Alkitab Mobile SABDA
[VER] : [ARALLE]     [PL]  [PB] 
 <<  2 Timotius 3 >> 

1Kalehaii indee: Di allo-allo di hundinna la mai'di kamasuhsaang.

2Hupatau la umpihki' supu kalaena noanna: ungkailui doi', ungngangka'-angka' kalaena, pa'pesalaang, dai tuhu'-tuhu'ang di to baha'na, dai nainsang ma'kuhhu'sumanga', dai ungkahea' Dehata,

3dai nainsang ungkalemui moi solasohonna, dai naaku ungngampungngi solana, si untula'-tula' tahuhu solana, dai nainsang undakai kalaena, si masahhu', dai ungkärä'i kamapiaang,

4si mambulitu', dai ma'pihki' kalambe', si ma'tomanähäng-nähäng, untuhu'i pampemalanna toboe' andana pa'elo'na Puang Alataala.

5Di mentolinona si kamba' mampetahpa', ampo' di mendehatanna ungkebo'i kakuasaanna kapampetahpa'ang. Maleke diita ampo' längko. Daumpenghauii yato tau ang noa.

6Tau ang noa, ahang ang si mentama di dasanna tau senga' anna umpakuhu sala-salai bahine ang maromi' dise'de' anna ang unsa'ding mai'di dosanna sibaha mai'di pampemalanna ang karake.

7Yato bahine ang noa pemala loloke' dipakuhu, ampo' dasiang aha ungnginsang pepakuhu ang tahpa' yaho mai di Puang Alataala.

8Sinnoa ta Yanes anna ta Yambres naonge umbali-balii Nabi Musa, la noa tunte'ne' yato tau ang umbali-bali pepakuhu ang tahpa' yaho mai di Puang Alataala. Pampihki'naii karake si'da-si'dang anna kapeimänganna dai ditahimbo ke dipahehsai.

9Ampo' inang dannang la aha ullambi' pahtuyu karakena, aka' katomahoannaii la nainsang asang hupatau sinnoa yato ang puha naolai ta Yanes anna ta Yambres.

10Ampo' dio Timotius, inang ungnginsammi pepakuhungku, pembabeku, pampemalaangku, kapampetahpa'angku, kasa'bara'angku, pa'kalemungku, umba noa kupengkatähängngi yaling di kamasuhsaang naonge dipakauho-uhoä', sinnoa ang puha kuolai di hao di Antiokhia, di Ikonium anna di Listra. Ampo' ingkänna yato kamasuhsaang nalahpa'ingkä' Puang Yesus.

11(3:10)

12Ingkänna tau ang pemala untuhu'i pa'elo'na Puang Alataala anna ma'mesa yaling di Kristus Yesus inang la ungngolaiete' kamasuhsaang.

13Ampo' to umbulitu' solana la tuhtuang mentokarake, aka' lella' mambulitu', menge toe' dibulitu'.

14Ampo' dio Timotius, pahallu tontong umpentokei si'da-si'da yato pepakuhu ang tahpa' ang puha untahimbo anna umpetahpa' liu aka' ungnginsang menna yato ang mampakuhuo.

15Kalehai toine' naonge mengkalaokangko saohko' anna inang untahimbomo Suha' Masero. Yato Suha' Masero mala nabeao kapainsangang nasuhung mala tau untahimbo kasalama'ang yaling di Kristus Yesus.

16Ingkänna ang tiuki' yaling di Suha' Masero sohong yaling mai di Inahanna Puang Alataala anna kekuna mepakuhu katahpa'ang, ungkambahoing kasalaang anna mepatuhoi lalang ang tahpa', anna umpakuhu hupatau anna malai tuho maroho.

17Monna ke untuhu'i Suha' Masero, ya' sabua'na Puang Alataala mala dipasundung lambi' umbabe ingkänna pengkähängang ang mapia.



 <<  2 Timotius 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel