1Sukdu mo buku ré anato sukdu gato Yesus Kristus kadum rer nai Yohanes subot suk gato bere men yetu me bor su kam sari ne ma. Yefun Allah kadum suk bok ne nyim nai Yesus Kristus, subere Yesus Kristus waii kadum rer nai Yefun Allah bi pakwerut mwa ne sino jam. Yo nam nde ge, bere Yefun Allah ben suk bok ré bor re. Yesus Kristus syogat An bi malaikat ge dik yo mu ki sukdu subot suk gato bere bor ne rer nai An bi pakwerut gato gum do Yohanes.
2Sane Yohanes waii krombot suk bok ne sino gato an me ne. An krombot sukdu gato Yefun Allah ki ne. An krombot suk bok ne sino gato Yesus Kristus ki rer nai an jam ne.
3Ye gato baca sukdu ré sye wa ye yi jam, ye ne anato mit at wa, we bere Yefun ben sukndo su an re. Ye gato jam ete benbot sukdu ré, ye ne anato mit at wa, we bere Yefun ben sukndo su an re. Ye ne mit at wa, we an jam nyim wé subot suk gato, yo nam nde ge, bere bor re.
4Ji, gato gum do Yohanes, ji krom sukdu ré wa nin, yé gato onyar kem mo Yefun Yesus mo nu ari mufit mo bur Asia. Yefun Allah gato su ré mó, kadit ketke mó, si kam sari ne ma bere mó tó ne, Yefun Allah ete mewa nin. Yefun Allah ete uttok nin petok sor. Yefun Allah Gen ka mufit gato kem mo Yefun Allah bi kursi tak de gwem, Yefun Allah Gen ete mewa nin, Yefun Allah Gen ete uttok nin petok sor.
5Yesus Kristus gato jam Yefun Allah sisu ndo, An ki bi sukdu-i subot Yefun Allah ri-roi petok sor. Yesus Kristus anato ye doketke gato Yefun Allah sun kadit sukkwop. Yesus Kristus anato jowa yeraja mwa ne sino mo bur ré. Yesus Kristus ete mewa nin. Yesus Kristus ete uttok nin petok sor. Yesus Kristus anato bi sukjimnut sye kas subot men ndo nde petok sor. Yesus Kristus anato kwop, An dé sye wa tot men bi suktot mo sukibit gato men ben ne wé.
6Yesus Kristus anato bes men tepsu An dakai bi yewis-i dor kadit yewis yi neya. Yesus Kristus anato bes men tepsu yesu gato rer mo Yefun bi suk-i, men ben suk wa An bi Ai, Yefun Allah. Yesus Kristus anato nggiwa jowa suk mwa mo bur ré. An anato gum kok to kapyo mato kapyo sor. Sangge.
7Sare, bere Yesus Kristus is kadit gu sisu nyotem ne ma. Yetu mwa ne sino bere me An dakai ma ne. Yé bok gato syer An bere ku An kaim ne dom. Sugane bere yé mwa ne sino mo bur ré iwedewe nderku nggwa mo An ndo nde. Digane it. Sangge.
8Yefun Allah ki do, "Ji anato Yefun gato ut suk kadit ketke ete Ji jom suk mwa ne sane sor kom mo pe gato or mó. Ji anato Yefun gato su ré mó, kadit ketke mó, si kam sari ne ma bere mó tó ne. Ji anato Yefun Allah gato nggi wai kadit suk mwa ne sino o re."
9Ji, gato gum do Yohanes anato tepsu nin bi nji mo Yefun Allah bi rus-i. Ji simo Yesus Kristus tepsu nin. Men sino bi Yekwesu mo Yesus Kristus. Men sino ku sukye tepsu yu. Kapre men ku sukye o, men yo misyar Yefun nde, men simo An pe sor. Ji ki sukdu subot os ndo gato Yefun Allah fro ne. Ji ki subot suk gato Yesus Kristus ben wa kak os ne, sane anato yé but ji, ete yé gwat ji mu yé grem kem mo ef Patmos.
10Kam ari dik yo, ete Yefun Allah Gen pet mo ji. Orete ji jam ye yo saiye nggi mo ji dari, an ba sye tepsu ye fuf dut.
11Ji jam ye ne ki sukdu sare do, "Suk gato bere nan sokme ne yo, nan krombot mo buku. Orete nan syo buku ne nai yé gato onyar kem mo Yefun Yesus mo nu ari mo kota Efesus e, Smirna e, Pergamus e, Tiatira e, Sardis e, Filadelfia si Laodikia ne et."
12Ji ti brek satu me ye gato ki suk ne sa, ji me suk yo ka sa dem sor gato ye ben kadit emas wa ye dum sukru bo mufit mone.
13Mo suk gato ka sa dem sor ne miten ji me yetu ge dik yo ka sato Yetu bi Pa. An it san gato syu kom mo An gwes tak. An far san emas mo An tunap.
14An su si An gro e, An gwem e ne kwo sato duk kwo ne. An sugo kwo ndo tepsu ndaraf go kwo ne. An gro gan ru tepsu bot ru.
15An gwes tak ru er tepsu tembaga gato ye kon tó ne ete ru er. An ki An bi sukdu-i yo, An ba syo-i sye tepsu syur sye ú mo tú.
16An jom bí ge mufit mo An syim ge. Nyom gato ot de we syesyar kadit An syokwet. An gro ru nggi tepsu kam yor sugato kam ti ri.
17Ji sokme An sa, ji bare ji nggwa mo An gwem tepsu ji kwop re. Orete An ak An syim ge mo ji, ete An ki do, "Nan nyu nde! Ji anato ut suk kadit ketke ete jom suk mwa ne sane sor kom mo pe gato or mó.
18Ji anato Ye gato kem gesyos. Ji kwop, sarewo ré ne Ji mbau to kapyo mato kapyo. Ji anato nggiwa Ji sun nje kadit sukkwop. Ji anato nggiwa Ji sun nje kadit Yefun Allah bi gwinggri syo mo bur desnak ne mbau satu.
19Sane suk mwa ne sino gato nan sokme ne yo, nan krombot mo buku et. Nan krombot suk mwa gato nan sokme su ré sisu suk mwa gato bere bor mone tó.
20Ji ki rer subot bí mufit gato nan me mo Ji syim ge ne si suk gato ka sa dem sor gato ye ben kadit emas wa ye dum sukru bo mufit ne. Suk we ne bi sukjimnut ne Yefun gurik kadit yetu, wo su ré Ji ki bi sukjimnut ne rer wa nan jam. Bí mufit bi sukjimnut do, malaikat ge mufit gato mewa yé gato onyar kem mo Yefun Yesus mo nu ari mo kota mufit ne . Or o, suk gato ka sa dem sor wa ye dum sukru mufit mone bi sukjimnut do, yé gato onyar kem mo Yefun Yesus mo nu ari mo kota mufit ne."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel