarewo ye Farisi yeket suk gato Yefun Yesus ben ne. Yefun Yesus yo git nde tó, Yefun Yesus yo mus An syim tepsu ye Yahudi bi amui bi sukduno nde.

39Sane Yefun Yesus ki nai ye Farisi ne do, "Nin, ye Farisi, nin mus gelas si mbem mo de nden kwo sor re, wo mo mit ne dum ndo nde, tepsu nin ben nin nggwa ndo mo nden sor re, wo nin mit tara re, nin gro sye wa nin ku suk mwa, nin ben sukibit mwa ye re.

40Nin jam nde suk. Yefun Allah gato ut tak de nden anato ut tak de mit dom fe?

41Sane suk gato mo gelas si mbem mit ne, nin syo napyo nai ye gato yewa suk et. Nin do ben sukndo su ye gato yewa suk it yo, bere Yefun Allah mit iwa nin mone, tepsu nin bi gelas si mbem ne sino kwo re.

42Nin ye Farisi, bere nin ku sukye. Suk gato nin fros su sugit wa ben sugit ne wik sato kru e, es wo e, ri e, sindar e ne yo, nin tik but musyu dik ete nin syo but dik yo nai Yefun. Nin ben sukwokgan sane da ndo, sarewo nin misyar sukduno gato sye wai mo Yefun Allah bi sukduno wa suma ne? Sukduno sato, nin ben nin bi suk-i ri-roi su nje, si nin bi sukjimnut sye kas subot Yefun Allah sor, nin misyar nde, wo nin benbot sor. Nin misyar sukduno gato sye wai sane nde. Sane dom, sukduno wokgan ne, nin misyar dom nde, wo nin benbot sukduno mwa ne sino sor.

43Nin ye Farisi, bere nin ku sukye, we nin iwa nin kem mo pe gato yé fro wa yepasye ma kem mo nu ari subere yé bes nin gum kok mone. Nin do mu mo pasar it yo, nin iwa yé mwa mo pasar ki do yepasye ana ma ne, ete yé ki do, 'kam ndo' mo nin.

44Bere nin ku sukye, we nin tepsu makwe gato yé yo syut kwedet wa nde. Sane yé jam nde yé muya-muma mo makwe ne sor."

45Yeguru agama dik yo ki nai Yefun Yesus do, "Yeguru, suk bok gato Nan ki ye Farisi gum ibit mone, tepsu Nan ki men yeguru gum ibit mone dom."

46Yefun Yesus ki nai an do, "Nin yeguru agama, bere nin ku sukye dom, we nin duno nje su nin bi sukduno-i ne mwa, nin ben sukye wa nje, tepsu nin bes sukde mo nje wa yé sam. Sarewo nin yo ós nje sam sukde ne nde, nin yo ós wokgan yo dom nde.

47Bere nin ku sukye, we nin fro makwe gato ndo wa yenabi gato nin bi amui gu wé ne.

48Sane nin dakai ki do, nin imo suk gato nin bi amui ben ne. Nin bi amui anato gu yenabi kwop, orete nin anato nggo nu wa yenabi mo bi makwe ne.

49Yefun Allah jam suk mwa ne sino, sane anato An ki do, 'Bere Ji syogat yenabi deyo si yerasul deyo gwat Ji bi suktaru ma, wo bere yé gu deyo kwop, deyo o yé ben sukye nai.'

50Ri ma, nin yé mwa gato kem mo bur su ré, bere nin ku sukye mo yenabi mwa ne sino gato nin bi amui gu kwop ne. Nin bi amui gu yenabi mwa ne sino wé kadit ketke sor kom mo kam ré dom.

51Kadit ketke nin bi amui gu Habel. Or o nin bi amui gu ye yi bok yo o sor kom mo Zakaria, gato nin bi amui gu kwop mo Yefun Allah bi nu si bot kot wa ye gre suge wa som Yefun su mone ndet. Sangge, Ji ki sare do, nin yé gato kem mo bur su kam ré, bere nin anato ku sukye mo yé mwa gato nin bi amui gu kwop su kam nyim neya.

52Nin yeguru agama, bere nin ku sukye, we nin bi os wa nin jam Yefun Allah bi sukduno, sarewo nin yo benbot ri nde. Nin gurik Yefun Allah bi sukduno kadit ye yi gato iwa jam sukdu ne. Nin dakai bariwa Yefun Allah bi os-i ne. Sane dom, nin duyawa ye gato iwa muket Yefun Allah bi os-i ne. Sane bere nin ku sukye mone."

53Yefun Yesus do mu kadit pe ne sa, yeguru agama si ye Farisi kabor Yefun Yesus gat. Yé ne iswen sukdu gato Yefun Yesus ki ne. Yé ne duwer Yefun Yesus gat, án ndogat Yefun Yesus subot suk mwa,

54subere Yefun Yesus do ki suk yo siri it yo, ye Farisi si yeguru mwa ne ku os wa án ben sukye nai Yefun Yesus.



 <<  Lukas 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran