Alkitab Mobile SABDA
[VER] : [ABUN]     [PL]  [PB] 
 <<  Yohanes 11 >> 

1Yetu ge dik yo gato gum do Lazarus, an kem mo kampung dik yo gato gum do Betania. An si an bi nyanggon Maria si Marta kem mone sino.

2Maria ne anato es manik gato grik mo Yefun Yesus gwes, ete mom singgri sa su mom sugo. Kam dik yo Lazarus i.

3Sane an bi nyanggon ka we taruwa Yefun Yesus do, "Yenggras, men ka we bi nji gato Nan jimnotku ne, an anato i."

4Yefun Yesus jam suktaru ne sa, An ki do, "Bere suki ne yo ben Lazarus kwop rut nde. Sane nde, wo kom mo rut suki ré anato ben yé mwa bes Yefun Allah gum kok sye wai o re. Sane bere Yefun Allah bi Gan gum kok sye wai mone dom re."

5Yefun Yesus jimnotku Marta si bi nji Maria si bi nji Lazarus.

6Yefun Yesus da jam do Lazarus i, sarewo An kem mo pe ne kam we yo o.

7Orete Yefun Yesus ki nai An bi pakon do, "Men satu mu mo bur Yudea et."

8Sarewo Yefun Yesus bi pakon ki nai An do, "Yeguru, su gabere karowa ye Yahudi am Nan su jok mone, ete su ré Nan iwa Nan satu mone o bado?"

9Yefun Yesus ki do, "Su nombrak bi jam musyu dik sop we mó. Ye gato mu su nden rer yo, tepsu ye gato ben Ji bi Ai bi suk-i, suk yo wai an gwes nde, an mu sisu ndo sor, nombrak rer ku suk mwa ne wa an me re.

10Wo ye gato mu su ndendu yo, an ye gato ben biris bi yekwesu bi suk-i, an gwes ti mo suk yo, an ges, we rer yo ku an nde."

11Yefun Yesus ki bi sukdu-i ne, orete An ki o do, "Men bi yesyim Lazarus sem re, sarewo Ji mu wa Ji sun an it anare."

12Yefun Yesus bi pakon ki nai An do, "Yenggras, Lazarus do sem yo, bere an ge re."

13Yefun Yesus bi sukjimnut-i do, Lazarus kwop re, sarewo An bi pakon jam nde, wo pakon bi sukjimnut-i do, Lazarus sem sagana sor re.

14Sane Yefun Yesus ki rer nai An bi pakon do, "Lazarus kwop it.

15Sarewo Ji yo si nje mone nde anato ndo, Ji iwa, we bere nin me suk gato ós nin onyar kem mo Ji bor mone. Sane men mu motu et."

16Pakon dik yo gato gum do Tomas waii ki sukdu. Tomas gum bi sukjimnut do, "Pa kwa we." Tomas ki nai an bi yesyim, pakon deyo do, "Men si Yefun mu sino subere men si An kwop mone."

17Yefun Yesus mu kom mo Betania ne sa, An jam do Lazarus kwop re. Yé bi Lazarus mo jokwak kom mo kam at rek it.

18Kampung Betania ne, karowa Yerusalem, os syu ne tepsu kilometer gri

19anato ye Yahudi mwa ma ku Marta si Maria subere bidek nggon we, subere nggon we ne yo jimnot an we bi nji gato kwop ne teker nde.

20Marta jam do, Yefun Yesus ma saresa, mom syesyar mu nden ku Yefun Yesus, wo Maria kem mo nu mit.

21Marta ki nai Yefun Yesus do, "Yenggras, Nan si men more sa, bere ji bi nji yo kwop nde.

22Sane, su ré ji jam do, suk to Nan ndek mo Yefun Allah yo, bere An syo nai Nan re."

23Yefun Yesus ki nai Marta do, "Bere nan bi nji mbau satu."

24Marta ki do, "Ji jam do, su kam gato bur ré kru it yo, bere ji bi nji mbau satu."

25Yefun Yesus ki nai Marta do, "Ji anato sun nje kadit sukkwop. Ji anato ben yetu mbau. Ye gato onyar kem mo Ji yo, kapre an kaim kwop, bere an kem ndo mone tó.

26Ye to yo kwop nde tó, ete an onyar kem mo Ji ne yo, bere ye ne yo kwop rut nde, wo bere an mbau to kapyo mato kapyo. Nan nut do, suk gato Ji ki ré suksangge bado nde?"

27Marta ki do, "Yenggras, ji jam do, sangge, Nan anato Yefun Allah bi Gan, Nan anato Kristus, gato kam nyim Yefun Allah tom su men bi amui do, bere Yefun Allah syogat Yekwesu dik yo ma mo bur ré wa nai men yetu kadit sukye ete jowa men."

28Marta ki sukdu ne or sa, mom mu tom mo mom bi nji dabe, mom ki do, "Maria, yeguru ma it. An iwa ku nan."

29Maria jam sukdu ne sa, mom ti kekro, ete mom mu ku Yefun Yesus.

30Yefun Yesus yo ma kom mo kampung mit nde tó. An ti mo pe gato Marta ku An mone tó.

31Ye Yahudi gato ma bidek Maria, án me Maria ti, ete mom mu mo nden kekro sa, án boribot mom. Án gendo Maria mu mo jokwak mo makwe wa mom wo mone.

32Maria mu kom mo pe gato Yefun Yesus ti mone, ete mom ku Yefun Yesus sa, mom tu mom umsu mo Yefun Yesus gwem. Maria ki do, "Yenggras, Nan si men more sa, bere ji bi nji yo kwop nde."

33Yefun Yesus me Maria wo, ete An me ye Yahudi gato sisu Maria wo dom sa, An mit buk, An jimnotbot teker wai o re.

34Yefun Yesus ndo do, "Yé grem Lazarus mukri mo u ne?" Ye Yahudi ne ki nai Yefun Yesus do, "Yenggras, Nan ma, Nan me et."

35Orete Yefun Yesus wo.

36Ye Yahudi ki nai yu do, "Nin me Ye ne, An jimnotku Lazarus ndo nde."

37Sarewo ye deyo ki do, "Ye ne ben ye gato gro ndu, me suk sisu ndo satu mó re. Wo suma ben to An yo ós Lazarus subere Lazarus yo kwop nde ne?"

38Yefun Yesus jimnotbot teker tó, An mu mo pe gato yé grem Lazarus mukri mo makwe ne. Yé grem Lazarus mukri mo jokwak dik yo mit, orete yé nggwot su jok sye kewa jokwak syo ne.

39Yefun Yesus ki do, "Nin kak jok gato kewa i-syo ne mo nden wé et." Marta, Lazarus bi nyanggon ki do, "Yenggras, yé bi an mukri kam at rek it. Sane mukri ne basmi kwik it."

40Yefun Yesus ki nai Marta do, "Tomga u Ji ki nai nan sare do, nan onyar kem mo Ji yo, bere nan me Yefun Allah bi suktinggi gato sye bor mo bur ré re."

41Sane yé kak jok gato kewa i-syo ne mo nden wé. Orete Yefun Yesus sok mu nim mo gu, ete An ki do, "Ji bi Ai, ndo mo Nan, we Nan jam Ji bi sukdu gato Ji ki nai Nan ré it.

42Ji jam do, Ji ndek suk mo Nan yo, bere Nan jam, ete Nan syo nai Ji re. Sarewo Ji ki sukdu ré subere yé mwa gato sum more jam do, sangge, Nan anato syogat Ji ma mo bur ré."

43Yefun Yesus ki sukdu su Yefun Allah, orete An saiye do, "Lazarus, nan syesyar tom!"

44Sane Lazarus syesyar kadit jokwak ma, san gato yé far an mukri su ne, mó tó. An syim, an gwes san kewa tó. An su dom, san kewa sino. Yefun Yesus ki nai yé mwa mone do, "Nin sombok san ne wé kadit an subere an mu sisu ndo et."

45Ye Yahudi gato ma ku Maria mone, án me suk gato Yefun Yesus ben bor mone, orete ye Yahudi ge bok yo nai sukjimnut dik do, án onyar kem mo Yefun Yesus.

46Sarewo ye deyo mu mo ye Farisi, ete án ki nai ye Farisi subot suk gato Yefun Yesus ben ne.

47Sane yekwesú mo Yefun Allah bi nu si ye Farisi kendo ye Yahudi bi yepasye si yekwesu gato sum sino wa kibot sukdu, subere án sino sum wa án kibot Yefun Yesus. Yekwesú si ye Farisi ki do, "Men ben suma ne? Ye ne kadum Yefun Allah bi suktinggi bor, An ben suk mwa bor gato ben men yeket.

48Men misyar An dakai ben An bi suk-i sane sor, bere yé mwa onyar kem mo An it are go! Bere ye Roma gato jom men maskwa, ete ma ben men bi nat ré ibit. Bere ye Roma ma ben Yefun Allah bi nu ibit mwir dom re."

49Yetu ge dik yo mone an gum do Kayafas. Su tahun gane an gum yekwesu gato gum kok wai mo Yefun Allah bi nu. An ki do, "Nin jam nde suk.

50Sa ndo sa, yetu ge dik yo kwop win men anato ndo wai kadit ye Roma ma gu men ye Yahudi mwa ne sino kwop or."

51Sukdu gato Kayafas ki ne, an dakai bi sukjimnut-i nde, wo an ki sukdu tepsu suktaru kadit Yefun Allah, we su tahun gane an gum yekwesu gato gum kok wai mo Yefun Allah bi nu. Suk ne yo bor nde tó, an ki nyim do, bere Yefun Yesus kwop wa yewis ye Yahudi.

52Yefun Yesus kwop wa yewis ye Yahudi sor nde, wo Yefun Yesus kwop subere An sum Yefun Allah bi pá gato kem mo peyo-peyo, subere án sino sum mo nat dik, subere án sino tepsu dik it.

53Sane kadit kam gato ye Yahudi bi yepasye kibot Yefun Yesus ne, ye Yahudi bi yepasye sino tepsu dik wa án meret os wa án gu Yefun Yesus kwop wé.

54Sane anato Yefun Yesus yo mubot pe gato yé mwa kem mone nde. An mu kadit pe ne, ete An mu mo kota dik yo gato gum do Efraim, karowa pe gato kwe yo kom mo nde. An si An bi pakon kem mone.

55Karowa Kam Sye Waiket it. Sane yé mwa ma kadit peyo-peyo mo nden, ma mo Yerusalem. Kam sye ne nde tó, yé mwa ne de syur subere án kaim kwo, tepsu Musa bi sukduno ki ne, subere án tep wa án simo kam sye ne.

56Yé mwa gato ma ne syeret Yefun Yesus. Án sum mo Yefun Allah bi nu de nden sa, án ndo mo yu do, "Nan bi sukjimnut sa u ne? Ye gane ma wa si men konwa kam sye ré bado nde e?"

57Sarewo yekwesú mo Yefun Allah bi nu si ye Farisi syogat yé mwa mone do, "Nin ku Ye ne mo pe yo it yo, nin ki napyo nai men subere men mu but An et."



 <<  Yohanes 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel