1Elisabet kem su mom bi pa Yohanes or, sugane Kaisar Agustus gum yekwesu wa ye Roma bi bur-i . Sane Kaisar syaugat yé mubot ye Roma bi bur-i subere yé krom yé mwa gato kem mone sino gum o re.
2Sensus gare, yé krom yé mwa gum mo pemerintah bi buku, yé krom wam doketke anare. Sugane Kirenius gum gubernur mo bur Siria.
3Sane yetu bok ne sino kadik-kadik mu mo nat gato án bi amui ontu mó. Yé mu mone wa yé krom án gum mo pemerintah bi buku ne, tepsu Kaisar syogat án ben ne.
4Sane Yusuf dom, Yusuf mu kadit kota Nazaret mo bur Galilea. Yusuf mu mo kota Betlehem, mo bur Yudea, mo nat gato yeraja Daud ontu mó, we Yusuf bi amui mo Daud.
5Yusuf si Maria mu mo Betlehem sino. Maria gato Yusuf nggorwa ne, Maria syimfar re. An we mu mo Betlehem subere an we krom an we gum mone.
6An we mu kom mo Betlehem sa, Maria nukwe i.
7Orete Maria kem su Pa yebris, Maria bi Pa dofutmo. Maria nggwot Pa ne su san det, orete mom grem Pa ne sem mo suk gato ka sa ndurbe, gato sagana yé grem suksi bi sugit mó. Maria si Yusuf sem mo suksi bi dur, we nu mwa ne sino mo Betlehem buk wa an we re, nu yo wa yekam gato ma ne sem mo nde, nu mwa ne ses sino.
8Mo Betlehem ne, ye gato mewa domba, án mewa domba mo nden karowa Betlehem. Sane noru ne sa, án sem mo nden mewa án bi domba kadit suge krok e ne.
9Su noru ne, án gensu malaikat dik yo ma ku án. Malaikat ne ma sa, tepsu sukru sye gato rer-rik kadit Yefun Allah rer ku bur. Sane yé bok ne sino nyu ndo nde.
10Sane, malaikat ne ki nai án do, "Nin nyu nde. Ji ma wa ji frot Yefun Allah bi suktaru nai nin. Suktaru ré ndo wai o re, bere nin si yé mwa ne sino mit at wa sukdu ré.
11Su kam ré, mo Daud bi nat-i ne, nggon dik yo kem su Pa gato bere ós men. Pa ne anato Yekwesu gato Yefun Allah syogat ma mo bur ré wa nai men yetu kadit sukye ete jowa men. Yefun Allah bes Pa ne gum Kristus.
12Bere nin jam Pa ne sare: yé nggwot pabom ne su san det, ete yé grem Pa ne sem mo suk gato ka sa ndurbe, gato sagana yé grem suksi bi sugit mó. Nin do ku pabom ne sa, nin jam do, suk gato ji ki ne sangge."
13Ye gato mewa domba ne gensu malaikat yaino ma ti su malaikat ne. Malaikat mwa ne un Yefun Allah, án ki do,
14"Men bes Yefun Allah gato kem mo pe gato kok mo gu ne gum kok sye wai o et. Yefun Allah, Nan ben nje gato Nan dakai jimnotku ne kem not mo bur ré et."
15Malaikat mwa ne un Yefun or, malaikat satu mu mo gu kadit yé gato mewa domba ne. Malaikat mu, orge yé gato mewa domba ki nai yu do, "Men mu mo Betlehem et. Men mu me suk gato Yefun Allah tarubot An bi malaikat ne et."
16Sane yé bok gato mewa domba ne mu kamas mo Betlehem. Yé bok ne mu kom mone sa, án ku Maria si Yusuf, án me pabom mone dom. Pabom ne sem mo suk gato ka sa ndurbe.
17Yé gato mewa domba ne sokme pabom or, án mu kadit pe ne, án nukbot suk gato malaikat ki nai án subot pabom ne.
18Yé mwa gato jam án bi sukdu ne yeket sukdu ne.
19Sarewo Maria napawa sukdu ne pe, mom jimnutbot suk mwa ne pe sor.
20Yé gato mewa domba ne, án mu satu mo án bi nat-i mo Betlehem de nden. Án do mu sa, án un Yefun Allah, án bes Yefun gum kok sye mo suk mwa gato malaikat ki nai án si suk mwa gato án me su án gro dom. Suk mwa ne bor tepsu sukdu gato malaikat ki nai án re.
21Maria kem su Pa ne or, kam munggwo rek eteyo, yesu mo nu ari bisunat Pa ne. Yesu ne tot Pa da naprut wé, ete Maria si Yusuf kendo Pa ne gum do, Yesus, tepsu gum gato malaikat ki nai Pa bi im sugato Pa bi im yo pe Pa nde tó.
22Yé syak Maria kadit mom bi nu pe tepsu bi kam-i gato Musa krom mo an bi sukduno-i ne, orete Maria syesyar, ete Maria si Yusuf mu mo Yefun Allah bi nu mo Yerusalem. An we gwat Pa ne mu mo Yefun Allah bi nu subere an we kadum Pa ne nai yé mwa, subere yé mwa ne jam do, Pa ne sok mo Yefun Allah bi rus-i.
23An we kadum Pa sane, we yé krom mo Yefun Allah bi sukdu do, "Pa yebris gato bi im kem su futmo ne, pa bi im kadum mo yé mwa gwem, subere yé mwa ne jam do, pa ne sok mo Yefun Allah bi rus-i."
24Sugane dom, an we gwat ndabu ge we yo, ndam gir ge we yo. An we gwat ndam ne wa syo nai yesu gato ben suk mo Yefun Allah bi nu, subere yesu ne gre mo bot, tepsu yé krom mo Yefun Allah bi sukdu.
25Maria si Yusuf gwat Yesus ma kom mo Yerusalem, sugane yetu ge dik yo gato gum do Simeon kem mo kota Yerusalem ne. Simeon ré, an ben sukndo, an ben suk ri tepsu Yefun Allah mit, we an jammo Yefun. An eswa kam gato bere Yefun Allah syogat Yekwesu ma mo bur Israel gato nai ye Israel wé kadit sukye. Yefun Allah Gen sisu Simeon pe.
26Yefun Allah Gen ki bi sukdu-i nai Simeon do, "Nan yo kwop nde tó, bere nan me Yekwesu gato Yefun Allah tom do, An syogat ma mo bur ré wa nai yetu kadit sukye ete jowa yetu ne et."
27Yefun Allah Gen gwat Simeon mu mo Yefun Allah bi nu. Kam gane Maria si Yusuf mu mo Yefun Allah bi nu dom. An we si Pa mu wa kadum Pa tepsu Yefun Allah bi sukdu-i. An we gwat Pa mu kom mo Yefun Allah bi nu de nden sa,
28Simeon nai Pa ne ma kot tak de gwem, ete Simeon un Yefun Allah. Simeon ki do,
29"Yefun Allah, ji bi Yekwesu, suk gato Nan tom su ji, ji me bor it anare. Sane ji, gato gum pakwerut wa Nan, ji fro wa ji kwop sisu ji mit ndo it anare.
30Ji me Pa ré su ji gro re. Ji me Pa ré gato Nan bes wa nai men yetu wé kadit sukye.
31Nan fro Pa gato ós men yetu ré wa yewis mwa ne mo bur ré sino.
32Bere Pa ré tepsu sukru gato rer ku os wa yewis yi gato jam nde Yefun, Pa ki rer subot Nan, Yefun Allah bi os-i, subere yewis yi ne jammo Nan. Bere Pa ré ben Nan bi rus-i, gato ye Israel ne, subere án gum kas mo yé mwa neya re."
33Pa ne bi im si bi ai yeket suk gato Simeon ki subot an we bi pa ne.
34Orete Simeon ki suk su Yefun Allah subere Yefun ben sukndo su an we. Simeon ki suk su Yefun or, Simeon ki nai Pa bi im gato Maria ne do, "Pa ré sye yo, ye Israel mwa bariwa An, sane bere yé mwa ne ku sukye mone. Wo ye Israel deyo iwa An, sane bere yé gato iwa Pa ne ku suk gato ndo, bere yé ne mbau to kapyo mone. Yefun Allah syogat Pa ré ma wa kadum Yefun Allah bi suktinggi nai men yetu, wo bere yé mwa bariwa Pa ré re.
35Yé gato bariwa jammo Pa ré, bere Yefun Allah ben yé ne bi sukjimnut bor wa yé mwa jam. Bere nan dom, nderku nggwa subot Pa ré, tepsu nyom syek nan mit, bere nan kwabom dek bot Pa ndo nde."
36Nggongras ne anato nggon nabi, gato ki Yefun Allah bi suktaru nai nje jam. Nggongras ne gum do Hana, Fanuel bi mam. Mom sok mo ye Israel bi wis dik yo gato gum do Asyer. Hana ré, nggongras rok it. Mom kra kom mo tahun mufit sor, ete mom bi ya kwop re.
37Sane Hana kem nggonna sor, Hana kaim sye tepsu kom mo tahun musyu munggwo sop at. Nggonna ré, noru nombrak mom yo mu kadit Yefun Allah bi nu-i nde, mom un Yefun Allah, mom benadi, mom mewa nggwa kadit sugit yei, subere mom ki suk su Yefun.
38Sane Hana ma ku Maria si Yusuf mone sa, Hana ki ndo mo Yefun Allah wa an we bi Pa ne, ete mom nukbot Pa ne nai yé mwa mone gato eswa kam gato Yefun Allah syogat Yekwesu ma wa nai nje mo Yerusalem wé kadit sukye.
39Yusuf si Maria benbot suk mwa gato yé krom mo Yefun Allah bi sukdu mo Yerusalem ne, orete an we satu mu mo an we bi kota Nazaret mo bur Galilea.
40Mone Pa ne sye, Pa kaim nggi o, Pa jam suk mwa wai o. Yefun Allah bi sukjimnut sye kas subot Pa ne, Yefun Allah mewa An.
41Tahundik-tahundik Yefun Yesus bi yenggras mu mo Yerusalem wa an we si nje konwa Kam Sye Waiket.
42Sane, Yefun Yesus kaim sye tepsu kom mo tahun musyu dik sop we sa, An si An bi im si bi ai mu mo Yerusalem wa án sino konwa kam sye ne, sagana An bi yenggras we ben ne.
43Kam sye ne or, Yefun Yesus bi im si bi ai satu mu mo an we bi nat-i. An we do mu saresa, an we bi Gan, gato Yefun Yesus ne kem mo Yerusalem tó, wo Pa bi im si bi ai jam nde Pa kem mori.
44An we gendo Pa simo yé mwa ne mu sino. Sane an we mu kam no dik, orete an we meret Pa mo an we bi nji, an we bi mben si an we bi yesyim gato si án mu sino.
45An we meret Pa ware, an we yo ku Pa ne nde. Sane an we satu mu mo Yerusalem subere an we meret Pa mone.
46An we meret Pa mone sor kom mo kam gri rek or. Kam gri rek, orete an we ku an we bi Pa mo Yefun Allah bi nu de mo ros de mit, mo pe gato yeguru agama duno nje. Pa kem su ye Yahudi bi yeguru. Pa syaretwa yeguru ki bi sukdu-i, Pa ndo yeguru subot kwayo-kwayo dom.
47Yé mwa mone gato syaretwa Pa ki bi sukdu-i ne yeket. Yé mwa ne yeket Pa do, Pa jam suk mwa. Suk gato yeguru ndo mo Pa ne, Pa jam or re.
48Pa bi im si bi ai ku an we bi Pa sa, an we yeket, we Pa si yeguru bok yo kem mone, ete Pa bi im ki nai Pa do, "Yesus, Nan ben sukye wa men ka we ré wa suma ne? Ji si Nan bi ai meret Nan ware, men ka we kwabom dek bot nan ndo nde go!"
49Yefun Yesus ki nai An bi im si bi ai do, "Nin ka we meret Ji wa suma ne? Nin ka we nutbot sisu ndo sa, bere nin ka we jam do, Ji kem mo Ji bi Ai, gato Yefun Allah ne bi nu re."
50Sarewo an we jam nde Yefun Yesus bi sukjimnut ne.
51Orge Yefun Yesus simo An bi im si an bi ai satu mu mo Nazaret, ete An jammo An bi im si an bi ai petok sor. An bi im napawa suk mwa gato Yefun Yesus ben ne pe.
52Sane Yefun Yesus sye o, An jam suk mwa wai o. Yefun Allah iwa An, yetu dom iwa An.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel