1Tahpana malinong sumule to Efesus, ya' ingkänna to mampetahpa' di hao nahimpummi Paulus mane nabeai kara pepakahanga anna malai tuhtuang matoto' kapampetahpa'annaii. Puhai, ya' mampasa'bing Paulus, aka' la le'ba' sau di Makedonia.
2Ullelengngi asang samai inde bohto anna si umpamatoto' loloi kapampetahpa'anna ingkänna to mampetahpa'. Katämpä'anna lambi' pano di Yunani.
3Tahpana tallu bulanna inde Paulus di hao di Yunani, ya' boheng la le'ba'mi sau di Siria mokahpala' uhai. Ampo' pihsananna nei' ke ahae' pahtuyunna to Yahudi di hao la napatei, dahi nabala'i pahtuyunna la sumule sau ungngola Makedonia.
4Sibaha-bahang mengkalao Sopater, änä'na Pirus to Berea, sibaha Aristarkhus anna Sekundus, sahing to Tesalonika; Gayus to Derbe anna Timotius sibaha deruake' solana, sahing to Asia, ang disanga Tikhikus anna Trofimus.
5Ampo' sika mendolung nei' mokahpala' sau di Troas aka' la naempeiang di hao.
6Ya' puharang pa'rame-rameang Roti Takeragi mane dai'ang di kahpala' di hao di Filipi. Lima allona mane malaang lambi' sau di Troas. Ya' di lau'dang mane silambi'ang yato solaki' ang mendolu. Tohhomang pitu allona di lau'.
7Tahpana allo Mingkui di bengi ma'mesamang mohko' umbika-bika roti. Ya' ma'kara bung Paulus pano di ingkänna to mampetahpa' di hao di Troas, aka' mopahtuyu bumi la mengkalao ke mabayang. Masae ma'tula' lambi' kale tängngä bengi.
8Yaho yato di loteng ang kionge ma'mesa mai'di lampu dipapuhpu.
9Ampo' aha mesa änä' muane mohko' yaho di pengngollengang, disanga Eutikhus. Natalo matanna aka' inang masaeng ma'tula' Paulus, pihsa' hahe tomande'. Pihsananna hanneng, manahong naung di tampo mengkalao yaho yato di loteng kaderuanna dasang. Le'ba'mi sika nalumba ampo' mateng.
10Tahpa tuhung siang Paulus nalumba anna nakalihpi'i mane ma'karai naoatee, "Daummahea'a' aka' menanahaete' sumule."
11Tahpana yaho sumule yato di tambing, ya' umbika-bikang roti Paulus anna nasusai anna kiandei sibaha-baha. Puhai mande, ya' ma'tula' bumi. Pihsananna buhka' baya mengkalaomang.
12Sika le'ba' tunne' yato ang ma'himpung umposola yato tau ang manaho pano di dasanna aka' nabelang. Ya' sika mahasa asammi inahanna aka' unsa'ding pepakahanga ang käyyäng.
13Ya' mendolumang kami' le'ba' mokahpala' uhai pano di Asos. Di haoke' mane sibahaang Paulus mokahpala', aka' le'ba'mine' mellao bihti' situhu' pahtuyunna.
14Tahpana silambi'ang di hao di Asos sibahamang pole' mokahpala' bete' di Metilene.
15Mengkalao di Metilene tahhi' liuke' kahpala'ki', ya' marondonnai sipandipemang Bohto Khios. Mabaya sala boi lambi'mang sau di Bohto Samos, ya' sangngallo bukang mokahpala' mane lambi'ang sau di Miletus.
16Puhang nabohtu Paulus dang la lempäng pano di Efesus andana masae liui tohho di Poropensi Asia, aka' pemala liu umpellambi'i Pa'rame-rameang Pentakosta yaho di Yerusalem.
17Dahi di haona di Miletus inde Paulus unsuong mesa tau pano di Efesus untambai ingkänna pebulle ada' ang di hao anna suleii natammui.
18Ya' tahpana sika sule, napa'tula'ing Paulus naoaintee, "Puhangnga' ungngita yato ang puha kubabe yaling di alla'-alla'mua', mengkalao di pampahandu'anna suleä' dinne di Asia.
19Sibaha kamahempo'ang inaha, mensabua'ä' di Dehata sitonda uhai mata aka' mai'dike' to tamampetahpa' anna unsa'dingngä' ma'kahupa-hupa kamasuhsaang napobua' pahtuyunna to Yahudi pano di kalaeku.
20Ungnginsang toia' dä' mahea' kutula'ingkoa' yato aka ang la kekuna tama di kalaemua'. Setonganna kupakuhukoa' noa di hao di olona tau mai'di, noa toi yaling di pa'himpungang di hao di dasammua'.
21Kutula' lolo kasa'biang pano di ingkänna to Yahudi anna ang tadia to Yahudi, umbato ke malai mengkatoba' di hao mai di ingkänna dosanna anna mengkaalai dai' di Puang Alataala sitonda kapampetahpa'ang yaling di Dehatanta Puang Yesus, To Dilanti' la Mepasalama'.
22Ampo' dinoa napahsaä' Inaha Masero naposola dai' di Yerusalem anna dai kuinsang aka la dahi pano di kalaeku ke yahong,
23supung yato aka ang puha napainsangngiä' yaling di mesa-mesa bohto ang puha kuolai naoatee, 'Kamadahhaang anna tahungkung la ungngolai.'
24Ampo' moinnakato noa, daete' aha kupihki' didiona kalaeku moi poro la sai'di', ahsala' malai kupapuha manahpa inde pengkähängangku ang nabeaä' Puang Yesus, dianto la umpepainsangnging Kaheba Mapia didiona mana' pa'kalemunna Puang Alataala.
25Puhamokoa' kupakahebai Kapahentaanna Puang Alataala. Anna dinoa kutula'ingkoa' mating aka' kuinsang kuoate, katämpä'annang la siitaingkea'.
26Diantoo anna pahallung kupakalehakoa' allo dinoa kuoatee, yahoä' tala nahambu anna di hoi'ä' tala nakati'doi ke ahai tau di alla'mua' ang la dai ullambi' kasalama'ang.
27Aka' dai aha kukalimpängngi anna dai aha malaya'ku untula'ingkoa' ingkänna paelo'na Puang Alataala tama di kalaemua'.
28Dahi dakai manahpakoa' kalaemu, anna ungkambi' mapiaia' ingkänna dombana, aka' diongnga'too ang puha napillei Inaha Masero mendahi to pangkambi' yaling di jumaa'na Puang Alataala, yato ang puha naalli umpake haha tibollona änä'na.
29Aka' kuinsang ponna ke le'ba'mä' la napentama alla'koa' to karake umpasisähä'-sähä' jumaa' sihapang asu pangngala' ang unghopängngi yato patuhoang ang dikambi'.
30Anna la aha sia tunne' yaling mai di alla'mua' ang la umbaha pepakuhu ang sala-sala la pemala umbaha to mampetahpa' umpellei lalang kamarohoang anna lupanoi di lalang kakarakeang.
31Dianto anna la madaka si'da-si'dakoa'. Pengkakalehaiia'too tallu pahiamanna kuola dai aha tohho allo-bengi kupainsangngikoa' simesa-mesa sitonda uhai mata aka' mai'dike' to tamampetahpa'.
32Anna dinoa kubehomokoa' dai' di Puang Alataala. Pahallu la umpentokei lolokoa' bahtakara mana' pa'kalemunna Dehata. Aka' aha kakuasaanna ang la mampamatohokoa' yaling di kapampetahpa'ang anna la mambeakoa' mana' pebehena Puang Alataala yato ang inang puha natandai pano di ingkänna petauanna ang puha napasenga'.
33Daliuke'too aha la kende' yaling di inahangku mailu pano di aka-akanna tau senga', pera'naraka, bulahannaraka, bahtu' porehanaraka.
34Aka' ungngitangnga' umba kupanoa untanang sikungku mengkähäng anna malaä' umpatuho kalaeku sibaha ingkänna sola pengkähängku ang si kuposola lolo.
35Puhamokoa' kupaitai pohapangang yaling di ingkänna kaha-kaha ang dipanoa mengkähäng manahpa, aka' la pahalluingkea' undului to pemase-mase. Aka' la tatokei loloa' yato tula' Kalaena Puang Yesus ang naoatee, 'Kehongko' puhane' ang pabea andana ang dibea."'
36Tahpana tehpu' tula'na Paulus, ya' malimuntu' asammi anna para-parai ma'sambayang.
37Ya' siduseng-dusengnging anna unsikalihpi'-lihpi'i Paulus sibaha nasiurung-urungngi.
38Sika manaho asammi inahanna londonang aka' naoaintee Paulus, "Katämpä'annang la siitaingkea'." Ya' sika le'ba'mi naposola sumule pano di kahpala'.
<< Kisah Para Rasul 20 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel