Alkitab Mobile SABDA
[VER] : [ARALLE]     [PL]  [PB] 
 <<  Roma 15 >> 

1Kita' ang matoho kapampetahpa'anta dai' di Puang Alataala pahalluingkea' sa'bara' pano di tau ang malamma kapampetahpa'anna. Anna daingkea' mala umpamasannang supu kalaeta.

2Pahalluingkea' umbabe aka ang la umpamasannang inahanna tau senga' ang la napomapia, anna malai tapakatoto' kapampetahpa'annaii.

3Aka' datoine' umpeäng kamasannangang Kalaena Kristus, ampo' naaku ungngolai kamasuhsaang untuhu'i Puang Alataala. Sinnoa ang tiuki' yaling di Suha' Masero naoatee, "Ingkänna tula' tahuhunna tau ang la napamating di Dio lupanong di kodi'."

4Nasuhung tiuki'i ingkänna ang aha yaling di Suha' Masero, dianto anna malai napaturuingkea'. Aka' ungngolai inde pepaturu, malaingkea' sa'bara' yaling di kamasuhsaang anna matoho aka' mepakahanga, lambi' hannuingke dai' di Puang Alataala.

5Puang Alataalarang si umpamatohoa' inahammu lambi' sa'bara'koa' yaling di kamasuhsaang. Kuhannuang la naduluikoa' tuho sikapiai mesa anna mesa untuhu'i pembabe mapianna Kristus Yesus,

6anna mala toukoa' dio umpamesa inaha anna umpamesa tula' umpudi Puang Alataala, Ambena Puang Yesus Kristus, Dehatanta.

7Dahi, solasohong, dianto anna kuoaingkoa'tee, tahimbo mapiakoa' solamu to mampetahpa', sinnoa natahimbo mapia touingkea' kita' Kristus. Aka' ponna ke sikapiaingkea' solata to mampetahpa', ya' umpamatandeingkea' Puang Alataala yaling di katuhoanta.

8Kalehaiia' indee: Kristus tama inde di lino untahiai to Yahudi, anna malai sundung pa'dandianna Puang Alataala pano di peneneanna to Yahudi, lambi' la maleso pano di ingkänna tau naoate tahpa' si'da-si'da Bahtakaranna Puang Alataala.

9Tama di lino la umbuhkei lalang anna malai tau ang tadia to Yahudi la dipasalama' anna umpudi Puang Alataala aka' pa'kalemunna pano. Yaling di Suha' Masero aha tiuki' naoatee, "O Puang Alataala, kupakeangka'o. Nahingngi mai'di tau ang tadia to Yahudi, anna menaniä' umpudi sangammu."

10Aha toe' tiuki' yaling di Suha' Masero naoatee, "Oa' ingkämmu ihsinna lino ang tadia to Yahudi, penau-naukoa' sibaha to Yahudi ang napillei Puang Alataala mengkalao dolu."

11Anna ahake' tiuki' naoatee, "Oa' ingkämmu ihsinna lino ang tadia to Yahudi, pudii Puang. Ingkämmua' hupatau pudii!"

12Anna mane ahai inde ang natula' lohpo' Nabi Yesaya naoatee, "Mengkalao di peänä'anna Isai la kende' mesa ang la umpahenta tau ang tadia to Yahudi Dianto ang la sika nahannuang."

13Puang Alataala Dianto ang tahannuang! Dianto anna mehumala'ä' dai', kupalauingkoa' kamasannangang anna kamasahkeang ang sundung, aka' kapampetahpa'ammua' yaling di Puang Yesus. Kupalau anna malai napamatoto' inahammua' ungngolai kakuasaanna Inaha Masero anna malai tuhtuang hannukoa' pano di Puang Yesus.

14Oa' ingkämmu solasohongku, kupetahpa' si'da-si'da anna kuinsang umba sama pembabe mapiammu. Ungnginsangkoa' pepaturu di hao mai di Bahtakara Dehata, lambi' malakoa' sipaturu mesa anna mesa.

15Ampo' moinnakato noa, yaling inde di suha'ku dä' masili kupakaenga'koa', untula' sangngaka-sangngaka pepaturu. Pahtuyungku dianto anna malakoa' kupakaleha aka' dianto pengkähängang ang nabeaä' Puang Alataala.

16Naängkä'ä' mendahi sabua'na Kristus Yesus pano di tau ang tadia to Yahudi. Anna yato pengkähängangku mala dipasiita pengkähänganna mesa imang, aka' umpepainsangngingkä' Kaheba Mapia pano di tau ang tadia to Yahudi, anna ingkänna tau ang mampetahpa' pano di Puang Yesus kupasihapang penombaangku ang kupopenomba dai' di Puang Alataala. Anna inde penombaangku natahimbo mapia Puang Alataala, aka' sika napamasero Inaha Masero anna napadahi petauanna Puang Alataala.

17Dahi, aka' kasikenteangku Kristus Yesus, suhaka inahangku umpokale'de pengkähängangku ang kukähängnging Puang Alataala.

18Ponna ke untula'ä' pengkähängangku, ya' dianto supu kähängang ang ungngolai kakuasaanna Kristus yaling di katuhoangku. Aka' aha tau ang tadia to Yahudi ang untuhu'ing Puang Yesus aka' unghingnging pepaturungku anna pengkähängangku,

19anna aka' tanda ang mepusa'-pusa' ang kupadahi ungngolai kakuasaanna Inaha Masero. Mengkalao yaho di Bohto Mahoa' Yerusalem lambi' sau di Poropensi Ilirikum halimä' umpepainsangnging Kaheba Mapia pano di tau mai'di, kupaturu menna setonganna ang dioainte Kristus.

20Pahtuyungku dianto pemalaä' umbaha Kaheba Mapia pano di bohto ang dake' ungnginsang Kristus. Aka' dai sihatang kusa'ding ke umpatulu'ä' aka ang puha napahandu' tau senga'.

21Pemalaä' umpasundung tula'na Suha' Masero ang naoatee, "Tau ang dake' aha umpelele kahebana, la nainsang naoate mennae' setonganna Yatoo. Anna tau ang dake' aha unghingngi yato kaheba, la unghingngi anna napebahtuang yato kaheba."

22Aka' inde pengkähängangku si mangkalapai loloä' ke pemalaä' mating kupellambi'ikoa', solasohong.

23Ampo' dinoa, puhang pengkähängangku dinne done. Inang sangngakang pahiamanna pemalaä' mating di Bohto Mahoa' Roma kupellambi'ikoa'.

24Kupahtuyu la lusauä' di Bohto Spanyol, dahi ke liumä' diting di bohtomua', mane lempängngä' diting. Ponna puhamingkea' sitammu sämpäi', kuhannuang ke la malai unduluiä' yaling di pellaoangku lusau di Spanyol.

25Ampo' dinoa la maokä' dolu dai' di Bohto Mahoa' Yerusalem. Aka' to pentindo'na Puang Yesus dinne di Poropensi Makedonia anna Akhaya puhang mopahtuyu sika la umbea doi' pano di solana to mampetahpa' ang memase-mase yaho di Yerusalem. Dahi, dianto la kubaha dai'.

26(15:25)

27Yato pahtuyunnaii sika nababe aka' pa'kalemunna. Anna inang sihatang liu ke sika unduluii solana to Yahudi ang dai nabela tuho. Aka' ungngolai to Yahudi lambi' tau ang tadia to Yahudi mala untahimbo Kaheba Mapia sihapang andeang mendehatanna. Dahi, sihatang toe' tau ang tadia to Yahudi untahakangnging andeang mentolinona pano di solana to Yahudi.

28Dahi, ponna ke haling kubaha dai' di Yerusalem inde doi' panduluinnaii ang puha sika nahimpung, ya' mane maoä' sau di Spanyol, kuola mating di bohtomu.

29Anna kuinsang ke lambi'ä' mating, inang la kubahaingkoa' mai'di behe di hao mai di Kristus.

30Oa' solasohongku, aka' kamesaantaa' yaling di Dehatanta Puang Yesus Kristus, anna aka' sikalemuiingkea' ungngolai pengkähänganna Inaha Masero yaling di inahanta, dianto anna kupalaui mating ke la malai umpehumala'ingkä' dai' di Puang Alataala yaling di sambayang.

31Palauingkä' anna malai nadakaiä' Puang Alataala di hao mai di tau ang dai mampetahpa' ke sumulemä' tama di Bohto Yudea. Palau touingkä' nei' ke malai to pentindo'na Puang Yesus yaho di Bohto Mahoa' Yerusalem la untahimbo mapia inde doi' pandului ang la kubaha dai'.

32Ponna noa, katämpä'anna ke naelo'i Puang Alataala, la malaä' mating di bohtomu sitonda kakahsiang, anna la makahangaä' yaling di alla'-alla'mua'.

33Kuhannuang Puang Alataala ang mebea kamasahkeang la mamposolai lolokoa'. Aming!



 <<  Roma 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran