Alkitab Mobile SABDA
[VER] : [ABUN]     [PL]  [PB] 
 <<  Yohanes 18 >> 

1Yefun Yesus ki suk su An bi Ai, orete An si An bi pakon mu. Yefun Yesus si bi pakon syo mo Syur Kidron mu mo deta. Mone nggwe dik yo mó, yé jan kwe zaitun mo nggwe ne. An si An bi pakon mu mo nggwe ne mit.

2Yudas, an tepsu yeketut wa Yefun Yesus, an jam nat ne re, we sagana Yefun Yesus si bi pakon sum mo nat ne.

3Sane Yudas so yeko mu mone. Yudas si ye Roma bi yesukmise ge bok yo, si ye gato mewa Yefun Allah bi nu ge bok yo. Yekwesú mo Yefun Allah bi nu si ye Farisi syogat án mu mone. Án sino si Yudas mu mone. Yeko ne gwat yor e, nyom e ne, án gwat sukru su kak dom.

4Yefun Yesus jam suk mwa gato bere yé ben nai An. Sane Yefun Yesus mu karowa yeko, ete Yefun Yesus ndo mo yeko ne do, "Nin syeret je u ne?"

5Yeko ne ki do, "Men syeret Yesus, ye Nazaret." Yefun Yesus ki nai án do, "Ji anare it." Yudas, yeketut gato gwat os wa yeko ne si yeko sino ti mone.

6Yefun Yesus ki do, 'Ji anare it' sa, yeko mu su án dari satu ete án ges gwa mo bur.

7Yefun Yesus ndo mo án o do, "Nin syeret je u ne?" Án ki do, "Men syeret Yesus, ye Nazaret."

8Yefun Yesus ki do, "Ji anare it. Ji ki nai nin mó re. Nin do syeret Ji it yo, nin misyar ye yi gare dakai mu sor re."

9(Yefun Yesus kiwa yeko misyar ye yi mone dakai mu, anato sukdu gato Yefun Yesus ki nyim wé re bor it. An ki do, "Ji bi Ai, yé sino gato Nan syo nai Ji, dik yo gwet mo nde, án sino mó tó.")

10Simon Petrus, an anato gwat bi nyom, an tik nyom, an sap pakwerut ge dik yo dabe syim ge toko wé. Pakwerut ne ben suk mo yekwesu gato gum kok wai mo Yefun Allah bi nu ne. Pakwerut ne gum do Malkus.

11Yefun Yesus syogat Petrus do, "Nan bok nan bi nyom satu tom! Sukye gato Ji bi Ai fro wa Ji ku ne, nan nut do, bere Ji yo simo nde bado? Tepsu ye da syur gato ye sye pe mo mok re, bere Ji da sor."

12Orete ye Roma bi yesukmise bi padosye si bi pa-i si ye gato mewa Yefun Allah bi nu ne, án but Yefun Yesus, án rai Yefun Yesus syim tak de dari.

13Án rai Yefun Yesus saresa, án gwat Yefun Yesus mu mo Hanas nyim. Hanas bi nyam anato Kayafas. Su tahun gane Kayafas gum yekwesu gato gum kok wai mo Yefun Allah bi nu.

14Kayafas anato duno ye Yahudi do, 'Sa ndo sa, yetu ge dik yo kwop win men anato ndo wai kadit ye Roma ma gu men ye Yahudi mwa ne sino kwop or.'

15Simon Petrus si Yefun Yesus bi pakon ge dik yo o mu boribot Yefun Yesus. Yefun Yesus bi pakon ne, an jam yekwesu gato gum kok wai mo Yefun Allah bi nu ne, ete an boribot Yefun Yesus mu kom mo yekwesu ne bi nu de nden. An sok mo bobor nap mo nu git.

16Sarewo Petrus kem mo ros de nden, karowa ros syo. Pakon gado ne, gato yekwesu jam ne, pakon ne mu mo nden, an ki suk su nggon kwerut gato mewa ros syo, ete nggon ne kendo Petrus sok mo bobor nap mo nu git ne.

17Nggon kwerut gato mewa ros syo ne ndo mo Petrus do, "Te, nan ré, nan sok mo Ye gane bi pakon bado nde e?" Petrus ki do, "Ji nde re."

18Su noru gane, nyot dek mo nden. Sane pakwerut si ye gato mewa Yefun Allah bi nu, án gre bot ru, ete án ti wairi wa bot ne, subere bot kam is án. Petrus dom mu si án ti mo bot de subere bot kam is Petrus dom.

19Sane yekwesu gato gum kok wai mo Yefun Allah bi nu ne ndo mo Yefun Yesus subot An bi pakon si An bi sukduno-i.

20Yefun Yesus ki nai yekwesu ne do, "Ji ki ji bi sukdu rer mo yé mwa gwem petok sor re. Sagana Ji duno nje mo ye Yahudi bi nu ari e, Ji duno nje mo Yefun Allah bi nu e, mo nat gato ye Yahudi sino sum mone, Ji duno nje mo bobor, Ji yo duno nje mo bobor fo mo nde.

21Nan ndo mo Ji subot Ji bi sukduno-i wa suma ne? Nan ndobot yé gato Ji duno ne sor re. Án sa, jam suk gato Ji ki ne fe!"

22Yefun Yesus ki bi sukdu-i duwer yekwesu ne sa, ye gato mewa Yefun Allah bi nu ge dik yo, an ti karowa Yefun Yesus mone, an gwa Yefun Yesus kwanke su an syim, ete an ki do, "Nan nut do, Nan gum sye wai kadit men bi yekwesu gato gum kok wai mo Yefun Allah bi nu bado, anato Nan ki Nan bi sukdu-i sane bado?"

23Yefun Yesus ki do, "Ji ki sukdu kwa yo gato siri mó yo, nan ki rer subere Ji jam suk gato Ji ki siri ne et. Sarewo Ji ki suk gato sangge it yo, suma ben anato nan gwa Ji su nan syim ne?"

24Sane Hanas syogat yé gwat Yefun Yesus mu mo Kayafas. Kayafas anato yekwesu gato gum kok wai mo Yefun Allah bi nu. Ye gwat Yefun Yesus mu mone, yé yo sombok bus gato yé rai An su ne wé nde.

25Simon Petrus ti mo bot de ne tó, bot ne kam is an. Sane yé mone ndo mo an do, "Te, nan sok mo Ye gane bi pakon bado nde e?" Petrus rewa re. An ki do, "Ji nde re."

26Yekwesu gato gum kok wai mo Yefun Allah bi nu ne bi pakwerut ge dik yo, pakwerut ne bi nji mo Malkus gato Petrus sap dabe toko ne ku Petrus mone. Pakwerut ne ndo mo Petrus do, "Tomgado, ji me nan si Ye gane mo nggwe ne bado nde e?"

27Or o Petrus rewa o an ki do, 'Ji nde re.' Sugane it ndam kokor ké.

28Ik o, bundugan, yé gwat Yefun Yesus syesyar kadit Kayafas bi nu-i mu mo gubernur bi nu-i gato sye. Ye Yahudi yo sok mo nu mit ne nde, we án fro án nggwa wa án git sugit mo Kam Sye Waiket. An sok mo ye Roma bi nu ne yo, bere án fowa án simo kam sye mo Yefun Allah bi nu or re, sane án yo sok mo gubernur bi nu-i nde.

29Sane gubernur Pilatus, an syesyar mo nden. An ndo mo ye Yahudi do, "Nin ndak Ye ré su suk sato suma ne?"

30Ye Yahudi ki nai Pilatus do, "Ye ré ben sukibit, ondesor sa, men yo gwat An ma mo nan nde."

31Pilatus ki nai ye Yahudi ne do, "Nin dakai gwat Ye ré mu sor. Nin dakai ndobot An tepsu nin dakai bi sukduno-i et." Ye Yahudi mwa mone ki do, "Nin ye Roma gato jowa men bi bur-i ré duyawa men do, men syokom ye gu ye yo kwop mo sukibit gato ye ne ben ne nde."

32(Ye Yahudi ki sukdu ne, we sukdu gato Yefun Yesus ki nyim subot os gato yé gu An kwop su ne, bere bor mone, bere ye Roma gu An kwop.)

33Pilatus sok satu mo nu mit, ete an kendo Yefun Yesus ma, an ndobot. Pilatus ndo mo Yefun Yesus do, "Te, Nan ye Yahudi bi yeraja bado?"

34Yefun Yesus ndo mo Pilatus do, "Nan ndobot Ji tepsu nan dakai bi sukjimnut-i e, ye yi yo ki sukdu subot Ji anato nan ndobot Ji mone bado?"

35Pilatus ki do, "Nan nut do, ji ré ye Yahudi bado? Nan bi yewis-i si yekwesú mo Yefun Allah bi nu anato gwat Nan ma, ete án syo Nan mo ji syim fe! Nan ben suk sato suma ne?"

36Yefun Yesus ki do, "Ji yo tepsu yeraja gato jom yetu mo bur ré nde. Ji tepsu yeraja mo bur ré yo, bere Ji bi pakon futmu mo ye Yahudi bi yeko, subere yeko ne yo but Ji nde. Sarewo Ji gum yeraja mo bur ré nde, wo mo pe yi re."

37Pilatus ki nai Yefun Yesus do, "Sane Nan anato yeraja e?" Yefun Yesus ki nai an do, "Nan dakai ki do, Ji anato yeraja. Sangge. Ji bi im pe Ji mo bur ré. Ji ma wa Ji ki rer subot suk dik yo sor re. Ji ma wa Ji ki rer subot suk gato sangge. Ye to iwa sukdu gato sangge, bere án jammo Ji bi sukdu-i."

38Pilatus ndo mo Yefun Yesus do, "Suk gato sangge ne te, bi sukjimnut sa u ne?" Pilatus ki sukdu ne or sa, Pilatus syesyar kadit nu ne o, ete an ki nai ye Yahudi mwa mone do, "Ji ndobot Ye ré ware, ji ki do, Ye ré ben suk gato ibit yo mo nde.

39Sarewo sagana ji sombok yetu ge dik yo gato yé rai mo sel ne wé su Kam Sye Waiket, sane nin iwa ji sombok Ye ré, gato nin ye Yahudi bi yeraja ne wa nin bado?"

40Ye Yahudi saiye do, "Nde re! An nde re! Nan sombok Barabas wa men sor!" (Barabas ne, an ye Yahudi bi yekweke bi yesu, an iwa syun ye Roma gato jom ye Yahudi ne wé.)



 <<  Yohanes 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran