1Pano di ingkänna jumaa' di Bohto Galatia. Hao mai di kodi' Paulus, mesaä' rasulna Puang Yesus Kristus. Mendahiä' rasul tadia aka' pantuhona hupatau, tadia toi hupatau ang mangngängkä'ä', ampo' Puang Yesus Kristus untuhoä' anna Ambeta Puang Alataala ang puha umpatuho sumule di hoi' mai di alla'na to mate. Salama' kipalambi' mating ingkännaang solasohommua' to mampetahpa' dinne.
2(1:1)
3Ke la malai Puang Alataala Ambetaa' sibaha Dehatanta Puang Yesus Kristus la umbehekoa' anna namana' kamasahkeang sibaha kamasannangang.
4Puang Yesus Kristusmitoo ang puha umpebeaing Kalaena dipatei anna malai nasulängngiingkea' di hao mai di dosanta anna nalahpa'ingkea' di hao mai di kakuasaanna inde lino ang punno kakarakeang. Napanoa aka' situhu' pangngelo'na Ambeta Puang Alataala ang tapenombai.
5Dipudi anna dipakäyyäng Puang Alataala lambi' sapano-panona. Aming.
6Kukapusa'ikoa' pole'. Puhamokoa' natambai Puang Alataala mendahi petauanna aka' mana' pa'kalemunna Kristus. Dahi akana maromi'rakoa' dio umpengkebo'i anna maokoa' untuhu'i yato kaheba senga' ang nasangai hupatau "Kaheba Mapia"?
7Setonganna dai aha Kaheba Mapia senga' sehalinna yato ang puha kipakuhuingkoa'. Ampo' nasuhung anna umpanoaia', aka' aha yato tau umbulitu' inahammu, umputa'-puta' sala anna umbala'i bahtuanna Kaheba Mapia didiona Kristus.
8Ampo' menna-menna umpepakahebaing "Kaheba Mapia" senga' sehalinna yato Kaheba Mapia ang puha kipakahebaiingkoa', ya' la napahoai petahungkung Puang Alataala yaling di allo katämpä'anna lino! Moi kami' ke umbahaang kaheba senga' bahtu' malaeka'raka yaho mai di suruka, tontommi la napahoai asang petahungkunna Puang Alataala!
9La kusulei bou yato ang puha kutula'ingkoa' kuoatee: menna-menna umpepakahebaing "Kaheba Mapia" senga' sehalinna yato ang puha untahimboa', Puang Alataala la mantahungkung yaling di allo katämpä'anna lino!
10La unsangarakaa'to ke ma'kara noaä' la kupemitai kuoatee, "Anna malaä' napudi hupatau?" Ampo' daete' noa. Aka' sanghupa supu ang kupemitai, dianto la napudiä' Puang Alataala. Aka' ponna ke la kupeängngi lalang umba la kupanoa anna malai nakärä'iä' hupatau, ya' tadiarä'te' disanga sabua'na Kristus.
11Oa' ingkänna solasohongku, pahallua' ungnginsang ungngoatee inde Kaheba Mapia kupepakahebaing tadia di hao mai di hupatau.
12Aka' dai kutahimbo yato Kaheba Mapia di hao mai di hupatau, bahtu' la dioarakatee aha mesa tau umpakuhuä'. Ampo' Kalaena Puang Yesus Kristus ang mampalosaiä' ihsinna yato Kaheba Mapia.
13Inang ahangnga' unghingngi didiona pembabeku dolu yato anna untuhu'ikä' peada'anna to Yahudi. Yato dai aha nasinnoaing kamasahhu'angku pano di petauanna Puang Alataala ang umpetahpa' Puang Yesus Kristus. Si kupeäng lalang umba la kupanoa anna malai pa'da yato to Sahani.
14Anna yaling umpembabeing peada'anna to Yahudi, mai'di para dahingku to Yahudi kupellondoi. Anna untuhu'i si'da-si'daä' ada' kabiasaanna peneneangku, lambi' ke pahallui moi la kupomate.
15Moinnakato noa pembabeku dolu, ampo' inang puhamä' natuho Puang Alataala naonge yalingkä' di kompenna indoku. Anna aka' mana' pa'kalemunna lambi' natambaiä' la mendahi pesuona.
16Situhu' pangngelo'na Puang Alataala puhang umpepainsangnging Änä'na pano di kalaeku anna malai yato Kaheba Mapia didiona Änä'na kupepakahebaing pano di tau ang tadia to Yahudi. Donetoo inang dä' aha umpeäng tau moi poro la mesa ang la mala mampakuhuä' didiona kasahaniang.
17Datouä' aha dai' di Yerusalem umpellambi'i yatoii ang dolu nei' anna kodi' mendahi rasul, ampo' tahpa lupanoä' di Bohto Arab. Ya' di haonto kuongei mengkalao sumule pano di Bohto Mahoa' Damsyik.
18Tallurang pahiamanna mane le'ba'ä' pole' dai' di Yerusalem umpengnginsangngi Petrus. Ampo' supung sampulo lima benginna sibahaang yaho.
19Anna dä' aha silambi' rasul senga' sehalinna Yakobus siullu'na Puang Yesus Dehatanta.
20Inde tula'ku Puang Alataala unsa'biii, dai kutula' kale ampo' kara tahpa'.
21Puhai yatoo, ya' le'ba'mä' pano di Poropensi Siria anna Kilikia.
22Donetoo ingkänna jumaa'na Kristus di hao di Poropensi Yudea dakä' nainsang aka' dakang aha silambi'.
23Supung si napelele ang natula' tau naoatee, "Yato ang si undahhaingkea' dolu, ya' diang dinoa umpepakahebaing kapampetahpa'ang yaling di Puang Yesus Kristus, yato kapampetahpa'ang dianto ang pemala napa'dai dolu."
24Lambi' sika umpamatande sanganna Puang Alataala aka' nahingngi yato kaha-kaha ang dahi pano di kalaeku.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel