Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 5 >> 

1Aha toe' to sisangkolung ang disanga Ananias anna Safira umbalu' toe' tampona.

2Kasibohtuanna yato allinna tampona la napatohho sambaheang anna sambaheangke' nabehoing rasul, anna naoaintee, "Supung inde allinna tampoki'."

3Ampo' ma'kara Petrus naoaintee, "O Ananias, napunnoi inahammu Pongkahana setang lambi' kaloseng-losengngo pano di Inaha Masero anna umpatohhoo sampuahe yato allinna tampomu.

4Naonge dake' umbalu' tampomu, ya' aka-akammuke'. Pihsananna puha umbalu', yato allinna tontong yaling di kakuasaammu. Dahi akana mopahtuyu noarako dio? Dai hupatau supu ang ulloseng, ampo' Puang Alataala toe'."

5Nahingnginna inde tula' Ananias, tahpa loe siang mampamate. Ingkänna ang manghingngi yato tula' sangka' sikalalla' aka' mahea'.

6Tahpa sule siarang sangngaka-sangngaka änä' muane nabalung anna do nalamungngi.

7Umbai tallu tehte' puhanna, suleng bahinena ampo' dai nainsang aka ang mane puha dahi.

8Mekutanang Petrus pano naoaintee, "Tula'ingkä' sama si'daraka inde umbalu'ingnga' tampomu?" Ya' natimba'mi yato bahine naoatee, "Io, samantoo."

9Naoaminte Petrus, "Akana mopahtuyurakoa' dio unsändä'i Inaha Masero? Nenne'i indo pano tau ang di haoke' di baba, mane sika sasulena ullamung muanemu, dia tunto nei' ang la mambulleo sohong."

10Tahpa loe sia tung nei' di behing bihti'na Petrus, mampamate. Tamanna yato änä' muane nalambi'mi mate. Ya' sika nabulle siang anna do nalamungngi napasitehe muanena.

11Dai aha tala mahea' dai' di Puang Alataala ingkänna to mampetahpa' anna ang unghingngi didiona yato ang dahi.

12Ma'kahupa-hupa tanda anna mai'di ang mepusa'-pusa' napadahi ingkänna rasulna Puang Yesus yaling di alla'-alla'na tau mai'di. Ingkänna yato to mampetahpa' ma'mesa di hao di Serambi Salomo ang aha yaling di Dasang Ada'na Puang Alataala.

13Anna dai aha la bahani tau senga' mampempakoi, ampo' moinnakatoo noa si napakeangka' tau mai'di,

14lambi' tuhtuang masae tuhtuang kehängngäng to mampetahpa' pano di Puang Yesus, noa muane noa toi bahine.

15Lambi' mai'di tau umbaha to makoronna pano di lalang anna napapatindoi di ale di hao di behing lalang aka' naoatee, "Liuito Petrus, moi poro kalihayonang unghoa sala' mennanna inde mai to makorong, ya' mala bono'."

16Noa toi to pa'bohto ang sirungku' Yerusalem sule mokalipumpung umbaha to makoronna anna ang napentamai setang. Anna ingkänna tau yatoo dipabono'.

17Pihsananna mengke'de' handang pongkahana imang sibaha to pentindo'na, dianto to Saduki ang sika timbuhu aka' mai'di tau untindo' pepakuhunna Puang Yesus,

18lambi' sika unsahkai ingkänna rasul anna napatamai di tahungkung.

19Ampo' tahpana bengi suleng mesa malaeka'na Puang Alataala untungka'i baba tahungkung mane sika napasohongngi anna naoaintee,

20"Laokoa' pano di Dasang Ada'na Puang Alataala anna ke'de'koa' di hao umpepainsangnging didiona katuhoang bakahu pano di tau mai'di."

21Ya' sika natuhu'i siang yato karanna. Mebengngi'na yatoo sika le'ba' siang tama di Dasang Ada'na Puang Alataala mampakuhu. Lella' mampakuhu inde rasul, yato handang pongkahana imang sibaha to pentindo'na untambai ingkänna To Mahkeada' Yahudi, bahtu' ang si dioaintee setobaha'anna to Israel, ma'limbo. Lella' ma'limbo umpapealang yato ingkänna rasul tama di tahungkung.

22Ampo' tahpana lambi' pano, danne' aha yato rasul yaling. Ya' sumuleng anna naoaitee,

23"Kilambi' baba tahungkung ampo' tontong mahha' tikapu' anna yato ang mandakai tontong di hao di olona. Kitungka'i yatoo ke danne' aha yato yaling tau."

24Nahingnginna yato pongkahana to pandaka Dasang Ada'na Puang Alataala sibaha ingkänna kapala-kapala imang inde tula'na tau, tahpa pusa'mi anna naoaitee, "Dai kiinsang aka ang dahi pano yato di tau!"

25Dai masae sule siarang mesa tau umbaha kaheba naoatee, "Pehingngiia', ne! Yato tau ang umpatamaa' di tahungkung, yaling asammi di Dasang Ada'na Puang Alataala umpakuhu tau mai'di."

26Ya' mengkalao siang yato pongkahana to pandaka Dasang Ada'na Puang Alataala sibaha sangngaka-sangngaka änä' buana le'ba' do ungngala yato rasul, ampo' sika napaela'-ela' aka' mahea' pano di tau mai'di la nasaleba'i batu.

27Sika naposolang tama do umpellambi'i To Mahkeada' Yahudi. Lambi'na tama, sika nakutanaing handang pongkahana imang naoatee,

28"Kusanga puhamokoa' kikeaha'i anna malai dakoa' le'ba' lolo mampakuhu yaling di sanganna Yesus. Ampo' ang umbabea' dio tuhtuangkoa' mampakuhu di umba-umba naonge done di Yerusalem anna si umpatanda'iang yato kamateanna."

29Mentimba'mi ta Petrus naoatee, "Aka' pahalluang untuhu'i Puang Alataala andana hupatau.

30Aka' Dehatanna peneneanta umpatuho sumule Puang Yesus di hoi' mai di kamateang ang puha untoke'a' anna umpatei yaho di kayu sitambeng.

31Anna Diantoo puha naängkä' Puang Alataala ungngohko'i tando kuananna, dianto ongeang kakeangka'ang, aka' mendahi To Pambahanang anna To Pepasalama', anna malaingkea' to Israel aha tempona la mengkatoba' lambi' malaingkea' naampungngi.

32Kami'mitoo ingkänna rasul mendahi sa'bi yaling di ingkänna kaha-kaha yatoo. Noa toi Inaha Masero ang la napatamaing Puang Alataala di ingkänna ang untuhu'i Puang Yesus."

33Nahingnginna kara yatoo sika keaha'mi, lambi' mopahtuyu la umpatei yato rasul.

34Ampo' di hao toi aha mesa to Farisi disanga ta Gamaliel dihekeng toi mesa To Mahkeada' Yahudi. Inde tau mesa ang umpalambi' pepakuhunna Musa anna napakeangka' si'da-si'da tau mai'di. Ke'de' anna naoaitee, "Ne mating tau, pasohongngia' dolu sämpäi'."

35Le'ba'na, ya' ma'karang pano yato di to ma'limbo naoatee, "O to Israel, pihki' manahpaingkea' aka la tababe pano inde di tau.

36Aka' dolu aha disanga ta Teudas, mesa to unsanga-sanga kalaena, lambi' mai'di ang mantindo'i: umbai uhpa' atu' tau. Ampo' dipatei lambi' sisähä'-sähä' yato to pentindo'na anna katämpä'anna dai aha aka-aka.

37Puhai yatoo, naonge temponai diihsa' hupatau, aha bung ang disanga ta Yudas to Galilea anna mai'di toe' mantindo' la umbali to pa'pahenta. Ampo' katämpä'anna dipatei toe' anna ingkänna to pentindo'na sisähä'-sähä'.

38Dahi sinnoa toi inde mai kadahiang, kupainsangngikoa' anna daingkea' la ungngaka inde pano tau. Pabei tomande'ia' aka' ponna inde pahtuyunna anna pembabena sule hao mai di hupatau, ya' la pa'da toetee'.

39Ampo' ponna sule yaho mai di Puang Alataala, ya' moite' la diaka, tala mala toi ditalo. Anna umbai bilang la umbaliingkea' Puang Alataala." Ya' yato pepaturunna inde Gamaliel sika natahimbo.

40Puhai yatoo, untambaing sumule rasul anna napohetongngi mane naoaintee, "Damongnga' si umpopampakuhu lolo kakuasaanna Yesus." Mane sika nalahpa'i.

41Yato rasul sika masannang liu umpellei pa'limboanna To Mahkeada' Yahudi aka' yaling di inahanna naoatee, "Naangka'ingkea' Puang Alataala inang la sihatang ungngolai kamadahhaang aka' umpetahpa'ingkea' Puang Yesus."

42Allo-allo tontong umpepainsangnging Kaheba Mapia yaling di Dasang Ada'na Puang Alataala anna pano di dasanna tau, dianto Puang Yesus To Dilanti' la Mepasalama'.



 <<  Kisah Para Rasul 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel