Alkitab Mobile SABDA
[VER] : [ABUN]     [PL]  [PB] 
 <<  Yohanes 20 >> 

1Kam Ari, bundugan, Maria gato bi nat mo Magdala mu mo jokwak gato ye grem Yefun Yesus mukri mone. Maria mu kom mo jokwak sa, mom me jok sye gato kewa jokwak syo ne, yé nai wé re.

2Sane Maria kas satu, mom kas mu ku Simon Petrus si pakon dik yo gato Yefun Yesus jimnotku. Maria ki nai an we do, "Ye yo nai men bi Yekwesu wé kadit makwe re. Jokwak ne or wa An re. Ji jam nde pe gato yé grem An mukri mone."

3Sane Petrus si pakon yi ne kas mu mo jokwak ne.

4An we do kas sino mu mone saresa, pakon yi ne kas nggi wai kadit Petrus, anato pakon ne mu kom mo jokwak ne nyim.

5Pakon ne ka, an sokme san det gato kwop mo jokwak mit ne, sarewo an yo sok mo mit nde.

6Simon Petrus waii boribot kom mone, ete an sok mo jokwak mit sa, an me san det gato yé far Yefun Yesus kaim su ne kwop mone.

7Wo san gato yé far wairi wa Yefun Yesus su ne, yé pam, ete yé grem dor kadit san gato yé far An kaim su ne. Sarewo Yefun Yesus mukri yo mo nde.

8Orete pakon gato kas mu nyim kadit Petrus ne, an sok boribot Petrus mo jokwak mit. An me san det gato kwop mone, ete an jam do, sangge Yefun Yesus sun kadit sukkwop re.

9(Mo Yefun Allah bi sukdu ye krom do, bere Yefun Yesus sun kadit sukkwop re, sarewo Yefun Yesus bi pakon yo jam sukdu gato yé krom mone nde tó.)

10Orete pakon we ne satu mu mo án bi nu.

11Sarewo Maria gato bi nat mo Magdala, mom satu ma ti mo jokwak syo mo nden. Maria ti mone, mom wo. Mom wo saresa, mom ka mom me mo jokwak mit.

12Orete mom me malaikat ge we gato it san kwo. Malaikat ge we kem mo nat gato ye grem Yefun Yesus mukri mone, sarewo nat ne or wa Yefun Yesus mukri re. Malaikat dik yo kem tak de su, dik yo kem tak de gwes.

13Malaikat ge we ndo mo Maria do, "Nggon, nan wo wa suma ne?" Maria ki nai malaikat we do, "Ye yo nai ji bi Yekwesu wé re. Ji jam nde pe gato yé grem An mukri mone."

14Maria ki sukdu ne or sa, mom brek sokbot mom dari sa, mom me Yefun Yesus ti mone. Sarewo mom jam nde Yefun Yesus anato ti mone.

15Yefun Yesus ndo mo mom do, "Nggon, nan wo wa suma ne? Nan syeret je u ne?" Maria gendo Ye ré anato ye gato ben suk mo nggwe ne. Sane Maria ki nai An do, "Nan anato nai Ye ne mukri kadit pe ré yo, nan gwat mu nan grem An mukri mo u ne? Nan ki rer nai ji jam et, subere ji mu nai An mukri kadit pe ne wé."

16Yefun Yesus ki nai mom do, "Maria!" Maria brek sokme Yefun Yesus, ete Maria ki su a Ibrani do, "Rabuni," (gato bi sukjimnut do, "Yeguru.") Maria iwa syimtok Yefun Yesus, sarewo

17Yefun Yesus ki nai Maria do, "Nan jom Ji nde, we Ji yo satu mu mo Ji bi Ai nde tó. Nan mu mo Ji bi nji, ete nan ki nai án do, 'Ji satu mu mo Ji bi Ai, gato nin bi Ai dom it anare. Ji satu mu mo Yefun Allah gato jom Ji si nin sino it anare.' "

18Sane Maria mu ki nai Yefun Yesus bi pakon ne do, "Ji ku men bi Yekwesu it!" Sukdu bok gato Yefun Yesus ki nai Maria gado ne, mom waii ki nai pakon ne jam dom.

19Su kam Ari gane bi noru, Yefun Yesus bi pakon sum sino mo nu dik. Mo nu mit ne án gwot nusyo bok ne krat, án kunci krat, we án nyuwa ye Yahudi bi yepasye. Án gensu Yefun Yesus ma si án ti mone sino, ete Yefun Yesus ki do, "Yefun Allah ete uttok nin. Nin nyu nde."

20Yefun Yesus ki sukdu ne, orete An kadum An syim tak wip si An syak wip ne nai An bi pakon ne me. An bi pakon me Yefun Yesus sa, án mit at wa ndo nde.

21Sane Yefun Yesus ki wam dik yo o do, "Yefun Allah ete uttok nin. Ji bi Ai syogat Ji ma wa nje mo bur ré, sane dom, Ji waii syogat nin mu wa nje mo bur ré."

22Orete An fuf An mas mo An bi pakon ne, ete An ki do, "Nin nai Yefun Allah Gen mo nin mit et!

23Nin do misyar sukibit gato ye yi ben ne, ete nin yo nutbot o nde yo, Yefun Allah dom yo nutbot sukibit ne o nde. Wo nin do maskwa ket ye ne mo sukibit gato an ben ne tó yo, Yefun Allah maskwa ket an pe dom."

24Tomas (gato yé kendo do, "Pakwa"), an ye gato sok mo Yefun Yesus bi pakon ge musyu dik sop we, sarewo tomgato Yefun Yesus ma ku bi pakon yi ne, Tomas yo sisu án mone nde.

25Sane Yefun Yesus bi pakon yi ne, deyo ki nai Tomas do, "Men ku men bi Yekwesu re!" Tomas ki do, "Ji me An wip no gato yé nggo su paku ne e, ji bok ji sopkwa mo An wip ne e, ji bok ji syim mo An syak wip e ne sa, ondeyo ji yo onyar kem mo nin bi sukdu-i nde."

26Ari ga tak, Yefun Yesus bi pakon ne sum satu mo nu ne o. Tomas sisu án mone dom. Pakon ne da gwot nusyo sino krat, sarewo Yefun Yesus ma si án ti mone sino. Yefun Yesus ki nai án do, "Yefun Allah ete uttok nin. Nin nyu nde."

27Orete Yefun Yesus ki nai Tomas do, "Nan me Ji syim wip no anare. Nan bok nan sopkwa mo Ji syim wip et. Nan syo nan syim ma, nan bok nan syim mo Ji syak wip ré et. Nan bi sukjimnut we subot Ji o nde, wo nan nai sukjimnut dik do, nan onyar kem mo Ji et!"

28Tomas ki nai Yefun Yesus do, "Nan anato Ji bi Yekwesu, Nan anato Yefun gato jom Ji it."

29Orete Yefun Yesus ki nai Tomas do, "Nan dakai me Ji su nan gro, sane anato nan onyar kem mo Ji it. Sarewo ye gato onyar kem mo Ji, kapre an yo me Ji su an gro nde, bere an mit at wa, we bere Yefun Allah ben sukndo su an re."

30Yefun Yesus kadum Yefun Allah bi suktinggi mo suk mwa gato An ben bor mo An bi pakon gwem. Suk gato An ben gato ben yé mwa yeket ne mwa wai, sarewo ji yo krom mwa ne sino mo buku ré nde.

31Sarewo ji krom suk bok gare subere nin jam do, sangge, Yefun Yesus anato Ye gato Yefun Allah syogat ma mo bur ré wa kak os ndo wa men yetu ete jom men, subere nin jam do, sangge, Yefun Yesus anato Yefun Allah bi Gan. Sane dom, ji krom sukdu bok gare subere nin jam do, nin nai sukjimnut dik do, nin onyar kem mo An it yo, bere nin kem ndo to kapyo mato kapyo it anane.



 <<  Yohanes 20 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran