1Aka' mesamokoa' Kristus lambi' matohoa' inahammu anna aka' pa'kalemunna lambi' makahanga lolokoa'. Tontong lolokoa' naposolai Inaha Maserona Puang Alataala, si umpoinahakoa' kapahalluanna tau senga' anna ma'kalemukoa'.
2Dahi pasundungngi kakahsiangku ungngolai mendahikoa' mesa inaha, sikalemuikoa' mesa anna mesa, anna mesa inahakoa' yaling di pahtuyummu.
3Yaling di ingkänna pembabemua' dasi'da-si'dakoa' la mala umpihki' supu kalaemu, anna datoukoa' la malängkä' inaha. Ampo' la mahempo' inahakoa' anna sipakeangka'koa' mesa anna mesa la'bi andana kalaemu.
4Pihki' liu toia'ne' kapahalluanna solamu, daa supung kalaemu la umpihki'.
5Anna pengngoya'mua' pahallu la sinnoa Kristus:
6Aka' moinnakato anna Puang Yesus Kristus inäng Puang Alataala, ampo' datoete' umpentokei sakali kadehataanna.
7Ampo' umpellei ingkänna ang aha di Kalaena, tama inde di lino menghupatau anna mendahii sinnoa siang mesa sabua'.
8Tahpana mendahi hupatau, ya' umpamadihoi'ammi Kalaena anna tuhoi untuhu'i pangngelo'na Puang Alataala lambi' mate yaho di kayu sitambeng.
9Dianto anna napamatandeng Puang Alataala anna nabeai kakuasaang ang la ungkuasai asang ingkänna kakuasaang senga',
10anna malai ingkänna aka-aka, noa ihsinna suruka, noa ihsinna inde lino, anna noa toi ang di hoi' di apa' tampo, la malimuntu' asang di hao di olona Puang Yesus,
11anna la sika mangngaku naoatee, "Puang Yesus Kristus dianto Dehata ang setonganna," lambi' dipamatande Puang Alataala Ambetaa'.
12Dahi ingkämmua' solasohongku ang kukalemui, la tuhu'-tuhu'ang lolokoa' di allo-allo ang la sule sinnoa ang si umpanoa tuhu'-tuhu'ang di allo-allo ang puha. Dai supung ke ditingngä' sibahaingke, ampo' la la'bi puha nei' ke dä' diting. Babe loloia' yato aka ang la sihatang dibabe aka' puha mepasalama' Puang Alataala. Pembabeingnga' yatoo sitonda mahea' anna sikalalla' di hao di olona.
13Aka' Kalaena Puang Alataala mengkähäng yaling di inahammua', lambi' aha kapemalaammua' umbabe yato pangngelo'na anna umbela si'daa' umbabe.
14Yaling di ingkänna pembabemu dakoa' la mala momämmäng anna datoukoa' la mala sibehta-behta.
15La umpanoaa' yatoo anna malakoa' masero, dai aha sallaammua', anna tandaangngi dioatee änä'-änä'na si'damokoa' Puang Alataala, dai aha sahsaimmu yaling di alla'-alla'na tau ang karake yaling di inahanna anna babena. La pahallukoa' sihapang pesilona bintäng ang umballoi kamalillingang
16ke umpa'tula'i bumokoa' yato to karake babena didiona Bahtakara Dehata ang la mebaha pano di katuhoang. Aka' ponna ke umpanoangnga' yatoo, ya' ahang ang la umpamahasa liu inahangku ke suleng Kristus kapendoanna. Aka' la tandaang dioatee yato pengkähängangku dai labu' kale ampo' la keboa.
17Mampetahpa'mokoa' nei' dai' di Puang Alataala anna yato kapampetahpa'ammu mendahing mesa penombaang yaho di olona ang tandaang yaling di ingkänna pembabemua'. Ponna ke dipateiä' aka' inde pengkähängangku yaling umpaturukoa' lalang kasalama'ang, ya' yato hahaku sihapangngete' la ditollo di hahona penombaammua' bahtu' dioatee kapampetahpa'ammua'. Ponna ke ahanai inang la noang, ya' la ma'kuhhu'sumanga'ä' anna ingkännaingkea' la masannang anna kahsi.
18Noa sia tungnga' dio la pahallukoa' ma'kuhhu'sumanga', anna la masannang asangngingkea' sitonda kakahsiang.
19Oa' ingkämmu solasohongku, aha pahtuyungku ke naelo'i Dehatanta Puang Yesus, dianto pemalaä' la baha' unsuo mating ta Timotius napellambi'ikoa' anna malai tiala inahangku ke sumuleng natula'ingkä' kahebamua'.
20Aka' ta Timotius supu ang kusitamaing anna si napihki' si'da-si'daingkoa' kamasannangammu.
21Ingkänna inde mai tau senga' supunne' nainsang umpihki' pengkähängang kalaena anna umpa'sele-seleiine' pangngelo'na Puang Yesus Kristus.
22Ampo' inde nei' ta Timotius, ungnginsammia'ne' ungngoatee inang mala dipetahpa'. Puhamang mengkähäng kahha' sibaha-baha, sihapangngang to sipoänä', umpepainsangnging Kaheba Mapia.
23Dahi bohtuke' inde kaha-kahangku mane kusuoi mating.
24Anna hannu liuä' dai' di Dehata kuoate la nabuhkeingkä' lalang anna malai baha' mating touä' koo kupellambi'ikoa'.
25Didionane' solasohongku ta Epafroditus, yato ang unsuoa' sule naduluiä', ya' sibaha lolomanne' yaling di pengkähängangku anna dai lengka' di behingku naduluiä' yaling umbali pengkähänganna setang. Ampo' pahallu la kusuong sumule mating
26aka' nakarohhengngi liukoa', la'bi-la'binna dai masannang inahanna tahpana nainsang naoate umpelelengnga' mating makorong.
27Moinnakato anna tahpa' si'dai makorong anna sai'di'i tala mate, ampo' aka' pa'kalemunna Puang Alataala lambi' bono'mi. Dai dia supu nakalemui Puang Alataala, ampo' nakalemui touä' kodi' anna malai dai tuhtuang masuhsa inahangku.
28Dianto anna kuoaite yaling di inahangku, "Mapia ke baha' sumulei mating." Kutula'ingkoa' noa anna malakoa' kahsi ke silambi'mokoa', dia tuke' anna malai kuhang kamasuhsaangku ke damokoa' unnaha-naha ta Epafroditus.
29Dahi tammuiia' sibaha punno kakahsiang sihapangkoa' untammui solasohonta ang mampetahpa' dai' di Dehata. Pakeangka'ia' ingkänna tau ang sinnoa ta Epafroditus
30aka' sai'di' tala mate ungkähäng yato pengkähängang ang nabea Kristus. Napentuyoi liu anna malai naduluiä' ungkähäng yato ang daia' mala ungkähäng aka' makahaokoa'.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel