1Aha di alla'na solata to mampetahpa' ang dake' matoho kapampetahpa'anna, dianto bata-batake' inahanna aka' dake' nainsang aka setonganna ang mala nababe. Tahimbo manahpai yato tau ang noa. Daumpaaha kasibehtaang pano yato ang noa.
2Hapanganna, aha tau ang matoho kapampetahpa'anna naoatee malaingkea' ungngande ingkänna hupanna andeang. Ampo' aha toi tau ang dai matoho kapampetahpa'anna ang naoane'tee, "Dai nakärä'i Dehata ke ungngandeingkea' bale, supung lohpo ang mala diande."
3Dioa' ang ungngande aka-aka siamo, dakoa' mala ungngita-ita naung tau ang lohpo supu naande. Anna tau ang lohpo supu mala naande, datoi mala unsalla solana ang si ungngande aka-aka siamo. Aka' inde mai solata puhang natahimbo Puang Alataala mendahi petauanna.
4Yato solata dianto sabua'na Dehata. Daingkea' unsalla sabua'na tau senga', aka' moi maroho, moi sala, nainsang toboe' pongkahana. Anna yato solata inang la maroho, aka' mala napamaroho Puang Alataala.
5Aha tau ang ungngangka' mesa allo masero puhane' andana allo senga'. Ampo' aha tau ang ungngangka' ingkänna allo sinnoa-noa siang. Ang handang pahallu dianto aka ang taangka' tahpa' dianto la tapetahpa' si'da-si'da lambi' tama di inaha.
6Tau ang ungngangka' masero puha mesa allo, napanoa anna malai umpamatande Dehata. Tau ang si ungngande moi aka, napanoa anna malai umpamatande Dehata, aka' ma'kuhhu'sumanga' dai' di Puang Alataala. Noa tunne' tau ang si ungngande supu andeang ang ma'tantu, napanoa yatoo anna malai umpamatande Dehata, anna ma'kuhhu'sumanga' toi dai' di Puang Alataala.
7Aka' kita' to Sahani, tuhoingkea' bahtu' mateingkea', pahalluingke untuhu'i supu pangngelo'na Puang Alataala. Daingke mala untuhu'i pampemala kalaeta.
8Aka' ke tuhoingke, ya' tuhoingke untuhu'i pa'elo'na Dehata. Noa tunne' ke mateingke untuhu'i toingkene' pa'elo'na Dehata. Dahi tuho bahtu' mateingke tontongngingke petauanna Dehata.
9Aka' suhunna anna matei Kristus anna tuho sumule, dianto anna malai mendahi Dehatanna ingkänna tau, noa ang tuhoke', noa toi ang mateng.
10Dahi, aka boi anna unsallao solamu ang mesaingke yaling di kapampetahpa'ang? Noa tunne' aka boi anna ungngita-ita naungngo solamu ang mesaingke yaling di kapampetahpa'ang? Aka' ingkännaingkea' la mengngolo asang pano di olona Puang Alataala ke mepahehsang.
11Aka' yaling di Suha' Masero ma'tula' Puang Alataala naoatee, "'Kalehaii indee: Ingkänna tau la mengkuntu' di oloku napenombaiä'. Anna ingkänna tau la mangngakuiä' naoate Kodi'mito Puang Alataala.' Noanto Bahtakara Dehata."
12Dahi, ingkännaingkea' pahallu untangkung tobouingkea' kita' ingkänna pembabeta di olona Puang Alataala.
13Dianto anna daingkea' mala unsalla solata. Ampo' diare' tadakaii andana ahai pembabeta ang la untumäng solata tama di dosa.
14Aka' tuhoä' yaling di Puang Yesus, lambi' kuinsang anna kupetahpa' lambi' tama di inahangku kuoate dai aha andeang ang pemali di olona Puang Alataala. Ampo' ponna ke ahai tau ang umpemalii sanghupa andeang, ya' inang daete' sihatang ke naandei yato ang napemalii.
15Dia tuke', ponna ke ungngandeingkea' andeang di olona tau senga' ang mampemalii, lambi' kaita-ita yato tau anna madosai, ya' madosa turingketo kita', aka' daingkea' pa'kalemu pano yato di solata. Dianto anna kuoaitee, dakaii andana untumängngingkea' solata lambi' tallang kapampetahpa'anna aka' yato andeang ang taande. Aka' yato solata solasohonta siang yaling di Dehata, ang nasulängngi Kristus ungngolai kamateanna.
16Dahi, ponna ke ahai ang tapemapiaing ampo' daine' napemapiaing solata, ya' dotanne' dai tababe yatoo, andana nasallai pembabeta tau senga'.
17Aka' yaling di Kapahentaanna Puang Alataala, tadiaete' atohang didiona ang la diandena supu bahtu' ang la dienu' supu. Ampo' ang handanna dianto inaha maroho, kasikapiaiang mesa anna mesa, anna kamasannangang inaha ang nabeaingke Inaha Masero.
18Ponna ke untuhu'iingkea' Kristus anna tapanoai indee, ya' la umpamasannang Puang Alataala pembabeta, anna la napakeangka'ingkea' solata.
19Dianto anna pahalluia' tapengkabela-belai tuho sikapiai mesa anna mesa anna sipakatoto' yaling di kapampetahpa'ang.
20Daingkea' mala ungkarakei pengkähänna Puang Alataala yaling di katuhoanna solata napobua' ungngandeingkea' andeang ang napemalii tau senga'. Setonganna dai aha andeang ang pemali diande. Ampo' ponna ke yato ang taande untumäng solata manaho tama di dosa, ya' salaringketee'.
21Dotanne' daingkea' ungngande bale bahtu' ungngenu' ang makahha' bahtu' umbabe aka ang la untumäng solata manaho tama di dosa.
22Ponna ke umpetahpa'i ungngoatee dai sala yato pembabemu, ya' patitanangngi yaling di inahammu yato aka ang umpihki' di olona Puang Alataala. Masannanne' tau ang dai unsohso pembabena aka' yaling di inahanna nainsang naoate maroho.
23Ampo' pano di tau ang bata-bata inahanna ungngande dia siamo andeang, anna katämpä'anna naandee', ya' salaete' yato tau, aka' yato ang hali nababe dai situhu' aka ang aha yaling di inahanna. Aka' moi aka ang tababe, ke dai sitonda kapampetahpa'anta dai' di Dehata, ya' dosaete' pano di kalaeta.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel