Alkitab Mobile SABDA
[VER] : [ABUN]     [PL]  [PB] 
 <<  Roma 13 >> 

1Yefun Allah sor anato bes yekwesu mo bur ré wa jom men yetu. Yekwesu ne ku suktinggi kadit Yefun Allah wa jom bi yetu mwa mo bur ré, sane men jammo men bi yekwesu gato jom men ne et.

2Sane ye gato su krat wa jammo bi yekwesu, ete duwer bi yekwesu ne, tepsu an su krat wa jammo Yefun Allah, ete duwer Yefun dom anane. Ye gato duwer bi yekwesu mo bur ré, bere an dakai ku sukye mo koirut.

3Ye gato ben bi suk-i ndo yo, bere an yo kwabom dek subot suk gato an bi yekwesu ben su an ne nde, wo ye gato ben bi suk-i ibit yo, bere an kwabom dek subot suk gato bere an bi yekwesu ne ben su an. Sane men bariwa men bi yekwesu ben sukye nai men it yo, men ben men bi suk-i ne ndo petok sor. Sane bere men bi yekwesu un men mo sukndo gato men ben ne.

4Men ben men bi suk-i ne ndo sor, we men bi yekwesu anato tepsu Yefun Allah bi pakwerut gato fro sukndo wa men. Wo men do ben sukibit it yo, men kwabom dek subot suk gato men bi yekwesu ben su men ne sor, we an ku suktinggi wa ben sukye nai men. An tepsu Yefun Allah bi pakwerut. Yekwesu ne gwat Yefun Allah bi sukmaskwa, ete syo sukye nai ye gato ben sukibit mo bur ré.

5Sane men jammo men bi yekwesu mwa ne sino mo bur ré sor. Men jammo án, we men nyuwa men ku sukye mo sukibit gato men ben ne sor nde, wo men jammo men bi sukjimnut gato ndo mo men mit ne, ete men ben suk gato men bi yekwesu ki ne.

6Yekwesu mo bur ré ben suk tepsu Yefun Allah bi pakwerut. Men bi yekwesu ne fro suk mwa neya wa men tepsu Yefun Allah bi pakwerut, sane anato men syo sugum pajak nai án.

7Sane sugum pajak gato yekwesu mo bur ré syogat men bi ne, men bi sor. Men bi yekwesu syogat men bi sugum wa sukyo-sukyo it yo, men bi sor. Men un men bi yekwesu sino ete bes an gum kok mo sukndo gato an ben tepsu Yefun Allah bi pakwerut ne.

8Sugum gato men tom wa men bi nai ye yi yo, men bi sor. Men bi bon mó yo, men bi kekro or wé et. Suk dik sor gato yo or wé kadit men nde anato men bi sukjimnut sye kas subot yu petok sor. Ye gato bi sukjimnut sye kas subot ye yi neya anato ben suk tepsu Musa bi sukduno-i mwa ne sino,

9we ye gato bi sukjimnut kas sye subot ye yi neya, bere ye ne benbot ye Yahudi bi sukduno-i sato ré do: men ben siri daret nde; men gu ye yi kwop daret nde; men syimsi suk nde; men gro sye wa men nai ye yi bi suk nde. Sukduno bok gare si sukduno yi neya bi i-ke mo sukduno kwa sye dik yo sare do, "Men bi sukjimnut sye kas subot ye yi tepsu men bi sukjimnut sye kas subot men dakai et."

10Ye gato bi sukjimnut sye kas subot ye yi, bere an yo ben sukibit nai ye ne nde. Sane ye gato bi sukjimnut sye kas subot ye yi, tepsu an benbot ye Yahudi bi sukduno-i mwa ne sino it anane.

11Sane dom, men jam do, su ré bi kam tep wa men sem o nde, wo men sun et, men ben Yefun bi suk-i petok sor, we su ré karowa bi kam gato Yefun Yesus ma kar men mu kem ndo mo An bi nat-i. Su ré, kam gato Yefun satu ma mo bur ré ne karowa wai kadit kam gato men onyar kem mo Yefun Yesus su ketke ne.

12Noru miten wai it, karowa nombrak it are. Sa ndo sa, ndendu bi suk-i men ben o nde, men misyar sor, ete men nai Yefun Allah bi sukmise gato rer wa men syun ndendu bi suk-i wé kadit men et.

13Men ben men bi suk-i ndo sor, men ben men bi suk-i tepsu suk gato ye ben su nombrak. Men kamo e, men yenau su e, men ben siri su dom nde. Men yenau nde. Yebris si nggon ben siri su yu daret nde. Men ben suk siri dakai daret nde. Men ben sukndi nde. Men maskwa ye yi mo sukndo gato ye ne ku ne nde.

14Men jammo sukjimnut gato tik men mit wa ben sukibit tepsu yetu iwa ben ne o nde, wo men nai sukjimnut wa men bi men nggwa mo men bi Yekwesu Yesus Kristus subere men ben suk tepsu An mit sor.



 <<  Roma 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel