Alkitab Mobile SABDA
[VER] : [ABUN]     [PL]  [PB] 
 <<  Lukas 7 >> 

1Yefun Yesus ki An bi sukdu bok ne nai yé mwa ne or, An mu kadit pe ne, ete An mu mo kota Kapernaum.

2Ye Roma bi yesukmise bi yesu ge dik yo, an kem mo Kapernaum. Yesukmise ne bi pakwerut dik yo gato an jimnotku sye teker. An bi pakwerut ne i de, bergan kwop rok.

3Yesukmise bi yesu ne jam Yefun Yesus ma mo Kapernaum sa, yesukmise ne syogat ye Yahudi bi yepasye ge bok yo gwat an bi suktaru mu wa kar Yefun Yesus ma, subere Yefun Yesus ma wa ben an bi pakwerut ne ge kadit bi suki ne.

4Ye Yahudi bi padosye do ma mo Yefun Yesus sa, padosye ne ndek gat do, "Yesukmise bi yesu ben sukndo wa men, sane Nan ma ós an or et.

5Yesukmise ré jimnot men ye Yahudi, an ós men nggo men bi nu ari dom."

6Sane Yefun Yesus si án mu sino. Yefun Yesus si án karowa yesukmise bi yesu bi nu ne sa, yesukmise ne syogat an bi yesyim mu ki nai Yefun Yesus do, "Yenggras, ji yo syimfar Nan ma mo ji bi nu o nde, we ji damen wa Nan sye teker.

7Sane anato ji yo ma ku Nan nde, ji gum yo tep wa Ji ku Nan nde. Sane Nan ma nde, wo Nan syogat suki ne titi wé kadit ji bi pakwerut. Nan ki kadit pe gato Nan ti more sor, we ji jam do Nan ki suk mone, bere ji bi pakwerut more ge re.

8Sane ji dom, ji jammo suk gato ji bi yekwesu syogat ji ben ne. Ji bi pa yesukmise jammo ji dom. Ji syogat pa yemsok dik yo do, 'Nan mu tom!' yo, an mu re. Ji syogat pa dik yo o do, 'Nan ma se!' yo, an ma re. Ji syogat ji bi pakwerut ne do, 'Nan ben suk ré et!' yo, pa ne ben re."

9Yefun Yesus jam sukdu ne sa, An yeket re. An brek ket An de dari, An ki nai yé mwa gato simo An do, "Mban! Ye gare sa. Ji ki sare do, mo ye Israel bok ne sino, Ji yo ku ye gato onyar kem mo Ji tepsu ye gare mo nde."

10Sane ye gato gwat suktaru ne mu satu mo yesukmise bi yesu bi nu. Yé ne kom mo nu sa, pakwerut ne ge re.

11Kam bok yo o, Yefun Yesus mu kadit Kapernaum, ete An mu mo kota gato gum do Nain. An bi pakon si yé mwa sisu An mu mone.

12Yefun Yesus ma karowa ros syo mo kota Nain sa, yé sam yekri dik yo mu nden. Ye gato kwop ne, an pa yemsok, nggonna bi pa ge dik ne sor. Yé mwa gato kem mo kampung ne sisu nggonna mu ne.

13Yefun Yesus do me nggonna ré sa, An jimnotku nggonna ndo nde, orete Yefun Yesus ki do, "Im o, nan wo nde!"

14Orge Yefun Yesus mu karowa yé gato sam yekri ne, ete Yefun Yesus syimtok kwatka gato yé grem pa yemsok mukri mone. Yefun Yesus syimtok kwatka ne sa, yé gato sam kwatka ne ti not, ete Yefun Yesus ki do, "Pa nji, Ji ki nai nan do, nan sun se!"

15Yefun Yesus do ki sukdu ne nai pa gato kwop re sa, pa yemsok ne sun, an ki sukdu, orete Yefun Yesus top an mo an bi im.

16Yé mwa me suk gato Yefun Yesus ben ne, án sino yeket, án nyuwa, ete án un Yefun Allah. Yé mwa ne ki do, "Yenabi gato gum kok sye dik yo anato ma kem su men it anare. Yefun Allah syogat yenabi dik yo ma wa ós An bi rus it anare."

17Sukdu subot suk gato Yefun Yesus ben gare, yé ki frekbot bur Yudea si nat gato karowa mone sino.

18Yohanes gato ras nje mo syur ne, an bi pakon ma nuk subot suk mwa gato Yefun Yesus ben ne. Sane, Yohanes kendo bi pakon ge we ma,

19ete Yohanes syogat an we mu mo Yefun Yesus wa an we ndo mo do, "Yenggras, Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men bado, men eswa ye yi yo o ma e?"

20An we do mu kom mo Yefun Yesus sa, an we ki do, "Yenggras, Yohanes gato ras nje mo syur ne syogat men ka we ma ndo mo Nan do, te, yenggras, Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men bado, men eswa ye yi yo o ma e?"

21Yohanes bi pakon ge we me suk gato Yefun Yesus ben ne. Sugane Yefun Yesus ben yé mwa gato i ne ge, yé mwa gato semda bok nggwa mó, Yefun Yesus syun semda titi wé kadit yé ne. Yé mwa gato gro ndu ne, Yefun Yesus ben yé ne gro ndo satu.

22Sane Yefun Yesus ki nai pakon ge we ne do, "Nin satu mu ku Yohanes, ete nin ki subot suk gato nin dakai jam, nin ki subot suk gato nin dakai me su nin gro sato ré: ye gato gro ndu, gro ndo satu; ye gato gwes út, mu ndo satu; ye gato i su suki borbuk, ge, án kaim ndo satu; ye gato dabe mbut, án dabe rer satu; ye gato kwop, mbau satu; ye gato yewa suk, án jam sukdu subot os ndo gato Yefun Allah fro wa yetu ne.

23Ye gato yo misyar Ji mo suk gato Ji ben ne nde, wo an onyar kem pe mo Ji it yo, bere ye ne mit at wa."

24Yohanes bi pakon ge we ne mu satu or, Yefun Yesus ki subot Yohanes nai yé mwa gato sum mone do, "Nin mu me suma mo pe gato kwe yo kom mo nde ne? Nin mu me es gato nofuf ti mó, bado?

25Sane nde. Sane, nin mu me suma motu ne? Nin mu me yetu ge dik yo gato it san gato ndo, bado? Nde re, ye gato it san gato ndo ete ku suk mwa yo kem mo pe sane nde, an kem mo nu sye gato ndo.

26Sane, nin mu me suma motu ne? Nin mu me yenabi ge dik yo, bado? Sangge, Ji ki sare do, nin mu me yenabi sor nde, wo Yohanes gum sye wai kadit ne o re.

27Yohanes ré anato ye gato ye krombot mo Yefun Allah bi sukdu sare do, Yefun Allah ki do, 'Ye gato ji syokom gwat Ji bi suktaru anare. Ji syokom an mu nyim mo Nan gwem, subere an fro os wa Nan.' "

28Yefun Yesus ki do, "Ji ki sare do, Yohanes gato ras nje mo syur ne ku gum kok sye wai kadit yetu mwa gato nggon pe mo bur ré sino. Sarewo kadit kam ré o, ye gato tepsu pa wokgan mo Yefun Allah bi rus-i, bere ku gum sye wai kadit Yohanes o re."

29Yé mwa ne sino gato syaretwa sukdu gato Yefun Yesus ki subot Yohanes ne, ye gato nai sugum kadit nje wa pemerintah dom, yé mwa ne sino nut do, "Sukdu ne sangge. Yefun Allah bi os wa men ndo wai, anato men brek ma kadit os ibit gato men simo ne it, ete men ma mo Yohanes wa an ras men mo syur mó re."

30Sarewo ye Farisi si yeguru agama sino bariwa Yefun Allah bi os-i, án bariwa án jammo Yefun Allah bi sukdu, anato án bariwa Yohanes ras án mo syur.

31Orete Yefun Yesus ki o do, "Ji gwat sukamno subot ye gato kem mo bur ré su ré, án tepsu suma ne? Yetu gato kem mo bur ré su ré án ben án bi suk-i sa u ne?

32Sare, án tepsu pa wokgan gato kem mo pasar. Pa deyo saiye nai pa deyo o do, 'Men ba syek nin mo suksara, sarewo nin yo sara su men nde, nin bariwa re. Men wo men jimnot, sarewo nin yo wo su men nde, nin bariwa re.'

33Ye gato ma ete ben sato ba syek nin ne anato Yohanes gato ras nje mo syur si Yetu bi Pa ne sino. Yohanes ma sa, an git sugit nde, an da nau nde, ete yé ki an do, 'Semda ben an re.'

34Yetu bi Pa to Ji ré ma sa, Ji git e, Ji da nau ete yé ki Ji do, 'Ye ré git sugit mwa ndo nde, An rim An syokwa kwo, An yenau, An bi yesyim mo yé gato gum ibit sato yé gato nai sugum kadit nje wa pemerintah e neya.'

35Yé ki sane, sarewo ye gato kem mo bur ré su kam ré jam nde suk. Yefun gato jam suk mwa ne sino, fro os gato ndo ne, ete bere yé me os ne bor re, ete yé ki do, sangge, os ne sa, os ndo."

36Ye Farisi dik yo gato gum do Simon kendo Yefun Yesus ma git sugit mo an bi nu. Sane Yefun Yesus mu mo Simon bi nu, ete An kem, An git sugit mone.

37Nggon ge dik yo mo kota ne, nggon ne ben siri su yebris mwa. Nggon ne jam do, Yefun Yesus git sugit mo ye Farisi ne bi nu sa, nggon ne ma, mom gwat manik gato grik su sukbo pualam ma.

38Nggon ne ti mo Yefun Yesus de dari, karowa An gwes tak, orete nggon ne wo, mom gro rom sye mo Yefun Yesus gwes tak. Orge nggon ne singgri Yefun Yesus gwes tak sa su mom sugo, mom ni Yefun Yesus gwes tak, ete mom syé manik gato grik ne mo Yefun Yesus gwes tak.

39Ye Farisi gato kendo Yefun Yesus ma git mo an bi nu ne, an me suk gato nggon ne ben sa, an nut mo an mit do, "Ye ré tepsu yenabi sangge yo, ye ré, ye gato jam suk rer yo, bere An jam do, nggon gato rot An, nggon ne anato nggon gato ben suksiri mwa."

40Orete Yefun Yesus ki nai ye Farisi ne do, "Simon, Ji iwa Ji ki sukdu yo nai nan et." Simon ki do, "Sane, yeguru, Nan ki sor."

41Yefun Yesus ki do, "Yetu ge we yo, an we nai sugum kadit yetu ge dik yo. Ye we sye bi bon kom mo juta mwa re. Ye we wok bi bon kom mo ribu bok yo sor re.

42Orge an we yo nggiwa win sugum ne nde. Sane ye gato bi bon mo an we ne, ye ne misyar bon ne sino wé re. Kadit an we ré, bere je u ana bi sukjimnut sye teker wa ye gato misyar an we bi bon ne?"

43Simon ki do, "Ji nut do ye we sye gato bi bon sye gato ye ne misyar ne." Yefun Yesus ki do, "Nan bi sukjimnut ne sangge."

44Orete Yefun Yesus brek ma, Yefun Yesus sokme nggon ne, ete Yefun Yesus ki nai Simon do, "Nan me nggon ré et! Ji ma sok mo nan bi nu gado, nan yo fro syur wa Ji mus Ji gwes tak su nde . Sarewo nggon ré mus Ji gwes tak su mom gro rom, ete nggon ré singgri Ji gwes tak sa su mom sugo.

45Ji ma mo nan bi nu, nan yo ni Ji nde, wo nggon ré sa, kadit Ji sok Ji kem more nggon ré ni Ji gwes tak pe sor.

46Nan yo syé manik mo Ji su nde,, sarewo nggon ré syé manik gato grik mo Ji gwes tak.

47Sane Ji ki sare do, nggon ré bi sukjimnut sye kas subot Ji wai o re, we mom jam do, sukibit mwa gato nggon ré ben ne or wé kadit mom it, Ji yo nutbot o nde. Sarewo ye gato ben sukibit wokgan, ete an jam do, Ji yo nutbot o nde yo, bere ye ne bi sukjimnut sye yo kas subot Ji teker eta nde."

48Orge Yefun Yesus ki nai nggon ne do, "Sukibit mwa gato nan ben ne, or wé kadit nan it anare. Ji yo nutbot sukibit mwa gato nan ben ne o nde."

49Ye gato kem git sugit si Yefun Yesus deyo mone ki nai yu do, "Ye ré anato ku gum sa u anato An nggiwa An ki do, sukibit mwa gato nggon ne ben or wé kadit nggon ré ne?"

50Sarewo Yefun Yesus ki nai nggon ne do, "Nan onyar kem mo Ji, anato Yefun Allah yo syo sukye nai nan mo sukibit gato nan ben ne o nde. Sane nan mu, nan kem not sor."



 <<  Lukas 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel