Alkitab Mobile SABDA
[VER] : [ARALLE]     [PL]  [PB] 
 <<  Matius 10 >> 

1Donetoo untambaing sampulo derua pahsikolana Puang Yesus anna nabeai kakuasaang la unghambai ingkänna setang ang umpentamai tau, noa tunne' la umpabono' korong anna kamalammaanna ingkänna tau.

2Sanga-sanganna yato sampulo derua rasul dianto: Simon (ang disanga toe' Petrus) anna ullu'na ang disanga Andreas, Yakobus änä'na Zebedeus anna ullu'na disanga Yohanes,

3Filipus, Bartolomeus, Tomas, Matius to pahsinga' sima, Yakobus änä'na Alfeus, Tadeus,

4Simon to Zelot anna Yudas Iskariot ang la umbeho dako' Puang Yesus pano di tau ang mampatei.

5Inde to sampulo derua nasuo Puang Yesus mao anna nabokungngii tula' naoaintee, "Daa ullao pano di bohto senga' ang tadia bohtona to Yahudi, anna datoune' ullao pano di bohtona to Samaria.

6Ampo' diare' laokoa' do peängngi yato ingkänna to Israel ang sähsä' lalang.

7Laokoa' anna umpainsangngii ungngoatee, 'Dang masae anna Kalaenang Puang Alataala ma'pahenta sinnoa tomaraya.'

8Pabono'koa' to makorong anna patuhoi sumule to mate. Pabono'koa' tau ang bosi lollo'na, hambaii ingkänna setang ang umpentamai tau. Anna aka' inde kakuasaang untahimbo tomande'a' dai mangki' umbaya' bahtu' unsaho, dianto anna pahallu tunne' umpebea tomande'ing pano di ingkänna tau dao mangki' la nasahoi.

9Lao tomande'koa' daa umbaha aka-akammu sinnoanna doi'.

10Daaa' mangki' umpebokung, noa tunne' kaya'mu poro sahpasang tomande' umbaha, sapatummu poro sahpasang, huntummu poro mesa umbaha, aka' mesa to pengkähäng inang si napakandeetee' ang mampopengkähäng.

11Ponna mentamao di mesa bohto mahoa' bahtu' bohto saohko', peängngi mesa tau ang la naaku napadai'o di dasanna, dianto ongeii tohho lambi' umpatahhi' pellaoammu.

12Ponna kende'o dai' di dasanna mesa tau, tula'o kara salama' pano yato di tau ang ullambi'.

13Ponna natahimbo manahpa yato tau kara salama'mu, ya' la kabeheang yato tau. Ampo' ponna dai natahimbo, ya' yato kara salama'mu sumule tobou dio pano di kalaemu.

14Anna ponna aha tau ang dao mantahimbo bahtu' dai naaku nahingngi aka ang untula', ya' pelleine' yato dasang bahtu' bohto ang naongei tohho yato tau anna umpentalahpi'ing tampo ang mendehke' pano di bihti'mu.

15Kutula'ingkoa' setonganna ponna lambi'mi tempona dihohto' inde lino, la mahingang puhaete'ne' tahungkunna Bohto Sodom anna Gomora andana yato bohto ang dakoa' mantahimbo."

16Naoa bunte Puang Yesus pano di pahsikolana, "La kusuokoa' do umpepainsangnging Kaheba Mapia. La sihapangkoa' domba ang tama di alla'-alla'na olo'-olo' peande. Dianto anna pahallukoa' manähkäng sinnoa ile anna mahamme' inahakoa' sinnoa dangang-dangang.

17Madakakoa' pano di ingkänna tau, aka' aha tau ang la mambehokoa' pano di to panghohto' anna la napohetongkoa' yaling di pa'sambayanganna.

18Anna la napapengngolo toukoa'ne' pano di to ma'kuasa anna setomarayaang aka' untindo'ä', lambi' sika la unghingngi kasa'biammu didiona Kalaeku, noa tunne' tau ang dai ungnginsang Puang Alataala la nahingngi toe'.

19Ponna nabehomokoa' pano di to panghohto', datomande'a' ummasuhsa yato aka ang pahallu la untula' ke dihohto'mokoa', aka' la napainsangngirakoa'te' Puang Alataala aka ang pahallu la untula' donetoo.

20Aka' aka ang la untula'a' donetoo daete' sohong yaling mai di pihki'mu, ampo' sule yahoete' mai di Inaha Maserona Ambemu, Puang Alataala.

21La aha tau napapepatei ullu'na aka' natindo'ä'. Noa tunne' la aha to baha' la umpapepatei änä'na. Anna la aha änä' la umbali-bali to baha'na lambi' la napebeaing dipatei.

22Inang mai'di tau la mangkahi'di'koa' aka' untindo'ä'. Ampo' menna ang la tontong mampetahpa' lambi' mate inang la salama'.

23Ponna tamakoa' di mesa bohto anna nadahhakoa' yato tau ang aha yaling yato di bohto, ya' pelleii anna laokoa' penanda pano di bohto senga', aka' kutula'ingkoa' setonganna dake' la puha ungngolai asang yato ingkänna bohtona to Israel anna sulemä' Kodi' inde Änä' to Lino.

24Ungnginsammia' ungngoate daete' aha mesa pahsikola la keangka' puha andana tuangkuhunna, noa tunne' mesa sabua' anna pongkahana.

25Sundummite' mesa pahsikola ke malai umpensinnoai tuangkuhunna, noa tunne' mesa sabua' umpensinnoai pongkahana. Ponna tau ang mendahi kapala yaling di mesa dasang disangai Pongkahana setang, ya' londonante' ingkänna sanghapunna disangai tunte' noa.

26Dahi daa ummahea'a' pano diii, aka' daete' aha aka-aka ang titutu' tala tibuhke, noa tunne' daete' aha kaha-kaha ang tibuni tala diinsang ke dako'mi.

27Aka' ingkänna ang si kutula'ingkoa' mating di dio ang dake' maleso liu, sihapang yaling di kamalillingang, pahallu umpamakalesoing pano di ingkänna tau, sihapang yaling di kamabayaang. Anna aka ang dikuti'ingkoa' tama di talingammu pahallua' umpekäyyängngi umpepainsangnging pano di ingkänna tau.

28Anna daa ummahea'a' pano di tau ang mala supu umpatei bätäng kalae, ampo' daine' mala umpatei sungnga'. Ampo' ang pahallu la ungkahea'a' dianto Puang Alataala ang dai supung mala umpatei bätäng kalae ampo' mala toe' umpatei sungnga' yaling di api nahaka.

29Ungnginsammia' ungngoatee derua dena' si nabalu' tau masempo si'da-si'da. Ampo' moinnakato noa, datoete' mala la mate tomande' moi poro mesa ke dai naelo'i Ambemu yaho di suruka.

30Londonangnga' dio, moi lamba' beluhä'mu puha tung naihsa' asang.

31Dianto anna dakoa' pahallu mahea', aka' keangka' puharakoa'to dio andana mai'di dena'.

32Menna ang mangngakuiä' di hao di olona tau senga', la kuakui toe' di hao di olona Ambeku yaho di suruka.

33Ampo' tau ang mambahoiä' di hao di olona tau senga', la kubahoi toe' di hao di olona Ambeku yaho di suruka."

34Napatahhi' bumi tula'na Puang Yesus pano di pahsikolana naoatee, "Daa unsangaia' inde kasuleangku tama inde di lino la umbahaä' kasikapiaiang di alla'na hupatau, aka' inde kasuleangku dä' sule umbaha kasikapiaiang ampo' suleä' umbaha kasikallaang.

35Aka' inde suleä' la umpadahiä' kasikallaang di alla'na hupatau sinnoanna: 'änä' ang muane la umbali ambena, änä' ang bahine la umbali indona anna manintung ang bahine la umbali pasananna ang bahine.

36Lambi' balinna tau, handang mai'di la sule yaling siang mai di hapunna.'

37Menna-menna ang ungkalemui puhane' ambena anna indona andana Kodi', yato tau dai sihatang mendahi petauangku. Noa tunne' tau ang ungkalemui puhane' änä'na andana Kodi' datoe' sihatang mendahi petauangku.

38Menna-menna dai sadia madahha bahtu' mate aka' natindo'ä' dai sihatang mendahi petauangku.

39Aka' menna pemala umpamahendeng katuhoanna, la bilang mateetee', ampo' menna ang tontong mampetahpa' moi dipatei aka' Kodi', dianto ang la dipasalama' sungnga'na.

40Menna-menna mantahimbo manahpao, ya' natahimbo manahpa tumä'to Kodi', anna menna-menna ang mantahimbo manahpaä' untahimbo manahpa toe' Ambeku ang mansuoä' sule.

41Menna-menna untahimbo manahpa mesa nabi aka' inang nabi, la ullambi' saho ang sihatang sahona mesa nabi, anna menna-menna untahimbo manahpa mesa to maroho aka' inang to maroho, tau yatoo la ullambi' saho ang sihatang disahoiing to maroho.

42Setonganna menna-menna ang membabe mapia pano di to pentindo'ku ang handang saohko', moi poro nabeang supu santangki' uhai kula' kalena, kutula'ingkoa' setonganna yato tau ang membabe noa, ya' ahaete' yato saho pembabena."



 <<  Matius 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel