1Ya' natuhu'i toi Saulus ke dipateii ta Stefanus. Allo donetoo napahandu'mi aha kamadahhaang käyyäng pano di to mampetahpa' yaho di Yerusalem. Lambi' ingkänna to mampetahpa' sika le'ba'i tisembu' unsamba Yudea anna Samaria ampo' supung rasulna Puang Yesus ang tohho.
2Yato bahkena Stefanus naala sangngaka-sangngaka to mampetahpa' sika nalamung anna naumbuii.
3Donetoo pemala Saulus la umpa'dai kapeimänganna ingkänna to mampetahpa', dahi ullelengngi dasang napentama anna unghui'i sohong noa bahine noa muane anna napapetahungkungngi.
4Ingkänna to mampetahpa' le'ba' tisembu' unsamba bohto umpepainsangnging Kaheba Mapia.
5Anna Filipus lupanone' di mesa bohto di hao di Samaria umpepainsangnging To Dilanti' la Mepasalama', dianto Puang Yesus, pano di hupatau yaling yato di bohto.
6Tahpana sika nahingngi tula'na anna ungngitang ma'kahupa-hupa tanda ang nababe, ya' sika natahimbo mapiang.
7Aka' mai'di setang malai yaling mai di kalaena mai'di tau menge kumihsä', anna mai'di toi to makule sibaha to kempäng napabono'.
8Lambi' umpamasannang liu yato to pa'bohto.
9Di hao yato di bohto aha mesa to pa'ihsang ang disanga Simon. Si umpapusa' asang to Samaria, anna si unsanga-sanga kalaena dang aha mantondong.
10Ingkänna tau moi to keangka' moi to pemase-mase mampekannang asang anna sika naoaitee, "Dianto inde kakuasaanna Dehata Matande ang si disangai 'Kakuasaang Käyyäng' sule menghupatau."
11Napentindo'i asang tau aka' masaeng sika napapusa' yato pa'ihsanganna.
12Ampo' tahpana sule Filipus umpepainsangnging Kaheba Mapia didiona Kapahentaanna Puang Alataala anna Puang Yesus, To Dilanti' la Mepasalama', sika napetahpa'mi anna sika umbehoi kalaena ditero', moi muane, noa toi bahine.
13Tahpa napetahpa' toi Simon lambi' umbeho toe' kalaena ditero'. Puhai, sibaha lolong Filipus anna si pusa' ungngita ma'kahupa-hupa tanda anna ang mepusa'-pusa' nababe.
14Tahpana napelele rasulna Puang Yesus yaho di Yerusalem naoatee untahimbong Bahtakara Dehata ihsinna Samaria, ya' sika unsuo siarang Petrus sibaha Yohanes le'ba' naung.
15Lambi'na naung inde to deruai, tahpa unsambayangnging to Samaria aka' mane sika ditero' supu yaling di sanganna Puang Yesus, ampo' dake' aha untahimbo Inaha Masero moi poro la mesa. Ya' napa'sambayamming naoatee, "O Puang Alataala beai inde mai tau Inaha Maseromu."
16(8:15)
17Sika nasahpang inde to deruai situhu' kabiasaanna to Yahudi, lambi' sika untahimbo pole' Inaha Masero.
18Tahpana nainsang ta Simon naoatee mala sule Inaha Masero ke mesahpai rasul, ya' suleng umbaha doi'na
19anna naoaitee, "Bea touä' kodi' ne kakuasaammua' kualli anna malai menna-menna kusahpa, la untahimbo toe' Inaha Masero."
20Ampo' natimba' Petrus naoaintee, "La tallangngete' ne doi'mu sibaha kalaemu, aka' unsangae dio la mala dialli kakuasaanna Puang Alataala.
21Dai dio aha tahamu yaling di pengkähängangki' aka' dao maroho inaha di olona Puang Alataala.
22Dahi pengkatoba'o anna pa'sambayangngo dai' di Dehata, anna malai naampungngi ne pahtuyu karakemu,
23aka' kuita ma'kasueheo anna napunnoio kakarakeang."
24Natimba'mi Simon naoatee, "Kalemuiä' sambayangngiä' anna malai yato tula'mu dai la dahi pano di kalaeku."
25Tahpana puha unsa'bii didiona Puang Yesus anna umpalambi' Kaheba Mapia, sumuleng inde to deruai dai' di Yerusalem. Anna mai'dike' bohto naolai yaling di Samaria untula' kara Dehata pano di to pa'bohto.
26Aha mesa malaeka'na Dehata ma'kara pano di Filipus naoatee, "Ke'de'o anna le'ba'o ungngola lalang ang mengkalao di Yerusalem lunaung di Gaza." (Lalang yatoo mahulla-hulla.)
27Ya' tahpa mengkalao siang ta Filipus. Donetoo aha mesa to Etiopia luyaho mai di Yerusalem menomba lella' sumule pano di bohtona. Inde tau mesa to käyyäng yaling di dasanna mesa tomaraya bahine ang disanga Kandake di hao di Katomarayaang Etiopia, si umpongkahai ingkänna ang untokei doi'na tomaraya.
28Yaling di pellaoanna yaho di bendinna, lella' siang umbata suha' ang nauki' Nabi Yesaya.
29Ma'karang Inaha Masero pano di ta Filipus naoatee, "Pendungku'o pano indo di bendi!"
30Napenandai siang Filipus pano, ya' unghingnging yato tau lella' umbata suha' ang nauki' Nabi Yesaya. Tahpa nakutanaing naoaintee, "Ungnginsandaka kalemba'anna ne ang umbata?"
31Natimba'mi yato tau naoatee, "Umbang kodi' la kupangnginsangngi ke dai aha ang mampakalesoingkä'?" Mane umbahaii Filipus dai' di bendinna anna mohko'i sitehe.
32Ihsinna yato ang nabata naoatee, "Sihapang mesa domba ang dibaha pano di pangkehe'ang, sinnoa toi änä' domba ang mahtang ke lella'i dikonting. Noa tunto yato tau dai aha poro la tibuhke suana.
33Dipakauho-uho anna dipaolai ang tadia lalang. Dai aha tau la mantula' didiona peänä'anna aka' mate yaling di kaänä'muaneanna."
34Mekutanang inde tau pano di ta Filipus naoatee, "Malaraka untula'ingkä'? Menna yato tau ang nahoa inde tula'na nabi? Kalaenaraka ne ang naoainte domba? Tau senga'raka?"
35Ya' donetoo napakalesoming Filipus didiona Puang Yesus ang dipasihapang domba. Natula'ing mengkalao di ihsinna suha' ang nauki' Nabi Yesaya ang nabata langngena', lambi' Kaheba Mapia didiona Puang Yesus.
36Sika umpatahhi'mi pellaoanna. Pihsananna ullambi'mi mesa uhai, tahpa ma'karang yato tau pano di Filipus naoatee, "Itare, ahang indo uhai. La malarakakä' untero'?"
37[Natimba'mi Filipus naoatee, "Ponna ke kalebu si'da-si'dang inahammu mampetahpa', ya' malao ditero'." Natimba'mi naoatee, "Kupetahpa' kuoatee Puang Yesus, To Dilanti' la Mepasalama', dianto Änä'na Puang Alataala."]
38Unsuong yato to pampalao bendinna tohho anna tuhungngi le'ba' naung di uhai naderua. Lambi' naung natero'mi Filipus.
39Tahpana kende' di hoi' mai di uhai tahpa suleng Inaha Maserona Dehata ungngala Filipus anna nabahai le'ba', lambi' dang naita yato ang natero'. Ya' umpatahhi'mi pellaoanna napunnoi kakahsiang.
40Ya' pihsanannane' Filipus lemba' di haoranne' di Asdod. Tahhi' umpepainsamming Kaheba Mapia pano di ingkänna bohto lambi' pano di Kaisarea.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel