Alkitab Mobile SABDA
[VER] : [ABUN]     [PL]  [PB] 
 <<  Matius 28 >> 

1Ye Yahudi bi kam sye ne or, kam Ari, bundugan, Maria Magdalena si Maria yi ne, an we mu me makwe ne.

2Nggon we ne kom mone sa, nggon we gensu sui juwai bur ndo nde, ete Yefun Allah bi malaikat dik yo is ma kadit gu. Orete malaikat wop jok gato kewa jokwak syo ne wé kadit jokwak ne, ete malaikat ne kem mo jok ne yu.

3Malaikat ne de gwem rup-rek sato nowarek, an bi san ne kwo ru ges.

4Yesukmise gato mewa makwe ne sokme malaikat ne sa, án nyu ndo nde, sane sor án tetet, orete án kaim rere, án tepsu ye gato kwop re.

5Malaikat ne ki nai nggon we ne do, "Nin nyu nde. Ji jam do, nin meret Yefun Yesus gato ye mban mo kwesukwin ne, sarewo

6An yo more nde, An mbau re, An sun re, saga nyim neya An dakai ki nai nin jam. Nin ka we dakai ma me nat gato ye grem An mukri mone.

7Su ré, nin ka we mu kekro. Nin ka we ki nai Yefun bi pakon ne do, 'Yefun Yesus sun re. An mu nyim mo bur Galilea. Nin sino mu sakanwa An motu.' Nin ka we napawa suk gato ji ki ré sisu ndo et."

8Sane nggon we ne mu kekro kadit makwe ne. Nggon we ne nyu ndo nde, sarewo nggon we mit iwa suk gato nggon we me ne, ete nggon we kas mu ki napyo nai Yefun Yesus bi pakon ne jam.

9Nggon we ne kas mu sa, nggon we ne gensu Yefun Yesus ma ku nggon we, ete Yefun Yesus ki do, "Ndo mo nin ka we." Nggon we ne ma karowa Yefun Yesus ete syimtok An gwes tak, orete nggon we un An.

10Yefun Yesus ki do, "Nin nyu nde. Nin mu ki nai Ji bi pakon ne do, pakon ne mu sakanwa Ji mo bur Galilea. Bere án ku Ji motu." Sane nggon we ne mu.

11Nggon we ne do mu saresa, yesukmise gato mewa makwe ne ge bok yo mu mo kota Yerusalem re. Yesukmise bok ne kibot suk mwa gato án me bor mo makwe ne nai yekwesú mo Yefun Allah bi nu jam.

12Yekwesú mo Yefun Allah bi nu ne si ye Yahudi bi yepasye sum wa kibot sukdu ne sa, án fro sukdu su yesukmise ete syo sugum mwa nai yesukmise ne.

13Orete án ki nai yesukmise do, "Nin ki sare do, 'Noru miten ne, men sem mit saresa, Yesus bi pakon ma syimsi An mukri ete gwat mu re.'

14Bere men frot koita nai yekwesu gato gum gubernur. Men bidek an subere nin yo ku sukye mone nde."

15Sane yesukmise gwat sugum ne, ete ki bi sukdu-i tepsu suk gato yepasye ne ki ne. Sukdu gato ye ki do, Yefun Yesus bi pakon mu syimsi An mukri ne, yé ki frekbot ye Yahudi bi nat-i mwa ne sino kom mo kam ré re.

16Yefun Yesus bi pakon ge musyu dik sop dik mu mo bur Galilea. Án mu mo bobuk mo pe gato Yefun Yesus syogat án mu mone.

17Án ku Yefun Yesus mone sa, án un Yefun Yesus, sarewo án ge bok yo mit we, ge bok ne nutbot do, sangge, Yefun Yesus dakai anare bado?

18Orete Yefun Yesus ma karowa pakon ne, ete An ki do, "Yefun Allah bes ji gum tepsu Yekwesu mo gu nim si bur ré sino.

19Sane nin mu mo yewis mwa ne sino mo bur ré iwedewe, ete nin duno nje subere yé ne tepsu Ji bi pakon, ete nin ras nje ne mo syur sisu men bi Ai, Yefun Allah gum, sisu Yefun Allah bi Gan gum sisu Yefun Allah Gen gum ne sino et.

20Nin duno nje ne subere yé ne benbot suk mwa ne sino gato Ji syogat nin ben ne. Nin jammo suk gato Ji ki ré et, nin mu duno nje yo, bere Ji sisu nin petok sor kom mo kapyo mato kapyo."



 <<  Matius 28 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran