1Inde tula'ku langngena' la ungngalaä' mesa pohapangang: mesa änä'-änä' ang namana' kulle ambena dake' mala ungkuasai yato kullena aka' saohko'ke'. Moinnakatoo anna naampui asammi yato kulle, ampo' sihapangke' sabua' aka' nakuasaike' tau senga'.
2Aka' aha tau senga' ang mangnguhu'ing kapahalluanna anna undakai yato kullena lambi' di tempona ang puha napama'tantu ambena.
3Noa tunto nei' pano di kita'a' naonge anna dakingkea' mampetahpa', sihapangngingkea' yato änä'-änä' saohko' aka' nakuasaikingkea' ingkänna kakuasaanna inde lino.
4Ampo' tahpana lambi' yato tempo ang puha napama'tantu Puang Alataala, ya' unsuong Änä'na mentama inde di lino. Yato Änä'na nakeänä'ing mesa bahine anna mendahii to Yahudi ang nakuasai Atohanna Musa,
5anna malai unsulängngi tau ang nakuasai Atohanna Musa, lambi' kami' to Yahudi malaang pole' natahimbo Puang Alataala mendahi änä'na.
6Aka' änä'na tumokoa' dio Puang Alataala, lambi' unsuong Inaha Maserona Änä'na tohho yaling di kalaetaa'. Yato Inaha Masero mengkähäng yaling di inahanta lambi' metambaingkea' taoatee, "O Papa', O Ambeku!"
7Dahi dinoa tadiamokoa' sabua', ampo' mendahimokoa' änä'na Puang Alataala. Aka' änä'namokoa' Puang Alataala, dahi sihatang tungnga' dio untahimbo yato pemana'na ang puha napatokaing pano di tau ang mendahi änä'na.
8Dolunna dakoa' ungnginsang Puang Alataala lambi' nakuasaikoa' yato ang disanga dehata ampo' setonganna tadia Dehata si'da.
9Ampo' dinoa ungnginsammokoa' Puang Alataala. (Setonganna mapia puha ke dioaitee nainsammokoa' Puang Alataala.) Dahi akana pemala burakoa' dio la sumule pano di kakuasaanna lino ang dai aha kamatohoanna anna ang tala mala dihannuang la medului? Akana pemala burakoa' la naposabua' sumule?
10Nasuhung anna kuoaitee pemalakoa' la naposabua' sumule, aka' si untuhu'i ada' kabiasaanna to Yahudi noanna: umpakahoa'koa' allo ma'tantu, bulang ma'tantu anna pahiama ma'tantu.
11Lambi' mahea'ä' labu' kale arang dako' yato pengkähängangku aka' dioa'.
12Oa' ingkämmu solasohongku, kupalau si'da-si'da anna umpensinnoaiä' aka' kodi'-kodi' halimä' umpellei yato ada' kabiasaanna to Yahudi, anna dinoa kupensinnoaikoa' ingkämmu ang tadia to Yahudi. Anna dake' aha umbabea' kakarakeang pano di kalaeku naonge anna sibahakingkea'.
13Ungkalehaike'a' naonge anna kupahandu'i kupainsangngikoa' yato Kaheba Mapia, dianto naonge anna makorongngä'.
14Donetoo yato korongku nasuhsaikoa' lambi' mendahi pesändä' käyyäng pano di kalaemua'. Moinnakato noa yatoo, ampo' dä' ungkahi'di'a'. Ampo' diare' untahimboä' sihapang untahimbo mesa malaeka' yaho mai di Puang Alataala bahtu' dioatee sihapangkoa' untahimbo Kalaena Kristus Yesus.
15Donetoo masannang si'da-si'dakoa'. Ampo' akana dai mala tontong yato kamasannangammua' lambi' dinoa? Kuinsang si'da-si'da kuoatee donetoo tandana ungkalemuiä', ya' umbai moi la untähsu'ia' matammu, la umbea tukä'.
16Ya' la unsangairakakä' dinoa balimmua' aka' kutula'ingkoa' yato katahpa'ang?
17Pano yato di tau senga' ang umparende ihsinna Kaheba Mapia, napeäng si'da-si'da lalang anna malai umpempolaia'. Ampo' dai mapia pahtuyunna, aka' pemala la umbohtui kasikenteantaa' anna malai untuhu'ia' sibaha sangkalebu inaha.
18Inang mapia ke tapengkabela-belaii membabe mapia. Ampo' pahallu la umpanoa loloa', daa supung ke yalingngä' di alla'-alla'mu.
19Oa' ingkämmu änä'ku ang kukalemui, dinoa masuhsa bouä' kupenanahaingkoa', sihapangngä' mesa bahine ang lella' mansa'ding. Anna yato kamasuhsaang la tontong kusa'ding lambi' mengnguhaka' manahpa pengkerona Kristus yaling di kalaemua'.
20Pemala si'da-si'daä' la yaling di alla'-alla'mua' dinoa, anna malai kuparende buke' tula' makahha'ku mating aka' dakaleng pole' kuinsang aka buke' ang la mala kubabeingkoa'.
21Oa' ingkämmua' ang pemala nakuasai Atohanna Musa, aha ang la kukutanaiingkoa': Daia' disanga umpebahtuang yato aka ang tiuki' yaling di Atohanna Musa?
22Yaling yatoo tiuki' naoatee aha derua änä'na Abraham: yatoo mesa änä'na nasibalii sabua'na ang disanga Hagar anna yato mesa nasibalii ang inang bahinena disanga Sara, tadia sabua'na.
23Yato bahine ang naposabua' ungkeänä'ing mesa änä' situhu' pahtuyunna hupatau. Ampo' yato bahinena ang tadia sabua' ungkeänä'ing mesa änä' situhu' pa'dandianna Puang Alataala.
24Dahi yato derua bahine mala diala pohapangang. Aka' sika mala dipasihapang pa'dandianna Puang Alataala pano di hupatau. Hagar dianto sihapang yato pa'dandiang ang puha dibea pano di Musa yaho di Tanete Sinai. Umba noa ingkänna änä'na Hagar inang di hoi' di pala'na la dipadahi sabua', noa tunto nei' ingkänna tau ang untuhu'i yato pa'dandiang ang dibea pano di Musa aka' napatisangke' Atohanna Musa.
25Dahi yato Hagar dipasihapang Tanete Sinai di hao di Bohto Arab. Anna dipasihapang toe' Bohto Mahoa' Yerusalem dinoa aka' ihsinna Yerusalem tuho sihapang sabua' aka' naposabua' Atohanna Musa.
26Ampo' yato bahine ang tadia sabua' sihapang nei' Yerusalem Bakahu yaho di suruka. Anna dianto ang tapoindo aka' beba'mingkea', damingkea' naposabua' Atohanna Musa.
27Aka' yaling di Suha' Masero aha tiuki' naoatee, "O bahine ang tamänäng, la kahsio anna mahasa inahammu; anna la mekohao mahasa inahammu, dio ang dake' aha unsa'ding kamapi'di'ang keänä'; aka' bahine ang dake' aha keänä' anna ang napellei sängkä muanena, la mai'di puha nei' änä'na andana yato bahine ang tohho sibaha muanena."
28Dahi sinnoa Ishak änä'na Sara ang dipadahi situhu' pa'dandianna Puang Alataala pano di Abraham, ya' noa toukoa' dio ingkämmua' solasohongku, änä'namokoa' Puang Alataala aka' situhu' pa'dandianna.
29Donetoo yato Ishak, ang dipadahi situhu' pengkähänganna Inaha Masero, nadahha yato Ismael, änä' ang dipadahi situhu' pahtuyunna hupatau. Noa tunto nei' dinoa, tau ang napentamai Inaha Masero nadahha yato ang si unghannuang Atohanna Musa.
30Ampo' aka yato ang tiuki' yaling di Suha' Masero? Naoatee, "Hambaii lao yato sabua' bahine sibaha änä'na, aka' yato änä'na ang sabua' daine' la mala untahimbo mana' di hao mai di ambena, aka' yato mana' la dibea asang pano yato di änä' ang nasibalii bahinena ang tadia sabua'."
31Dahi ingkämmua' solasohongku ang mampetahpa', daiingkea' kita' sihapang änä'na sabua' bahine ampo' sihapangngingkea' änä'na bahine ang tadia sabua'.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel