1Aka ang dioaintee kapampetahpa'ang? Bahtuanna: yato ang tahannuang yaho mai di Puang Alataala, tapetahpa' taoatee inang la dahi. Moinnakato anna dake' taita yato ang taempei, ampo' matohong yaling di inahanta taoatee inang ahang.
2Aka' kapampetahpa'anna, sangngaka-sangngaka peneneanna to Yahudi dolu umpamasannang Puang Alataala.
3Aka' kapampetahpa'anta, lambi' tainsang taoatee naonge Puang Alataala umpapia langi' anna lino, ya' ma'kara supu anna dahing. Dahi ingkänna ang taita dinoa napapia mengkalao yato ang dai mala diita.
4Aka' kapampetahpa'anna ta Habel, lambi' umpopenomba mesa penombaang ang mahasa puha andana penombaanna kakana, dianto ta Kain. Tainsammi taoatee mampetahpa', aka' natahimbong Puang Alataala yato penombaanna ta Habel, anna aka' yato kapampetahpa'anna lambi' naangka' marohong Puang Alataala. Mateng pole' ta Habel, ampo' yato kapampetahpa'anna napakalehakingkea' lambi' dinoa.
5Aka' kapampetahpa'anna ta Henokh daine' mate, bilang tahpa tiängkä' yaling mai di lino. Dai aha tau mallambi' aka' naängkä' Puang Alataala yaling mai di lino. Aka' naonge anna dake' tiängkä', ya' dipakeangka'mi sihapang mesa ang umpamasannang Puang Alataala.
6Anna ke dai aha kapampetahpa'ang, ya' dai tau mala umpamasannang Puang Alataala. Aka' ingkänna tau ang pemala mendungku' pano, pahallu napetahpa' naoatee Puang Alataala inang ahang, anna inang umbehe tau dia siamo ang mampeäng sitonda sangkalebu inahanna.
7Aka' kapampetahpa'anna Nabi Nuh, lambi' untuhu'i pahentana Puang Alataala. Aka' inang puha napa'karai Puang Alataala pano naoaintee: la aha sompo' le'bo' ang la untallangngi lino. Dahi moinnakato anna dake' aha naita yato ang la dahi, ampo' untuhu'i pahentana Puang Alataala lambi' umpapia kahpala' käyyäng anna dai mala limmi' sanghapunna. Aka' yato kapampetahpa'anna lambi' maroho nei' di olona Puang Alataala, ampo' yato ingkänna tau di lino ditahungkung nei'.
8Aka' kapampetahpa'anna Abraham lambi' untuhu'i toe' pahentana Puang Alataala. Natambai Puang Alataala anna nasuoi le'ba' pano di bohto makahao ang la natahimbo dako' mendahi mana'na. Dahi moinnakato anna dake' nainsang yato ongeang ang la naongei, ampo' untuhu'i tomande' nei' pahentana Puang Alataala.
9Aka' kapampetahpa'anna lambi' mebansuli leleng sihapang to sule yato di bohto ang nadandiing Puang Alataala. Noa tunne' Ishak änä'na anna Yakub ampona ang untahimbo toe' yato pa'dandianna Puang Alataala sinnoa Abraham.
10Mebansuli Abraham aka' ungngempei bohto ang la napahtuyu anna napake'de'ing Puang Alataala, mesa bohto ang dibatui matoto' anna la lambi' sapano-panona.
11Aka' kapampetahpa'annaii lambi' Abraham anna Sara mala umpadahi mesa änä', moinnakato anna matuang Abraham anna Sara tamänäng toe'. Mala aka' nainsang naoatee Puang Alataala ang puha ma'dandi mala dipetahpa'.
12Donetoo bätäng puntinna Abraham matua liung, noa ang la mateng. Ampo' mengkalao inde mesa tau, mai'di liu peänä'anna, noa bintäng yaho di langi' bahtu' sama mai'dinna bunging di behing le'bo'.
13Ingkänna yato tau tontong mampetahpa' lambi' matena. Donetoo dake' sika ullambi' yato ang didandiing, supung nainsang naoatee la masae mane dipasundungngii. Mala dioatee sika naita makahao anna masannang naoate la dipasundung dako', aka' unghekeng supu to sule kalaenaii ang lempäng sämpäi' done inde di lino.
14Tau ang ma'pihki' noa yatoo maleso anna umpeängngi bohto ang la mala naongei tohho.
15Tadia bohto ang puha napengkalaoi napeäng, aka' ponna ke noai, ya' mala sika sumule.
16Ampo' yato ang napeäng dianto suruka, mesa bohto ang mahasa puha nei'. Dianto Puang Alataala anna dai masili sika nasangai Dehatanna, aka' umpapiaing mesa bohto ang la naonge sika tohho yaho di suruka.
17Aka' kapampetahpa'anna Abraham lambi' la umpopenomba Ishak änä'na, naonge anna nasändä'i Puang Alataala kapampetahpa'anna. Naoamintee Puang Alataala, "Mengkalao yato di änä'mu la aha mai'di liu peänä'ammu sinnoa yato ang puha kudandiingko." Ampo' moinnakato noa, ya' sadiake' Abraham la umbeho yato änä' samboana la ditunu.
18(11:17)
19Aka' naoate inahanna Abraham, ma'kuasa Puang Alataala lambi' mala la umpatuho sumule Ishak di hoi' mai di kamateang. Ampo' setonganna malang dioatee, sinnoa ang ungngalang sumule änä'na di hoi' mai di kamateang.
20Aka' kapampetahpa'anna Ishak lambi' umbehe yato derua änä'na, Yakub anna Esau anna untula' lohpo' yato ang la dahi di allo ang la sule.
21Aka' kapampetahpa'anna Yakub naonge anna la mateng, lambi' umbehe yato derua ampona, änä'na Yusuf, anna menomba dai' di Puang Alataala mengngohho' pano di huntunna aka' matua liung.
22Aka' kapampetahpa'anna Yusuf naonge anna la pohsu'i penanahanna, lambi' untula' lohpo' kamalaianna to Israel yaling mai di Mesir. Tandana nainsang naoatee la dahi si'da, ya' nasuo sika umbaha bukunna ke la sika malaing.
23Aka' kapampetahpa'anna to baha'na Musa, lambi' umbuni yato änä'na tallu bulanna puhanna dahi. Naita naoatee tadia änä' biasa anna dai sika mahea' untehkai pahentana tomaraya Mesir.
24Aka' kapampetahpa'anna Nabi Musa tahpana lobo', lambi' dai naaku disangai ampona tomaraya Mesir.
25Naaku puhane' madahha sibaha petauanna Puang Alataala andana tuho masannang sängkä yaling di kamadosaang.
26Nasanga dotanne' dipakauho-uho aka' mampetahpa' pano di To Dilanti' la Mepasalama' ang la sule, andana untombong kulle di hao di Mesir, aka' napemitai yato ang la natahimbo dako' aka' kapampetahpa'anna.
27Aka' kapampetahpa'anna, lambi' inde Musa malai yaling mai di Mesir, dai ungkahea' kakeaha'anna tomaraya. Napatahhi' pellaoanna, dai unsaile kebo'na, aka' sinnoang ang ungngitang Puang Alataala ang dai landa'.
28Aka' kapampetahpa'anna Musa lambi' umpahentang to Israel umpaaha pa'rame-rameang Paska. Pahallu sika untahpi' haha babana dasannaii anna malai änä' uluanaii dai napatei yato malaeka' ang umbaha kamateang.
29Aka' kapampetahpa'anna to Israel dolu, lambi' sika ullambang Le'bo' Malea sihapang mellao di kalantanang, ampo' tahpana nasändä' toe' to Mesir, ya' limmi' nei'.
30Aka' kapampetahpa'anna lambi' inde to Israel ungkulilingngi Bohto Yerikho pitu allona, lambi' ingkänna hala tembo'na yato bohto pihsa' titale-tale.
31Aka' kapampetahpa'anna ta Rahab, mesa pahsundala' di hao di Yerikho, lambi' daine' dipatei naonge anna tallangngi ingkänna sola bohtona. Aka' supung inde ta Rahab ang tuhu'-tuhu'ang dai' di Puang Alataala, lambi' untosule manahpa mata-matanna to Israel.
32Akake' ang pahallu kuoa? Aka' la masae maho ke la kutula' toinne' tohodolunna kapampetahpa'anna ta Gideon, ta Barak, ta Simson, ta Yefta, Tomaraya Daud, Nabi Samuel anna senabiang senga'nake'.
33Aka' kapampetahpa'anna, lambi': Sika untalo sangngaka-sangngaka bohto ang ketomaraya. Sika ma'pahenta maroho, lambi' sika untahimbo aka yato ang nadandiing Puang Alataala. Sika natutu'ing Puang Alataala suana yato singa.
34Dai sika mate naonge anna dipatamai di api. Dai sika mate naonge anna nalolai to popa'dang. Moi malamma ampo' mendahi matoho. Sika bahani yaling di pa'tolla'ang. Sika untalo tantarana balinna.
35Aka' kapampetahpa'anna, lambi' aha bahine ang dang masuhsa, aka' yato solasohonna ang hali mate dipatuhong sumule. Ampo' ahane' tau ang naaku didahha lambi' mate aka' kapampetahpa'anna. Tau ang noa yatoo hannu la untahimbo katuhoang ang mahasa puha nei' naonge ke dipatuhong sumule.
36Aha piha ang dipakauho-uho anna dipohetong, aha toi ang disangke' anna dipatamai di tahungkung.
37Ahake' piha ang disaleba'i batu lambi' mate; aha ang disasa' diperedua; aha toi ang dipatei umpake pa'dang. Sika mekaya' lollo' olo'-olo' tandana memase-mase anna didahhai unsamba kalane.
38Sika mengkaala pano di ongeang makä'däng, dai' di tanete, membuni tama di leäng anna naung di kahoäng. Setonganna inde lino ongeang ang dai sihatang pano diii.
39Ingkänna yato tau umpamasannang Puang Alataala aka' kapampetahpa'annaii. Ampo' dai tahhi' sika untahimbo yato ingkänna ang nadandiing Puang Alataala.
40Ampo' suhunna anna dai sika tahhi' natahimbo, aka' aha pahtuyunna Puang Alataala pano di kita'a' sibaha-baha ang mahasa puha nei'. Pahtuyunna dianto supung la mala ke sibaha-bahamingkea' mane tatahimboia' yato kamapiaang ang sundung lambi' sapano-panona.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel