Alkitab Mobile SABDA
[VER] : [ARALLE]     [PL]  [PB] 
 <<  Markus 2 >> 

1Tahpana sangngaka-sangngaka allona, ya' mao bung Puang Yesus naung di Bohto Kapernaum. Ya' napelele bung tau, naoatee, "Sule bumi di hao di dasang ang si biasa naongei."

2Yato dasang ang naongei, mai'di liu tau punno sule. Moi di hao di tingngayona baba daliung aha ongeang la lo'bäng. Mengene' Puang Yesus untula' Kara Dehata pano yato di hupatau.

3Menge ma'kara, aha sule tau uhpa'. Sika umbulle mesa tau ang mate sambose' kalaena, ya' dang mala mellao. La nabaha pano di Puang Yesus,

4ampo' dai mala naola pano, aka' mai'di liu tau ungkalapai lalang. Dahi indee tau ludai'ne' di ätu' ang mahante anna nabuhkeii yato ang sipatu naung Puang Yesus, mane napampaolaii naung yato to makoronna sibaha patindoanna.

5Tahpana naita Puang Yesus naoate matama si'da-si'da kapampetahpa'annaii, ya' ma'karang yato pano di to makorong naoatee, "O änä'ku, ingkänna kasalaammu kuampungnging."

6Ampo' aha toe' sangngaka-sangngaka to pampakuhu ada' Yahudi sika mohko' anna naoaite yaling di inahanna,

7"Bahani liue' inde tau ma'kara noa! Ungngindä'-indä' sanganna Puang Alataala! Aka' Puang Alataalaete' supu ang mala ungngampungngi kasalaang."

8Ampo' donetoo, nainsang siang Puang Yesus aka ang menge sika napihki'. Ya' sika naoamintee, "Akaboi anna ma'pihki' noakoa' nee?

9Umbarakae' kahang maromi' dioate pano di tau ang mate sambose' kalaena, 'diampungnging kasalaammu,' bahtu dioarakatee, 'kalehao, alai ne patindoammu anna pellaoo'?

10Ampo' la pahallua' ungnginsang ungngoatee, yaling inde di lino ma'kuasaä' Kodi' Änä' to Lino ungngampungngi dosa." Ma'kara bumi Puang Yesus pano yato di tau ang mate sambose' kalaena naoatee,

11"Kalehao, ängkä'i ne patindoammu anna maoo sumule pano di dasammu."

12Ya' kalehang anna tahpa ungngalai patindoanna, le'ba' tama di aneang nasa'bii tau mai'di. Yato ingkänna tau pusa' anna umpamatandei sanganna Puang Alataala, naoatee, "Tehterereete'! Mane dianna liu diita inde ang noa!"

13Sumule bumi Puang Yesus naung di behing Le'bo' Galilea. Tahpana di hoi', sule bumi nalumba tau mai'di. Ya' sika napakuhung.

14Menge mellao Puang Yesus di hoi', ya' ungngitang to pansima ang disanga ta Lewi, änä'na ta Alfeus, menge mohko' yaling di känto' pambaya'ang sima. Nasilahaming Puang Yesus naoaintee, "O leä, maio tindo'ä'!" Ke'de' siang ta Lewi anna mentindo'i.

15Pihsananna menge mande Puang Yesus sibaha pahsikolana di hao di dasanna ta Lewi, suleng sangngaka-sangngaka to pahsinga' sima ang senga' anna tau ang naangka' to pa'bohto 'kekasalaang,' aka' mai'di di alla'na to pentindo'na ang noa. Ya' mandeng sibaha-baha.

16Donetoo sika naitang sangngaka-sangngaka to pampakuhu ada' ang to Farisi lella' sika mande sibaha-baha. Tahpa mekutanang pano di pahsikolana Puang Yesus, naoatee, "Akana mandee' indo tuangkuhummua' sibaha to pahsinga' sima anna to kekasalaang? Dai sihatang la noa!"

17Nahingnginna yato Puang Yesus, natimba'mi naoatee, "Sinnoanna ang si natula' to baha', 'Tadiaete' to makahsing ang umpahallu to pa'pakuli, ampo' to makorongngetee'.' Noa tunto Koo. Dä' sule untambai tau ang ungngangka' kalaena maroho, ampo' tau ang nainsang naoatee kekasalaang."

18Aha mesa tempo naonge ma'puasai pahsikolana Yohanes to Pantero' anna to Farisi. Suleng sangngaka-sangngaka tau mekutana pano di Puang Yesus, naoatee, "Aka boi anna ma'puasaine' pahsikolana Yohanes sibaha pahsikolana to Farisi, ampo' dio dio sibaha pahsikolamu dakoa' Dio ma'puasa?"

19Mentimba'mi Puang Yesus pano diii umpake pohapangang naoatee, "Malaraka ingkänna tau ang menge ma'tokabeng sika ma'puasa ke mengeke' mohko' sibaha-baha yato to kabeng? Noa tunto Koo, dai la sihatang ke dai la masannang mande pahsikolaku naonge sibahakä'.

20Ampo' la aha toboe' tempona dako', Kodi' la sihapangngä' to kabeng, la dialai yaling mai di alla'-alla'na yato pahsikolaku. Ya' donento yatoo la sika naongei ma'puasa.

21Noa tunne' daete' aha mesa tau la ungngalli kaing ang bakahu anna napakei untampi' sahedorona ang malullu' liung, aka' ponna napanoa, ya' yato kaing ang bakahu la unghentu sahedoro lambi' tuhtuang umpakehängngängngete' seu'na yato sahedoro.

22Anna noa tunne' hapanganna ponna aha pangnganang lollo' ang masaeng lambi' mato'do', dai la sihatang dipampatamai angkoro' bakahu aka' la natehse, lambi' sahing ditibe. Ampo' angkoro' bakahu supung mala dipatama di pangnganang lollo' bakahu.

23Pihsang tempo di allo katohhoang Puang Yesus sibaha pahsikolana ungngolai sallimbo bela'. Menge sika mellao, yato pahsikolana Puang Yesus sika umponge'mi sangngaka-sangngaka boana pinamula.

24Naitanna yato to Farisi naoamintee, "Akaboi indo pano pahsikolamu anna umbabei yato ang dai mala dibabe di allo katohhoang?"

25Natimba'mi Puang Yesus naoatee, "Dakake'a' dio aha umbata yato aka ang hali nababe Tomaraya Daud sibaha änä' buana naonge kakuhangangngi anna manonoi?

26Donetoo mentama di Dasanna Dehata, naonge Abyatar-i mendahi handang pongkahana imang, anna ungngalai dehpa ang puha dipopenomba yaling. Naala naande, anna nabea toine' pano di ingkänna ang nasibahaing, ang setonganna yato dehpa dasi'da-si'dai mala naande tau sehalinna ingkänna imang."

27Nalombungngike' tula'na Puang Yesus naoatee, "Allo katohhoang dipaaha anna malai mehile hupatau. Dai dioate dipaaha hupatau anna la untuhu'i ingkänna atohang allo katohhoang.

28Dahi Kodi' Änä' to Lino dianto ang ungkuasai allo katohhoang."



 <<  Markus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel