Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 11 >> 

1Yato kaheba tahpa nahingngi tunne' ingkänna rasulna Puang Yesus sibaha to mampetahpa' di hao di Yudea didiona tau ang tadia to Yahudi untahimbong Puang Yesus.

2Lambi'na dai' di Yerusalem Petrus, sitelämmi to Yahudi ang mampetahpa'.

3Sika keaha'mi anna naoaitee, "Akana tamarako dio di dasanna ang tadia to Yahudi anna sibaha-bahakoa' mande?"

4Dianto anna napahandu'mi pole' Petrus napamalesoing yato ang puha dahi mengkalao di pampahandu'anna naoatee,

5"Naonge ma'sambayangngä' di hao di Bohto Yope, tahpa kutikaitaing: aha tuhung yaho mai di langi' noa kaing maluhhang titoke' uhpa' sikunna, tihulu' naung di oloku.

6Tahpa kupahandammi, ya' kuitang ma'kahupa-hupa olo'-olo' ang uhpa' bihti'na, olo'-olo' mahaila, olo'-olo' meme' anna sedansiang.

7Ya' kuhingnging kamaha naoatee, 'O Petrus, kalehao, tunui anna ungngandei.'

8Ampo' kutimba' kuoatee, 'Inang dai, Puang, aka' mengkalao dahingku dake' aha kuande andeang ang dipemalii.'

9Ya' naoa bunte yato kamaha yaho mai di langi', 'Ang napemapiaing Puang Alataala, dai mala napemalii hupatau.'

10Pentallung nasulei napa'panoa-noa lolo, mane tiängkä' asangngi sumule dai' di langi'.

11Donetoo di hao di olo dasang ang kiongei tohho, sule sia tunne' tallu tau ang mengkalao di hao di Kaisarea ang disuo sule natambaiä'.

12Kuhingnging kamaha naoatee, 'Laokoa' sibaha, daumpamatingngii inahammu, moinnakato ungnginsang ungngoatee tadia to Yahudi.' Ya' dianto inde unnung solaku ang kuposola naonge le'ba'ang tama di dasanna ta Kornelius.

13Ya' natula'mingkang inde Kornelius yato ang puha naita. Naita are' mesa malaeka' ke'de' yaling di dasanna anna naoaitee, 'Suoi tau pano di Bohto Yope do untambai mesa tau disanga Simon bahtu' ang si disangai toe' ta Petrus,

14aka' la natula'ingkoa' kaheba ang la mampasalama'o sibaha ingkänna sanghapummu.'

15Tahpana kupahandu' ma'tula', ya' tuhummi Inaha Masero napunnoi asang, noa yato ang mallambi'ingkea' dolu.

16Ya' tahpa kukalehaing tula'na Puang Yesus yato naonge si naoaitee, 'Yohanes supung uhai ang si napake mantero', ampo' dioa' la ditero'koa' Inaha Masero.'

17Dahi ponna la nabea toe' Inaha Masero Puang Alataala pano di tau ang tadia to Yahudi, sinnoa ang nabeaingkea' dolu naonge mampetahpa'ingkea' dai' di Puang Yesus, To Dilanti' la Mepasalama', ya' dai aha lalanna la kulaba'i."

18Ya' tahpana sika nahingngi yato kaha-kaha, sika mahtammi anna umpamatande Puang Alataala naoatee, "Napabei Puang Alataala moi tau ang tadia to Yahudi mengkatoba' ang la mantehte pano di katuhoang!"

19Yato puhanna dipatei Stefanus, ya' mai'ding kamadahhaang lambi' tisembu'mi ingkänna to mampetahpa'; aha pano di Fenisia, pano di Siprus anna pano di Antiokhia. Ya' tontongke' umpepainsangnging Kaheba Mapia ampo' supung lupano di to Yahudi.

20Ampo' yaling di alla'-alla'na yato to mampetahpa' aha ang di hao mai di Siprus anna Kirene. Inde tau le'ba'i pano di Antiokhia untula'ing Kaheba Mapia pano di tau ang tadia to Yahudi naoatee, "Puang Yesus dianto Dehata."

21Kakuasaanna Puang Alataala sika mamposolai lambi' tuhtuang mai'di tau mampetahpa' anna untindo'i Puang Yesus.

22Tahpana napelele ingkänna to mampetahpa' yaho di Yerusalem kaheba yatoo, ya' sika unsuo siarang Barnabas le'ba' pano di Antiokhia.

23Inde Barnabas mesa tau mapia anna to mampetahpa' si'da-si'da anna napunnoi Inaha Masero. Lambi'na pano, tahpa mahasang inahanna aka' ungngita ingkänna to mampetahpa' di hao nabehe Puang Alataala. Ya' napahenta asammi naoaintee, "Patontong loloia' inahammu dai' di Dehata." Lambi' tuhtuang mai'di tau mentindo' di Puang Yesus.

24(11:23)

25Ya' le'ba'mi Barnabas pano di Bohto Tarsus umpeäng Saulus.

26Tahpana silambi', naposolang pano di Antiokhia. Sahtaung di hao si ma'himpung lolo sibaha ingkänna to mampetahpa' anna umpakuhu tau mai'di. Ya' di haonto inde di Antiokhia pampahandu'anna to mampetahpa' disanga 'petauanna Kristus.'

27Tempo donetoo aha sangngaka-sangngaka nabi di hao ang sule yaho mai di Yerusalem.

28Aha mesa ang disanga Agabus naposolai Inaha Masero lambi' ke'de' ma'tula' lohpo' naoatee, "La kende' kabuhohangang tama di lino." (Kabuhohangang yatoo dahing pole' tempona naonge Kaisar Klaudiusi ma'pahenta di Katomarayaang Roma.)

29Ya' donetoo umpaahang kasibohtuang ingkänna to mampetahpa' la unghimpung aka-aka situhu' kapalambi'anna aka' la undului solasohonna ang mampetahpa' di hao di Yudea.

30Tahpana tihimpung, ya' nabehong pano di Barnabas sibaha Saulus aka' dia la sika mampalambi' pano di pebulle ada'na to mampetahpa' di hao di Yudea.



 <<  Kisah Para Rasul 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran