1Yefun Yesus mu kadit nat ne sa, An mu kom mo bur Galilea o, yetu ge bok yo ma sum mone o. Yé ne yo bi sugit yo mo nde, sane Yefun Yesus kendo An bi pakon ma, ete Yefun Yesus ki nai An bi pakon do,
2"Ji dakai jimnotku yé mwa more ndo nde. Án si men kem more kom mo kam gri rek it, ete su ré án bi sugit yo mo nde.
3Ji do syogat án satu mu mo án bi nu yo, án mu su án on de bere án mbrin mo os mit. Yé deyo ma kadit os syu dom re."
4Yefun Yesus bi pakon ki nai An do, "Yetu yo kem more nde, ete men meret sugit mo u anato tep wa men syo nai yetu mwa ré git ne?"
5Yefun Yesus ndo mo An bi pakon do, "Nin bi roti koi ot ne?" An bi pakon ki do, "Roti koi mufit sor."
6Sane Yefun Yesus syogat yé mwa ne kem ga mo bur. Orete Yefun Yesus nai roti koi mufit ne ma, An ki do, "Ndo mo Nan, Yefun Allah wa roti gato Nan syo nai men ré." Yefun Yesus ki ndo mo Yefun Allah or sa, An syat roti ne, ete An syo nai An bi pakon wa An bi pakon waii syo nai yé mwa ne git. Sane Yefun Yesus bi pakon benbot suk gato An ki ne.
7Yefun Yesus bi pakon bi boge wokgan ge bok yo mó dom. Yefun Yesus ki do, "Ndo mo Nan, Yefun Allah wa boge gato Nan syo nai men ré." Ete An syogat An bi pakon syo boge ne nai yé mwa git.
8Yé mwa ne git sane sor án sino on ge, orete pakon ne mubot nat ne sum sugit napta, ete án bok mo yu mufit ses.
9Yé mwa gato git sugit ne, ye newa kom mo yetu ge ribu at. Yefun Yesus syogat yé mwa ne mu orete
10An si bi pakon it mo kwem mu mo bur Dalmanuta.
11Ye Farisi ge bok yo ma ku Yefun Yesus, ete Ye Farisi ndo mo Yefun Yesus subot suk bok yo. Án werwa meret os wa Yefun Yesus, sane án ki nai Yefun Yesus do, "Nan ben suk yo gato ben men yeket et, subere Nan kadum nai men do, Nan ku suktinggi kadit Yefun Allah."
12Yefun Yesus jam ye Farisi bi sukdu ne, ete Yefun Yesus syesyar An mas nggi syu mu nden, we ben sato Yefun Yesus da bambri, An da nya mo suk gato ye Farisi ndek mo An ne. Sane Yefun Yesus ki nai ye Farisi ne do, "Suma ben anato nin werwa Ji ben suk yo wa ben Yefun Allah bi suktinggi bor ne? Suk gato Ji ki ré suksangge anare, Ji yo ben suk gato ben Yefun Allah bi suktinggi bor mo nin gwem nde."
13Sane Yefun Yesus mu kadit yé ne, An mu satu it mo kwem, ete An mu mo em deta.
14Yefun Yesus si bi pakon mu mo em deta sa, Yefun Yesus bi pakon mbrinket án gwat roti, wo án gwat roti koi dik gato án grem kwop mo kwem ne sor re.
15Yefun Yesus ki nai An bi pakon do, "Nin mewa nin nggwa kadit ye Farisi si Herodes bi bibit roti."
16Pakon ne nutbot suk gato Yefun Yesus ki ne, ete án ki nai yu do, "Yefun Yesus ki sane, we men yo gwat roti nde bayok."
17Yefun Yesus jam suk gato An bi pakon kibot ne re, sane Yefun Yesus ndo mo An bi pakon ne do, "Nin kibot roti gato nin yo gwat nde wa suma ne? Suk gato Ji ben gabere, nin jam bi sukjimnut-i nde wa suma ne? Nin bi sukjimnut-i ne kwop bado?
18Nin gro mó, sarewo nin yo me suk sisu ndo nde wa suma ne? Nin dabe mó, sarewo nin yo jam suk sisu ndo nde wa suma ne? Te, nin napawa suk gato Ji ben gabere bado nde e?
19Sugato Ji syat roti koi mumek, ete nin syo nai yetu ge ribu mumek ne te, nin sum roti napta tepsu yu ot ses ne?" An bi pakon ki do, "Tepsu yu musyu dik sop we ses."
20Yefun Yesus ndo mo An bi pakon o do, "Sugato Ji syat roti koi mufit, ete nin syo nai yetu ge ribu at ne te, nin sum roti napta kom mo yu ot ses ne?" Yefun Yesus bi pakon ki do, "Kom mo yu mufit ses."
21Yefun Yesus ki nai án do, "Nin jam Ji bi sukjimnut-i nde tó bado?"
22Yefun Yesus si An bi pakon mu kom mo kota Betsaida. Án mu kom mone sa, yetu ge bok yo gwat yebris dik yo gato gro ndu ma mo Yefun Yesus, ete yé ne ndek mo Yefun Yesus wa Yefun Yesus ben yebris ne gro ndo satu.
23Sane Yefun Yesus syimtok ye gato gro ndu ne syim, ete Yefun Yesus gwat yebris ne mu mo kampung de nden. Yefun Yesus si yebris ne mu kom mone sa, Yefun Yesus sukut mo ye ne gro, orete Yefun Yesus grem syim mo ye ne gro. Yefun Yesus grem syim mone, orete An ki nai yebris ne do, "Te, nan me suk it bado nde tó e?"
24Ye ne sok mu nim, an sokbot nden, ete an ki do, "Ji me yetu mu ram, sarewo ji me nje tepsu kweke gato ram mo nden."
25Yefun Yesus grem syim mo ye ne gro wam dik yo o. Sugane ye ne gro ndo satu it. Ye ne gro ndo satu, an me suk mwa ne sisu ndo it.
26Orge Yefun Yesus ki nai ye ne do, "Nan satu mo nan bi nu sor, nan satu mu mo kota mit nde."
27Yefun Yesus si An bi pakon mu kadit nat ne. Án mu o mu kom mo kampung bok yo gato karowa Kaisarea Filipi. Án mubot os miten saresa, Yefun Yesus ndo mo An bi pakon do, "Yé mwa kibot Ji ré te, yé kibot Ji sa u ne?"
28An bi pakon ki nai An do, "Yé bok yo ki do, Nan anato Yohanes gato ras nje mo syur. Yé bok yo o ki do, Nan anato yenabi nyim gato gum do Elia. Yetu ge bok yo o ki do, Nan anato yenabi ge dik yo o."
29Sane Yefun Yesus ndo mo An bi pakon do, "Wo nin dakai, nin nutbot Ji sa u ne?" Petrus ki do, "Nan anato Yekwesu gato Yefun Allah bes gum Kristus, gato Yefun Allah syogat ma mo bur ré wa nai men yetu kadit sukye ete jowa men."
30Orge Yefun Yesus dumik wa An bi pakon wa sukdu ne. Yefun Yesus ki nai pakon ne do, "Nin mu, nin ki sukdu subot Ji nai ye yi jam daret nde."
31Orge Yefun Yesus duno An bi pakon subot sukye gato ri ma yé ben nai An ne. Yefun Yesus ki nai An bi pakon do, "Yetu bi Pa to Ji ré, gato Yefun Allah syo ma kadit gu ne, bere ye Yahudi bi yepasye, yekwesú mo Yefun Allah bi nu si ye Yahudi bi yeguru agama ne, án sino bariwa Ji o re, ete án ben sukye nai Ji ket kwayo-kwayo. Bere yé gu Ji kwop, sarewo kom mo kam we rek, bere Yefun Allah sun Ji kadit sukkwop o re."
32Yefun Yesus ki sukdu ne rer nai An bi pakon jam. Sane Petrus syimtok Yefun Yesus wadigan mu mo nden, ete Petrus ndantom Yefun Yesus mo sukdu ne.
33Sarewo Yefun Yesus brek ma sokme An bi pakon saresa, An ndantom Petrus do, "Nan ki sukdu yawa os wa Ji nde, biris bi yekwesu bi sukjimnut-i anane! Nan gwat sukjimnut ne mu ko kadit Ji se! Nan bi sukjimnut-i yo ma kadit Yefun Allah nde, wo nan bi sukjimnut-i ma kadit yetu sor re."
34Orge Yefun Yesus kendo yé mwa gato mone si An bi pakon ma mo An, ete An ki do, "Ye to iwa simo Ji it yo, ye ne yo iwa ben suk ket an mit-i ne o nde, wo an ben Ji bi suk-i sor, an tepsu ye gato sam an bi kwesukwin. Kapre an ku sukye mone, an kwop o, an mbau o an simo Ji pe sor.
35We, sare, ye to bi sukjimnut sye wa an dakai kem ndo mo bur ré yo, bergan an kwop re, wo ye to bi nggwa mo Ji wa an ben Ji bi suk-i, ete gwat sukdu subot os ndo gato Yefun Allah fro wa yetu ne yo, bere ye ne kem ndo to kapyo mato kapyo.
36Nin ben suk ket nin mit-i subere nin ku suk mwa mo bur ré, ete nin ges mo os ibit mone, suk mwa gato nin ku ne sato sugum e, san e, nu e ne te, bere ós nin gum sok mo Yefun Allah bi rus-i sa u ne? Yo os nin nde.
37Bere suk mwa gato nin ku ne, nin syo nai Yefun Allah, ete bere An nai nin gum sok mo An bi rus-i bado? Mo nde,
38Bere Yetu bi Pa to Ji ré satu ma mo bur ré. Ji satu ma sisu Ji kaim rer-rik su Ji bi Ai bi suktinggi ne. Malaikat gato ben Yefun Allah bi suk-i si Ji ma sino. Sane, ye to damen wa an ki nai ye yi do, an sok mo Ji bi rus-i si ye to damen wa an kibot Ji gum nai ye gato ben sukibit bu mo bur ré jam yo, bere Ji do satu ma it yo, Ji waii damen wa ye ne, Ji waii bariwa Ji ki do, ye ne sok mo Ji bi rus-i dom."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel