1Donetoo le'ba' toe' Paulus dai' di Bohto Derbe anna Listra. Silambi'mi di hao mesa to mampetahpa' ang disanga Timotius. Indona dianto to Yahudi ang mampetahpa' toe' anna ambena nei' tadia to Yahudi.
2Inde Timotius nainsang asang ingkänna to mampetahpa' di hao di Bohto Listra anna Ikonium naoatee, 'Tau mapia.'
3Pemala ta Paulus ke umposola lelengngi ta Timotius umpatahhi' pengkähänganna. Dahi natille anna malai natahimbo to Yahudi aka' nainsang naoatee, ambena tadia to Yahudi.
4Yaling di pellaoanna Paulus sibaha Silas naonge ungngolaii yato sangngaka-sangngaka bohto si umpalambi' yato kasibohtuanna rasul anna pebulle ada' yaho di Yerusalem, anna malai ingkänna to mampetahpa' la natuhu'i.
5Ya' noantoo ingkänna jumaa' dipamatoto' kapampetahpa'anna anna tuhtuang masae tuhtuang kehängngäng to mampetahpa'.
6Inde Paulus anna Silas sika mangngola pano di Frigia anna Poropensi Galatia aka' dai napabei Inaha Masero la umpepainsangnging Kaheba Mapia di hao di Poropensi Asia.
7Tahpana ullambi' alla'na Misia, ya' nasändä'mi boheng la lutama di Bitinia, ampo' dai napabei Inaha Maserona Puang Yesus.
8Ullehanna Misia, ya' lambi'mi naung di Troas.
9Tahpana bengi, ahang pangngitanna Paulus. Ang naita dianto aha mesa to Makedonia moke'de'-ke'de' anna malaui naoatee, "Lumbakang kami' mai anna unduluiang."
10Ya' puhanna yatoo mangkahahpi siamang la mengkalao sau di Makedonia, aka' kiinsang nasuo si'damang Puang Alataala la umpepainsangnging Kaheba Mapia di lau'.
11Mengkalaoang di hao di Troas tahhi'ang mokahpala' uhai sau di Samotrake, ya' marondonnai lambi'mang yato di Bohto Neapolis.
12Ya' mengkalaomang di hao le'ba' pano di Filipi, mesa bohto mahoa' di Poropensi Makedonia ang napahenta to ma'pahenta Roma. Ya' dianto kiongei tohho sangngaka-sangngaka benginna.
13Tahpana lambi' allo katohhoang, umpelleimang bohto mahoa' anna maoang naung di behing salu uhai umpeäng ongeang ang si naonge ma'sambayang to Yahudi. Ya' kilambi'mi bahine ma'himpung; mohko'mang anna kipa'tula'ii.
14Donetoo ma'pehingngi toe' mesa bahine ang disanga Lidia, to pa'balu' kaing malahtu ang sule di hao mai di Bohto Tiatira. Inde bahine mesa toe' ang si menomba lolo dai' di Puang Alataala ampo' tadia to Yahudi. Nabuhkeiing inahanna Dehata lambi' umpehingngii manahpa yato ingkänna tula'na Paulus.
15Lambi' ditero'mi Lidia sibaha sanghapunna. Ya' puha ditero', nabahaimang naoatee, "Ponna umpetahpa' si'daa' kapampetahpa'angku dai' di Puang Yesus, ya' tapanoa' di dasang anna di haoingkea' tohho." Lambi' napeäng lalang anna malai kipengngioi.
16Pihsang tempo naummang yato di ongeang ang si naongei to Yahudi ma'sambayang, ya' silambi'mang mesa sabua' bahine ang napentamai setang lambi' ma'ihsang-ihsang, lambi' ingkänna pongkahana sangka' mai'di asang pallolonganna.
17Ya' natindo' lolomang sibahaang Paulus lella' siang kakoha-koha naoatee, "Inde mai tau sabua'na asang Puang Alataala, To Handang Malängkä'. Dianto ang mampainsangngikoa' lalang kasalama'ang."
18Tahpana sangngaka allona napa'panoa-noa lolo, ya' maliping talinganna Paulus nahingngi, lambi' napengkolingngi anna ma'karai pano yato di setang naoatee, "Yaling di sanganna Puang Yesus, To Dilanti' la Mepasalama', kupahentao: palaio yaling mai di kalaena ne bahine!" Ya' tahpa malai siarang yato setang.
19Tahpana naita ingkänna pongkahana inde bahine, sika keaha'mi aka' naoatee, "La pa'dang pole' pallolongangki'." Tahpa unsahkang Paulus sibaha Silas anna sika nahui'i pano di pasa' aka' la nabaha pano di to ma'kuasa.
20Ya' tahpana di hao di olona to panghohto' bohto mahoa' sika naoantee, "Inde to deruai sule done inde di bohto umpasisähä' to pa'bohto aka' to Yahudi
21anna umpopampakuhu ada' kabiasaang, aka' nasanga dai sihatang atohanna to ma'pahenta Roma. Dahi dai la mala tatahimbo, londonang la tatuhu'i."
22Sule tunne' tau mai'di ullebo Paulus anna Silas anna nasitungo-tungoii. Pihsananna inde to panghohto' unsuong yato tau mai'di unseu' porehana inde to deruai yaling mai di kalaena mane nasuoi napohetong.
23Puhai yatoo, ya' napesuoing dibaha tama di tahungkung. Umpahentang to pandaka tahungkung naoatee, "Dakai manahpaia'!"
24Dahi situhu' yato pahenta, ya' sika napatamang to pandaka tahungkung di tängngä-tängngä anna napungoi bihti'na pano di ahhi.
25Umbai tängngä bengi ma'sambayammi Paulus sibaha Silas anna menanii umpudi Puang Alataala. Ya' sika napehingngii tunne' ingkänna solana ang aha yaling di tahungkung.
26Pihsananna tahpa ahang lino' käyyäng lambi' ingkänna batunna yato tahungkung pahoro anna tahpa tibuhke asang ingkänna baba anna tibuhke toi pepungona ingkänna to di tahungkung.
27Tahpana kaleha yato to pandaka anna ungngitang baba titungka' asammi, ya' tahpa unsintä'mi pa'danna la umpatei kalaena aka' nasanga le'ba' asammi yato ihsinna tahungkung.
28Ampo' metamba Paulus naoatee, "Daungkarakei kalaemu aka' dinne asangkantee'!"
29Ya' umpalau siarang ballo inde to pandaka anna lumumpa'i tama lella' sikalalla' aka' mahea' anna malimuntu'i di hao di olona Paulus anna Silas.
30Mane umposolai Paulus sibaha Silas mensohong anna mekutanai pano naoatee, "Oa' tuang, aka la pahallu kubabe anna malaä' salama'?"
31Ya' natimba'mi naoatee, "Petahpa'o Puang Yesus anna malao salama', noa dio, noa toi sanghapummu."
32Ya' sika natula'ming Bahtakara Dehata sibaha ingkänna ang yaling di dasanna.
33Tehte' doneto siang di bengi anna umbahai Paulus sibaha Silas do nabaseiing bila'na anna umbehoi kalaena sibaha sanghapunna ditero'.
34Puhai, nabahaing pano di dasanna anna natahiaii. Mahasa liu inahanna aka' mampetahpa'mi sanghapui dai' di Puang Yesus.
35Tahpana mabaya ingkänna yato to panghohto' unsuo polisi naoatee, "Pellambi'i to pandaka tahungkung anna ungngoaintee, 'Lahpa'i ne to deruai.'"
36Le'ba' tunne' yato to pandaka tahungkung umpellambi'i Paulus sibaha Silas anna naoaintee, "Nalambi'ä' pahentana to panghohto' la kulahpa'mokoa'. Dahi laomokoa'. Paela'dang."
37Ampo' ma'kara Paulus pano di pandaka tahungkung sibaha polisi naoatee, "Dihekeng touang kami' to Roma, dake' aha dihohto' pembabeki' anna tahpa dipohetommang di hao di olona tau mai'di mane dipatamaang di tahungkung. Ya' pihsananna dinoa dai pole' kiaku la ullahpa' tomande'ang. Supung ke diai sika sule yato to panghohto' dinne done ang la mambahanangngang sohong."
38Ya' le'ba'mi yato polisi umpalambi' karanna Paulus pano di ingkänna to panghohto'. Tahpana sika nainsang naoatee yato to deruai to Roma toe', ya' sika mahea' liung aka' untehkai atohanna to Roma.
39Ya' sika sule siarang umpellambi'i Paulus sibaha Silas anna sika ungngakuii kasalaanna di olona. Mane sika naposolai mensohong anna naoaintee, "Ke la malai anna umpelleiia' inde bohto."
40Ya' le'ba'ing umpellei yato tahungkung anna tahhi'i pano di dasanna ta Lidia. Lambi' pano silambi'mi ingkänna to mampetahpa', ya' napakahangang mane napelleii.
<< Kisah Para Rasul 16 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel