Alkitab Mobile SABDA
[VER] : [ARALLE]     [PL]  [PB] 
 <<  1 Korintus 10 >> 

1Oa' solasohong, kalehaii yato ang dahi pano di neneta di hao di ongeang makä'däng dolu. Natehte Puang Alataala umpake salehu' ang mellao di olonaii anna nabaha asangngi ungngolai le'bo' ang napatisillängnging.

2Mala dioatee: sinnoa anna ditero'ingkea', tanda mendahimingkea' to pentindo'na Puang Yesus, ya' noa tunne' sika ungngolai asang salehu' anna le'bo' ang mendahi tanda dioatee to pentindo'na Nabi Musa.

3Ingkänna yato tau, ungngande asang andeang sibaha-baha anna menu' sibaha-baha. Yato andeang anna ang la naenu', Kalaena Puang Alataala ang mampaaha. Yato uhai ang sika naenu' sohong yaling mai di batu papang, anna yato batu papang mala dipasihapang Kristus ang sika mamposolai.

4(10:3)

5Ampo' moinnakato noa, mai'di di alla'naii ang dai nakärä'i Puang Alataala pembabena lambi' sika mate yato di hao di ongeang makä'däng.

6Ingkänna yatoo ang dahi pano di to Yahudi dolu mendahi pohapangang pano di kita' anna malai daingkea' mailu pano di aka-aka ang karake, sinnoa yato ang sika nababe.

7Daa umpenombai tau-tau sinnoa ang nababe piha yato neneta dolu. Sinnoa ang tiuki' yaling di Suha' Masero naoatee, "Yato tau mai'di ma'rame-rame mande anna menu', mane umpensinnoaii to malilling ang lella' umpenombai dehata lino."

8Daingkea' ungngindä'-indä' pa'bannetauang, sinnoa ang nababe piha yato neneta dolu. Aka' yato pembabe tasampa'naii lambi' pihsang matena dompulo tallu sa'bunna tau.

9Datoingkea' la unsändä'i Dehata, sinnoa ang nababe piha yato tau lambi' mai'di mate nakeki' ile.

10Anna daa umpomämmäng sinnoa ang nababe pihaii lambi' mai'di napatei malaeka' ang umbaha kamateang.

11Ingkänna yatoo dahi pano diii dolu ang la mendahi pohapangang pano di kita'. Tiuki' anna malaingkea' madaka inde ang tuho dinoa di tempo ang marungku'mi allo katämpä'.

12Dahi, ponna ke unsangaia' kalaemu matoho yaling di kapampetahpa'ang, ya' madakakoa' andana manaho arangkoa' tama di dosa sinnoa yato neneta dolu.

13Kalehaii, dai aha pesändä' ang ungngolaia' ang daine' nasa'ding ingkänna hupatau. Anna kalehai loloi yato pa'dandianna Puang Alataala pano di kita': dianto dai la napabeiingkea' disändä'i la'bi anna ang mala ditähäng. Ponna ke taolai bumi pesändä', ya' la mebea Puang Alataala lalang anna malaingkea' lahpa' di hao mai lambi' tontongngingkea' matoho anna tähäng.

14Dahi, solasohong, pakahaoia' peada'ang ang menomba pano di tau-tau.

15Anna dioa' tau ang keaka', pamapahehsai tula'ku anna pihki' manahpai la tahpa' si'daraka, daraka.

16Ponna ke ungngenu'ingkea' angkoro' ang la mampakalehaingkea' didiona hahana Kristus anna ma'kuhhu'sumanga'ingkea' dai' di Puang Alataala, ya' dianto ang tapotanda taoatee petauannamingkea' Kristus ang nasulängngi ungngolai kamateanna. Noa tunne' ke umbahe-bahe bumingkea' yato roti ang la mampakalehaingkea' kamateanna, ya' dia tunto nei' ang tapotanda taoatee mendahimingke baheang yaling di bätäng kalaena Kristus.

17Aka' mesa supu roti ang dibahe-bahe anna ingkännaingkea' mangngande asang yatoo. Bahtuanna inde ang tababe: kita' tau mai'di sangkalebumingke yaling di kasikenteanta sibaha Puang Yesus Kristus, sihapang mesa bätäng kalae.

18Noa tunne' peada'anna to Israel. Naonge yato tau anna umbahai penombaang ang la ditunu, ya' naande sibaha-baha solana anna sika ma'mesa yaling yato di peada'ang.

19Daa pake unsangai kuoatee yato tau-tau ang napenombai to malilling, dehata si'da, bahtu' ang dipopenomba pano di tau-tau aha kakuasaanna lambi' dai mala diande.

20Dai nei'. Bahtuanna inde tula'ku noa indee: yato ang dipopenomba pano di tau-tau setonganna dipopenomba pano di setang, anna dai kuaku ke la ma'mesakoa' sibaha yato tau ang mampanoa.

21Ke ungngenu'ingke angkoro' yaling umpenombai Puang Yesus Kristus, daingke mala ungngenu' angkoro' sibaha tau ang menge umpenombai setang. Daingke mala ungngande roti yato ang la mampakalehaingkea' didiona kamateanna Puang Yesus anna la mande toingkea'ne' sibaha tau ang menge umpenombai setang.

22Unsangarakaa' dio dai maaka ke umpakeaha'ingkea' Puang Alataala aka' mandeingkea' sibaha-baha to umpenombai setang? Unsangarakatoo matoho puhamingkea' andana Dehata?

23Ahakoa' ang mangngoatee, "Aka' napabeba'mingkea' Dehata, ya' mala tababe moi aka." Tahpa'etee', ampo' kodi' kuoa kotee: ponna ke tababei ingkänna ang tapemala, dai la kekuna asang pano di kalaeta, bahtu' dai la umpamatoho inahanna solata.

24Dotanne' dai tababe yato supu ang takärä'i, ampo' yato toi ang la undului solata.

25Ingkänna andeang ang dibalu' di hao di pasa' mala asangnga' taande. Dai tau mangki' mekutana dolu la taoatee, dipopenombaraka pano di tau-tau yato andeang, daraka. Dai pahallu bata-bata inahanta,

26aka' "Inde lino sibaha ingkänna ihsinna, naampui asang Puang Alataala."

27Ponna ke ahai solamu ang tadia to Sahani anna nabahaio mande sibaha-baha di hao di dasanna, ke ungngakui, ya' malao mao. Mala ungngande yato ang napakandeingko, dai pahallu dipekutanaing dolu umba yato nakasulei.

28Ampo' ke ahai ang mangngoate mating, "Inde bale puha dipopenomba pano di tau-tau," ya' daungngandei, aka' umbai la mapi'di' inahanna yato solamu ang mantula'ingko ke ungngandei.

29Pihki'i inahanna yato solamu anna daungngandei. Umbai dai maaka yaling di unnä' inahammu, ampo' kalehaike' solamu. Umbai la aha ang la mangngoatee, "Akaboi yato pampemalangku anna la malai nakalapai tau senga'?

30Ponna ke ma'kuhhu'sumanga'ä' dai' di Puang Alataala naonge anna kuandei yato bale, ya' akana nasallaä'ne' tau senga'?"

31Ampo' situhu' pihki'ku, ponna mandeingke, bahtu' menu'ingke, bahtu' moi aka ang tababe, pahallu tababe situhu' lalanna ang la umpamatande Puang Alataala.

32Daa umbabei ang la umpamanaho solamu, moi to Yahudi, moi ang tadia, anna moi solata to mampetahpa'.

33Dianto inde pahtuyungku ang si kutuhu'i. Kupengkabela-belai umbabe yato aka ang mahasa pano di ingkänna tau, dai kupihki' kamasannanganna kalaeku, bahtu' ang kekuna pano di kalaeku, ampo' yato ang la kekuna pano di tau senga' anna malai sika salama'.



 <<  1 Korintus 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel