1Su kam ne, Yefun Yesus mu kadit nu ne, ete An mu mo em de. Kom mone sa, An kem ga.
2Mo em de ne, yé mwa teker sum wairi wa Yefun Yesus anato An it mu kem mo kwem dik yo gato nor mo em de. Yefun Yesus kem mo kwem mit ne saresa, yé mwa ne ti mo em de.
3An duno nje mone su sukamno bok yo. An ki do, "Wam dik yo, yetu ge dik yo mu am mbet gro mo bi nggwe.
4An do am mbet gro mo nggwe sa, deyo ges mo os, ete ndam ma git or re.
5An do am mbet gro sa, mbet gro deyo o ges mo bur ka gato jok mwa ya tak bur, wo bur ka ne nifret. Mbet ne nggwar bor kekro, we bur ne nifret.
6Sarewo kam it, orete kam gat mbet nggwar ne ndo nde. I-brot ne yo kom kru nde, sane bergan mbet nggwar ne te re.
7An am mbet gro deyo ges mo jak miten sa, jak si mbet ne kom sino, orge jak ne ben mbet yo kom ndo nde.
8Sarewo an am mbet gro ne o sa, mbet gro deyo ges mo bur ka gato ndo, sane mbet ne kom sisu ndo, ete ri ma mbet bo mwa wai o re, deyo bo kom mo bo wotin dik, deyo bo kom mo bo musyu mumat, deyo bo kom mo bo musyu gri."
9Yefun Yesus gwat sukamno ne or sa, Yefun Yesus ki do, "Sane nin brek nin dabe muya-muma kadit nde, wo nin jammo sukdu ré et!"
10Orete Yefun Yesus bi pakon ma ku An, ete ndo mo An do, "Suma ben anato Nan duno nje su sukamno petok sare ne?"
11Yefun Yesus ki do, "Sukdu gato Yefun Allah gurik suga nyim subot os ndo gato bere Yefun Allah fro wa yetu sok mo An bi rus-i ne, Yefun Allah tarubot Ji, subere Ji ki rer wa nin dakai jam kom mo mit, sarewo ye yi neya yo jam sukdu ne rer kom mo mit nde tó.
12Ye to bi sukjimnut kak, bere jam Yefun Allah bi sukdu mwa wai o re, sane bere an jam sukdu ne kom mo mit re. Sarewo ye to da jam sukdu ne wokgan, ete an misyar, sukwokgan gato an jam ne bere ges or kadit an re.
13Sane Ji duno nje su sukamno subere án da me, sarewo án yo me rer kom mo koirut nde; án da jam, sarewo án yo jam sukdu ne rer kom mo mit nde.
14Sane men me suk bor mo án tepsu suk gato yenabi Yesaya ki ne, 'Yefun Allah ki do, Nin da syaretwa sukdu petok sor, sarewo nin jam nde bi sukjimnut ne ware; nin da sokwa suk ne petok sor, sarewo nin jam nde suk gato bor ne ware.
15Yewis ye Yahudi gare jam nde suk, we án su krat ware, án dabe mbut it, ondesor sa, án jam suk; án gro ndu it, ondesor sa, án me suk sisu ndo; án bi sukjimnut yo nggi o nde it, onde bere, án jam sukdu ne kom mo mit ete bere án brek ma mo Ji, orete yo, Ji ben án kem ndo it.'
16Wo nin sa, nin ku suk gato ndo, nin dakai me su nin gro, nin dakai jam su nin dabe, ete nin jam kom mo mit re.
17Suk gato Ji ki ré suksangge anare, yenabi bok ne sino e, yé mwa gato ben suk ri tepsu Yefun Allah mit suga nyim neya mit iwa me suk gato nin me su ré, sarewo án yo me nde; án mit iwa jam suk gato nin jam su ré, sarewo án jam nde ware."
18"Sukamno subot ye gato am mbet gro ne bi sukjimnut mó, nin jam et.
19Mbet gro gato ges mo os mit ne anato tepsu ye gato jam sukdu subot os ndo gato Yefun Allah fro wa An tepsu men bi Yekwesu, sarewo án yo but nde, wo biris bi yekwesu ma ete nai sukdu ne wé kadit án mit or re.
20Mbet gro gato ges mo bur ka ga jok mwa ya tak bur ne anato tepsu ye gato nai sukdu ne mo án mit. Diksim án iwa,
21sarewo sukdu ne yo kem pe mo án mit nde, tepsu mbet gro ne i-brot yo kom mo jok nde, bergan sor, ete án misyar or re. Diksim án jammo sukdu ne, sarewo án do ku sukye mo sukdu ne yo, ye kiket án mone yo, bergan sor, ete án misyar sukdu ne kekro re.
22Mbet gro gato ges mo jak mit anato tepsu ye gato but sukdu ne, sarewo án jimnotbot suk mwa gato men yetu yémo sato sugit e, san e, sugum e ne. Án bi sukjimnut kasbot suk mwa ne anato sukdu ne yo kom ndo mo án mit o nde, án yo ben suk tepsu sukdu ne nde. Sane án tepsu mbet gro mo jak mit ne, án yo kom ndo nde, i-bo yo mo nde.
23Mbet gro gato ges mo bur ka gato ndo anato tepsu ye gato but sukdu ne ete jammo. Yé ne jamwa sukdu ne pe sane sor án ben suk gato ndo ne, deyo ben sukndo mwa, deyo ben sukndo mwa gan, deyo ben sukndo wokgan, sato mbet gro gato syesyar i-bo, deyo kom mo wotin dik e, deyo kom mo musyu mumat e, deyo kom mo musyu gri e ne."
24Yefun Yesus gwat sukamno dik yo o do, "Yefun Allah nai yetu sok mo An bi rus-i ne yo, bere Yefun ben suk tepsu yenggras dik yo gato am mbet gro gato ndo mo bi nggwe.
25Su noru dik yo, yé mwa ne sino sem sa, ye gato bariket yenggras ne ma ete am es bo mo mbet gro miten mo nggwe ne, orete ye ne mu kadit re.
26Mbet kom, bo sim, ete es ne kom bor it.
27Ye gato bi nggwe ne bi pakwerut bok yo ma ku bi yenggras ete ki do, 'Yenggras, nan jan mbet gro gato ndo mo nggwe, sarewo es mwa mone ma kadit u ne?'
28Yenggras ne ki do, 'Ye gato bariket men anato ben suk ne.' Yenggras bi pakwerut bok ne ndo mo an do, 'Nan iwa men mu tik es ne wé, bado?'
29Yenggras ne ki do, 'Nde re. Men do tik es ne wé yo, bere mbet ne ke buk dom bayok.
30Sane men misyar es ne si mbet kom sino sane sor tepsu kam gato men fro wa men do mbet ne et. Su kam ne bere ji syogat yé gato do mbet ne do, ketke án tik es, án but, ete án far, orete án syo bot git wé. Or o án sum mbet ete grem mo ji bi nu.' "
31Yefun Yesus gwat sukamno dik yo o do, "Yefun Allah jowa men yetu tepsu men bi Yekwesu yo, bere tepsu sukamno ré: Yetu ge dik yo nai kwe nam gro dik yo ete jan mo bi nggwe.
32Su ketke gro ne wok wai kadit gro yi neya, wo ri ma gro ne kom sor gro ne kom tepsu kweke sye wai kadit kweke yi neya. Kweke ne sye sane sor ndam ma tom mo i-guk."
33Yefun Yesus gwat sukamno dik yo o, An ki nai yé mwa mone do, "Yefun Allah jowa men yetu tepsu men bi Yekwesu yo, bere tepsu sukamno ré, nggon ge dik yo nai bibit roti wokgan ete karwet su tepung sak dik sane sor, tepung mwa ne it sino."
34Yefun Yesus duno yé mwa ne su sukamno. An duno nje yo, An gwat sukamno mwa su sor.
35Yefun Yesus gwat sukamno subere yenabi bi sukdu ne bor. Yenabi ki do, "Ji duno nje su sukamno; Ji ki rer subot sukdu gato ye gurik kadit kam gato Yefun Allah ut bur ré re."
36Yefun Yesus mu kadit yé mwa mone, ete An sok mo nu mit sa, An bi pakon ma ki nai An do, "Nan ki subot sukamno subot es gato ye am mo nggwe mbet ne, men jam rer et."
37Yefun Yesus ki do, "Ye gato am mbet gro gato ndo ne anato tepsu Ji dakai, gato ye kendo gum do Yetu bi Pa;
38nggwe ne anato tepsu bur ré; mbet gro gato kom ndo anato tepsu yé gato sok mo Yefun Allah bi rus-i; es ne anato tepsu yé gato sok mo biris bi yekwesu bi rus-i.
39Ye gato bariket Ji ete am es bo mone anato biris bi yekwesu. Kam gato yé do mbet gro anato tepsu kam gato bur ré kru. Yé gato do mbet gro anato malaikat.
40Tepsu kam ne dom, malaikat tik es ne, ete yé syo bot git wé.
41Bere Yetu bi Pa syogat An bi malaikat mubot Yefun Allah bi rus-i subere malaikat ne nai yé mwa gato ben ye yi ges mo os ibit si yé mwa ne sino gato ben bi suk-i ibit.
42Orete bere malaikat bare yé mwa ne mo bot gesyos. Mone yé mwa ne wo ndo nde, án nderku nggwa.
43Orete yé gato ben suk tepsu Yefun Allah mit, bere yé ne kaim ru mo bur be mo Yefun Allah bi de-i tepsu kam ru nggi mo gu ne. Sane nin brek nin dabe muya-muma kadit nde, wo nin jammo sukdu ré et!"
44"Men werwa Yefun Allah nai men sok mo An bi rus-i it yo, men misyar suk bok neya wé kadit men tepsu sukjimnut mo sukamno ré: Yetu ge dik yo ku sukrok gato ye gurik mo nggwe dik yo. Ye ne mit iwa nai suk ne, sane an gurik sukrok ne satu o, orete an mu so an bi suk mwa wa an ku sugum, orete an mu so nggwe ne su sukrok ne."
45"Sane dom, Yefun Allah nai men yetu sok mo An bi rus-i ne yo, bere tepsu sukamno ré: Yetu ge dik yo gato so suk mo ye yi neya mu meret mutiara,
46sane sor, an ku gro dik yo gato ndo wai o re, ete an mu so an bi suk mwa wa an ku sugum sane sor an bi suk mwa ne or kadit an. Orete an mu so mutiara ne su sugum gato an ku ne."
47"Sane dom, Yefun Allah nai yetu sok mo An bi rus-i ne yo, bere tepsu sukamno ré: Yé bok yo gato sok boge bare án bi mwi mo em, ete án but boge wis mwa su mwi.
48Mwi ne ses su boge, orete án tik ma nden. Án tik ma nden, orete án wat boge ne, dogato ndo án bok mo ember mit, wo dogato ibit án bare wé.
49Su kam gato bur ré kru bere malaikat ben sane. Bere malaikat mubot bur ré ete nai yé gato ben bi suk-i ibit kadit yé gato ben sukndo tepsu Yefun Allah mit,
50orete án bare yé gato ben bi suk-i ibit mo bot gesyos. Mone yé mwa ne wo ndo nde, án nderku án nggwa."
51Yefun Yesus ndobot do, "Nin jam suk gato Ji ki ré bado?" Yefun Yesus bi pakon ki do, "Men jam re."
52Sane Yefun Yesus ki nai án do, "Sane yeguru agama mwa ne sino gato gum sok mo Yefun Allah bi rus-i ne anato jam Musa bi sukduno-i si sukduno be gato Ji gwat ma ne, ete yeguru duno nje su, tepsu yenggras mo nu dik yo gwat sukrok si sukbe kadit an bi gudang ma nden."
53Yefun Yesus gwat sukamno bok ré, orete An mu kadit pe ne.
54Yefun Yesus kom mo An dakai bi nat-i, nat gato An sye mone sa, An duno nje mo ye Yahudi bi nu ari. Yé mone yeket Yefun Yesus, án ndo do, "Ye ré ku suktinggi wa jam suk mwa ete ben suk gato ben men yeket ré kadit u ne?
55Ye ré anato bi ai ye gato jam ben suk su kwe sato meja e, kursi e ne bado? An bi im gum do Maria, bado? An bi nji gum do Yakobus e, Yusuf e, Simon si Yudas bado?
56An bi nyanggon si men kem more sino, bado? Sane An ku suktinggi wa jam sukduno mwa ete ben suk gato ben men yeket kadit u ne? Ye ré, An nut do An bes An nggwa tepsu yepasye, ete An ma more, ete An duno men bado a?"
57Sane yé mwa mone bariket Yefun Yesus re. Orete Yefun Yesus ki nai nje mone do, "Mo pe mwa ne sino yé bes yenabi gum kok, sarewo mo yenabi ne dakai bi nat-i yo, yenabi bi nje-i si bi rus-i ne bariwa jammo an re."
58Yé mone yo onyar kem mo An nde, sane An ben suk gato ben nje yeket mone yo mwa nde.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel