Alkitab Mobile SABDA
[VER] : [ABUN]     [PL]  [PB] 
 <<  Lukas 14 >> 

1Ye Yahudi bi kam sye, kam Sabat dik yo ete Yefun Yesus mu git sugit mo ye Farisi bi yepasye dik yo bi nu-i. Yefun Yesus kem mo nu ne sa, ye Farisi si yeguru agama mone sokwa An pe sor, sawe Yefun Yesus ben suk yo siri ket ye Yahudi bi sukduno-i.

2Yetu ge dik yo gato syua gat gwes si syim gun kem mo Yefun Yesus gwem mone.

3Yefun Yesus ndo mo ye Farisi si yeguru agama mone do, "Men ben ye gato i ne ge su kam Sabat anato tepsu Yefun Allah bi sukduno-i, bado siri kadit e?"

4Yé mwa mone not, án yo ki suk yo mo nde. Orge Yefun Yesus syimtok ye gato i ne, Yefun Yesus ben ye ne ge, or Yefun Yesus syogat ye ne mu re.

5Orge Yefun Yesus ndo mo yé mwa mone do, "Sato nin ge dik yo bi pa ges mo syurwak su kam Sabat yo, bere nin ben suma ne? Sane dom, nin ge dik yo bi suksi yo ges mo syurwak su kam sye yo, bere nin ben suma ne? Kapre kam sye, nin mu nin tik mu nden kadit syurwak ne fe!"

6Yé mwa mone not, ye yo ki suk yo mo nde.

7Yefun Yesus sokwa ye gato ye Farisi kendo ma git sugit mo an bi nu-i ne. Ye deyo meret pe gato yé fro wa yepasye ma kem mó subere an dakai kem mone, sane anato Yefun Yesus gwat sukamno. An ki nai yé mwa mone sare do,

8"Yetu ge dik yo do kendo nin git mo pesta yo, nin ma nin kem mo pe gato yé fro wa yepasye ma kem mone nde, sawe bere yepasye dik yo gato gum kok sye wai kadit nin waii ma wari o.

9Yepasye ne do ma mone it yo, bere ye gato ben pesta ma ki nai nin gato kem mone do, 'Nin mu nden, we ji syo nat ré nai yepasye gato ma ré kem mó et.' Orge nin mu kem mo nden kadit pe gato yepasye kem mone. Nin mu kem mo pe gato pa wokgan kem mone, sane bere nin damen ndo nde.

10Sarewo yé kendo nin ma mo yé bi pesta it yo, nin ma nin kem mo nden mo pe gato pa wokgan kem mó subere ye gato ben pesta kendo nin ma, an ki do, 'Yesyim, nan ma, nan kem mo pe gato ndo ré, subere nan ku sugit kekro.' An do ki sane yo, yé mwa gato kem mone me do, ye bes nin gum kok mone,

11we ye gato bes an nggwa kok tepsu an yepasye, bere Yefun Allah ben an damen o re, wo ye gato is an nggwa ga tepsu pa wokgan, bere Yefun Allah dakai bes an gum yepasye o re."

12Orge Yefun Yesus ki nai ye Farisi gato kendo An ma git ne do, "Nan do konwa suk yo it yo, nan kendo nan bi yesyim ma sor nde, nan kendo nan bi nji ma sor nde, nan kendo nan bi mben ma sor nde, nan kendo yepasye gato kem mo nan bi kampung ma sor nde. Nan do kendo yé ne ma si nan git sugit mo pesta ne yo, bere yé ne waii kendo nan ma mo án bi pesta ne satu o, sane bere nan ku sukndo satu.

13Sarewo nan do konwa suk yo it yo, nan kendo ye gato ku suk mo nde ma, nan kendo ye gato gwes út ma, nan kendo ye gato yo mu ndo nde ma, nan kendo ye gato gro ndu ma si nan git sino mone.

14Nan do kendo ye ga sane ma it yo, bere Yefun Allah ben sukndo su nan. Ye gato nan kendo ma ne, yé ne bi os wa án ben sukndo satu yo mo nde. Wo Yefun Allah sa, bere ben sukndo satu nai nan. Su kam gato Yefun sun yé gato ben sukndo tepsu An mit ne mbau satu kadit sukkwop, su kam gane Yefun Allah ben sukndo su nan."

15Yetu ge dik yo gato si nje git mone jam Yefun Yesus ki sukdu ne sa, ye ne ki do, "Bere mo pe gato Yefun Allah jowa men tepsu men bi Yekwesu ne, ye to git sugit mo pesta sye mone yo, ye ne mit at wa wai o re."

16Sane Yefun Yesus gwat sukamno dik yo, An ki nai ye ne do, "Yetu ge dik yo fro suk mwa wa an ben pesta sye. Ye ne kendo yé mwa ma git sugit su an.

17Yé fro suk mwa ne or sa, su kam gato yé mwa ma git sugit sino mone, ye gato ben pesta ne syogat an bi pakwerut mu ku ye gato an kendo ma wa git su an, ete an syogat pakwerut ne ki do, 'Nin ma et, suk mwa ne men fro or it anare.'

18Pakwerut ne mu ku ye gato an bi yenggras kendo ma ne, sarewo yetu kadik-kadik ki bi sukye gato ben an yo ma nde. Ye gato pakwerut mu ku nyim ki do, 'Ji so bur det dik yo sim, bere ji mu watbot re, sane ji ki maaf sor, bere ji yo ba nde.'

19Ye deyo ki do, 'Ji so sapi ge musyu diksim wa ben ji bi nggwe su, sane ji mu ji tom mó et. Sane ji ki maaf sor, bere ji yo ba nde.'

20Ye deyo o ki do, 'Ré ete ji kra sim, sane bere ji yo ba nde.'

21Pakwerut ré satu mu ki suktaru mwa gato yé ki ne nai an bi yenggras. Sane yenggras ne maskwa ndo nde, orete an syogat an bi pakwerut mu o. Yenggras ne ki do, 'Nan mu kekro. Nan mubot os sye si os wok gato mo kota mit, ete nan kar ye gato bi suk yo mo nde, nan kar ye gato yo nggiwa ben suk nde, nan kar ye gato gwes út, nan kar ye gato gro ndu ma. Nan kar yé ne ma mo pesta gato ji fro re.'

22Pakwerut mu, orge an satu ma o. Pakwerut ne ki do, 'Yenggras, suk gato nan syaugat ji ben ne, ji ben or re, wo nan bi nu yo ses nde tó.'

23Sane yenggras ne ki nai an bi pakwerut do, 'Nan mu kadit kota, nan mu mo nden et. Nan mubot os sye si os wok mone. Nan werwa ye gato kem mone ma dom subere ji bi nu ne ses.

24Ji ki sare do, ye gato ji kendo su ketke, ye gato bariwa ma git sugit mo pesta ne, bere yé ne yo git ji bi sugit mone nde, yé ne yo git wokgan dom nde.' "

25Yefun Yesus mubot os ne sa, yé mwa mu sisu Yefun Yesus mone, orete Yefun Yesus brek sokme yé mwa ne. Yefun Yesus ki nai yé ne do,

26"Ye to iwa simo Ji, sarewo ye ne bi sukjimnut sye mo bi ai si bi im wai kadit Ji it yo, Ji bariwa ye ne simo Ji tepsu Ji bi pakon re. Ye to bi sukjimnut sye mo bi nggon, si bi pa wai kadit Ji it yo, Ji bariwa ye ne simo Ji tepsu Ji bi pakon re. Ye to iwa simo Ji, sarewo ye ne bi sukjimnut sye mo bi nji si bi nyanggon it yo, Ji bariwa ye ne simo Ji tepsu Ji bi pakon re. Ye to jimnotku an nggwa wai kadit Ji it yo, Ji bariwa ye ne simo Ji tepsu Ji bi pakon re.

27Ye gato bariwa ku sukye tepsu ye sam kwesukwin, ete bariwa sibot suk gato Ji ben ne yo, Ji bariwa ye ne simo Ji tepsu Ji bi pakon re.

28Sato nin, yetu ge dik yo do mitwa an nggo nu sye it yo, bere an ben suma ne? Ye ne yo nggo nu ne nde tó, an newa sugum or et, subere an jam do sugum tepsu nu ne bado, yo tepsu nde e?.

29An newa an bi sugum sisu ndo, sawe an nggo nu napyo sor, ete sugum or kadit an, orete ri ma ye gato ma me nu ne, bere sa ye ne.

30Bere yé mwa ne sa, án ki do, 'Men me ye ré et. An nggo nu, sarewo an yo ben or nde, an mu kadit re.'

31Or o, sato yeraja dik yo mitwa futma gu yeraja dik yo o bi nje te, bere yeraja ré ben suma ne? Bere yeraja ré kem ete an nutbot do, 'Ji bi yesukmise ré ge ribu musyu dik sor re. Sarewo yeraja motu ne bi yesukmise ge ribu musyu we. Yeraja ne do futma gu men yo, bere men anato nggi wai bado, men yo nggi tep nde e?'

32Yeraja ré do nut do, an yo nggi nde it yo, yeraja motu ne os syu kadit an tó, an syogat yegweswai ge bok yo mu gwawa an. Bere yegweswai ne gwat suktaru do, 'Men kibot sisu ndo or et. Men yo gu yu nde, wo men kem not, ete men jom syim sor.' "

33Orge Yefun Yesus ki do, "Sane dom, ye gato simo Ji nutbot sisu ndo et, we ye gato yo misyar an bi suk-i or wé nde yo, Ji bariwa ye ne tepsu Ji bi pakon."

34"Bók anato suk gato ndo, sarewo bók ne yo wik o nde yo, bere men ben suma subere bók ne wik satu o ne?

35Bók gato yo ndo o nde, men yo mitmo o nde, bók ne yo ndo wa bur dom nde. Sane men bare wé sor. Nin brek nin dabe muya-muma kadit nde, wo nin jammo sukdu gare et!"



 <<  Lukas 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel