Alkitab Mobile SABDA
[VER] : [ABUN]     [PL]  [PB] 
 <<  Yohanes 9 >> 

1Yefun Yesus mubot os saresa, An me yetu ge dik yo gato gro ndu. Kadit kam gato ye ne bi im kem su an, an gro ndu it.

2Yefun Yesus bi pakon ndo mo Yefun do, "Yeguru, suma ben anato ye ré gro ndu kadit kam gato an bi im kem su an ne? An gro ndu mo sukibit gato an bi ai si an bi im ben ne bado, an dakai ben e?"

3Yefun Yesus ki do, "Ye ré gro ndu mo sukibit gato an bi ai si bi im ben ne nde. An gro ndu mo sukibit gato an dakai ben ne dom nde. Wo ye ré gro ndu subere yé mwa me Yefun Allah bi suktinggi bor mo an.

4Ji kem mo bur ré su nombrak tó, sane men ben suk tepsu Ye gato syogat Ji ma more ki ne. Men ben An bi suk-i su nombrak. Noru it yo, men yo ben suk yo o nde.

5Ji mo bur ré tó, Ji anato tepsu sukru gato rer ku nje mo bur ré."

6Yefun Yesus ki bi sukdu-i ne or sa, An sukut mo bur, orete An waiyu An sopkwa mo bur gato An sukut mone. An nai burdat war ne, ete An es mo ye gato gro ndu ne gro bak.

7Yefun Yesus ki nai ye ne do, "Nan mu, nan mus nan gro mo syurgun Siloam et!" (Siloam su a Ibrani bi sukjimnut do, 'Ye syogat ma.') Sane ye ne mu, an mus an gro mone, orete an satu mo nu sa, an gro gan rer, ndo it.

8Tomga nyim ye gro ndu ne an kem mo os de wa ndek sugum mo yé gato muket os ne. Ye gato kem karowa ye gro ndu bi nu ne si ye gato me an ndek sugum mo ye yi ne, án ndo mo yu do, "Ye gare anato tomga u an gro ndu, ete an ndek sugum mo nje bado?"

9Yé bok ne deyo ki do, "Sangge, an gare it." Deyo o ki do, "Nde re, an gro bergan tepsu ye gane sor re." Sarewo ye ne dakai ki do, "Ji dakai anare it."

10Yé bok ne ndo mo ye ne do, "Ben sa u anato nan gro ndo it ré ne?"

11Ye ne ki do, "Ye gato yé kendo do Yesus fros burdat war, ete An es mo ji gro bak. Orete An ki nai ji do, 'Nan mu mo syurgun Siloam, nan ambru syur mo nan gro et.' Sane ji mu mus ji gro or sa, ji me suk sisu ndo it."

12Sane yé bok ne ndo mo an do, "Te Ye gane mo u ne?" Ye gato gro ndo satu ne ki do, "Ji jam nde re."

13Sane ye gwat ye gato gabere gro ndu ma mo ye Farisi.

14Ye gwat ye ne ma mone, we Yefun Yesus fros burdat war wa ben ye ne gro ndo satu su kam sye kam Sabat ne.

15Sane ye Farisi ndobot ye ne do, 'Ben sa u anato nan gro ndo ne?' Ye ne ki do, "Ye gane es burdat mo ji gro bak, or o ji ambru syur mo ji gro, ete ji me suk sisu ndo it."

16Ye Farisi ne deyo ki do, "Ye gane yo ma kadit Yefun Allah nde, we An ben suk siri kadit men bi sukduno subot kam sye kam Sabat." Sarewo ye Farisi deyo o ki do, "Ben sa u anato Ye gato ben suk gato siri ne nggiwa ben suk gato kadum Yefun Allah bi suktinggi gato ben men yeket sare ne?" Orete ye Farisi duwer yu mo Yefun Yesus it anane.

17Sane ye Farisi ndobot ye gato gro ndo satu ne o do, "Nan dakai bi sukjimnut subot Ye gato ben nan gro ndo satu sa u ne?" Ye ne ki do, "Ye gato ben ji gro ndo ne, An yenabi gato frot Yefun Allah bi suktaru nai men."

18Sarewo ye Farisi bariwa jammo ye ne bi sukdu-i. Ye Farisi syidem syu ye ne mo bi sukdu gato an ki do an gro ndu, ete su ré an gro ndo satu. Sane ye Farisi kendo an bi ai si bi im ma, ete

19ye Farisi ndobot do, "Nin ka we bi pa gato gro ndu kadit kam gato nin pe ne anare bado? Ben sa u anato pa me suk sisu ndo satu ne?"

20Pa bi ai si bi im ki do, "Sangge, men bi pa anare. Pa ne gro ndu kadit kam gato men pe pa ne it.

21Sarewo men jam nde suk gato ben pa gro ndo re. Sane dom men jam nde Ye gato ben pa gro ndo satu re. Nin dakai ndo mo pa sor re. Pa sye it, bere pa dakai ki rer nai nin jam."

22Pa bi im si bi ai ki sane, we an we nyuwa ye Yahudi, we ye Yahudi nai sukjimnut do, ye gato ki rer do, Yefun Yesus anato Yekwesu gato Yefun Allah syogat ma mo bur ré wa nai men yetu kadit sukye ete jowa men ne yo, ye gato ki sukdu sane, bere ye Yahudi duyawa ye ne sok mo ye Yahudi bi nu ari re.

23Sane anato pa bi im si bi ai ki do, "Pa sye it. Nin ndo mo pa dakai sor!"

24Orete ye Farisi kendo pa gato gro ndu gado ne ma, wam do we o, ete yé ne ki nai pa do, "Nan tom su men, ete nan syo nan syim su do, 'Yefun Allah anato kem mo gu nim ne,' ete nan ki nan bi sukdu-i ne sangge sor. Men jam do Ye gane ben bi suk-i ibit sor."

25Pa ne ki do, "Ye ne ben sukibit bado, ji jam nde. Sarewo suk dik sor anato ji jam, suga nyim ji gro ndu, sarewo su ré ji me suk sisu ndo it."

26Sane ye Farisi ki nai pa do, "Ye ne ben suma su nan ne? Ben sa u anato An ben nan gro ndo satu ne?"

27Pa ki do, "Ji ki nai nin mó re, sarewo nin brek nin dabe kadit. Nin iwa nin jam ji kibot sukdu ne o wa suma ne? Nin dom iwa nin simo Ye ne bado?"

28Pa ne ki bi sukdu-i sa, ye Farisi kabor pa ne. Ye Farisi ki nai pa do, "Nan anato simo Ye gane. Men nde re. Men simo Musa sor re.

29Men jam do, Yefun Allah ki sukdu nai Musa mó re, sarewo Ye gane men jam nde ware, men jam nde pe gato An ma kadit ne."

30Pa ne ki nai ye Farisi do, "Mban! Nin ki nin bi sukdu-i yak yi re. Nin jam nde pe gato An ma kadit ne, sarewo An anato ben ji gro ndo satu re.

31Men jam do, ye gato ben sukibit mwa ndek suk yo mo Yefun Allah it yo, bere Yefun Allah yo jammo an nde, wo Yefun Allah jammo ye gato ben Yefun bi suk-i tepsu Yefun mit sor re.

32Kadit kam gato Yefun Allah ut bur ré su ketke kom more, ye gato gro ndu kadit kam gato bi im pe an ne, ye yo nggiwa ben ye ne gro ndo satu mo nde.

33Sane Ye gane ma kadit Yefun Allah, ondesa An yo nggiwa ben suk yo mo nde."

34Ye Farisi ki nai pa ne do, "Mban! Kadit kam gato nan bi im kem su nan, sukibit mwa jom nan re, or o su ré, nan nut do, nan anato duno men e?" Sane ye Farisi duyawa pa ne sok mo ye Yahudi bi nu ari, yé syun pa mu mo nden wé kadit re.

35Yefun Yesus jam do ye Farisi syun pa ne mu mo nden wé kadit ye Yahudi bi nu ari sa, Yefun Yesus mu ku pa ne. Yefun Yesus ku pa ne sa, Yefun Yesus ki do, "Te nan onyar kem mo Yetu bi Pa it bado?"

36Pa ne ki do, "Yenggras, Yetu bi Pa anato je u ne? Nan ki rer nai ji subere ji onyar kem mo An et."

37Yefun Yesus ki nai pa do, "Nan me An mó re. Ji, gato ki suk su nan su ré anato Yetu bi Pa."

38Pa ne ki do, "Yenggras, ji onyar kem mo Nan it." Ete pa tu umsu mo bur mo Yefun Yesus gwem.

39Yefun Yesus ki do, "Ji ma mo bur ré subere Ji ben yetu tara kadit yu. Sane bere ye gato gro ndu mo Yefun bi suk-i, bere an me suk sisu ndo satu, wo ye gato nut do, án sa, gro ndo mo Yefun bi suk-i yo, bere án gro ndu or re."

40Ye Farisi ge bok yo mone jam Yefun Yesus ki sukdu ne sa, án ndo mo Yefun Yesus do, "Nan bi sukjimnut sa u ne? Nan nut do men gro ndu dom e?"

41Yefun Yesus ki nai án do, "Nin tepsu ye gato gro ndu gato jam nde Yefun bi os-i ne yo, bere Yefun yo syo sukye nai nin mo sukibit gato nin ben ne nde. Sarewo nin ki do, nin sa, nin tepsu ye gato gro rer ndo gato jam Yefun Allah bi os-i ne, ondewo nin yo benbot nde, sane bere Yefun syo sukye nai nin mo sukibit gato nin ben ne."



 <<  Yohanes 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel