1Tahpana Puang Yesus puha untula' ingkänna yatoo pano di tau mai'di, ya' maong naung di Bohto Kapernaum.
2Yaling yato di bohto aha mesa tau makorong kahha' sai'di' tala mate. Inde tau dianto sabua'na mesa kapala tantara ang handang napakamaya liu.
3Nahingnginna yato kapala tantara didiona Puang Yesus, ya' unsuong sangngaka-sangngaka to dipotobaha' yaling di alla'na to Yahudi do natammui anna malai napalau ke la malai sule napabono'ing yato sabua'na.
4Sika maong umpellambi'i Puang Yesus anna malau mase si'da-si'dai pano naoatee, "Yato kapala tantara sihatang si'da-si'da ungkalemui,
5aka' mapia inaha liu pano di sola bohtota, anna diaete' ang ungngongkoso'i inde pa'sambayangangki' dipake'de'."
6Ya' maong Puang Yesus sibaha-baha yatoii. Tahpana la lambi'mi pano yato di dasanna kapala tantara, ya' unsuong solana yato kapala tantara do untammui Puang Yesus anna naoaintee, "O Tuang, damong unsuhsai Kalaemu la maoo pano di dasangku, aka' dai sihatang kusa'ding la umpengkende'i dasangku.
7Noa tunne' dai sihatang kusa'ding la mengngolo mating di Dio. Ampo' diare' tula' tomande'mi sambahta kara anna malai bono' yato sabua'ku.
8Aka' kodi' mesa touä' kodi' to dipahenta, ampo' aha tou kodi' änä' buaku ang kupadihoi'ang lambi' mala tomande' kupahenta. Hapanganna ke kuoainte yato mesa änä' buaku, 'Laoo!' ya' mao si'daetee', bahtu' pano di änä' buaku ang senga' kuoainte, 'Maio!' ya' sule si'daete', bahtu' kuoainte pano di sabua'ku, 'Kähängngi indee!' ya' nakähäng si'daetee'."
9Tahpana nahingngi Puang Yesus yato tula'na, ya' pusa' liung anna mensailei pano yato ang mampentindo'i lella' ma'tula' naoatee, "Kutula'ingkoa' setonganna dake' aha kulambi' yaling di alla'na to Israel kapampetahpa'anna tau ang sinnoa inde kapampetahpa'anna."
10Tahpana sika sumuleng pano di dasang yato solana kapala tantara ang nasuo mao umpellambi'i Puang Yesus, ya' nalambi'mi yato sabua' makahsimmi noa yato ang dai aha makorong.
11Umpatahhi' bumi pellaoanna Puang Yesus anna lupanoi di mesa bohto ang disanga Nain. Mao toe' pahsikolana sibaha-baha anna mai'di liu tau mampentindo'i.
12Tahpana sidungku'mi yato baba käyyäng lutama di bohto, ya' sohongngi yaling mai sangngaka-sangngaka tau ullemba to matena. Yato to mate dianto mesa änä' muane, änä' samboana mesa balu bahine yaling yato di bohto. Inde balu bahine naposolai mai'di tau.
13Naitanna Puang Yesus yato balu bahine, ya' kende'mi pa'kalemunna yaling di inahanna, anna napamala'i naoaintee, "Daa unduseng,"
14lella' siang undungku'i yato to mate yaho di lembaanna anna nasahpai. Yato to pallemba to mate tohho asang. Ya' ma'tula'mi Puang Yesus naoatee, "O änä' muane, kutula'ingko dinoa, tuhomo sumule!"
15Ya' tuho siang sumule yato änä' muane anna mohko'i tahpa ma'kara-kara. Nabehong Puang Yesus pano di indona.
16Ingkänna tau ang aha donetoo mahea' asang anna umpamatandei sanganna Puang Alataala, sika koha naoatee, "Suleng pole' yaling di tängngä-tängngäta mesa nabi ang handang ma'kuasa! Ahana suleng Puang Alataala la umpasalama' petauanna."
17Ya' tisembu' siang kaheba didiona Puang Yesus di hao di ingkänna Poropensi Yudea anna pano di bohto-bohto senga'.
18Nahingngi Yohanes yato ingkänna kaha-kaha ang dahi, aka' napakahebai pahsikolana. Ya' untambaing derua pahsikolana
19anna nasuoi mao mekutana pano di Puang Yesus naoatee, "Diongka inde To Dilanti' la Mepasalama', bahtu' pahallurakakang ungngempei tau senga'?"
20Mao si'dang yato to derua. Tahpana lambi' pano di Puang Yesus, ya' sika mekutanang naoatee, "Nasuoang Yohanes to Pantero' mekutana mating anna malai nainsang naoatee Diongka inde To Dilanti' la Mepasalama', bahtu pahallurakakang ungngempei tau senga'?"
21Donetoo mai'di liu tau ang napabono' Puang Yesus di hao mai di ma'kahupa-hupa korong, anna unghambai toe' mai'di setang ang umpentamai tau, noa tunne' mai'di to buta ang napapennenne'.
22Ya' sika natimba'mi Puang Yesus naoatee, "Laomokoa' anna untula'ing Yohanes ingkänna aka ang puha unghingngi anna aka puha ungngitaa', sinnoanna to buta paita, to makule mellao, tau ang bosi lollo'na bono', to binga pahingngi, to mate tuho sumule, anna pano di to pemase-mase dipainsangngi Kaheba Mapia.
23Tau ang dai umpengkebo'i kapampetahpa'anna mai di Kodi', tau yatoo la kahsi nei'."
24Tahpana le'ba'i sumule yato ang nasuo Yohanes, ya' napahandu'mi Puang Yesus ma'tula' pano di tau mai'di didiona Yohanes naoatee, "Aka ungngalaa' mao pano di ongeang makä'däng? Do ungngitakoa' bulo ang napalusau lutama pepahi?
25Bahtu' maorakakoa'to do ungngita tau ang mampake mahahsa'? Inang dai, aka' tau ang mampake mahahsa' anna ang tuho dai aha nakalala'i di haoete' supu di dasanna tomaraya.
26Dahi aka ang pemalaa' ungngita pano di ongeang makä'däng? Pemalakoa' ungngita nabi, i? Ahana tahpa' si'da. Anna kutula'ingkoa', yato ang ungngitaa' londo puhane' andana mesa nabi.
27Aka' didiona yato Yohanes aha tiuki' yaling di Suha' Masero naoatee, 'Itai, kusuo mesa tau napendoluio, anna dianto ang la mampatokaingko lalammu ang la ungngola.'
28Kutula'ingkoa' setonganna di alla'na ingkänna tau ang aha yaling inde di lino, moi ang tuhoke' moi ang puhang mate, inang daete' aha la keangka' puha andana Yohanes. Ampo' tau ang handang mahoi'ang yaling di Kapahentaanna Puang Alataala setonganna keangka' puhane' andana Yohanes."
29Ingkänna tau ang manghingngi yato tula'na, moi yato ingkänna to pahsinga' sima, ungngakui asang katahpa'anna pahtuyunna Puang Alataala, aka' hali sika umbeho asang kalaena natero' Yohanes.
30Ampo' yatone' to Farisi anna to pampakuhu ada' daine' sika naaku untahimbo pahtuyunna Puang Alataala tama di kalaenaii, aka' daine' sika naaku umbeho kalaena natero' Yohanes.
31Ma'tula'mi Puang Yesus naoatee, "Aka la kupasihapangnging inde mai hupatau ang aha dinoa? Anna aka ang nasinnoaing?
32Tau ang aha tempo dinoa kupasihapang änä' ang menge mangngino di hao di pasa' lella' siang ungkohai solana anna naoaitee, 'Kiposulingngingko ampo' dai ungngaku sumayo, kipenaniingko penaniang kamateang ampo' dai ungngaku masuhsa.'
33Aka' sule Yohanes to Pantero' anna si biasai dai ungngande dehpa anna dai ungngenu' angkoro', ya' ungngoaminte, 'Napentamai setang.'
34Pihsananna suleä' Kodi' inde Änä' to Lino anna si mandeä' Ko anna menu'ä', ya' si ungngoa burantee, 'Itai indo tau sähäuäng anna pa'enu', sola-solana to pahsinga' sima anna ingkänna to madosa.'
35Ampo' kalehaiia'to indee: kakeaka'anna Puang Alataala ang kipepaturuing mala diita yaling di katuhoanna ingkänna tau ang mampentindo'i."
36Aha mesa to Farisi untambai Puang Yesus pano di dasanna anna malai mande sibaha-baha di hao. Mao si'dang Puang Yesus pano di dasanna anna mohko'i sibaha-baha mande.
37Yaling yato di bohto aha mesa bahine ang supung nainsang tuho yaling di katasampa'ang lambi' kainsangang dosanna. Tahpana nahingngi naoatee Puang Yesus menge mande di hao di dasanna ta Simon ang to Farisi, ya' suleng umbaha mesa buli-buli ang keihsi minnä-minnä' bomammi'.
38Panong ke'de' di behinna Puang Yesus sidungku' bihti'na menge siang dumuseng. Yato bahine umbonä'i bihti'na Puang Yesus umpake uhai matanna, mane napahsii beluhä'na, mane naurungngi anna nasihoii yato minnä'-minnä' bomammi' ang nabaha.
39Tahpana yato to Farisi, ang naongei mande dasanna Puang Yesus, ungngita aka yato ang nababe bahine, ya' ma'tula'mi yaling di inahanna naoatee, "Ponna inang nabi si'da indee, ya' la nalähpä'itoo menna bahtu' umba noa babena inde bahine ang menge mangnganti bihti'na, tantunte' anna la nainsangngi naoatee, indo bahine mesa to tasampa' ang punno dosa."
40Ma'tula'mi Puang Yesus pano naoaintee, "O Simon, aha ang umpemala la kutula'ingko." Mentimba'mi ta Simon naoatee, "Tula' tomande'i, Tuang!"
41Naoate Puang Yesus, "Aha dolu derua tau moindang pano di tau ang biasa umpapebungai doi'na, ang mesa keindang limangngatu' doi' pera', anna ang senga'na limampulo doi' pera'.
42Ampo' aka' dai sika nabela umbaya' yato indanna lambi' napa'dai tomande'ing yato indannaii. Dahi ang umba kahang yato to deruai ang la handang ma'kalemu toe' pano yato di tau aka' napa'daiming indanna?"
43Mentimba'mi Simon naoatee, "Situhu' kodi', ya' yato tubunte' ang mai'di indanna." Ma'tula'mi Puang Yesus naoaintee, "Ahana tahpa' ne pentimba'mu."
44Lella' mensaile pano yato di bahine, nalombungngike' tula'na pano di Simon naoatee, "Ungngitaraka inde bahine? Langngena' mentamaä' inde di dasammu ampo' dä' umpatokaing uhai ang la kubaseiing bihti'ku. Dia nei' nabonä'ingkä' bihti'ku umpake uhai matanna anna napahsii beluhä'na.
45Dio, dä' aha ungngurung naonge anna mane suleä', ampo' dia nei' sallangngena'nang napa'urung-urung bihti'ku.
46Dä' aha umminnä'ing bää'ku tanda umpotosuleä', ampo' dia nei' naminnä'ingkä'ne' bihti'ku umpake minnä'-minnä' ang handang bomammi'.
47Dahi kupainsangngio dinoa: tandana diampungngiming dosanna inde bahine ang mai'di, ya' ma'kalemu si'da-si'da. Ampo' panone' di tau ang sai'di' supu diampungngi, ya' bahtuanna sai'di' toe' pa'kalemunna."
48Puhai yatoo, ya' ma'tula'mi pano yato di bahine naoaintee, "Diampungnging dosammu."
49Yato tau senga' ang nasibahaing mande, sika kutana yaling di inahanna naoatee, "Mennarakae' inde tau anna pake la malae' ungngampungngi dosa?"
50Ampo' ma'tula' sala Puang Yesus pano yato di bahine naoatee, "Kapampetahpa'ammuete' ang mampasalama'o, dahi laomo sitonda pebehena Puang Alataala."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel