1Orete malaikat ne kadum syur gato ben yé mbau ne nai ji me dom. Syur ne rer tepsu kaca. Syur ne syé kadit Yefun Allah si Domba Gan bi kursi sye ne.
2Syur ne syé ket os sye mit mo kota ne. Mo syur de kwe gato ben yetu kem gesyos ne kom mó. Kwe ne ke dik yo mo syur deré, ke dik yo o mo syur deta. Kwe ne bo ainadik-ainadik petok, tepsu tahun dik, kwe ne bo wam musyu dik sop we. Yé mwa nai kwe ne nat wa kon án wip ne ge su.
3Suk mwa mo kota ne ndo sino. Yefun Allah yo dufo mo suk yo gato kem mo kota ne mo nde. Bere mo kota ne, Yefun Allah si Domba Gan bi kursi sye mó. Yefun bi pakwerut ben Yefun bi suk-i mone.
4Bere Yefun bi pakwerut dakai ku Yefun Allah gro mone. Ye krom Yefun Allah gum mo án git det.
5Mo kota ne noru mo nde, sane án yo mitmo sukru si kam nde, we án bi Yekwesu Yefun Allah bere tepsu sukru rer ku án. Bere Yefun bes án tepsu yesu gato jowa Yefun bi suk-i ne sor to kapyo mato kapyo.
6Orete malaikat ne ki nai ji do, "Sukdu gato ji ki ré sangge, sukdu ne tep wa yé onyar kem mó. Men bi Yekwesu Yefun Allah gato bok An Gen mo yenabi anato syogat An bi malaikat ma kadum suk gato bere bor nai An bi pakwerut mwa ne jam et."
7Yefun Yesus ki do, "Nin jammo suk gato Ji ki ré et, bergan sor ete Ji ma. Ye gato jammo sukdu subot suk gato bere bor mo buku ré, ye ne sa, mit at wa, we bere Yefun ben sukndo su ye ne re."
8Ji gato gum do Yohanes jam ete sokme suk mwa gato ji krom more re. Ji jam ete ji sokme suk mwa ne or sa, ji bare ji nggwa mo malaikat gato kadum suk mwa nai ji ne gwem. Ji bare ji nggwa wa ji bes malaikat ne gum kok,
9sarewo malaikat ne ki nai ji do, "Nan bes ji gum kok nde. Ji si nan tepsu Yefun Allah bi pakwerut sino. Men ka we si nan bi nji, gato yenabi bok ne si yé mwa ne sino gato jammo sukdu mo buku ré, men sino tepsu Yefun Allah bi pakwerut. Sane nan bes ji gum kok nde, wo nan bes Yefun Allah gum kok sor re."
10Orete malaikat ne ki nai ji o do, "Nan gurik sukdu subot suk gato bere bor su kam sari ne ma mo buku ré nde, we yo nam nde ge, suk mwa ré bor re.
11Ye to ben sukibit yo, ben bi suk-i ne sor. Ye to ben suk gato Yefun bagri ket ne yo, ben bi suk-i ne sor. Ye to ben sukndo yo, ben bi suk-i ne sor. Ye to ben Yefun Allah bi suk-i ne yo, ben Yefun Allah bi suk-i ne sor."
12Yefun Yesus ki do, "Nin jammo suk gato Ji ki ré et, bergan sor ete Ji ma. Ji gwat suk mwa gato bere Ji syo nai nje tepsu suk gato án ben wa Ji re.
13Ji anato Yefun gato ut suk kadit ketke ete Ji jom sane sor kom mo pe gato or mó. Ji anato kem kadit ketke sor to kapyo mato kapyo."
14Ye gato ben Yefun bi suk-i, ben sato án gu án bi san kwo ndo it anane. Ye gato gu án bi san kwo yo, bere án ku os wa án git kwebo mo kweke gato ben yetu kem gesyos. Bere án ku os wa án sok ket ros syo mu mo kota mit ne. Yé ne sa, án mit at wa, we bere Yefun ben sukndo su án re.
15Sarewo yé gato yo ku os wa sok mo kota ne nde anato yé gato bariket Yefun. Yé ne ben bi suk-i sato ré: án kwa syua e, kro ri, frum suk e ne e, án ben siri su yu daret e, án gu ye yi kwop daret e, án som sukdaret e, án mit iwa kidar nje ket kwayo-kwayo e ne. Yé mwa gato ben bi suk-i sane, yo ku os wa sok mo kota ne nde.
16"Ji, gato gum do Yesus, Ji anato syogat Ji bi malaikat ma wa kibot sukdu mwa mo buku ré wa ye gato onyar kem mo Ji mo nu ari mo bur ré jam re. Ji anato yeraja Daud bi dat. Ji anato kak os ndo wa yetu tepsu bí ik gato it ben sato kak os wa nombrak ne ma."
17Yefun Allah bi rus-i, gato tepsu Yefun Yesus bi nggon gato bere An kra ne si Yefun Allah Gen ki nai Yefun Yesus do, "Yefun Yesus o, Nan ma et!" Yé mwa gato jam sukdu mo buku sino ré ki do, "Yefun Yesus o, Nan ma et!" Yé mwa ne ki do, "Yefun Yesus o, Nan ma et!" Yé gato sosa, án ma nai syur gato ben án mbau mone et. Yé gato mit iwa ma nai syur ne yo, án nai yi sor, án yo bi suk yo wa nde.
18Ji, gato gum do Yohanes, ji ki suknapa wa yé mwa ne sino gato jam suktaru subot suk gato bere bor su kam sari ne ma mo buku ré, sare do, ye gato syek kwa be tó sukdu ré yo, bere Yefun Allah waii syek sukye tepsu sukye gato ji krombot mo buku ré wa ye ne.
19Ye gato tot sukdu mo buku ré napyo wé yo, bere Yefun Allah tot sukndo gato ji krombot mo buku ré napyo wé kadit ye ne re. Bere Yefun Allah tot sukndo gato ye ne ku mo Yefun Allah bi kota si kwebo gato ben yetu kem gesyos ne, Yefun Allah tot sukndo ne napyo wé kadit ye ne re.
20Ye gato kibot sukdu mwa ré nai ji, An ki do, "Sangge, bergan sor ete Ji ma!" Sangge! Yefun Yesus, men bi Yekwesu, Nan ma et!
21Men bi Yekwesu Yefun Yesus ete mewa Yefun Allah bi rus-i ne sino sor. Sangge.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel