1Ma'tula'mi Puang Yesus pano di pahsikolana naoatee, "Inang la aha loloete' pesändä', ampo' yato tau ang umpaaha pesändä' ahana inang la tilaka si'da-si'da.
2Dotanne' yato tau ditoke' batu käyyäng pano di bahokona anna dipentibeing tama di tängngä le'bo' andana la umpasähsä' lalangngi moi poro la mesa inde mai änä'.
3Dahi madakakoa'! Ponna ahai solasohommu ang membabe dosa, ya' sängkäii. Ponna mengkatoba' di hao mai yato di kasalaanna, ya' ampungngii.
4Bahtu' moinnakato pempitu yaling di sangngallona membabe kasalaang mating di dio ampo' semata sule mengkatoba' di hao mai yato di kasalaanna, ya' pahalluete' ungngampungngi."
5Ya' ma'tula'mi yato pahsikolana pano di Puang Yesus naoatee, "Pamatohoingkang kapampetahpa'angki'."
6Natimba'mi naoaintee, "Ke la poro ahangnga' kapampetahpa'ammu sama lisa'na batu pinamula ang handang saohko', ya' malamokoa'te' umpahenta inde poang ara ungngoainte, 'Tisengkao anna titonde'o tama di tängngä le'bo'!' Tantunte' anna dahi si'dai noa."
7Napatahhi' bumi tula'na Puang Yesus naoatee, "Ke hapanganna ahai sabua'mu, ya' tantunte' anna dai aha di alla'mu ang la untahiai manahpa yato sabua'mu ke mane sulei malupu mambingkung bahtu' mane sule umpakande patuhoang.
8Ampo' tantunte' anna dioi la mangngoatee, 'Penandaii pampake manahpa anna umpasadiaingkä' ang la kuande, mane ke'de'o di behingku ungngempeiä' lambi' puhaä' mande. Puhakä' mande mane malao dio mande.'
9Tantunte' mesa pongkaha anna dai la ma'kuhhu'sumanga' pano yato di sabua'na aka' umbabe kähänganna.
10Noa tungnga' dio, ponna puha asammi ungkähäng ingkänna kähängang ang dipatangkungngiingkoa', ya' pahallu ungngoate supu, 'Kami' indee dianto sabua' ang takekuna. Ingkänna kähängang kibabe aka' disuoang.'"
11Yaling di pellaoanna Puang Yesus ludai' di Yerusalem, ungngolaing alla'na bohtona to Samaria anna bohtona to Galilea.
12Tahpana mentama di mesa bohto saohko', ya' natammuing sampulo tau ang makorong tamahamu' asang dianto bosi lollo'na. Inde mai tau ke'de' ungkahaoi
13anna ungkohaii Puang Yesus naoatee, "O Puang Yesus! Tuang! Kalemuiang kasi!"
14Tahpana sika naita Puang Yesus, ya' naoamintee, "Laomokoa' pepaitaing kalaemu pano di imang." Lella' sika mellao lupano di imang, ya' sika bono'rang nasa'ding yato koronna.
15Mesa di alla'na yato sampulo to makorong tahpana nasa'ding bono'mi yato koronna tahpa sumule nei' anna kakoha-kohai umpudi sanganna Puang Alataala.
16Ullumbang Puang Yesus anna malimuntu'i di olona. Yato tau dianto mesa to Samaria.
17Mekutanang Puang Yesus naoatee, "Darakate' bono' asammi yato langngena' sampulo tau? Umbae'ne' yato kamehsa solamu?
18Akana indere' supu mesa to Samaria sule umpudi sanganna Puang Alataala, bilang daine' aha sika sule yato kamehsa to Yahudi moi poro la mesa?"
19Puhanna yato ma'tula' noa, ya' naoamintee, "Ke'de'mo anna maoo, aka' salama'mo napobua' kapampetahpa'ammu."
20Aha sangngaka-sangngaka to Farisi ang mekutana pano di Puang Yesus didiona pihhang la napahandu'i Kapahentaanna Puang Alataala. Natimba'mi Puang Yesus naoatee, "Daete' aha tanda ang maleso ang la untandai kasuleanna Kapahentaanna Puang Alataala.
21Datoi aha tau ang mala mangngoatee, 'Itaia' inderanne' yato Kapahentaanna Puang Alataala,' bahtu' naoate, 'Indoranne' di hao,' aka' setonganna yatoo dahingnga' di alla'-alla'mu dinoa."
22Ma'tula'mi Puang Yesus pano di to pentindo'na naoatee, "La ahaa' tempomu pemala liu ungngita bouä' inde Änä' to Lino, moi yaling di sangngallo supu, ampo' dä'a' la ungngita.
23Anna la aha tau mangngoaingkoa'tee, 'Itarea' inderanne' yato Änä' to Lino!' bahtu' naoatee, 'Indoranne'!' Daa ullumbaia' yato tau.
24Aka' umba noa tikila'na kila' naita asang tau, la noa tuntone' kasuleangku Kodi', inde Änä' to Lino, ke lambi'mi allo kasuleangku.
25Ampo' dolunna yatoo pahallu kuolai dolu kamadahhaang käyyäng, anna dä' la natahimbo tau ang aha dinoa.
26Anna umba noa ang hali dahi di tempona Nabi Nuh, la noa tuntone' la dahi ke lambi'mi tempona kasuleangku, Kodi' inde Änä' to Lino.
27Aka' umba noa sika nasa'ding dolu naonge dake' sompo' le'bo', dianto sika ma'sannang-sannang mande anna menu', sipakabeng-kabeng anna senga'nake' ang biasa sika nababe, lambi' sika mentamane' Nabi Nuh sibaha sanghapunna yato di kahpala' uhainna. Pihsananna sule yato sompo' le'bo' untallangngi ingkänna yatoii.
28Noa tunne' naongei di temponai Lot, ingkänna tau umpobeba'-beba'na sika mande, menu', beba' ma'bulele, beba' mopinamula anna umpake'de' dasang.
29Ampo' tahpana malai Lot yato yaling mai di Bohto Sodom, ya' tuhung siang yaho mai di langi' api sitonda batu ang meleä'-leä' anna unghopuii ingkänna tau.
30Noa tunne' dako' di tempona dipalanda'ä' Kodi' inde Änä' to Lino.
31Tau ang sipatu yaling di aneang dasanna dang mala la tamake' di huäng dasanna ungngala aka-akanna. Anna tau ang di hao di bela'na datunne' mala sumule ungngala aka-akanna.
32Kalehaiia' aka ang dahi pano di bahinena ta Lot.
33Aka' menna pemala umpamahendeng katuhoanna, la bilang mateetee'; ampo' menna ang tontong mampetahpa' moi dipatei aka' Kodi', dianto ang la dipasalama' sungnga'na.
34Kutula'ingkoa', ke donentoo di bengi la aha derua tau ang hahe sibaha yaling di tambinna ampo' mesa supu la diala anna dipatohhoine' yato mesa.
35La aha toi derua bahine ang menge lumambu' sibaha, ampo' mesa supu la diala anna dipatohhoine' yato mesa.
36[La aha toi derua tau menge mengkähäng di hao di bela'na, ya' supunte' mesa ang la diala anna dipatohhoine' mesa.]"
37Sika mekutanang pahsikolana pano di Puang Yesus naoatee, "Umba naonge la dahi noa nee, Puang?" Sika naoaminte, "Ponna ke ahai kaheba, inang la tahpa nainsang tau di umba-umba naongei, sinnoa pohapangang ang natula' to baha' dolu naoatee, 'Umba naonge aha bahke, di hao tuntone' naongei mokalipumpung karoaya.'"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel