Alkitab Mobile SABDA
[VER] : [ARALLE]     [PL]  [PB] 
 <<  Markus 9 >> 

1Kutula'ingkoa' setonganna yalingnga' inde di alla'-alla'mu dinoa aha sangngaka-sangngaka tau ang dai la mate, dolunna ungngita Kapahentaanna Puang Alataala ang la sule sitonda kakuasaang."

2Tahpana unnung allona puhanna umpainsangngi pahsikolana Puang Yesus didiona kamateanna, maong dai' di mesa tanete malängkä' umpasähä' kalaena sibaha tallu pahsikolana dianto: Petrus, Yakobus anna Yohanes. Dai sibaha solana ang senga'. Lambi' dai', sika ungngita Puang Yesus tirende hupanna.

3Kaya'na mendahi moballo mabusa ang dai aha nasinnoaing mabusanna di lino.

4Pihsa' tomande' lemba' Nabi Elia sibaha Nabi Musa. Lella' sipa'kara Puang Yesus, naita yato tallu pahsikolana.

5Ma'karang ta Petrus pano di Puang Yesus, naoatee, "O Tuang, masannang liu tau dinne. Umbai mahasa ke umpake'de'i tau bansuli umpopantangnga' simesa: dio mesa, Nabi Elia mesa anna mesa Nabi Musa."

6(Inde ta Petrus ma'tula' tomande'; dai nainsang aka ang la natula' aka' pihsa' sika mahea' anna pusa' liu.)

7Pihsananna tuhummi yaho mai salehu' unsapu'ii. Ya' kahingngiammi kamaha yato yaling mai di salehu' naoatee, "Dianto inde Änä'ku ang kupakamaya. Pehingngiia' tula'na."

8Sika menenne'-nenne' lelemmi di behinna, ampo' dai aha tau naita, supurang Puang Yesus.

9Tempona sika tuhungngi yaho mai di tanete, napa'karaing Puang Yesus, naoaintee, "Daa umpetula' sängkäingnga' pano di tau senga' yato aka ang puha ungngitaa' ke dakä' dipatuho sumule Kodi', inde Änä' to Lino, di hoi' mai di kamateang."

10Inde to tallu napehingngii yato pahentana, dai natula', ampo' supung di kalaena ang nasitula'-tula'i aka bahtuanna: Änä' to Lino dipatuho sumule.

11Mane sika ungkutanaii Puang Yesus naoatee, "Akana naoaite to pampakuhu ada', 'Nabi Elia pahallu nei' la mendolu sule andana To Dilanti' la Mepasalama''?"

12Mentimba'mi Puang Yesus naoatee, "Io, inang tahpa' la sule ang sinnoa Nabi Elia anna umpasadiai ingkänna siamo, ampo' umbane' noa ang tiuki' yaling di Suha' Masero, dianto: pahallu Kodi' inde Änä' to Lino la ungngolai kamasuhsaang anna napakauho-uho hupatau?

13Anna kutula'ingkoa', setonganna haling sule yato ang sinnoa Nabi Elia, ampo' yato hupatau sika membabe pano situhu' pampemalanna. Dianto ang sinnoa aka ang puha tiuki' yaling di Suha' Masero didiona kalaena."

14Tahpana Puang Yesus anna yato tallu pahsikolana silambi'mi sumule pahsikolana ang senga', sika ungngitang mai'di tau di hao. Sangngaka-sangngaka to pampakuhu ada' Yahudi menge sitimba'-timba' unsiala-alai tula'na sibaha yato pahsikolana Puang Yesus.

15Ungngitanna Puang Yesus sule, sika pusa'mi, mane le'ba'i sika lumpa' natammui.

16Sika nakutanaing Puang Yesus, naoatee, "Aka ang unsitimba'-timba'i sibaha to pampakuhu ada'?"

17Ya' ahang mesa tau mentimba', naoatee, "O Tuang, umposolaä' änä'ku sule. Dai mala ma'kara aka' napentamai setang.

18Ponna nakasulei bumi, si umpembänsä'-bänsä'ing kalaena naung di tampo, si membuha uhalena di suana, si umpasikiki' isinna anna si mato'do' kalaena. Puhang kupalau pano di pahsikolamu unghambai yato setang ampo' dai sika mala naalai."

19Ya' sika naoaminte Puang Yesus, "Tehtereremokoa' dio indee! Umbarea' dio naola kapampetahpa'ammua'? Akana sähsä' lalangkoa'? La sangngakake' masaena tohhoä'a' yaling di alla'-alla'mu anna sa'bara' ungngoloikoa'? Bahai ne mai änä'!"

20Ya' sika naposolaming. Tahpana ungngita Puang Yesus yato setang, ya' mato'do' siang yato kalaena änä', lambi' loe naung di tampo, membuha suana.

21Mekutanang Puang Yesus pano di ambena yato änä', naoatee, "Masaengka inde si noa?" Natimba'mi ambena inde änä', naoatee, "Mengkalaoke' saohko'.

22Si pemmai'ding la napatei inde setang, si manaho tama di api, bahtu' naung di uhai. Ke malai umbela Tuang, ya' kalemuiang kasi!"

23Ya' natimba'mi Puang Yesus, naoatee, "Aka ungngoa? Ke malai kubela? Dai aha tala mala, ahsala' mampetahpa'i tau!"

24Tahpa mekohang yato ambena änä', naoatee, "O Puang, mampetahpa'ä' ampo' dake' kanna'. Kalemuiä' anna kehängngängngi kapampetahpa'angku!"

25Tahpana naita Puang Yesus tuhtuang mai'di sule tau mokalipumpung, ya' ungkarahta'mi yato setang, naoaintee, "Setang ang mampabinga anna ang mampatomaho, palaio yaling mai done di änä'! Daunsumule bou tama!"

26Yato setang mekoha, mane umpasikalalla'i kalaena yato änä'. Puhai, ya' malaing yaling mai di kalaena. Indee änä', noa liung ang mate, lambi' mai'di tau mangngoatee, "Mateng!"

27Ampo' natokei teyyena Puang Yesus, mane napakalehai. Ya' kalehang yato änä', malang ke'de' kalaena aka' bono' liung.

28Tahpana di hao di dasang inde Puang Yesus, suleng pahsikolana nakutanai, naoatee, "Akana darangkang mala unghambai yato setang yaling mai di kalaena tau?"

29Natimba'mi Puang Yesus, naoatee, "Setang ang noa indoo dai mala sadilaba'inna, supung ke disambayangngii mane malai."

30Mengkalaong Puang Yesus sibaha pahsikolana umpatahhi' lalanna lupano di Galilea. Dai naaku ke la ahai mangnginsang ongeanna dinoa

31aka' supung pahsikolana ang la napakuhu. Umpa'karaing pahsikolana, naoatee, "Kodi', inde Änä' to Lino, la dibehoä' pano di kakuasaanna to lino anna sika la napateiä', ampo' tallu allona puhangku mate la tuhoä' sumule."

32Inde pahsikolana dai sika umpähäng yato ang natula' Puang Yesus, ampo' malaya' sika napekutanaing umba noa yato bahtuanna.

33Lambi'mi Puang Yesus sibaha pahsikolana pano di Kapernaum. Tahpana yaling di dasang ang si naongei, mekutana Puang Yesus pano di pahsikolana, naoatee, "Aka yato ang unsitula'-tula'ia' langngena' di tängngä lalang?"

34Ampo' sika mahtang supu aka' yato ang sika natula' di langngena' dianto unsiba'di-ba'dii didiona menna ang handang dipakeangka' yaling di alla'naii.

35Mane mohko'i Puang Yesus, umbahai pahsikolana anna naoaintee, "Ponna aha tau ang pemala dipakeangka', pahallu mendihoi'ang anna ungkalemui ingkänna solana."

36Pihsananna ungngalang mesa änä' saohko' inde Puang Yesus anna napake'de'i tama di alla'-alla'naii, mane naahingngi lella' ma'kara, naoatee,

37"Menna ang untammui manahpa mesa tau aka' napetahpa'ä', ang diangka' dihoi'ang sinnoa inde änä' saohko', dianto ang mantammui manahpaä'. Anna menna ang mantammui manahpaä', tadia Kodi' supu ang natammui manahpa, ampo' Puang Alataalaetee' ang mansuoä'."

38Ma'karang ta Yohanes pano di Puang Yesus, naoatee, "O Tuang, aha kiita mesa tau unghambai setang yaling di sangammu, ya' kisängkäing aka' kiinsang tadia solata ang mentindo' di Dio."

39Ampo' natimba' Puang Yesus, naoatee, "Daunsängkäiia'. Aka' daete' aha mesa tau ang umbabe ang mepusa'-pusa' umpake sangangku, la tahpa umpatahuhu sangangku.

40Menna ang la daingkea' mambali, dianto solata.

41Kutula'ingkoa' setonganna ponna aha tau hapanganna mampaenu'koa', moi poro nabeang supu santangki' uhai kula' kalena aka' dioa' to pentindo'ku, ya' ahaete' yato saho pembabena.

42Ampo' menna-menna ang umpasähsä' lalang moi poro mesa di alla'na inde mai änä' ang mampetahpa'mi di Kodi', dotanne' yato tau ang noa ditoke' batu käyyäng pano di bahokona mane dilimmi'i tama di le'bo'.

43Ponna yato sambali teyyemu mandosaio, ya' dotante' umbose'i. Dotainne' tamao di katuhoang sapano-panona dai keteyye sambali andana la keteyye sibalio ampo' la napatamao di api nahaka ang dai aha pi'dena.

44[ang naongei yaling ingkänna illi'-illi' bobosi ang aha lolo sibaha api ang dai mala pi'de lambi' sapano-panona.]

45Noa tunne' ponna yato sambali bihti'mu la mandosaio, dotai tunne' umbose'i. Dotanne' tamao di katuhoang sapano-panona hehpä' andana la kebihti' sibalio ampo' la napatamao di api nahaka,

46[ang naongei yaling ingkänna illi'-illi' bobosi ang aha lolo sibaha api ang dai mala pi'de lambi' sapano-panona.]

47Anna ponna matammu ang mampadahi madosao, ya' dotanne' ungkahohe'i. Dotainne' tuhoo sibaha Puang Alataala dai kemata sambali andana la kemata sibalio ampo' la napatamao di api nahaka,

48ang naongei yaling 'ingkänna illi'-illi' bobosi ang aha lolo sibaha api ang dai mala pi'de lambi' sapano-panona.'

49Ingkänna indee mapahhi' asang la ditindo', ampo' ingkänna ang pemala mantindo'ä', pahallu dipamasero sinnoa bale ang disiai, ungngolai kamasuhsaang sinnoa bahsi ang napamakähhäng api.

50Sinnoanna sia la umpamäsing lolo ingkänna andeang, ampo' ponna ke dang mäsing, ya' dai la kekuna. Noa tumokoa' dio, pahallukoa' kekuna noa sia. Pahallukoa' tohho sikalemu-lemui mesa anna mesa."



 <<  Markus 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran