Alkitab Mobile SABDA
[VER] : [ARALLE]     [PL]  [PB] 
 <<  Matius 28 >> 

1Tahpana lehang yato allo katohhoanna to Yahudi, sipatu allo Mingku mebengngi'-bengngi', sika le'ba'mi Maria Magdalena sibaha Maria ang senga' do ungngeka' yato ku'bu'na Puang Yesus.

2Donetoo pihsa' tomande'mi aha dahi lino' ang handang käyyäng, aka' aha mesa malaeka' tuhung yaho mai di langi' anna ungkisu'i yato batu pelapa'na baba ku'bu' mane mohko'i yaho di hahona.

3Hupanna yato malaeka' pansillo' salamang pesilona kila', anna pakeanna mabuhsa' liu.

4Anna yato ingkänna to pandaka sikalalla' salamang ang diponno'i bukunna tandana mahea' ungngita yato aka ang dahi.

5Ampo' ma'kara yato malaeka' pano yato di derua bahine naoatee, "Daa ummaheaa', aka' kuinsang sulekoa' umpeäng Puang Yesus ang hali ditoke' yaho di kayu sitambeng.

6Ampo' dang aha dinne dinoa, aka' tuhong sumule sinnoa aka ang puha natula'ingkoa' dolu. Mairakoa'too anna unnenne'i patindoanna lo'bämmi.

7Dahi dinoa penandamokoa' lao, anna umpainsangngii ingkänna pahsikolana ungngoaintee, 'Tuhong sumule Puang Yesus di hoi' mai di alla'na to mate! Napendoluimokoa' are' naung di Galilea. Di hoi'ke' mane ungngitaia'.' Kalehaiia' inde tula'ku."

8Napenandai siang le'ba'i sika lumpa' umpellei yato ku'bu'. Yaling di pihki'naii nasa'ding alla' la mahea' ampo' menau-nau sakali bure, anna maoi do umpainsangngi ingkänna pahsikolana Puang Yesus yato aka ang puha natula'ing malaeka'.

9Pihsananna yaling di pellaoannaii, pihsa'e' sule Puang Yesus napellambi'i anna ma'karai naoatee, "Salama'a' mating!" Ya' sika mendungku' siang yato derua bahine anna malimuntu'i pano di bihti'na menomba.

10Ma'karang Puang Yesus pano diii naoatee, "Daa ummahea'a'. Dinoa laomokoa' anna umpainsangngii ingkänna pahsikolaku ang kuangka' solasohongku, anna malai sika mao naung di Poropensi Galilea aka' di hoi'mito la sika napangngitaiä'."

11Tahpana sumule yato derua bahine, ya' le'ba'ing yato sangngaka-sangngaka tantara to pandaka pano di bohto mahoa', anna umpainsangngii kapala-kapala imang yato aka ang puha dahi.

12Umpaahang kasitula'ang yato kapala-kapala imang anna setobaha'ang. Ya' nabohtung sika la umbea mai'di doi' pano yato di sangngaka-sangngaka tantara to pandaka

13anna sika naoaintee, "Pahallua' ungngoate pano di ingkänna tau, 'Sule pahsikolana tängngä bengi umboko yato bahkena mengeang hahe.'

14Anna ponna nahingngi inde kaheba to ma'pahenta Roma, ya' kami' ang la sitingngayo, dahi dakoa' dio la masuhsa aka' dakoa' dio la nalambangngi."

15Sika untahimbong yato doi' sangngaka-sangngaka tantara to pandaka, anna sika nababe si'dai yato aka ang puha sika dipahentaing. Dianto anna tisembu'mi yato kaheba kalosengang tama di alla'na to Yahudi lambi' dinoa.

16Yato sampulo mesa pahsikolana Puang Yesus sika mao naung di Poropensi Galilea anna dai'i di mesa tanete situhu' ang puha sika napahentaing Puang Yesus.

17Tahpana sika ungngita Puang Yesus yaho yato di tanete, ya' sika malimuntu'mi di olona menomba. Ampo' aha sangngaka-sangngaka yato pahsikolana ang bata-bata aka' naoate yaling di inahanna tadiaarang Puang Yesus si'da.

18Mendungku'mi Puang Yesus pano diii anna ma'karai naoatee, "Puhamä' nabea Ambeku ingkänna kakuasaang, la ma'kuasaä' yaho di suruka anna yaling di lino.

19Dahi laokoa' pano di ingkänna bohto di lino, anna mampaturukoa' di hao lambi' aha to pentindo'ku mengkalao yato di ingkänna bohto. Anna tero'ia' yaling di sanganna Ambeku Puang Alataala, anna sangangku, Kodi' inde Änä', anna Inaha Masero.

20Anna paturuia' yato ingkänna tau membabe situhu' aka ang puha kupahentaingkoa'. Anna kalehaiia' indee: la tontongkoa' kuposolai lolo lambi' katämpä'anna lino."



 <<  Matius 28 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran