Alkitab Mobile SABDA
[VER] : [ARALLE]     [PL]  [PB] 
 <<  Matius 13 >> 

1Allo donetoo le'ba'mi Puang Yesus umpellei yato dasang ang naongei mampakuhu lunaung di behing Le'bo' Galilea anna mohko'i di hoi'.

2Ya' suleing tau mai'di si'da-si'da anna sika ulleboi Puang Yesus. Lambi' dai'mi Puang Yesus di mesa lopi anna mohko'i yaho. Yatone' tau mai'di sika ke'de' nei' di hoi' di behing le'bo'.

3Ya' napahandu'mi Puang Yesus umpaturu yato tau mai'di ma'kahupa-hupa pepaturu umpake pohapangang naoatee, "Pihsang tempo aha mesa petani la mao mangngambo'.

4Menge ungngambo' yato bannena, aha piha ang manaho pano di lalang. Ya' sule siang sedansiang naandei lambi' puha.

5Aha toe' piha ang manaho naung di tampo ang di haho batu. Ya' tuhong yato banne. Ampo' aka' manipi' yato tampo ang naongei tuho,

6ya' tahpana naalloi, ya' laonang malahso anna mabangii lambi' mate aka' dai manaung uhaka'na.

7Yato banne aha toe' piha ang manaho tama di alla' lohpo ang kedui. Inde lohpo kedui tuhtuang mahombo lambi' ungkapupu' yato banne ang mane napahandu' tuho lambi' mate.

8Ampo' aha toe' piha banne ang manaho naung di tampo ang malambu. Yato banne tuho manahpa nei' lambi' keboa. Boana yatoo aha pentallumpulo luhpi', aha pengngunnumpulo luhpi' anna aha pensangngatu' luhpi'."

9Natämpä'ing inde pohapanganna Puang Yesus naoatee, "Menna pemala mangnginsang, pamapehingngiingnga'too!"

10Donetoo sika mendungku'mi yato pahsikolana pano di Puang Yesus anna mekutanai naoatee, "Akae', Tuang, anna si umpakeo pohapangang ke umpaturuo tau mai'di?"

11Mentimba'mi Puang Yesus naoatee, "Pano di dioa' dibeakoa' dio kapainsangang la ungnginsang umba noa Kapahentaanna Puang Alataala ang masaeng tibuni, ampo' pano diii dai nei'.

12Aka' menna ang inang ahang ang nainsang, inang la dihängngängngiking, lambi' mai'di si'da-si'da kapainsanganna, ampo' menna ang dai ma'pehingngi, ingkänna yato ang nainsang la dialai yaling mai di pihki'na.

13Dianto suhunna anna si mampakuhuä' pano diii umpake pohapangang, aka' moinnakato anna sika naitai ampo' setonganna daete' naita anna dai nakaleso; anna moinnakato sika nahingngi ampo' setonganna daete' tama di talinganna anna datoi napebahtuang aka yato ang sika nahingngi.

14Ya' sundummi pole' pano diii aka ang puha natula' lohpo' Nabi Yesaya dolu naoatee, 'La semata ma'pehingngikoa' ampo' dasiangnga' la umpebahtuang. Anna la semata ungngitaa' ampo' dasiangnga' la ungkaleso aka yato ang ungngita.

15Aka' sika makahha' bää' anna untimping talingannaii. Noa tunne' sika untutu'i matanna. Lambi' dai sika paita matanna, dai pahingngi talinganna anna dai mala umpähäng aka-aka siamo. Aka' ke daete' noa, ya' la sika paita matanna, pahingngi talinganna anna napähäng pihki'na, lambi' la sika sumule mai di Kodi' anna malai sika kupabono'.'

16Ampo' dioa' dio kehongko' si'da-si'dakoa' dio aka' malaa' paita matammu anna mala pahingngi talingammu.

17Aka' kutula'ingkoa' setonganna mai'diete' nabi anna tau ang aha dolu ang untuhu'i Puang Alataala, pemala toe' sika naita aka ang ungngitaa' ampo' dang hali sika naita, anna pemala toe' sika nahingngi aka ang unghingngia' ampo' dang hali sika nahingngi."

18Napatahhi' bumi tula'na Puang Yesus umpakuhu pahsikolana naoatee, "Pehingngiia' bahtuanna yato pohapangang didiona ma'kahupa-hupa tampo anna to petani.

19Noa indee: yato banne ang dondong pano di lalang sihapang tau ang untahimbo kaheba didiona Kapahentaanna Puang Alataala, ampo' dai napähäng. Lambi' sule Pongkahana setang anna nahampa'i yato aka ang puha natahimbo ang tiambo' sihapang banne yaling di inahanna.

20Yatone' banne ang dondong di tampo ang di haho batu sihapanne' tau ang unghingngi yato Kaheba Mapia anna tahpa napatamang di inahanna sitonda kakahsiang,

21ampo' yato Kaheba Mapia ang nahingngi dai mengnguhaka' yaling di inahanna lambi' dai mala masae tohho yaling. Aka' mane ungngolai sanghupa kamasuhsaang bahtu' kamadahhaang aka' yato Kaheba Mapia, ya' darang natähäng anna ungkebo'i Puang Alataala.

22Yatone' banne ang dondong tama di alla' lohpo kedui sihapanne' tau ang unghingngi Kaheba Mapia, ampo' semata umpihki' supu katuhoanna anna pemala mendahi to makaka. Lambi' yato Kaheba Mapia ang puha nahingngi tihimpi' yaling di inahanna lambi' dai mala memboa mapia.

23Ampo' yatone' banne ang dondong di tampo malompo sihapanne' tau ang unghingngi Kaheba Mapia anna napepähängngi si'da-si'dai. Lambi' mala keboa ma'luhpi'-luhpi'; aha ang pentallumpulo luhpi, aha ang pengngunnumpulo luhpi' anna aha ang pensangngatu' luhpi'."

24Ma'tula' bumi Puang Yesus pano di tau mai'di umpake pohapangang ang senga' naoatee, "Kapahentaanna Puang Alataala sinnoa inde pohapangang: mesa to pobela' mane puha umbubu' banne ang mapia pano di bela'na.

25Ampo' tahpana tängngä bengi, naonge anna hahe asammi ingkänna tau, suleng ang umpa'bali yato to pobela' anna unsahu'i boa lohpo ang takekuna tama di alla'na yato banne. Puhai yatoo, ya' le'ba'mi.

26Tahpana lobo' yato pahe anna napahandu'mi kehähtäng, ya' lobo' tunne' yato lohpo ang takekuna yaling di alla'na.

27Ya' suleing yato sabua'na to pobela' anna mekutanai pano di pongkahana naoatee, 'O Tuang, darakate' banne mapia yato ang umbubu' di hao di bela'mu? Umbae' nakasulei yato lohpo ang takekuna anna pake aha ture' tuho yaling di alla'-alla'na pahe?'

28Mentimba'mi yato to pobela' naoatee, 'Nasahu' tau ang mampa'baliä'.' Mekutana sala bung yato sabua'na naoatee, 'Ungngakuraka, Tuang, ke maoang do kihe'bu'i yato lohpo ang takekuna?'

29Ampo' naoate yato to pobela', 'Daa! Aka' ponna unghe'bu'ia' yato lohpo ang takekuna, ya' la tihe'bu' toe' yato pahe.

30Diare' pabei tomande'mi lobo' toe' yato lohpo ang takekuna sibaha pahe lambi' tempo pepaheang. Doneke'to ke la dipepaheng, mane kuoainte tau ang la mampepahe: Himpung toboia' nei' ne mating lohpo ang takekuna, ba'ba'-ba'ba'angngii mane untunuii tama di api. Puhaitoo ya' unghimpung tungnga'ne' ne pahe anna umbe'beiingkä'ne' tama di loko mapia-pia.'"

31Untula' bumi mesa pohapangang Puang Yesus pano di tau mai'di naoatee, "Kapahentaanna Puang Alataala sihapang sallisa' batunna pinamula ang handang saohko' ang napamula tau pano di bela'na.

32Moinnakato anna saohko'i yato batu pinamula, ampo' ponna tuhong, ya' mala untondong asang ingkänna pinamula ang senga' anna mala toi malängkä' sinnoa poang kayu. Lambi' sulei sedansiang anna mesehängngi dai' di tangkena, tanda käyyänna."

33Nalombungngi bumi tula'na Puang Yesus untula' bou mesa pohapangang ang senga' pano yato di tau mai'di naoatee, "Kapahentaanna Puang Alataala sihapang bibi' roti ang naala mesa bahine anna napasiuyä'i mai'di tahpung lambi' mala membea' asang yatoo."

34Ingkänna pepakuhunna Puang Yesus didiona Kapahentaanna Puang Alataala, natula' asang pano di tau mai'di umpake pohapangang. Dai aha untula' aka-aka siamo pano di tau mai'di ke dai umpake pohapangang.

35Ya' sundummi pole' tula'na Puang Alataala ang napalambi' nabi dolu ang naoatee, "La ma'karaä' pano di ingkänna tau umpake pohapangang; pemalaä' untula' kaha-kaha ang dake' kainsangang mengkalao pampahandu'anna lino."

36Puhanna yatoo le'ba'mi Puang Yesus umpellei yato tau mai'di, anna lupanoi di mesa dasang. Dai masae suleing yato pahsikolana nalumba anna nakutanaii naoaintee, "Malaraka umpakalesoingkang bahtuanna yato pohapangang didiona lohpo ang takekuna ang tuho tama di alla' pahe?"

37Natimba'mi Puang Yesus naoatee, "Mala. Noa inde bahtuanna: yato tau ang umbubu' banne ang mapia sihapangngä' Kodi' inde Änä' to Lino.

38Yato bela' sihapanne' lino, anna yato banne sihapanne' petauanna Puang Alataala, ampo' yatone' lohpo ang takekuna sihapanne' petauanna Pongkahana setang.

39Yato ang umpa'bali to pobela' dianto Pongkahana setang. Tempo pepaheang sihapanne' katämpä'anna lino, anna yato to pepahe sihapanne' malaeka'.

40Dahi umba noa yato lohpo ang takekuna dihimpung mane ditunui tama di api, la noa tuntone' ke katämpä'annang lino.

41Kodi', inde Änä' to Lino, la umpahentaä' ingkänna malaeka'ku unghimpung ingkänna yato ang umpasähsä' lalang hupatau anna ingkänna tau ang umbabe kakarakeang.

42Ingkänna yatoo la ditibei tama di api nahaka, anna di haontoo ang la naongei tau sika umbu salamang ang kamateang, anna dianto kamadahhaang ang dai aha mantondong.

43Ponna ke donentoo ingkänna tau ang untuhu'i Puang Alataala la pangngillo'ne' salamang mata allo yaling di kapahentaanna Ambenaii." Natämpä'ing inde tula'na Puang Yesus naoatee, "Menna pemala mangnginsang, pamapehingngiingnga'too!"

44Napatahhi' bumi Puang Yesus umpa'tula'i pahsikolana naoatee, "Kapahentaanna Puang Alataala sihapang kulle ang tilamung yaling di tampo ang nalambi' mesa tau ampo' nalamung sala bou sumule tama yato di ongeanna. Ampo' aka' kahsi si'da-si'da yato tau ang mallambi', dianto anna le'ba'mi do umbalu'i asang ingkänna aka siamo ang aha naampui, mane ungngallii yato tampo ang naongei tilamung yato kulle.

45Kapahentaanna Puang Alataala sihapang toe' mesa to pa'bulele ang mao umpeäng leleng belo-belo ang handang malehke' la naalli.

46Tahpana nalambi', ya' maong umbalu'i asang ingkänna aka-akanna anna ungngallii yato belo-belo ang handang masuli' allinna."

47Napatahhi' bumi tula'na Puang Yesus pano di pahsikolana naoatee, "Kapahentaanna Puang Alataala sihapang dala ang dipensamboing naung di le'bo', lambi' mala unghimpung ma'kahupa-hupa bau.

48Ponna nasa'dimmi yato to podala punno bau yato dalana, ya' nahentung pano di behing le'bo', mane sika ohko'i pole' napille-pilleiangngi yato bau. Bau ang mahasa nahimpunne' tama di paongeannaii ampo' bau ang dai huhu natibei nei'.

49La noa tuntone' ke katämpä'annang lino: ingkänna malaeka' la sule anna unghimpung asangngi ingkänna tau ang untuhu'i Pongkahana setang anna yato ingkänna tau ang untuhu'i Puang Alataala.

50Anna ingkänna yato tau ang untuhu'i Pongkahana setang la natibeiine' tama di api nahaka, anna di haontoo ang la naongei tau sika umbu salamang ang kamateang."

51Mekutanang Puang Yesus pano di pahsikolana naoatee, "Umpähändakaa' ingkänna inde ang kutula'?" Sika mentimba'mi naoatee, "Io, Tuang, kipähäng."

52Ya' naoainte Puang Yesus, "Dianto anna pano di to pampakuhu ada' ang mentamang di Kapahentaanna Puang Alataala sihapanne' mesa puäng dasang ang umpasohong aka-akanna ang bakahu yaling mai di tambing paongeang, dai supu yato ang masaeng."

53Donetoo, tahpana puha Puang Yesus untula' yato ingkänna pohapanganna pano di pahsikolana, ya' sika le'ba'mi sibaha-baha umpellei yato ongeang,

54anna sika lupanoi di bohtona toboe' Puang Yesus ang disanga Bohto Nazaret. Lambi'na pano, ya' napahandu'mi Puang Yesus mampakuhu pano di tau tama di pa'sambayangang. Yato tau mai'di ang napakuhu sika pusa' asang liu anna sikutana-tanaii naoatee, "Mennarea'ne' mambea kamanähängang anna kakuasaang lambi' mala umbabe ma'kahupa-hupa tanda ang mepusa'-pusa'?

55Darakate' inde tau änä'na tukang kayu, anna indona disanga Maria, noa tunne' ullu'na dianto ta Yakobus, ta Yusuf, ta Simon anna ta Yudas?

56Anna darakae' sibaha-baha siamingkea' dinne ingkänna ullu'na ang bahine? Dahi umbae' napangngalai indo kamanähängang anna kakuasaang?"

57Lambi' dai sika napetahpa', aka' dai tama di ahkalannaii umba noa kakuasaanna Puang Yesus. Ya' ma'tula'mi Puang Yesus pano diii naoatee, "Mesa nabi moi umba naongei dipakeangka' toi, ampo' supung ke di haoi di bohtona toboe', bahtu' yaling di hapunna toboe' anna dai dipakeangka'."

58Dianto anna dang umbabe mai'di tanda ang mepusa'-pusa' Puang Yesus donetoo, aka' yato tau mai'di dai sika mampetahpa'.



 <<  Matius 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran