Alkitab Mobile SABDA
[VER] : [ARALLE]     [PL]  [PB] 
 <<  2 Korintus 1 >> 

1Pano di ingkänna petauanna Puang Alataala di hao di Korintus, sibaha ingkänna to mampetahpa' di hao di Poropensi Akhaia. Hao mai di Paulus, sibahaang ta Timotius. Nasuhung anna kuuki'i inde suha' mating, aka' naängkä'ä' Puang Alataala mendahi rasulna Kristus.

2Salama'ku mating. Ke la malai Puang Alataala Ambetaa' sibaha Dehatanta Puang Yesus Kristus la umbehekoa' anna namana'koa' kamasahkeang sibaha kamasannangang.

3Tapudii Puang Alataala, Ambena Puang Yesus Kristus, Dehatanta. Inde Ambe si mekalemui lolo anna Dianto kasuleanna ingkänna pepakahanga.

4Si umpamatoho inahangki' yaling di ma'kahupa-hupa kamasuhsaang ang mehoa, lambi' mala touang kami' umpamatoho inahanna tau senga' yaling di ingkänna kamasuhsaannaii, umpake kamatohoang ang kitahimbo yaho mai.

5Yato kamasuhsaang ang nasa'ding dolu Kristus, ya' mai'di ang kisa'ding tou kami'. Ampo' mai'di toe' kamatohoang inaha ang kitahimbo yaho mai di Kristus.

6Ungngolai kamasuhsaangki', dianto napolalang Puang Alataala umpamatoho inahammua', solasohong, anna malakoa' salama', aka' si masuhsa toukoa' dio, sinnoaingkea'. Dahi, ke napamatohoi inahangki' Puang Alataala yaling di kamasuhsaangki', ya' la napamatoho toua' dio inahammu, lambi' la tähängkoa' ungngolai kamasuhsaang.

7Dianto anna dai bata-bata inahangki' didiomua', aka' kiinsang kioatee si ungngolai toukoa' dio kamasuhsaang sinnoaingkea', anna inang la napamatoho inahammu Puang Alataala sinnoaingkea', lambi' la tähängkoa'.

8Oa' solasohong, pahallu ungnginsang ungngoatee yato ingkänna kamasuhsaang ang manghoaang di lau' di Poropensi Asia matingngi liu, lambi' sai'di' tala dai kibela kitähäng anna kisanga la mateang.

9Kipihki' kioatee, "Dang aha lalang la malaang tuho." Ampo' nasuhung dahii noa yatoo, anna malaang dai umpetahpa' kamatohoang kalaeki', ampo' la umpetahpa'ang supu Puang Alataala, aka' Dianto ang mala umpatuho sumule to mate.

10Dahia', solasohong, nalahpa'ang tora' di hao mai yato di kamasuhsaang matingngi di allo ang lehsu' lambi' daang mate. Noa tunne' la nalahpa'ang di hao mai di kamasuhsaang ang dahi dinoa. Anna kipetahpa' kioatee la nalahpa' touang nei' di hao mai di kamasuhsaang ang la dahi di allo-allo di tingngayo.

11La napanoa, solasohong, aka' si unsambayangngiang. Aka' ponna ke mai'dii tau ang mansambayangngiang, ya' la nabeheang Puang Alataala lambi' mai'di tau la ma'kuhhu'sumanga' dai' di Puang Alataala.

12Oa' solasohong, male'deang aka' yaling di unnä' inahangki' maroho pembabeki' pano di ingkänna tau, londonang pembabeki' mating. Dai aha ang kibuni yaling di ingkänna siamo, maroho pahtuyungki' untuhu'i paelo'na Puang Alataala. Daang untuhu'i kamanähänganna hupatau, ampo' pembabeki' situhu' pa'kalemunna Puang Alataala pano di kami'.

13Yato ang kiuki' mating, supung ang la maromi'a' umbata anna ungnginsang. Ahakoa' ang inang ungnginsammi pahtuyungki', ampo' aha piha ang dake'. Dahi kuhannuang la ungnginsang asangkoa' pahtuyungki', lambi' ke suleng Puang Yesus, ya' la umpokale'deang, sinnoa kipokale'de toukoa' dio.

14(1:13)

15Dianto anna ahai dolu pahtuyungku la pendoang lempäng diting di bohtomua' anna malakoa' pendoang ullambi' behe. Noa indee setonganna pahtuyungku dolu: la lempängngä' mating naonge anna panoä' di Makedonia. Pihsananna ke sumulemä' di hao mai, ya' lempäng bumä' anna malai unduluiä'a' yaling di pellaoangku sau di Yudea.

16(1:15)

17Ampo' dai dahi yato pahtuyungku. Umbai damä'a'te' umpetahpa'? Bahtu' unsangaa' mopahtuyu salaä' situhu' pampemala kalaeku, aka' mahka kuoantee "io," mahka kuoantee "dai"?

18Daete' noa yatoo, solasohong! Sinnoanna pa'dandianna Puang Alataala dai nabala'i, ya' noa tunne' pa'karangki' mating daete' mahka mengngio, mahka la dai.

19Aka' kami' ta Silas anna ta Timotius puhaang umbaha mating kaheba yaho mai di Puang Yesus Kristus, Änä'na Puang Alataala. Anna yato Puang Yesus Kristus daete' umpakarende-rende pahtuyunna, mahka mengngiong, mahka dai. Ampo' pahtuyunna pano di kita' mala lolo dipetahpa'.

20Aka' mai'di liu pa'dandianna Puang Alataala pano di kita', anna inang la dahi asang aka' kasikenteanta sibaha Kristus. Dianto anna ke umpudiingkea' Puang Alataala si taoatee, "Aming! Inang noang!" Aka' pa'dandianna Puang Alataala pano di kita' ahana inang la sundung yaling di Kristus.

21Kalaena Puang Alataala ang mampamatohoingkea', noa kami' noa toi dioa', lambi' sikenteingkea' sibaha Kristus. Anna napilleiingkea' mendahi ampuanna,

22anna nabeaingkea' Inaha Masero ang mendahi tanda dioatee ampuannaingke. Inde Inaha Masero sinnoa tanda yaling di inahanta ang umpamatoto' pa'dandianna Puang Alataala pano di kita', lambi' maleso taoatee yato ingkänna ang nadandiingkea' inang la tatahimbo di allo-allo ang la sule.

23Oa' solasohong, dä' loseng, naitaä' Puang Alataala anna Dianto ang ungnginsang ihsi inahangku. Nasuhung dai dahi yato pahtuyungku di pihhang tiing mao mating, aka' dai kuaku la kukahha'ikoa'.

24Daang pemala mentuambahsa' mating, aka' kapampetahpa'ammu pano di Puang Yesus matoto'mi. Ampo' diare' pemalaang mengkähängngingkea' sibaha anna malakoa' masannang.



 <<  2 Korintus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel