1O Teofilus, yaling di suha'ku ang uhuna kupamalesong ingkänna pembabena Puang Yesus, noa pengkähänganna noa pepakuhunna,
2lambi' di tempona tiängkä' dai' di suruka. Naonge dake' dai' di suruka, sibaha kakuasaanna Inaha Masero umpahenta ingkänna rasul ang puha napillei ang la mampembabeing.
3Puhanna mate, pemmai'ding umpepaitaing Kalaena pano di ingkänna rasul. Anna umbabe mai'di tanda anna malesoi dioatee tuho sumule. Aka' uhpa' puloke' allona si naola umpellambi'i rasulna anna natula'ing didiona Kapahentaanna Puang Alataala.
4Pihsang tempo tihimpung bumi mande sibaha rasulna anna ma'pahentai naoatee, "Daumpelleia' Bohto Mahoa' Yerusalem. Empeiia' pa'dandinna Ambeku situhu' ang puha kutula'ingkoa'.
5Aka' Yohanes supung uhai ang napake mantero', ampo' dioa' yaling di sangngakake' allona la ditero'koa' Inaha Masero."
6Tempona ma'himpung Puang Yesus sibaha rasulna, sika mekutanang pano naoatee, "O Puang, la dinoaraka la umpake'de'i sumule kapahentaantaa' to Israel?"
7Natimba'mi Puang Yesus naoatee, "Supung Ambeku ang mampama'tantu. Daia' dio mangki' ungnginsang, aka' ingkänna yatoo kakuasaanna Ambeku.
8Ampo' dioa' la untahimbokoa' kakuasaang naonge anna tuhungngi Inaha Masero mating di dioa', anna la mendahikoa' sa'bingku mengkalao dinne di Yerusalem, di ingkänna Yudea, naung di Samaria, lambi' pano di siku-sikunna lino."
9Puhanna ma'tula', naitang rasulna tiängkä' dai' di langi' lambi' nahehengngi salehu'. Ya' dang landa' sika naita.
10Lella'ke' sika tonga dai' di langi', tahpa ungngitarang derua tau mekaya' mabusa di behinna.
11Ya' tahpa ma'karang yato tau naoatee, "Oa' to Galilea, akana sika ke'de' kalekoa' mennenne' dai' di langi'? Napelleimokoa' Puang Yesus tiängkä' dai' di suruka, ampo' inang la sumuleete' yaho mai sinnoa inde ang ungngitaa' tiängkä' dai' di suruka."
12Ya' sumuleng yato rasulna lubete' di Yerusalem mengkalao di mesa tanete disanga Tanete Zaitun ang sipandipe siang Yerusalem.
13Tahpana lambi', dai'mi di mesa loteng, ongeang ang si naonge tohho Petrus anna Yohanes, Yakobus anna Andreas, Filipus anna Tomas, Bartolomeus anna Matius, Yakobus änä'na Alfeus, Simon, ang mentama di kakalebuanna to umbali kapahentaang Roma, anna Yudas änä'na Yakobus.
14Sangka' umpamesa lolo inaha ma'sambayang sibaha sangngaka-sangngaka bahine, sinnoanna Maria indona Puang Yesus, anna siullu'na Puang Yesus.
15Allo donetoo ke'de'mi Petrus yaling di alla'-alla'naii ang tihimpung, umbai sangngatu' dompulo tau mai'dinna, anna ma'karai naoatee,
16"Oa' ingkänna solasohongku, sundummi ihsinna Suha' Masero, yato ang napalambi' lohpo' Inaha Masero ungngolai Tomaraya Daud, didiona ta Yudas ang umpatuhoi yato tau ang unsahka Puang Yesus,
17moinnakato anna dihekeng tuke'ne' dolu solaki' anna ungngala toe' baheang yaling di pengkähängangki'.
18(Yato doi' sahona ta Yudas naonge umbabei kakarakeang, puhang naalliing sallimbo tampo. Ya' diang naongei tahpa tipalumbäng lambi' tehse kompenna anna sohongngi ihsinna.
19Anna kaha-kaha yatoo nainsang asang tau ang yaho di Yerusalem lambi' yato tampo sika nasangai situhu' tula'na: 'Hakal Dama' ang bahtuanna: Tampo Haha.)
20Aka' puha tiuki' yaling di suha' Pampudiang naoatee: 'Pabei tomande'i lo'bäng ongeanna anna pabeii mahulla-hulla;' anna: 'La naala tau senga' pangka'na.'
21Dahi la pahallu diala mesa tau ang la manghängngängngiang yaling mai di alla'-alla'na yato ang si kiposola lolo naonge sibahakang Puang Yesus, napahandu' di pantero'anna Yohanes lambi' di tempona Puang Yesus tiängkä' dai' di suruka napelleiang, anna malai para-paraang unsa'bii didiona katuhoanna sumule."
22(1:21)
23Ya' sika natuhong derua tau, mesa disanga Yusuf ang si disangai Barsabas, anna si disanga toe' Yustus, anna ang kaderuanna disanga Matias.
24Sika ma'sambayammi anna malau naoatee, "O Puang, Dio ullosa tama di inahanna simesa-mesa tau. Tuhoi menna kahang la umpake inde derua tau
25yaling inde di pengkähängang la mendahi rasulmu. Aka' pahallu la aha bala'na ta Yudas ang umpellei inde pengkähängang, aka' le'ba'mine' naung di ongeang ang inang sihatang naongei."
26Sika undohe'mi sihsä' mane pantangngi manghui' yato to deruai. Ya' Matias ang manghui' yato kalambe'na. Ya' dianto ang la unghängngängngi yato to sampulo mesa rasulna Puang Yesus.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel