Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 18 >> 

1Puhai yatoo umpelleing Bohto Mahoa' Atena Paulus le'ba' pano di Bohto Mahoa' Korintus.

2Tahpana di hao sitammung mesa to Yahudi disanga Akwila to Pontus. Mane sule di lau' mai di Italia sibaha Priskila bahinena, aka' napahenta Tomaraya Klaudius naoatee, "Ingkänna to Yahudi pahallu umpellei Roma." Ya' lempämmi Paulus pano di dasanna

3anna tohhoi di hao sibaha. Si sibaha lolong mengkähäng aka' sahing manähäng umpapia tenda.

4Lambi' boito allo katohhoang, tama bung di pa'sambayanganna to Yahudi Paulus ma'tula' aka' umpeäng lalang anna malai ingkänna to Yahudi sibaha ang tadia to Yahudi mampetahpa'.

5Ya' tahpana sule Silas sibaha Timotius di hao mai di Makedonia napamesang pole' tempona Paulus umpepainsangnging Bahtakara Dehata anna umpelleii pengkähänganna umbabe tenda. Mampasa'bing pano di to Yahudi naoatee, "Puang Yesus Diantoo To Dilanti' la Mepasalama'."

6Ampo' sika umbali-bali Paulus anna napakauho-uhoi, ya' umpentahpi'ming ähäng tampo ang di kaya'na aka' la mendahi tanda pano yato di ingkänna tau didiona kasalaanna. Mane naoaitee, "Kalaemu toboua' dio la undurung kasalaammu. Ke nalambi'koa' pambala'na Dehata, ya' tadianto kodi' insangku. Yahoä' tanahambu, di hoi'ä' tanakati'doi. Dinoa, la lupanomä' di tau ang tadia to Yahudi."

7Ya' mensohommi anna le'ba'i pano di dasanna Titius Yustus, mesa toe' ang umpenombai Puang Alataala ampo' tadia to Yahudi. Yato dasanna sitehe pa'sambayanganna to Yahudi.

8Ampo' pongkahana yato pa'sambayangang, ang disanga Krispus, sibaha sanghapunna umpetahpa'mi Puang Yesus. Anna mai'dike' to Korintus ang umpehingngii Paulus umpepainsangnging pepakuhu didiona Puang Yesus, tahpa mampetahpa' lambi' umbeho kalaena ditero'.

9Pihsang bengi ahang pangngitanna Paulus: Sule Dehata anna napa'tula'i naoatee, "Daummahea'. Pa'tula' loloo, daummahtang,

10aka' la kuposolai lolorakotee' anna dai aha mesa tau la mampahoaio kakarakeang. Aka' yaling inde di bohto mahoa' la mai'di petauangku."

11Ya' tohhong di hao Paulus sahtaung setangnga umpepainsangnging Bahtakara Dehata.

12Ampo' tahpana diängkä' Galio mendahi tuambahsa' di hao di Akhaya, ma'kamesang pole' sangngaka-sangngaka to Yahudi anna umbalii Paulus lambi' nasahka anna nabahai pano di olona to panghohto'.

13Ma'karang naoatee, "Inde tau mampakuhu anna malai tau ang menomba dai' di Puang Alataala dai sihatang pepakuhunna Musa."

14Ampo' tahpana la napahandu' Paulus ma'tula', ma'karang Tuambahsa' Galio ang to Roma pano di ingkänna to Yahudi naoatee, "Oa' to Yahudi, ponna inde tau untanda'a' umbabe ang tadia babe, bahtu' kakarakeandaka, sipäto' la kutahimbo hahpo'ammua'.

15Ampo' ponna inde unsiteläng-telängngia', supung aka' tula'mu toboua' dio, inang daine' la kuaku kuhohto'. Hohto' toboia' dio."

16Lambi' sika nahambai Galio.

17Ya' le'ba'mi yato tau ullebo Sostenes pongkaha pa'sambayanganna to Yahudi anna nasidangku'-dangku'i di olona yato to panghohto', ampo' nanenne'i tomande' supu inde Tuambahsa' Galio.

18Puhai yatoo, masae-saeke' tohho Paulus di hao di Korintus mane umpelleii yato ingkänna to mampetahpa' anna le'ba'i mokahpala' sibaha Priskila anna Akwila sau di Siria. Lambi' pano di Kengkrea mokontimmi situhu' ada'na to Yahudi aka' puha mopinda dai' di Puang Alataala lambi' umpakalambe' beluhä'na.

19Lambi' sau di Efesus mentamang Paulus di pa'sambayanganna to Yahudi anna unsitula'-tula'ii Bahtakara Dehata sibaha to Yahudi. Ya' sika napalaung anna malai masae-saeke' tohho di hao. Ampo' dai naaku, lambi' naoatee, "Pabeikä' le'ba'. Sule salarangkä' ke napabeiä' Dehata." Ya' mengkalao siang umpellei to Efesus ampo' umpatohhone' Priskila anna Akwila.

20(18:19)

21(18:19)

22Lambi'na sau di Kaisarea, ludai'mi di Yerusalem umpensiitai ingkänna to mampetahpa', mane tahhi'i naung di Antiokhia.

23Tahpana masae-sae di hoi', ya' mengkalao bung ungngolai Poropensi Galatia anna Frigia do ullelengngi ingkänna to mampetahpa' anna napamatoto'i kapampetahpa'anna.

24Tempo donetoo ahang mesa to Yahudi mao pano di Efesus ang disanga Apolos, to sule di lau' mai di Aleksandria. Mesa toi ang manähäng ma'tula' anna ang ungnginsang si'da-si'da ihsinna Suha' Masero.

25Anna puhang dipakuhu manahpa didiona Puang Yesus. Makahanga liu ma'tula' anna sihatang si'da-si'da umpepakuhuing didiona Puang Yesus, ampo' dake' nainsang didiona pantero'ang Inaha Masero. Supung nainsang didiona pantero'anna Yohanes.

26Sibaha kabahaniang napahandu'mi mampakuhu tama di pa'sambayanganna to Yahudi. Ampo' tahpana nahingngi Priskila sibaha Akwila, nabahaing pano di dasanna anna napamaleso manahpaing didiona lalanna Puang Alataala.

27Tahpana pemala Apolos le'ba' sau di Akhaya, sika umpapebahang suha' to Efesus sau di to mampetahpa' ang aha di lau', anna malai sika untahimbo manahpa Apolos. Lambi'na sau kekuna si'da-si'dang pano di ingkänna tau ang puha mampetahpa' aka' mana' pa'kalemunna Dehata.

28Aka' dai aha mehe inahanna umbahoi to Yahudi di hao di olona tau mai'di naonge umpakalesoi ihsinna Suha' Masero, naoatee, "Puang Yesus diantoo To Dilanti' la Mepasalama'."



 <<  Kisah Para Rasul 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel