1Ya' suleng di hao di Antiokhia sangngaka-sangngaka to Yahudi yaho mai di Yudea ang sika mampetahpa'mi dai' di Puang Yesus. Mampakuhung pano di tau ang tadia to Yahudi ang umpetahpa' toe' Puang Yesus naoatee, "Ke dakoa' ditille situhu' kabiasaang Atohanna Musa, inang dasiamokoa' la mala dipasalama'."
2Ampo' yato pepakuhunna dasi'da-si'dai natahimbo Paulus sibaha Barnabas. Lambi' ingkänna to mampetahpa' untuho Paulus sibaha Barnabas anna sangngaka-sangngaka tau di hao yato di jumaa' la le'ba' umpellambi'i rasulna Puang Yesus sibaha ingkänna pebulle ada' yaho di Yerusalem, anna malai ma'limbo untula' yato kaha-kaha.
3Ya' naposolang jumaa' ang aha di hao di Antiokhia lambi' tama di aneanna bohto. Mane le'ba'i sika naola pano di Fenisia anna Samaria. Lambi'na pano sika natula'ing naoatee, "Mai'ding ang tadia to Yahudi untindo' Puang Yesus." Ya' sika tialang inahanna to mampetahpa' ang manghingngi.
4Tahpana lambi' dai' di Yerusalem natahimbo manahpang to mampetahpa' sibaha ingkänna rasul anna pebulle ada'. Ya' natula'iming yato aka ang puha nababe Puang Alataala yaling di pengkähängannaii.
5Ya' suleng sangngaka-sangngaka to Farisi ang mampetahpa'mi naoatee, "Ingkänna ang tadia to Yahudi pahallu la ditille toe' anna disuoi untuhu'i pepakuhunna Musa anna malai salama'."
6Ya' ma'himpummi ingkänna rasul sibaha pebulle ada' yaho di Yerusalem unsitula'-tula'i yato kaha-kaha.
7Tahpana masae sitimba'-timba', ya' ke'de'mi Petrus naoatee, "Oa' solasohong, puhangnga' ungnginsang ungngoatee, dolunnake' anna napilleimä' Puang Alataala yaling mai di alla'-alla'mua', aka' mengkalao di tula'ku tau ang tadia to Yahudi la unghingngi Kaheba Mapia anna la mampetahpa'.
8Aka' Puang Alataala ang ullosa inahanna hupatau umbea Inaha Masero pano yato di tau, tandana natahimbo toe' sinnoa kita'a'.
9Anna daingkea' aha napasisenga'ang moi poro la mesa, kita'a' to Yahudi anna yato ang tadia to Yahudi, aka' sika napamasero yato inahannaii aka' mampetahpa'.
10Dahi monna ke noai, akana unsändä'irakoa' dio Puang Alataala la umpahsa petauanna la untuhu'i ingkänna Atohanna Musa, anna dasiangnga' tabela tatuhu'i yato atohang mengkalao di neneta lambi' pano di kita'?
11Ampo' inderea'ne' tapetahpa'i: Supung aka' mana' pa'kalemunna Puang Yesus lambi' malaingkea' salama', noa tunne' pano yato di tau ang tadia to Yahudi."
12Sika mahtang asammi pole' anna umpehingngii Paulus sibaha Barnabas untula' yato ma'kahupa-hupa tanda anna ang mepusa'-pusa' ang napadahi Puang Alataala yaling di alla'-alla'na tau ang tadia to Yahudi naonge sika mengkähängngi.
13Puhai ma'tula' Paulus sibaha Barnabas, ma'kara tunne' Yakobus naoatee, "O ingkämmua' solasohongku, pehingngiia' tula'ku:
14Mane sapuhanna liu napakaleso Simon Petrus umba noa pampahandu'anna umpepaitaing pa'kalemunna Puang Alataala pano di tau ang tadia to Yahudi. Aka' pahtuyunna, yaling yato mai di alla'-alla'na la napillei la mendahi petauanna.
15Kaha-kaha yatoo situhu' tula'na Puang Alataala ang puha nauki' ingkänna nabi naoatee,
16'Dako'itoo la sumuleä', anna katomarayaanna Daud sihapang dasang ang puha ditalei la kupake'de' sumule, lambi' ingkänna ang loe la ke'de' sumule, anna la kupamatoto'.
17La kupanoa anna malai ingkänna hupatau ang ahake' pemala untuhu'i Dehata, anna ingkänna ang tadia to Yahudi ang puha kutambai la mendahi petauangku.' Noantoo tula'na Dehata ang umpadahi ingkänna yato kaha-kaha
18anna puha napepainsangnging mengkalao dolu.
19Dahi situhu' pihki'ku, daingkea' mala umpaaha kamapahhi'ang pano di tau ang tadia to Yahudi, yato ang untindo'mi Puang Yesus.
20Ampo' la tapapebaha suha' ang la naoatee, 'Daa ungngandea' andeang ang puha dibeho pano di dehata senga', daa unsamangkamahoinna, daa ungngande balena olo'-olo' mate ditehke anna daa ungngande haha.'
21Aka' mengkalao dolu dipepainsangnging Atohanna Musa pano di ingkänna bohto anna lambi' dinoa ke allo katohhoang bumi yato atohanna dibata lolo tama di ingkänna pa'sambayangang."
22Ya' ungngalang kabohtuang ingkänna rasulna Puang Yesus sibaha pebulle ada' anna ihsinna jumaa' yaho, dianto la umpillei tau yaling mai di alla'-alla'naii ang la naposola Paulus anna Barnabas sumule pano di Antiokhia. Ya' sika umpilleing Yudas ang si disanga toe' ta Barsabas sibaha Silas, sahing dipakeangka' yaling di alla'-alla'na to mampetahpa'.
23Ya' dibeang yato suha' nabaha. Ihsinna yato suha' naoatee, "Salama'ki' ingkännaang solasohommu, noa rasul, noa pebulle ada', mating di ingkämmua' solasohongki' ang tadia to Yahudi ang diting di Antiokhia, Siria, anna Kilikia.
24Kihingngi aha tau ang yaling mai di alla'-alla'ki' to mampetahpa' dinne di Yerusalem moinnakato dai aha kisuo, lambi' tula'na didiona kapotilleang napapusa'koa'.
25Dahi dianto anna kibohtung umpillei derua tau umposola Barnabas anna Paulus ang kipakamaya,
26ang dai aha mahea'na umpebeaing kalaena dipatei ahsala' malai umpepainsangnging sanganna Dehatanta Puang Yesus, To Dilanti' la Mepasalama'.
27Dahi kisuo Yudas sibaha Silas mating anna malai natula' manahpaingkoa' situhu' ihsinna inde suha'.
28Aka' puhaang naposolai Inaha Masero lambi' ungngalaang kabohtuang anna malai dakoa' la dipapahsai bahaang ang tala umbelaa' umbaha. Ampo' supung indee la pahallu untuhu'ia':
29Daa ungngande andeang ang puha dibeho pano di dehata senga'; daa ungngande haha anna balena olo'-olo' mate ditehke, anna daa unsamangkamahoinna. Ke umpakahaoi kalaemu di hao mai di kaha-kaha yatoo, ya' mapiantoo. Ya' samantoo indee supu. Salama'ki' mating."
30Puhai yatoo, ya' sipasa'bing mane mengkalaoi yato ang nasuo lupano di Antiokhia. Tahpana lambi' pano untambaing ingkänna to mampetahpa' ma'himpung anna nabeai yato suha'.
31Tahpana sika nabata, mahasa asammi inahanna aka' napakahanga yato ihsinna suha'.
32Inde Yudas sibaha Silas nabi toe'. Masae ma'tula' umpahenta ingkänna to mampetahpa' anna malai umpamatoto' kapampetahpa'anna.
33Tahpana masae-sae di hao inde to deruai, napabeing ingkänna to mampetahpa' ang di hao di Antiokhia le'ba' sitonda kamasannangang inaha sumule dai' di Yerusalem.
34[Ampo' nabohtune' Silas naoatee, "La dinnemä' kodi'."]
35Masae-sae tuke'ne' tohho Paulus anna Barnabas di hao, ya' mai'ding solana to mampetahpa' naposola mampakuhu anna umpepainsangnging Bahtakaranna Dehata.
36Tahpana masae-sae di hao, naoante Paulus pano di Barnabas, "Umbai mapia ke le'ba'ingke sumule ullelengngi bohtona ingkänna solasohonta ang puha taongei umpepainsangnging Bahtakara Dehata anna malai tainsang umbane' noa."
37Naaku toe' Barnabas ampo' pemala umposola Yohanes ang si disanga toe' ta Markus.
38Ya' donentoo naonge sisala aka' naoate Paulus, "Dai la diposola aka' puha mepellei di hao di Pamfilia dolu anna dang naaku medului mengkähäng donetoo."
39Ya' sikallang Paulus anna Barnabas lambi' sisähä'. Le'ba'mine' Barnabas umposola ta Markus mokahpala' uhai lusau di Siprus.
40Ampo' Paulus umpillei Silas la naposola. Puhai yatoo, yato ingkänna to mampetahpa' di hao di Antiokhia umbehong Paulus anna Silas dai' di mana' pa'kalemunna Puang Alataala, mane sika mengkalaoi inde to deruai.
41Le'ba'ing ullelengngi bohto yaling di Siria anna Kilikia umpamatoto' ingkänna jumaa'.
<< Kisah Para Rasul 15 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel