Alkitab Mobile SABDA
[VER] : [ARALLE]     [PL]  [PB] 
 <<  1 Yohanes 4 >> 

1Oa' solasohongku ang kukalemui, dakoa' la si madihhi' umpetahpa' tau moi la naoatee, "Nakuasaimä' Inaha Masero." Aka' mai'ding ang unsanga kalaena nabi, ampo' setonganna tadia, kende' anna mao mampakuhu tama inde di lino. Dahi la pahallua' umpemalesoi dolu bahtu' la Inaha Maserona si'daraka Puang Alataala ungkuasaii menge mampakuhu, bahtu' la tadiaare.

2La malesongnga' ungngita tau ang nakuasaing Inaha Masero ke naakui naoatee, "Puang Yesus To Dilanti' la Mepasalama' tamang inde di lino menghupatau."

3Ampo' menna-menna ang dai mangngakui, tau yatoo dai napentamai Inaha Maserona Puang Alataala, ampo' napentamaine' inahanna setang bahtu' dioatee balinna Puang Yesus Kristus. Puhangnga' unghingngi la sule inaha yatoo anna ahana suleng yaling inde di lino.

4Oa' änä'ku, dioa' dio änä'-änä'namokoa' Puang Alataala anna puhamokoa' untalo ingkänna ang unsanga kalaena nabi ampo' setonganna tadia, aka' ma'kuasa puhane' Inaha Masero ungkuasaikoa' andana yato inaha ang ungkuasai to tamampetahpa'.

5Yato ingkänna ang unsanga kalaena nabi ampo' setonganna tadia, yaling mai di alla'-alla'na to tamampetahpa' lambi' tula'na situhu' pampemalanna solana anna napehingngii.

6Kami'mitoo änä'-änä'na Puang Alataala. Dahi menna-menna ungnginsammi Puang Alataala, tau yatoo la umpehingngii pepakuhungki'. Ampo' menna-menna tadia änä'-änä'na Puang Alataala, tau yatoo daine' umpehingngii pepakuhungki'. Noantoo tapangnginsangngi alla'na pepakuhu tahpa'na Inaha Masero anna pepakuhunna inaha ang la mepasähsä' lalang.

7Ingkämmua' solasohongku ang kukalemui, la sikalemuiingkea' mesa anna mesa aka' yato pa'kalemu yaho mai di Puang Alataala. Anna menna-menna ang si ma'kalemu, tau yatoo maleso anna änä'-änä'nai Puang Alataala anna ungnginsammi Puang Alataala.

8Aka' sipa'na Puang Alataala ma'kalemu. Dahi menna-menna ang dai ungkalemui solana, tau yatoo maleso daine' ungnginsang Puang Alataala.

9Puang Alataala puha unsuo Änä' samboana mentama di lino anna malai nabeaingkea' katuhoang lambi' sapano-panona. Noantoo napaitaiingkea' pa'kalemunna pano di kita'.

10Aka' ang dioainte pa'kalemu tadia kita' ang ungkalemui Puang Alataala, ampo' Puang Alataala ungkalemuiingkea' anna unsuo Änä'na umbala'iingkea' dipatei lambi' mala diampungngi dosanta.

11Oa' solasohongku ang kukalemui, aka' noa yato pa'kalemunna Puang Alataala pano di kita', dahi pahallu touingkea' kita' sikalemui mesa anna mesa.

12Moinnakato dake' aha tau moi poro la mesa ungngita Puang Alataala, ampo' ponna sikalemuimingkea' mesa anna mesa, ya' keboanto pa'kalemunna Puang Alataala yaling di kita', anna tontong lolo Puang Alataala tohho yaling di kalaeta.

13Aka' nasuhung tainsangnga' taoatee tohhomingkea' yaling di Puang Alataala anna tohho toi yaling di kalaeta, aka' puhamingkea' napatamai Inaha Maserona.

14Anna puhang kami' kiita anna kisa'biing kioatee Ambeta unsuo Änä'na mentama di lino mendahi To Pepasalama'.

15Menna-menna mangngakui naoatee, "Puang Yesus Dianto Änä'na Puang Alataala," tau yatoo tohhong yaling di Puang Alataala anna Puang Alataala tohho yaling di kalaena.

16Anna tainsammi sibaha tapetahpa' taoatee pa'kalemunna Puang Alataala mentama di kalaeta. Sipa'na Puang Alataala ma'kalemu. Menna-menna ungkalemui lolo solana, tau yatoo tohhong yaling di Puang Alataala anna Puang Alataala tohho yaling di kalaena.

17Dipasundung pa'kalemu yaling di kalaeta anna malai daingkea' mahea' di hao di olona Puang Alataala ke lambi'mi Allo Panghohto'ang. Daingkea' la mahea' aka' sinnoang pembabeta Puang Yesus.

18Ke ahai pa'kalemu yaling di kalae, daingkea' la mahea'. Aka' ponna sundummi pa'kalemu yaling di kalae, dianto ang la umpa'dai kamahea'ang. Aka' daingkea' la nahoa pantahungkungang yato ang si napihki' hupatau. Dahi menna-menna mahea', tau yatoo dake' sundung pa'kalemunna yaling di kalaena.

19Dianto anna si ma'kalemumingkea' aka' dolu puhane' Puang Alataala ungkalemuiingkea'.

20Ponna aha tau mangngoatee, "Ungkalemuiä' Puang Alataala," ampo' ungkahiri' solana to mampetahpa', tau yatoo ma'loseng-loseng. Aka' solana ang naita anna dai nakalemui, londonanne' Puang Alataala ang dai naita.

21Anna Diae' ang umbeaingkea' inde pahenta naoatee, "Menna-menna ungkalemui Puang Alataala pahallu toi la ungkalemui to mampetahpa'."



 <<  1 Yohanes 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran