1Sugane ye Roma jom ye Yahudi bi bur. Sane, ye Roma bi yekwesu Kaisar Tiberius jowa ye mone sa, an bes Pontius Pilatus gum gubernur mo bur Yudea. Kaisar bes Herodes jowa nje mo bur Galilea dom. Herodes bi nji, Filipus jowa nje mo bur Iterea si Trakhonitis. Lisanias jowa nje mo bur Abilene. Kaisar jom nje mo ye Yahudi bi bur mu kom mo tahun musyu dik sop mek sa,
2yekwesu gato gum kok wai mo Yefun Allah bi nu gum do Hanas si Kayafas. Su tahun gane, Yefun Allah ki suktaru nai Yohanes, gato Zakaria bi pa ne. Yohanes jam sukdu kadit Yefun Allah mo pe gato kwe yo kom mo nde.
3Sane Yohanes mubot nat mwa mo Syur Yordan ne sino. Yohanes kibot Yefun Allah bi suktaru mone, an ki nai nje gato ma mo an do, "Nin kwet kadit sukibit gato nin ben ne, nin jammo Yefun, ete nin ma wa ji ras nin mo syur subere Yefun Allah yo maskwa nin mo sukibit mwa gato nin ben ne o nde, tepsu An tot sukibit ne wé kadit nin re."
4Suk gato Yohanes ben ne tepsu sukdu gato yenabi Yesaya krom mo bi buku su kam nyim ne sare do, "Mo pe gato kwe yo kom mo nde, ye yo saiye do, 'Men fro os gato ndo wa Yefun, men bi Yekwesu ne se! Men duk os wa An muket se!
5Us mwa ne sino Yefun Allah krer bur wa sane sor ya, banbo mwa ne sino Yefun Allah ben ga, subere os ne ndo. Os gato kwek-kwak Yefun Allah ben ri, os gato jok mwa mó, Yefun Allah fre er, subere os ne ndo.
6Yetu mwa mo bur ré sino, bere án me Yekwesu gato Yefun Allah syogat ma wa nai men wé kadit sukye subere men kem ndo to kapyo mato kapyo.' "
7Yé mwa ma mo Yohanes subere Yohanes ras án mo syur. Sarewo Yohanes ki nai yé mwa gato ma ne do, "Nin yé gato kidar suk nggi, nin tepsu kwis jan, nin nut do, nin ma wa ji ras nin mo syur, bere ós nin titi fro kadit Yefun Allah bi sukmaskwa mo sukibit gato nin ben ne bado? Sane nde, nin ma wa ji ras nin mo syur sor nde, wo
8nin ben suk gato ndo sor, subere yé jam do, sangge, nin kwet kadit sukibit gato nin ben ne, ete nin jammo Yefun it. Nin nut do, nin bi amui mo Abraham, Ji ki sare do, Yefun Allah nggiwa ben jok bok ré tepsu Abraham bi dat-i. Sane nin dom tepsu Abraham bi dat-i, bere yo ós nin nde.
9Wo nin ré tepsu kwe gato yo bo ndo nde. Su ré yo, Yefun Allah fro bi mbam wa gwa kwe ga sane wé, Yefun Allah gwa mo i-brot kai sor. Yefun Allah fro wa syo sukye nai ye gato yo kwet nde, tepsu ye gwa kwe gato yo bo nde ne, orete ye syo bot git wé re."
10Yé mwa ne ndo mo Yohanes do, "Sane, men ben suk sato suma ne?"
11Yohanes ki do, "Ye gato bi san sun we mó yo, ye ne syo dik yo nai ye gato bi san sun yo mo nde. Sane dom, ye gato bi sugit mó yo, ye ne syo sugit nai ye gato bi sugit yo mo nde."
12Ye gato nai sugum kadit nje wa pemerintah ge bok yo ma mo Yohanes, subere Yohanes ras án mo syur. Orge án ndo mo Yohanes do, "Yeguru, men ben suk sato suma ne?"
13Yohanes ki do, "Nin mu nai sugum kadit nje yo, nin nai sugum tepsu pe gato pemerintah fro ne, nin nai wai kadit ne nde."
14Yesukmise bok yo ma mo Yohanes dom. Yesukmise ne ndo mo Yohanes do, "Men ré, men ben suk sato suma ne?" Yohanes ki nai yesukmise bok ne do, "Nin wergat nje nde, nin ben nje nyu subere yé syo sugum nai nin nde. Nin ndak nje daret subere yé nokwa nin ki án gum ibit subere án syo sugum nai nin nde. Sugum gato nin ku tepsu nin bi kamba ne, nin nut do tep it anane, nin wergat ye yi subere nin nai yé ne bi sugum dom nde."
15Yé mwa gato syaretwa Yohanes ki bi sukdu-i nut mo án mit do, "Te, Yefun Allah syogat Yohanes ma mo bur ré wa nai men yetu kadit sukye ete jowa men bado? Te, Yohanes ré Yekwesu gato men eswa ne, bado? Te, Yefun Allah bes Yohanes ré gum Kristus, bado?"
16Yohanes ki nai yé mwa mone sino do, "Ji anato ras nin mo syur, sarewo bere Ye gato gum kok sye wai kadit ji waii ma bori. Sane ji iwa ben suk wa An yo, bere ji yo tepsu nde, ji gum wok teker mu bur ware. Bere ji gum yo tep wa ji sombok jamtu mo An bi sepatu dom nde. Ye gato gum kok sye wai kadit ji ne bere An syogat Yefun Allah Gen bok nggwa mo nin, ben sato An ras nin mo Yefun Allah Gen, tepsu An ras nin mo bot.
17An fro nggwa wa An wat yé gato ben sukndo kadit yé gato ben sukibit, tepsu ye gato ben nggwe wat sugit dor kadit sukkwik. Sugit ne An grem mo pe gato ndo, wo sukkwik ne An syo bot git wé, mo bot gato yo te mo nde."
18Yohanes ki sukdu mwa o subot os ndo gato Yefun Allah fro wa men yetu, subere yé mwa ne jammo sukdu ne.
19Sarewo Yohanes ndantom Herodes gato jowa nje mo bur Galilea ne dom. Yohanes ndantom Herodes wam bok yo do, "Nan kra su Herodias, gato nan bi nji bi nggon ne nde. Nan kra su Herodias kadit nan bi nji nde." Yohanes ndantom Herodes mo sukibit bok yo o gato Herodes ben ne dom.
20Sane Herodes maskwa ket Yohanes, ete Herodes ben sukibit yo o do, Herodes syogat an bi yesukmise grem Yohanes mo sel.
21Yohanes ras yé bok ne sino mo Syur Yordan or sa, Yohanes ras Yefun Yesus mo Syur Yordan dom. Yefun Yesus mu nden kadit syur, ete Yefun Yesus ki suk su Yefun Allah saresa, gu ben sato det,
22ete Yefun Allah Gen is ma mo An. Yefun Allah Gen ne is ma su kaim sato ndabu. Orge yé mwa ne jam Yefun Allah ki sukdu kadit gu sare do, "Nan anato Ji bi Gan. Ji bi sukjimnut sye kas subot Nan. Ji iwa Nan ndo nde."
23Yefun Yesus sye karowa kom mo tahun musyu gri ne, ete An mu ben suk gato An bi Ai syogat An ma wa ben ne. Yé nut do, Yefun Yesus bi ai mo Yusuf. Yé jam do, Yusuf bi ai mo Eli;
24Eli bi ai mo Matat; Matat bi ai mo Lewi; Lewi bi ai mo Malki; Malki bi ai mo Yanai; Yanai bi ai mo Yusuf;
25Yusuf bi ai mo Matisya; Matisya bi ai mo Amos; Amos bi ai mo Nahum; Nahum bi ai mo Esli; Esli bi ai mo Nagai;
26Nagai bi ai mo Maat; Maat bi ai mo Matisya; Matisya bi ai mo Simei; Simei bi ai mo Yosek; Yosek bi ai mo Yoda;
27Yoda bi ai mo Yohanan; Yohanan bi ai mo Resa; Resa bi ai mo Zerubabel; Zerubabel bi ai mo Sealtiel; Sealtiel bi ai mo Neri;
28Neri bi ai mo Malki; Malki bi ai mo Adi; Adi bi ai mo Kosam; Kosam bi ai mo Elmadam; Elmadam bi ai mo Er;
29Er bi ai mo Yesua; Yesua bi ai mo Eliser; Eliser bi ai mo Yorim; Yorim bi ai mo Matat; Matat bi ai mo Lewi;
30Lewi bi ai mo Simeon; Simeon bi ai mo Yehuda; Yehuda bi ai mo Yusuf; Yusuf bi ai mo Yonam; Yonam bi ai mo Elyakim;
31Elyakim bi ai mo Melea; Melea bi ai mo Mena; Mena bi ai mo Matata; Matata bi ai mo Natan; Natan bi ai mo Daud;
32Daud bi ai mo Isai; Isai bi ai mo Obet; Obet bi ai mo Boas; Boas bi ai mo Salmon; Salmon bi ai mo Nahason;
33Nahason bi ai mo Aminadab; Aminadab bi ai mo Admin; Admin bi ai mo Arni; Arni bi ai mo Hezron; Hezron bi ai mo Peres; Peres bi ai mo Yehuda; Yehuda bi ai mo Yakub;
34Yakub bi ai mo Isak; Isak bi ai mo Abraham; Abraham bi ai mo Terah; Terah bi ai mo Nahor;
35Nahor bi ai mo Serug; Serug bi ai mo Rehu; Rehu bi ai mo Peleg; Peleg bi ai mo Eber; Eber bi ai mo Salmon;
36Salmon bi ai mo Kenan; Kenan bi ai mo Arpaksad; Arpaksad bi ai mo Sem; Sem bi ai mo Nowak; Nowak bi ai mo Lamek;
37Lamek bi ai mo Metusalah; Metusalah bi ai mo Henok; Henok bi ai mo Yared; Yared bi ai mo Mahalaleel; Mahalaleel bi ai mo Kenan;
38Kenan bi ai mo Enos; Enos bi ai mo Set; Set bi ai mo Adam; Adam bi ai mo Yefun Allah.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel