1Sibaha inde suha'ku la kupainsangngikoa' menna ang disanga Febe. Dianto mesa bahine, solata to mampetahpa' ang si undului to pentindo'na Puang Yesus di hao di Bohto Kengkrea.
2Kupalau anna malai untahimbo sinnoa solasohommu yaling di Puang Yesus, aka' dianto pembabe ang sihatang pano di kita' ang untuhu'i Puang Yesus. Ponna aha ang napahallu, ya' beai pano, aka' puhang undului mai'di tau, sinnoanna kodi', mesa touä' ko ang puha nakalemui.
3Kalemuiä' palambi'ingkä' salama'ku pano di ta Priskila anna ta Akwila, muanena. Dianto solaku mengkähäng yaling di Kristus Yesus.
4Haling sai'di' tala sika mate aka' pemala naduluiä'. Dahi ma'kuhhu'sumanga'ä' aka'ii. Anna tadia kodi' supu ang ma'kuhhu'sumanga', ampo' ingkänna toe' tau ang mampetahpa' yaling di Puang Yesus ang tohho pano di bohtona tau ang tadia to Yahudi ma'kuhhu'sumanga' toe'.
5Palambi' touingkä'ne' salama'ku pano di ingkänna to mampetahpa' ang si ma'himpung yaling di dasanna. Salama'ku pano di ta Epenetus ang kukalemui. Dianto tau ang handang uhuna mampetahpa' pano di Kristus di hao di Poropensi Asia.
6Anna salama'ku toe' pano di ta Maria, ang puha napengkähäng kahha'ingkoa'.
7Palambi' touingkä'ne' salama'ku pano di ta Andronikus anna ta Yunias. Dianto sola bohtoku to Yahudi, ang hali kusibahaing yaling di tahungkung. Inde to deruai dolune' mampetahpa' pano di Kristus andana kodi', anna napakeangka' ingkänna rasul.
8Salama'ku pano di ta Ampliatus ang kukalemui yaling di Puang Yesus.
9Salama'ku pano di ta Urbanus, solataa' mengkähäng yaling di Kristus. Salama'ku toi pano di ta Stakhis ang kukalemui.
10Salama'ku toi pano di ta Apeles ang tontong lolo untindo'i Kristus moinnakato nahoa mai'di kamadahhaang. Salama'ku pano di hapunna ta Aristobulus.
11Salama'ku pano di ta Herodion, solaku to Yahudi. Salama'ku toi pano di solata ang mampetahpa' yaling di hapunna ta Narkisus.
12Salama'ku toi pano di ta Trifena anna Trifosa ang mengkähäng untanang sikunna yaling di pengkähänganna Puang Yesus, anna pano di ta Persis ang kukalemui, ang mai'di toe' pengkähänganna dai' di Dehata.
13Salama'ku pano di ta Rufus, mesa to Sahani ang dipakeangka'; anna salama'ku toi pano di indona, ang kupasihapang indoku tou kodi'.
14Palambi'ingkä' salama'ku pano di ta Asinkritus, Flegon, Hermes, Patrobas, Hermas sibaha ingkänna solasohong ang nasibahaing.
15Salama'ku pano di ta Filologus anna ta Yulia, pano di ta Nereus anna ullu'na ang bahine, anna pano di ta Olimpas sibaha ingkänna to mampetahpa' ang nasibahaing.
16Sisalama'koa' mesa anna mesa umpakalebu inahammua' yaling di ingkänna kasitammuammu. Ingkänna to mampetahpa' yaling di Kristus ang dinne umpalambi' asang salama'na mating di dioa', solasohong.
17Oa' solasohong, kupakaenga'koa' anna malakoa' madaka pano di tau ang la mampasisähä'-sähä'koa' anna ang la pemala mampatinahokoa' ungngolai pepaturunnaii ang dai sihatang pepaturu ang haling untahimbo. Kahaoii yato tau ang noa!
18Aka' tau ang membabe noa yatoo daine' umbabe pengkähänganna Kristus Dehatanta, ampo' sika untuhu'ine' pampemala kalaena. Sika unse'de' tau ang dai aha aka nainsang lambi' nabulitu'.
19Ampo' dioa', solasohong, kainsangammi umba umpanoaa' untuhu'i pepaturunna Puang Alataala. Anna kahsi touä' kodi' kuhingngi yato pembabemu. Kuhannuang la bansa' lolokoa' membabe mapia, ampo' ungkahaoine' pembabe karake.
20Puang Alataala ang mebea kamasahkeang la baha' untalo anna umpasitale-tale kakuasaanna Pongkahana setang yaling di katuhoammu. Kuhannuang mana' pa'kalemunna Dehatanta, Puang Yesus Kristus la umposolai lolokoa'.
21Salama'na toe' are' mating ta Timotius, solaku dinne mengkähäng. Noa toi ta Lukius, Yason anna Sosipater, santoyahudingku umpalambi' toe' salama' mating.
22Noa tunne' ta Tertius, ang mangnguki'ingkä' inde suha'ku, umpalambi' toune' salama'na yaling di Puang Yesus mating di dioa' solasohongku diting di Roma.
23Umpalambi' toe' mating salama'na ta Gayus ang kuongei tohho dasanna, anna ingkänna to mampetahpa' yaling di Puang Yesus ang si ma'himpung dinne. Noa tunne' ta Erastus, to pambe'bei doi'na to ma'pahenta dinne di bohto, sibaha solasohonta ta Kwartus umpalambi' toe' salama'na mating.
24[Kuhannuang mana' pa'kalemunna Puang Yesus Kristus la tontong mamposolai lolokoa'. Aming.]
25Dipudi Puang Alataala! Dianto ang ma'kuasa umpamatohoa' kapampetahpa'ammu, solasohongku, situhu' Kaheba Mapia ang si kupepainsangnging didiona Puang Yesus Kristus. Inde Kaheba Mapia ang kupepainsangnging, dianto pahtuyunna Puang Alataala ang masae dai nainsang hupatau.
26Ampo' dinoa napalanda'mi Puang Alataala yaling di suha' ang nauki' ingkänna nabi dolu, anna dipepainsangnging pano di ingkänna hupatau, situhu' pahentana Puang Alataala ang tuho sapano-panona, anna malai ingkänna tau mampetahpa' anna untuhu'i Puang Alataala.
27Dianto Dehata ang ungnginsang asang ingkänna ang aha, ang dai aha mansinnoaing! Kuhannuang la dipudi anna dipamatande yaling di sanganna Puang Yesus Kristus lambi' sapano-panona. Aming!
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel