Alkitab Mobile SABDA
[VER] : [ARALLE]     [PL]  [PB] 
 <<  Roma 2 >> 

1Oa' solasohongku, tainsammi taoate tahpa' liu yato kabohtuanna Puang Alataala ponna ke untahungkungngi tau ang membabe karake. Ampo' dai kita' sihatang ke unsallaingke solata, aka' ponna unsallaingke tau senga', sinnoa siante' unsallaingke kalaeta, aka' yato pembabeta sinnoa siante' pembabena tau senga'. Dahi dai aha lalang ang la taola umbahoi kasalaanta.

2(2:1)

3Ponna ke membabe toingkea' kita' sinnoa yato pembabena solata ang tasalla, ya' dai mala tapihki'a' taoate daingkea' la natahungkung Puang Alataala.

4Daa tapihki'i taoatee daingkea' pahallu kamarota'anna Puang Alataala pano di kita' anna kamapiaanna sibaha kasa'bara'anna ang dai aha mantondong. Darakaa' dio ungnginsang ungngoatee nasuhung marota' anna sa'bara' Puang Alataala pano di kita' aka' anna malai tau mengkatoba' di hao mai di dosa?

5Dahi, daummakahha' bää'a', solasohong. Daumpatontong loloia' pembabemu ang dolu. Aka' ponna ke umpatontong loloi yato pembabemu, la matingngi liu tahungkummu di allo kakeaha'anna Puang Alataala. Aka' di allo yatoo, la mepahehsa Puang Alataala sitonda kamarohoanna anna la untahungkung ingkänna tau ang membabe karake.

6Ingkänna tau la nabala' Puang Alataala situhu' pembabena.

7Aha tau ang tontong membabe mapia, aka' pemala untahimbo kamatandeang, kakeangka'ang anna katuhoang ang dai aha kapuhaanna di hao mai di Puang Alataala. Pano di tau ang noa yatoo, la nabea Puang Alataala katuhoang lambi' sapano-panona.

8Ampo' aha toe' tau ang umpihki' supu kalaena. Dai naaku untuhu'i pa'elo'na Puang Alataala, supung untuhu'i pampemala karakena. Dianto yato tau ang la handang dolu nahoa kakeaha'anna Puang Alataala sibaha tahungkunna.

9Ingkänna tau ang membabe karake la madahha anna masuhsa, dipadolu pano di to Yahudi, mane pano toine' di tau ang tadia to Yahudi.

10Ampo' tau ang membabe mapia la untahimbo nei' kamatandeang, kakeangka'ang anna kamasahkeang, dipadolu pano di to Yahudi, mane pano toine' di tau ang tadia to Yahudi.

11Aka' Puang Alataala dai unse'la-se'laangngi hupatau.

12Tau ang dai ungnginsang Atohanna Musa anna madosa, tontongke' kekasalaang anna sihatang la ditahungkung. Tau ang noa yatoo natahungkung Puang Alataala aka' dosanna, tadia aka' untehkai Atohanna. Noa tunne' tau ang ungnginsang Atohanna Musa ampo' madosa, la natahungkung toe' Puang Alataala. Nasuhung ditahungkung inde mai tau ang noa, dianto aka' untehkai yato Atohanna.

13Aka' tadiaete' tau ang ungnginsang kale Atohang ang naangka' maroho Puang Alataala. Ampo' ang untuhu'iete' Atohang, dianto ang naangka' maroho.

14Tau ang tadia to Yahudi dai ungnginsang yato Atohang ang napepainsangnging Musa. Ampo' moinnakato noa, si aha tempona sika membabe mapia sinnoa yato ang tiuki' yaling di Atohanna Musa. Dahi moinnakato anna dai sika ungnginsang yato Atohang ang tiuki', ampo' inahannaii mendahi sinnoa yato Atohang.

15Ungngolai yato pembabenaii maleso tainsang taoate inang aha pahenta di hao mai di Atohanna Musa yaling di inahannaii. Aka' pihki'naii mampakaleso dioatee aha atohang yaling di inahannaii, aka' sika naoate yaling di inahannaii, "Pembabe indee mapia," bahtu' naoatee, "Pembabe indoo tahuhu."

16Noanto inde ang la dahi di Allo Pampahehsaang. Situhu' ihsinna Kaheba Mapia ang kupepainsangnging, donetoo Puang Alataala ungngolai Puang Yesus Kristus la umpahehsa ihsi inahanna anna pihki'na ingkänna tau.

17Oa' solasohongku, ahakoa' ne yaling di alla'-alla'mu ang unsangakoa' kalaemu to Yahudi ang umpentokei si'da-si'da Atohanna Musa, lambi' ungngangka'-angka'koa' kalaemu aka' umpihki' ungngoate aha kasikenteammu Puang Alataala.

18Ungnginsang toukoa'ne' pa'elo'na Dehata, anna ungnginsang umpasisenga' ang mapia anna ang tahuhu aka' untahimbokoa' pepakuhu di hao mai di Atohanna Musa.

19Umpihki'a' ungngoatee kami'mito ang mala untehte tau ang buta di mendehatanna, anna unsanga toukoa' kalaemu ballo pano di tau ang yalingke' di kamalillingang ang dake' ungnginsang pepakuhu ang tahpa'. Aka' untokeikoa' pepakuhu ang handang poko' ang tiuki' yaling di Atohanna Musa.

20(2:19)

21Si umpakuhu tau senga'. Ampo' bilang daia' dio umpoinaha! Si umpakuhukoa' tau senga' ungngoatee, "Dai tau mala maboko." Ampo' dio siangnga' dio maboko!

22Umpaturukoa' tau senga' ungngoatee, "Dai tau mala ungngindä'-indä' pa'bannetauang." Ampo' dio siangnga' dio ungngindä'-indä' pa'bannetauang! Ungngoa toe'a'tee, "Dai tau mala umpenombai dehata lino." Ampo' dio siangnga' dio umbokoi aka-aka yaling mai di ongeang penombaanna!

23Ungngangka'-angka'koa' kalaemu aka' untokeimokoa' yato Atohang ang napepainsangnging Nabi Musa dolu. Ampo' setonganna ungkärähko'ikoa' sanganna Puang Alataala aka' dasiang untuhu'i yato atohanna!

24Aha tiuki' yaling di Suha' Masero naoatee, "Aka' pengkero karakemua', to Yahudi, lambi' tau ang tadia to Yahudi untula' tahuhu sanganna Puang Alataala."

25Kita' to Yahudi si taoatee kekuna yato ada'ta didiona tille situhu' Atohanna Musa. Ya' ahana inang kekuna si'da yatoo, ahsala' untuhu'ikoa' Atohanna Musa. Ampo' ponna ke untehkaikoa' Atohanna Musa, ya' daete' aha kunanna yato kapotilleang.

26Ponna mesa tau ang tadia to Yahudi dai motille situhu' ada'na to Yahudi, ampo' maroho pembabena situhu' Atohanna Musa, ya' inang la natahimbo toete' Puang Alataala sinnoa siang yato tau ang motille.

27Ponna ke noai, ya' yato pembabena tau ang tadia to Yahudi la umpalanda' kasalaammua' to Yahudikoa'. Aka' untokeikoa' dio Atohanna Musa ang tiuki', anna motillekoa' situhu' Atohanna Musa, ampo' si untehkaia' pahentana. Anna yatone' tau ang tadia to Yahudi, daine' sika motille, ampo' untuhu'ine' Atohanna Musa.

28To Yahudi motille situhu' Atohanna Musa, ampo' yato kapotilleanna supung nababe aka' kabiasaanna kale pano di kalaena. Ampo' setonganna tadiaete' indee nasuhung sika naangka' Puang Alataala naoate petauanna.

29Ampo' ang dioainte to Yahudi ang setonganna, bahtu' petauanna Puang Alataala, dianto tau ang untuhu'i Puang Alataala mengkalao yaling di inahanna, anna yato kapotilleang napayaling toe' di inahanna. Bahtuanna indee dianto pengkähänganna Inahanna Puang Alataala yaling di inahannaii nasuhung sika naangka' Puang Alataala naoate petauanna, dai aka' sika untuhu'i atohang ang tiuki'. Tau ang noa yatoo tadia hupatau mampudi ampo' Puang Alataalaetee'.



 <<  Roma 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel