Alkitab Mobile SABDA
[VER] : [ABUN]     [PL]  [PB] 
 <<  Lukas 22 >> 

1Sane, ye Yahudi konwa kam sye dik yo, gato yé kendo gum do Waiket ne. . Ye Yahudi bi kam sye bi kam do futmo ne, ye Yahudi kon roti gato yo it nde. Sane karowa kam sye ne sa,

2yekwesú mo Yefun Allah bi nu si yeguru sino fro os wa án gu Yefun Yesus kwop apre, subere yé mwa jam nde. Yekwesú bok ne nokwa yé mwa maskwa án mone anato án fro os ne su apre.

3Orge biris bi yekwesu bok nggwa mo Yudas, gato yé kendo do Iskariot. Yudas sok mo Yefun Yesus bi pakon musyu dik sop we ne. Biris bi yekwesu ne bok nggwa mo Yudas,

4sane Yudas mu ku yekwesú mo Yefun Allah bi nu si ye gato mewa Yefun Allah bi nu. Yudas ku yé ne sa, yé bok ne kibot os yo subere Yudas tepsu yeketut gato meret os wa gwat yeko ma wa but Yefun Yesus.

5Yekwesú ne jam Yudas bi sukdu ne sa, yekwesú ne iwa wai o re, sane án tom su Yudas do, bere án syo sugum nai Yudas.

6Sane Yudas imo, ete Yudas meret os tepsu yeketut gato gwat yeko ma wa but Yefun Yesus. An meret os subere yeko but Yefun Yesus mo yé mwa gwem nde, subere yé mwa jam nde.

7Ye Yahudi bi Kam Sye Waiket ne, bi kam dofutmo ne, yé kon roti su bibit roti nde, yé git roti gane, roti gato yo it nde. Su kam gane, sagana yé Yahudi gu domba gan wa án git. Ye Yahudi konwa kam gato án bi amui syesyar kadit bur Mesir suga nyim tuya. Su kam gane

8Yefun Yesus syogat Petrus si Yohanes mu fro suk. Yefun Yesus ki nai an we do, "Nin ka we mu nyim. Nin ka we fro suk wa men git sino su kam sye ré et."

9An we ndo mo Yefun Yesus do, "Men ka we fro suk mo nat u ne?"

10Yefun Yesus ki do, "Sare, bere nin ka we mu nyim, nin ka we sok mo kota yo, nin ka we ku yebris dik yo gato gwat syur su sukbo. Nin ka we simo ye ne mu kom mo nu gato an sok mone.

11Orete nin ka we ki nai yenggras gato bi nu ne do, 'Yeguru ndek mo nan do, An si bi pakon bere konwa Kam Sye Waiket ré, sane men git mo gumwak u ne?'

12Bere yenggras ne kadum gumwak sye dik yo mo kwatka mo nim nai nin ka we. Mo gumwak mit ne, yé fro meja si bangko pe re. Sane nin ka we fro suk mwa wa men git mone et."

13Sane pakon ge we ne mu, ete an we ku suk mwa ne sagato Yefun Yesus ki su an we ne. Sane an we fro sugit wa konwa Kam Sye Waiket mone.

14Yé fro suk mwa wa Yefun Yesus si An bi pakon git sugit mo nu ne sa, Yefun Yesus si An bi pakon ma mone, ete án kem ga wairi wa meja de wa án git sugit sino.

15Orete Yefun Yesus ki nai An bi pakon do, "Ji ku sukye nde tó, Ji mit iwa ji si nin konwa Kam Sye Waiket ré sino et.

16We Ji ki sare do, Ji yo si nje git sugit mo Kam Sye Waiket o nde yei kom mo kam sari ne ma. bere Yefun Allah nai nin yetu wé kadit sukye, ete An jowa nin tepsu nin bi Yekwesu mo suk gato Ji ben ne or wé eteyo, bere Ji git o mone.

17Orete Yefun Yesus nai mok su nau anggur, ete An ki do, "Ndo mo Nan, Yefun Allah wa nau gato Nan syo nai men ré." Orete Yefun Yesus ki nai An bi pakon do, "Nin nai mok ré, nin gedik-gedik da mo et."

18Ji ki sare do, Ji yo da nau ré o nde yei, kom mo kam gato Yefun Allah jowa An bi rus-i mo nat be ne tepsu Yekwesu ne yo, bere Ji da o mone."

19Orete Yefun Yesus nai roti. An ki do, "Ndo mo Nan, Yefun Allah wa roti gato Nan syo nai men ré." Or o An syat roti ne, An syo nai An bi pakon. An syo nai An bi pakon saresa, An ki do, "Ji ku anare. [Ji syo Ji kaim ma kwop tepsu suktot wa sukibit gato nin ben ne. Sane nin benbot suk gato Ji ben ré subere nin napawa Ji."

20Sane dom, án sino git sugit, or Yefun Yesus nai sukbo su nau anggur, ete An ki do, "Nau gato ji sye wa nin ré anato tepsu Ji dé gato bere sye ne subere Ji kak os gato be wa Yefun Allah nai nin gum sok mo An bi rus-i sagato An tom ne."]

21"Mban! Yeketut gato meret os wa gwat yeko ma wa but Ji, an si Ji kem mo meja de ré. An si Ji git sugit sino anare.

22Yetu bi Pa to Ji ré bere kwop, sagato sukdu gato Yefun Allah tom su it ne. Sarewo ye gato meret os wa gwat yeko ma wa but Ji bere ku sukye."

23Sane Yefun Yesus bi pakon bok ne ndobot yu do, "Kadit men ré te, je u anato tepsu yeketut ré ne?"

24Or o Yefun Yesus bi pakon duwer yu subot ye gato gum kok mo án sino.

25Yefun Yesus ki nai An bi pakon do, "Yekwesu gato jowa nje mo bur ré, yekwesu ne ben bi suk-i krat, án syogat nje gato án jowa ne ben suk ket án i sor. Orge yekwesu ne ki do, 'Ji sa, mewa ji bi rus-i sisu ndo.'

26Sarewo nin ré, nin ben nin bi suk-i sane nde. Ye gato gum kok wai mo nin yo, bere an bes an nggwa tepsu yepasye nde, wo an ben an nggwa tepsu pa wokgan gato gum wok mo bur. Sane dom ye gato jowa nje yo, bere an bes nggwa kok nde, wo an ben suk tepsu pakwerut wa an bi rus sino et.

27Ye gato gum kok wai ne anato ye gato kem wa git sugit bado, pa gato ós wa gwat sugit ma ne, e? Men sino jam do, ye gato kem git sugit anato gum kok wai kadit pa gato an syogat gwat sugit ma ne. Sarewo Ji ben Ji bi suk-i su nin ré, Ji syogat nin ós Ji tepsu yepasye nde, wo Ji ós nin, Ji tepsu pakwerut wa nin.

28Nin ré, nin sisu Ji pe mo sukye sino gato Ji ku ne.

29Sane bere Ji bes nin gum yekwesu wa jowa nje. Ji bi Ai bes Ji gum Yekwesu wa jowa An bi rus-i, sane Ji waii bes nin gum yekwesu dom.

30Bere kam sari ne ma mo pe gato Ji jowa yé bok ne sino, nin sisu Ji, nin si Ji kem mone. Men git sino mo pe gato Ji fro wa yekwesu ne. Nin gum yekwesu, sane bere nin ndobot ye Israel bi yewis ge musyu dik sop we mone."

31Yefun Yesus ki do, "Simon, Simon, nan jammo Ji bi sukdu ré et! Biris bi yekwesu ndek mo Yefun Allah do, an ben sukye nai nin sino, tepsu ye tut fas gro.

32Sarewo Simon, Ji ndek Yefun Allah wa ós nan, subere nan onyar kem pe mo Ji mo sukye ne, subere nan misyar Ji nde. Kapre nan ges mo os ibit mo sukye ne yo, bere nan kwet kadit, ete nan duno nan bi nji mo Yefun Allah bi rus-i, subere án onyar kem mo Ji nggi wai kadit nyim ne o re."

33Sane, Petrus ki do, "Yenggras, Ji bi Yekwesu, pe gato Nan mu mó yo, ji sisu Nan. Yé but Nan ke, yé sok Nan mo sel ke, yé gu Nan kwop yo, ji kwop o, ji mbau o, ji sisu nan sor."

34Yefun Yesus ki do, "Petrus, Ji ki sare do, ber noru ré, ndam kokor yo ké nde tó, nan rewa Ji, bere nan ki do, nan jam nde Ji sor kom mo wam gri re."

35Orge Yefun Yesus ndo mo An bi pakon do, "Tomga u, Ji syogat nin mu ne, Ji ki do, nin gwat sugum nde, nin gwat yu nde, nin gwat sepatu nde. Sugato nin mu ne te, nin yewa suk yo, bado?" Pakon bok ne ki do, "Nde re."

36Orge Yefun Yesus ki do, "Sarewo su ré yo, nin ben suk tepsu tomga nyim ne o nde. Nin bi sugum mó yo, nin gwat sor. Nin bi yu mó yo, nin gwat sor. Nin yo ku nyom gato ot nden wé yo mo nde yo, nin mu so nin bi sansun subere nin ku sugum, ete nin so nyom dik yo wa nin gwat.

37We, Ji ki sare do, suk gato ye krom mo Yefun Allah bi sukdu bere bor re. Ye krom sare do, 'Yé nut do, An anato ye gato ben sukibit.' Mo Yefun Allah bi sukdu ne ye krombot Ji dakai. Bere suk gato ye krom ne bor mo Ji."

38Yefun Yesus bi pakon ki do, "Yenggras, Nan me men bi nyom gato ot nden wé, nyom we anare." Yefun Yesus ki do, "Tep re. Men ki subot suk ne o nde."

39Yefun Yesus si An bi pakon git sugit or re, sagana Yefun Yesus mu kadit kota mu nden mu mo bobuk Zaitun. Sane, Yefun Yesus si An bi pakon mu mone sino.

40Án sino mu kom mo pe ne sa, Yefun Yesus ki nai An bi pakon do, "Nin ndekwa Yefun Allah mewa nin subere suk yo tik nin mit ete ben nin misyar Ji nde."

41Yefun Yesus ki suk ne or, An mu ko gan kadit An bi pakon, ete An tu An umsu, An ki suk su Yefun Allah.

42Yefun Yesus ndek mo Yefun Allah do, "Ji bi Ai o, Nan imo yo, Nan nai Ji wé kadit sukye gato bere Ji ku ré et. Sarewo Nan jammo suk gato Ji iwa ne nde, wo Nan dakai fro pe ne tepsu Nan dakai imo. Bere Ji benbot suk gato Nan imo, Ji yo ben ket Ji i nde."

43[Malaikat ge dik yo mu kadit gu ma ku Yefun Yesus, ete ben An nggi.

44Yefun Yesus kwabom dek subot sukye gato bere An ku ne, sane Yefun Yesus ki suk su Yefun Allah sisu sangge sane sor, An babrut ndo nde. An babrut ne sye mo bur tepsu yetu dé.]

45Yefun Yesus ki suk su Yefun Allah, or An ti satu, ete An satu ma ku An bi pakon. An do mu kom mo An bi pakon ne sa, pakon ne sem re. Yefun Yesus bi pakon jimnotbot Yefun teker ware, án ge bok ne kaim rere ete án sem re.

46Yefun Yesus ki nai An bi pakon do, "Nin sem wa suma ne? Nin sun se! Nin ndekwa Yefun Allah mewa nin subere suk yo tik nin mit ete ben nin misyar Ji nde."

47Yefun Yesus ki sukdu saresa, yé mwa ma mone. Yefun Yesus bi pakon dik yo kadit pakon musyu dik sop we gato gum do Yudas, Yudas ne mu nyim mo os wa gwat yeko ne ma mo Yefun Yesus. Yudas ma ku Yefun Yesus sa, Yudas baput mo Yefun Yesus kwanke.

48Sarewo Yefun Yesus ki nai Yudas do, "Yudas, nan ma ku Ji, nan baput mo Ji tepsu men ka we yesyim ku yu. Ondewo nan anato yeketut gato gwat yeko ré ma wa but Yetu bi Pa to Ji ré go!"

49Yefun Yesus bi pakon deyo me do yeko ne ma wa but Yefun Yesus sa, án ndo mo Yefun Yesus do, "Yenggras, men bi Yekwesu te, men gu yeko ré su men bi nyom e?"

50Orge pakon dik yo sap pakwerut dik yo dabe syim ge toko wé re. Pakwerut ne ben suk wa yekwesu gato gum kok wai mo Yefun Allah bi nu.

51Pakon sap pakwerut ne dabe toko wé sa, Yefun Yesus ki do, "Tep it!" Orete Yefun Yesus syimtok pakwerut ne dabe, Yefun Yesus ben pakwerut dabe ne kom satu re.

52Orge Yefun Yesus ki nai yekwesú mo Yefun Allah bi nu, si ye gato mewa Yefun Allah bi nu ge bok yo, si ye Yahudi bi yepasye gato ma wa but An mone. Yefun Yesus ki nai yé mwa ne do, "Te nin nut do Ji ré, yekwesu wa yeko gato futma wa gu nin anato nin gwat nyom si kwekoi ma wa nin but Ji su ne bado?

53Kamdik-kamdik Ji si nin mo Yefun Allah bi nu de mo ros de mit ne, wo nin yo but Ji nde. Sarewo ye gato biris bi yekwesu jom ne ben an bi suk-i su noru anato nin ma but Ji su noru ré."

54Orge yeko ne but Yefun Yesus, yé gwat Yefun Yesus mu mo yekwesu gato gum kok wai mo Yefun Allah bi nu ne bi nu-i. Petrus ndar boribot Yefun Yesus.

55Petrus waii kom mo nu ne sa, an me yé gre bot mo nu de subere bot kam is án. Petrus mu mone, an si nje kem karowa bot ne.

56Nggon kwerut dik yo ma mone. Nggon ne me Petrus kem karowa bot gato ru mone. Nggon ne sokwa Petrus pe, ete mom ki nai nje mone do, "Ye gare simo Yesus fe!"

57Sarewo Petrus rewa sukdu ne. An ki do, "Ji jam nde Ye ne, sangge."

58Bergan yo o, yetu ge dik yo o me Petrus, ete an ki nai Petrus do, "Nan sa, nan anato Yesus bi pakon ge dik yo." Sarewo Petrus ki do, "Ji nde re."

59Bergan o, jam dik yo o bayok, yetu ge dik yo o ki nggi do, "Sangge ye ré simo Yesus dom, we an si Yesus anato ye Galilea sino."

60Sarewo Petrus ki do, "Ji jam nde suk gato nan ki ne re. Ji jam nde sangge kai." Petrus do ki sukdu ne saresa, ndam kokor ké.

61Sugane Yefun Yesus brek sokme Petrus mone. Yefun Yesus sokme Petrus sa, Petrus napakom sukdu gato Yefun Yesus ki nai an nyim ne do, "Ndam kokor yo ké nde tó, nan rewa Ji wam gri re."

62Orete Petrus syesyar mu nden, Petrus wo ndo nde.

63Yé gato mewa Yefun Yesus ne, yé bok ne gwa Yefun Yesus mone, yé ne siker Yefun dom.

64Án but san det wa Yefun Yesus gro subere Yefun Yesus yo me suk nde, ete án gwa Yefun Yesus wam bok yo. Án gwa Yefun Yesus sane, án ndo mo Yefun Yesus gat do, "Nan, ye gato tepsu yenabi sangge yo, Nan ye gato jam suk rer, sane Nan ki ye gato gwa Nan ré gum et."

65Yé bok ne kabor Yefun Yesus ket kwa bok yo o dom.

66Ik, nyotkwo, ye Yahudi bi yepasye e, yekwesú mo Yefun Allah bi nu si yeguru mwa ne sum sino. Yé ne sum sino, orete yé gwat Yefun Yesus ma mo án gwem wa án kibot.

67Yepasye ne ki nai Yefun Yesus do, "Nan anato tepsu Yekwesu gato Yefun Allah syogat ma mo bur ré wa nai men yetu kadit sukye ete jowa men, bado? Nan ki mó et." Yefun Yesus ki nai yepasye bok ne do, "Ji do ki nai nin yo, bere nin yo jammo suk gato Ji ki ne nde.

68Ji waii ndobot nin yo, bere nin yo ki sukdu satu ma nde.

69Wo kadit kam ré bere Ji, gato Yetu bi Pa kem tak Yefun Allah gato nggi wai ne de syim ge."

70Sane yepasye bok ne sino ndo mo Yefun Yesus do, "Sane te, nan anato Yefun Allah bi Gan ne bado?" Yefun Yesus ki do, "Sukdu gato nin ki ne sangge."

71Sane yepasye ne ki do, "An dakai ki do, An anato Yefun Allah bi Gan. Men yo mitwa ye yi yo ma ki sukdu subot An o nde. Men sino jam An bi sukdu ne it."



 <<  Lukas 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel