Alkitab Mobile SABDA
[VER] : [ARALLE]     [PL]  [PB] 
 <<  Markus 12 >> 

1Napahandu'mi Puang Yesus ma'tula' umpake pohapangang pano di kapala-kapala imang, to pampakuhu ada' Yahudi anna setobaha'ang. Naoatee, "Aha mesa tau ang umpapia bela' angkoro'. Nahala lipu', napapiaing bombeng ang la napampihsä'i angkoro' anna umpake'de' pa'hondaang malängkä'. Puhaitoo napopetesammi yato bela'na pano di sangngaka-sangngaka to pantesang, mane le'ba'i pano di bohto senga'.

2"Tahpana lambi' tempo pantuhangang, yato puäng bela' unsuo mesa sabua'na pano di to pantesang la ungngala boa pinamulanna ang mendahi katahaanna.

3Ampo' sika nasahka anna nasibamba-bambaii supu anna nasuoi sumule tomande', dai aha aka nabaha.

4Pihsananna yato puäng bela' unsuo bumi sabua'na ang senga'. Lambi'na pano nabamba bumi yato to pantesang lambi' pehaha bää'na, mane napakasili-silii anna nahambaii yaling mai.

5Yato puäng bela' unsuo bumi sabua'na ang senga'. Indee sika napatei. Tontong napanoa: aha ang sika nabamba, aha ang sika napatei.

6Dahi dinoa mesarang supu tohho, diantoo änä'na ang napakamaya. Lambi' unsuo änä'na pano di to pantesang aka' napihki', naoatee, 'Umbato ke sika nakalaya'i nei'.'

7Ampo' tahpana sika ungngita yato änä' to pantesang, ya' sioa-oamintee, 'Diangnga'to indo ang la umpuängang inde bela' ke mateng ambena. Dahi tapateiia' anna malai kita'a' umpuängang inde bela'.'

8Nasahka inde änä' mane napateii anna bahkena napentibeing yaling mai di huäng bela'."

9Mekutanang Puang Yesus, naoatee, "Dahi dinoa, akang la nababe yato puäng bela' pano di to pantesang? Tantunte' anna la panoi di bela'na anna umpatei asangngi yato ingkänna to pantesanna, mane napapetesang salai yato bela'na pano di tau senga'.

10Darakate' puha umbata ang yaling mai di Suha' Masero didioku naoatee, 'Batu ang puha natibei tukang, setonganna mendahi batu ang handang dipahallu.

11Dianto indee pembabena Puang Alataala ang takapusa'ia' mahasanna.'"

12Nahingnginna yatoo ingkänna kapala-kapala imang, to pampakuhu ada' anna setobaha'ang, tahpa sika umpeäng lalang anna malai unsahka Puang Yesus, aka' sika nainsang naoate kalaenaii ang napahoai pohapanganna, ampo' mahea' pano di tau mai'di lambi' sika le'ba' umpellei tomande' Puang Yesus.

13Suleng sangngaka-sangngaka to Farisi sibaha sangngaka-sangngaka änä' buana Tomaraya Herodes umpellambi'i Puang Yesus. Sika nasuo pongkahana mekutana anna malai pentimba'na Puang Yesus umbali-bali to ma'pahenta.

14Nase'de', naoatee, "O Tuang, kiinsang dio mesa to maroho inaha anna dao aha mahea' pano di tau senga' moinnakatoo ang dipakeangka'. Dao aha umpasisenga'-senga' tau, ampo' mampakuhuo sitonda katahpa'ang didiona lalang ang nakärä'i Puang Alataala. La malaraka la tabaya'a' sima pano di to ma'pahentana Kaisar, daraka?

15Pahallu la tabaya'a' daraka?" Ampo' nainsang Puang Yesus kakalasiannaii. Natimba'mi naoatee, "Akaboi anna sulekoa' unsändä'iä'? Bahai mai mesa doi' bahsi anna malai kuita."

16Sika nabeang pano mesa doi' bahsi. Nakutanaing Puang Yesus naoatee, "Menna inde kekambara' anna menna kesanga?" Sika natimba'mi naoatee, "Kaisar."

17Naoamintee Puang Yesus, "Dahi ponna noa, ya' beaia' pano di to ma'pahenta Kaisar aka ang la pahallu umbea anna beaia' pano di Puang Alataala aka ang la pahallu umbea." Sika pusa' asammi tahpana nahingngi.

18Pihsang tempo suleing sangngaka-sangngaka to Saduki ullumba Puang Yesus. (Inde mai tau dai sika napetahpa' la aha katuhoang sumule di hoi' mai di kamateang.)

19Sika mekutanang naoatee, "O Tuang, puha nauki' Musa inde pahenta pano di kita': Ponna aha mesa muane ang mate dake' hali keänä' bahinena, ampo' ahake' ullu'na yato muane, pahallu la umpobahine sala inde bahinena ullu'na ang mate anna malai aha peänä'anna yato to mate.

20Noa indee: Dolu aha pitu to siullu'. Yato ang ulua kebahine, ampo' mate di tempona dake' keänä'.

21Dahi yato bahinena napobahine sala ullu'na ang kaderuanna anna malai umpaaha peänä'ang pano di kakana ang puha mate. Ampo' yato ullu'na mate toe' dai hali keänä'. Napobahine bumi ullu'na ang katallunna ampo' noa toe',

22lambi' yato ullu'na ang kapitunna noa asang, mate dai aha änä'na. Katämpä'anna mate toe' yato bahine.

23Dahi ponna ke tuhong sumule to mate di hoi' mai di kamateang, ya' mennang kahang di alla'na yato pitu to siullu' ang la mendahi muanena yato bahine? Aka' puha asammi umpomuane yato pitu to siullu'."

24Natimba'mi Puang Yesus, naoatee, "Inang sala pähängkoa'. Aka' daia' ungnginsang ihsi Suha' Masero anna kakuasaanna Puang Alataala.

25Noarea'te' indee: ponna lambi'mi tempona katuhoanna sumule to mate di hoi' mai di kamateang, ya' dante' la aha tau ang dipakabeng. Ampo' katuhoanna hupatau la sinnoang katuhoanna malaeka' yaho di suruka, tala kebahine, tala kemuane.

26Anna didiona umpatuho sumule to mate, kuinsammi puha umbataa' yaling di suha'na Musa, naonge ma'tula'i Puang Alataala pano di Musa yaling mai di alla' lohpo ang lella' puhpu sinnoa api. Naoaintee, 'Kodi'mito indee Dehata ang napenombai Abraham, Ishak anna Yakub.'

27Donetoo Abraham, Ishak anna Yakub inang puhang mate, ampo' naangka' tuhoke' Puang Alataala. Aka' tadiaete' to mate ang umpenombai Puang Alataala ampo' to tuhoetee'. Inang dioa' nee sähsä' lalangkoa'."

28Nahingnginna yatoo, aha mesa to pampakuhu ada' umpellambi'ing Puang Yesus aka' nahingngi pentimba'na Puang Yesus pano di to Saduki tahpa' si'da. Mekutanang pano di Puang Yesus, naoatee, "O Tuang, ang umba kahang pahenta ang handang pahallu yaling di Atohanna Musa?"

29Natimba'mi Puang Yesus naoatee, "Pahenta ang handang pahallu diantoo: 'O to Israel, pehingngiia'! Dehatantaa' mesa supu, dianto Puang Alataala.

30Kalemuikoa' Puang Alataala Dehata ang umpenombai, penumpuii yaling di inahammu, yaling di pihki'mu, yaling di pembabemu anna yaling di kamatohoammu.'

31Anna pahenta kaderuanna ang pahallu diantoo: 'Kalemuikoa' para-parammu hupatau sinnoa ungkalemuikoa' kalaemu.' Dai aha pahenta senga' ang pahallu puha nei' supung inde derua."

32Ma'karang inde to pampakuhu ada' pano di Puang Yesus naoatee, "Tahpa' liu ne tula'mu Tuang. Inang mesa supu Dehata, dai aha senga'na supung Puang Alataala.

33Anna inang pahallu la ungkalemuiingkea' Puang Alataala umpakalebu bätäng sungnga'ta anna bätäng kalaeta anna para-paranta hupatau sinnoa ungkalemuiingkea' kalaeta toboua' kita'. Mahasa puha nei' andana ingkänna petunu ang dipopenomba dai' di Puang Alataala."

34Nahingngi inde tula'na to pampakuhu ada' Puang Yesus mahasa liu, naoamintee, "Sai'di'kangko anna mendahimo to pentindo'na Puang Alataala." Ya' daliung aha moi mesa tau la bahani la napekutana salaing.

35Temponang dinoa Puang Yesus mekutana. Lella' mampakuhu yaling di tähämpä' Dasang Ada'na Puang Alataala, mekutana naoatee, "Aka boi anna naoaite to pampakuhu ada', 'To Dilanti' la Mepasalama' dianto peänä'anna Tomaraya Daud?'

36Aka' Inaha Masero ang umpatuhoi Tomaraya Daud aka ang la nauki' diantoo: Puang Alataala ma'kara pano di Dehatangku naoaintee, 'Ohko'o di hao di tando kuanangku, lambi' ingkänna balimmu kusuo asang malimuntu' di olomu.'

37Dahi ponna ke di mendehatannai To Dilanti' la Mepasalama' nasangai Tomaraya Daud, 'Dehatanna,' ampo' mala toi ke di mentolinonai 'peänä'annaetee'.'" Yato tau mai'di ang manghingngi pihsa' masannang liu lambi' pemalake' nahingngi.

38Yaling di pepakuhunna Puang Yesus naoate, "Madakakoa' pano di to pampakuhu ada' ang pemala liu dipakeangka', sinnoanna umpake kaya' ang handang kalambe' anna malai dinenne'i lolo. Noa toi sika nakärä'i liu ponna natabe'ii ingkänna tau di hao di pasa'.

39Ponna ke maoi ma'sambayang si umpeäng ohko'ang ang handang mahasa, bahtu' ke ahai pa'rame-rameang si nakärä'i mohko' di hao di ongeang ang dipasadiaing to dipakeangka'.

40Sika umbulitu' balu bahine lambi' nahampa'i aka-akanna. Si ma'sambayang kalambe' aka' pemala dioaintee, 'Ei, meimäng si'da-si'da!' Dia asammito indee ang la untahimbo tahungkung ang handang matingngi ke nahohto'mi Puang Alataala ke lambi'mi tempona."

41Pihsang tempo mohko' Puang Yesus di behinna pahti derema ang di behing baba yaling di Dasang Ada'na Puang Alataala. Menge mohko' unnenne'-nenne'i tau mai'di ang menge umpatama derema yato di pahti. Mai'di to makaka mampatama mai'di doi'.

42Suleng mesa balu bahine ang memase-mase anna umpatamai derua doi' bahsi, dianto doi' ang handang sai'di'.

43Naitanna Puang Yesus, ya' untambaing pahsikolana anna naoaintee, "Kutula'ingkoa' setonganna inde deremana balu bahine keangka' puha nei' andana deremana ne pano to makaka.

44Aka' ne pano to makaka umpoderema nei' la'bi katomakakaanna, ampo' indene' kasi to pemase-mase ulluhpe' nei' doi'na napoderema ang setonganna la napotuho.



 <<  Markus 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel