Alkitab Mobile SABDA
[VER] : [ABUN]     [PL]  [PB] 
 <<  Roma 1 >> 

1Ji gato gum do Paulus anato krom surat ré wa nin yé gato onyar kem mo Yefun Yesus gato kem mo kota Roma. Yefun Allah bi sukjimnut sye kas subot nin. Yefun nai nin gum sok mo An bi rus-i it. Yefun Allah bes ji gum yerasul subere ji mu ki sukdu subot os ndo gato Yefun Allah fro wa men yetu subere men ku os wa men gum sok mo An bi rus-i.

2Sukdu subot os ndo ne, An tom su men bi amui tomgato nyim tuya it. An ki napyo nai yenabi jam re, orete yenabi waii krom Yefun bi sukdu ne mo buku o wa men jam.

3Sukdu subot os ndo ne anato bor mo suk gato Yefun Allah bi Gan, men bi Yekwesu Yesus Kristus ben ne. Men nutbot Yefun Allah bi Gan tepsu yetu it yo, men jam do Pa bi amui mo yeraja ge dik yo gato gum do Daud, ye Israel bi yeraja gato gum kok wai o re.

4Sarewo Pa ne tepsu yetu sor nde, wo Pa ne anato Yefun Allah bi Gan, men jam rer mo gato Yefun Allah Gen ben Pa ne nggi wai kadit sukkwop, Yefun Allah Gen sun Pa ne kadit sukkwop o re.

5Yefun Allah syogat Yesus Kristus ma mo bur ré anato ji ku suktinggi wa ji ben suk tepsu yerasul. Sane ji iwa bes Yesus Kristus gum kok mone. Ji iwa bes Yesus Kristus gum kok, sane anato ji mu ben Kristus bi suk-i. Ji mu duno yewis ye Yahudi nde, wo ji mu duno yewis yi mwa ne sino mo bur ré, subere án onyar brek ete kem pe mo Yesus Kristus, orete án benbot sukdu gato Yesus Kristus ki ne.

6Sane nin ye Roma dom sok mo yewis dik yo gato ji mu duno ne. Yefun Allah nai nin ma sok mo Yesus Kristus bi yetuge-i.

7Sane anato ji krom surat ré wa nin yé gato onyar kem mo Yefun Yesus gato kem mo kota Roma ne sino. Men bi Ai, Yefun Allah si men bi Yekwesu Yesus Kristus ete mewa nin, Yefun Allah si Yesus Kristus ete uttok nin petok sor.

8Ji ki suk su Yefun Allah sa, ketke, ji ki suk nai Yesus Kristus tepsu yemiten, subere Kristus waii ki ndo mo Yefun Allah, ji bi yenggras gato jom ji ne. Ji ki ndo mo Yefun Allah, we yé ki sukdu subot nin onyar kem mo Kristus ne frekbot yetu mo bur ré iwedewe jam o re.

9Ji ki suk su Yefun Allah yo, ji napawa nin petok sor. Sangge, ji yo kidar nde, Yefun Allah gato ji ben suk wa ne, An dakai jam sukdu gato ji ki ré sangge, ji yo kidar nde. Ji ben Yefun Allah bi suk-i su ji mit dik si ji onyar dik, ji mu ji ki sukdu subot os ndo gato An bi Gan kak wa men yetu ne. Yefun Allah gato ji ben suk wa ne jam do, ji sa, napawa nin pe re.

10Su ré ji ndek mo Yefun Allah do, Yefun do iwa it yo, Yefun kak os wa ji ba ku nin,

11we ji da o ku nin subere ji syo Yefun Allah bi suktinggi deyo nai nin, subere nin bi sukjimnut nggi mo Yefun petok sor.

12Ji bi sukjimnut sare do, men onyar kem mo Yesus Kristus ne sino, sane men ki subot suk gato Yefun Yesus ben su men nai yu, subere men sino kwabom kam mo Yefun Yesus nggi wai o et.

13Ji bi nji ji bi nyanggon ji mit iwa nin jam do, ji da fro os wa ji ba ku nin wam bok yo, sarewo kom more suk yo kwa wa ji petok sor. Ji iwa ba ku nin subere ji duno nin subot Yefun Yesus subere nin ge bok yo o waii sok mo Kristus bi yetuge-i, tepsu ji duno yewis yi neya gato tara kadit ye Yahudi ne, ete yé bok yo mone sok mo Kristus bi yetuge-i ne mó re.

14Ji ré tepsu pakwerut wa ji ki sukdu subot os ndo gato Yesus Kristus kak ne nai yewis mwa ne sino, ye gato jam yesem bi suk-i tepsu ye Yunani, si yewis yi gato jam nde sukdu mo sem ré bi suk-i e ne sino. Ji ki nai ye gato jam suk si ye gato jam nde suk, ji ki nai ye gato farkor si ye gato yo farkor mo nde.

15Sane anato ji mit iwa ji ba ku nin mo kota Roma subere ji ki sukdu subot os ndo ne nai nin jam dom.

16Ji mit kem pe mo sukdu subot os ndo gato Yesus Kristus kak ne, ji yo damen wa nde, we Yefun Allah bi suktinggi bor mone anato yé mwa gato onyar kem mo Yesus Kristus ne sino, ku os wa án titi fro wé kadit bot gesyos, ete kem ndo to kapyo mato kapyo. Yefun Yesus kak os ne wa ye Yahudi sor nde, wo Yefun Yesus kak os ne wa yewis yi neya dom re.

17Ji mit at wa sukdu ne, we men me mo sukdu ne Yefun Allah anato kadum os rer nai men subere men ku os wa men sok mo An bi rus-i, ete mone men si An kem ndo su yu. Men onyar kem mo Yesus Kristus bi sukdu ne sor kadit ketke kom mo pe gato or mó anato men si Yefun Allah kem ndo su yu, tepsu ye krom mo Yefun Allah bi sukdu sare do, "Men onyar kem mo Yefun it yo, bere men si Yefun Allah kem ndo, we Yefun Allah nut mo men do, men sa, tep wa sok mo An bi rus-i it anane."

18Yefun Allah mo gu bi sukmaskwa ne men me bor mo bur ré it. Yefun Allah maskwa men yetu mo suksiri si sukibit mwa gato men ben ne. Men yetu bi sukibit mwa ne ben sato kewa mit wa Yefun Allah bi sukdu gato sangge sane sor ye yo jam o nde, anato ye ku sukye mo Yefun bi sukmaskwa it anare.

19Yefun Allah ben sukye nai men, we Yefun Allah da kadum sukdu subot An dakai ne rer wa men jam mó re, sarewo men dakai misyar ware.

20Yefun Allah kadum sukdu subot An dakai kadit ketke An ut bur ré it. Men me mo suk gato Yefun Allah ut ne, ete men yetu jam do, Yefun tara kadit men yetu, An yo ben sukibit sato yetu ben ne nde, An bi suktinggi ne gesyos, An kem gesyos. Sukjimnut subot Yefun sane men yetu yo me su men gro nde, wo men me mo suk mwa gato Yefun ut ne, ete mone men dakai jam rer re. Sane men yetu yo ku os wa men rewa Yefun nde, we men me rer mo suk gato Yefun ut ne it.

21Men yetu da jam sukdu subot Yefun Allah, sarewo men yo bes An gum kok tepsu men bi yenggras mo gu gato jom men nde. Men yo un An gum mo sukndo gato An ben ne dom nde. Wo men brek ma, ete men bi sukjimnut sye kem mo sukdaret sor, ben sato men bi sukjimnut ne kwop re.

22Men nut do, men sa, men jam suk mwa, sarewo men jimgon, men jam suk kom mo pe yo nde.

23Yefun Allah da gum kok sye wai o re, sarewo men yo bes Yefun Allah gum kok nde. Wo men win Yefun Allah gato gesyos su sukdaret mo bur ré gato men yetu dakai ut su men syim ka sato: yetu gato kaim budat ré e, ndam e, suge gato gwes at mó e, suge gato mu rut ke bet e ne. Men yetu yo som Yefun Allah o nde, wo men som suk bok gare win An o re.

24Sane anato Yefun Allah misyar men ben suk siri ket men dakai í ne sor. Yefun Allah misyar men dakai ben suk ket men í anato men ben siri su yu daret sor.

25Sukdu gato sangge subot Yefun Allah ne men win su sukkidar o re. Yefun Allah da ut suk mwa ne, sarewo men yo bes Yefun Allah gum kok mone o nde, men yo jammo An nde, wo men som suk bok neya gato Yefun Allah ut ne win Yefun o re. Or o men ben suk bok gane bi suk-i sor re. Sarewo sa ndo sa, men som suk bok ne nde, wo men bes Yefun Allah gato ut suk mwa ne gum kok sor to kapyo mato kapyo sor re. Sangge.

26Men yetu ben sukibit ket men dakai í ne sor anato Yefun Allah misyar men da bro wa yu dakai daret. Yefun Allah misyar sane sor nggon deyo bariwa sem su yebris sagana ne o re, wo nggon ne dakai iwa ben siri su nggon yi neya daret sor.

27Sane dom yebris deyo bariwa sem su bi nggon sagana ne o re, wo yebris ne da bro wa ben siri su yebris yi neya daret sor. Yebris deyo ben siri su yebris deyo daret, sane anato bere yebris bok ne ku sukye tepsu sukibit gato án ben re.

28Yé bok gare bariwa jam Yefun Allah o re, sane anato Yefun Allah misyar án re. Yefun Allah misyar án sane sor án bi sukjimnut ne ibit it, sane án ben suk siri kadit Yefun Allah mit pe sor.

29Án ben bi suk-i ne ibit petok, án iwa ben sukdaret bu, án iwa ku suk mwa wa án dakai sor, án ben sukibit nai ye yi neya, án on sa ket ye yi mo suk mwa gato ye ne ku wai kadit án ne e, án iwa gu ye yi kwop e, án iwa ben sukndi e, án iwa kidar suk e, án mit iwa ben sukibit nai ye yi e, án iwa kiket ye yi e,

30án ki ye yi gum ket kwayo-kwayo e, án bariket Yefun Allah e, án kabor ye yi gum e, án bes án nggwa kok ete án jam nde sukwatum ne re e, án ki suk án syokwet wik e, án owa meret os wa ben sukibit ket kwayo-kwayo e, án bariwa jammo án bi yenggras e,

31án yo nutbot ye yi nde e, án yo benbot suk gato án tom ne nde e, án yo jimnotku ye yi ne nde e, án ben sukot su ye yi e ne.

32Án jam Yefun Allah bi sukdu gato ki do, ye to ben sukibit mwa ne bere Yefun ben sukye nai ye ne tepsu sukibit gato ye ben ne. Án da jam do, bere Yefun bare án mo bot gesyos mo sukibit ne, sarewo án iwa án ben sukibit mwa ne petok sor. Án iwa ben sukibit ne petok sor nde, wo án iwa ye yi waii ben bi suk-i ne ibit tepsu án dom.



 <<  Roma 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran